| كَلِمةُ الإِدَارَة |
 |
 |
 |
 |
 |  |  |
| جديد المواضيع |
|
||||||
| رِيَاض إبْنُ بَطُوطَة لِسْيَاحَة والسَفَر ( لسياحة ورحلات الطبيعية ) |
 الإهداءات |
 |
|
|
|
أدوات الموضوع | إبحث في الموضوع |
07-19-2018, 05:19 PM
|
#1 | |
 
|
تركيا أسطنبول .. طرابزون ازنجول .. وش نخلي وش نقول
أبدأ معكم بتقريري اللي اتمنى انه يحوز لو على 2% من رضاكم .gif) وهذه صورة لشاشة جوالي ابدأ معكم بها  أدري مافيها اي شيء بس اكثر من تقرير اشوفهم يصورون شاشات جوالاتهم يشرحون بعض الاشياء فأنا مافيه شيء بس قلت اقلدهم .gif) وانتم عاد دامكم بتشاركوني التقرير يالله كل واحد يصلي على نبينا محمد ويعطيني حسنات << اجل تبون تشوفون تقريري ولا استفيد منكم شيء .gif) ^ ^ ^ بسم الله الرحمن الرحيم والحمد لله الذي بحمده تدوم النعم فاللهم لك الحمد والشكر حمداً يليق بعظمتك وعزتك وجلالك وأسألك اللهم ان توفقني وتوفق كل من مر على تقريري هذا ^ ^ ^ ^ تاريخ السفر الى تركيا كان 30/12/2014 تقريري عن تركيا وشهر العسل في تركيا طبعا شهر العسل ما احد يقدر يأخذه الا بعد الزواج .gif) معلومة مهمة لازم تعرفونها عسى الله يخليني لكم << سجلو عندكم اول فوائد التقريروباقي التقرير مليئ بالمعلومات والفوائد طبعاً ما اطول عليكم قبل الزواج بثلاث ايام انا خالص ومجهز كل شيء مابقى الا انتظر يوم الزواج وشوفوا هذا الدليل على فضاوتي  من الفضاوة رايح للقصر قبل الزواج بيوم وخذيت كم صورة وزين اني صورتها وأكشخ بها في تقريري .gif)  المهم ما اطول عليكم الحمد لله تزوجت وخلصت هذيك الليلة بأجمل مافيها من احداث وذكريات ومواقف ** ** ** ** ** ** لكل منا وقفات وذكريات ولحظات تمضي بها الايام ونتمنى لو تدوم معنا كل شيء منتهي وكل شيء زائل فياترى ماهو الباقي؟ لن يدوم لنا الا جمال اخلاقنا وتعاملنا مع من حولنا فسيذكروننا بها بعد ان تخطفنا عنهم الحياة اما لفراق او وفاة فأحسن مابينك وبين الناس لتبقى ذكرياتك اجمل مايحملون عنك ** ** ** ** ** ** ** وان شاء الله عقبالكم ياللي ماتزوجتم تتزوجون وتعزموني .gif) وبعد الزواج توجهت للفندق انا والعروس وكانت رحلتنا الى جدة بكرة العصر طريقة رحلتنا جدة اسطنبول والعودة اسطنبول جدة الدمام ويوم وصلنا الفندق احترت وش اقول لها وش اسولف لها عنه فقلت استغل الفرصة ولازم اخبرها ان شهر العسل قطة بيني وبينها .gif) واذا ماعندها فلوس للسفر اسافر واخليها ماعليكم انسو السالفة ترى امزح معكم وسفرتها على حسابي هههه تعالوا وخلوني اعلمكم انا وش سويت .gif) طبعا انا يوم وصلت الفندق جهزت جوازي انا والمدام وبطايق التأمين الصحي فقط وباقي البطائق حطيتها في الشنطة اللي راح اتركها في السعودية من ضمنها كرت العائلة  وكانت هذي اول البدايات اللي شكلها بتخلي المدام تقول انا توهقت في زوج مثلك .gif) المهم صحيت الساعة 2 الظهر وصليت ظهر وعصر جمع وقصر وطلبت لنا غداء تغدينا وبعدها توجهنا للمطار سلمت سيارتي ودخلنا صالة المغادرة الساعة تقريبا 4 ونص استعداداً للسفر في امان الله يامسافر في امان الله مسافر وتاركني في دياري بعدك اعيش .gif) <<< لا ماتنفع هالخاطرة اصلا انا مسافر مع المدام وتوي عريس ليش اودع الدار والديرة بفراق وغرام المهم اقلعنا من المطار ووصلنا جدة تقريبا 8 مساء استلمنا العفش وأخذنا تاكسي الى فندق هلتون جدة << وهنا اول وجع الراس  طبعا يوم وصلت طلعت له الورقة اللي طبعتها من موقع بوكنق طلبني كرت العائلة  << هاه وشو ذا وش يعني كرت عائلة تدرون اخوكم توه عريس مو متعود على هالشغلات هههههه المهم قال لي لازم كرت العائلة عشان افتح لك الغرفة قلت ياخوي انا مسافر بكرة الصباح على تركيا وانا بس بنام عندك الليلة والصباح طالع قال مايهمني وين بتروح انا صعب ادخلك بدون كرت عائلة قلت يالطيب هذا حجزي عن طريق بوكنق وهذا جوازي نفس الاسم قال حتى ولو حنا مانقدر ندخلك وهذي مسؤولية وقام يشرح لي قصة حياته ان صاحبة مفصول من العمل قبل اسبوع لأنه دخل واحد مع وحدة وطلعت مو بزوجته اللي دخلها .gif) المهم مالنا في باقي الاحداث اللي قالها لي عشان يبرر موقفه انه صعب يدخلني انا هنا احترت وش اسوي وشلون اقنعه ان هذي زوجتي  قلت يالطيب ترى انا توي عريس وهذي زوجتي وكرت العائلة انا ما احتاجه في تركيا ليش اخذه معي في الاخير وبعد وجع راس اقنعني اروح اجيب ورقة من الأمن حق الفندق ويدخلوني عاد ورقه من الامن تبي لها اقل شيء ساعة عشان اخلص اجراءاتها قلت للمدام خليك هنا في هالكوفي وانا باروح اجيب لنا ورد واجيك خلاص والله امزح قلت لها اجلسي وتقهوي وروقي وانا بخلص اجراءات الدخول المهم الله رزقني واحد جداوي واتوقع انه ريئسهم وشاف انه الكشخة خربت وشاف اني متنرفز قال لي وش فيك شرحت له الوضع والحمد لله دخلني على مسؤوليته بحيث اني اطلع الصبح قبل الساعة 7 قلت له ياخوي انت بس دخلني واذا تحب اطلع قبل يأذن الفجر الحمد لله دخلنا تقريبا الساعة 10 ونص وميتين جوع من ظهر ماكلينا شيء طلبنا عشاء من مطعم والله مادري وش اسمه المهم اظطريت اطلب منه لأنه المطعم الوحيد اللي يوصل للفندق حتى وجباتهم بس هبرجر وانا كنت مشتهي مشاوي الحمد لله تعشينا ونمنا وصحينا من فجر احس اني نمت الف ساعة فل نوم مع ان كل اللي نمته تقريبا 5 ساعات  صلينا الفجر وجلسنا في البلكونه نسولف وبصراحة كانت الاطلالة ولا اروع خذيت لكم كم صوره << الله يخليني لكم حتى هلتون جدة صورته  شوفو هالصورة اللي تحت دققو فيها وقولوا وش تلاحظون؟  اشكركم على التدقيق مافيها شيء بس انا حبيت تدققون عشان تتمقلون زين في تصويري المهم نكمل معكم بعض الصور << وين هاك الفيس اللي يعطي بوسات تستاهلون دامكم جمهوري<< حسيت اني نادري الهلال الا على طاري نادي الهلال من تتوقعون يأخذ كأس اسيا هذا الموسم ؟ والبلنتي حق الهلال صحيح او خطأ؟ لو كان يوسف الثنيان باقي يلعب في الهلال صدقوني كان رشحت لكم بطل البطولة من عام 2000 طيب وش دخل سوالف الكورة في موضوعنا .gif) ارجع للتقرير لا اتفاهم معك تفاهم ثاني   خلاص بسكم صور تعالوا خلونا نطلع من الفندق عشان نلحق رحلتنا وعشان اخونا هذاك قال نطلع بدري وبصراحة اصلا انا من زمان حاط في بالي اطلع بدري من الفندق لأن رحلتي 10 الصباح وكان ودي اوصل بدري عشان اخلص كل اجراءاتي وخلوني اختصر عليكم قبل تطفشون وتقفلون التقرير قبل أدخلكم تركيا مااطول عليكم الحمد لله وصلنا المطار الساعة 8 قصينا تذاكرنا وسلمناهم عفشنا ورحت اتسوق وفي طريقي اشتريت لي عطر << عطوني الفيس اللي يبكي بقوة يامدير ظبطوني بالفسيات والا ترى ابيع تقريري هذا على منتدى ثاني .gif) المهم خلوني اعلمكم ليش ابي ابكي انا اشتريت عطري اللي تعجبني ريحته وانا قبل الزواج كنت ادوره وللأسف مالقيته لكن في مطار جدة لقيته وسألت الكشير لو اشتريته يسمحون لي اطلعه الطيارة؟ قال اي مسموح ولاهو من ظمن الممنوعات والحمد لله اشتريته بـ 316 ريال  اشتريته وخذيته معنا ورحنا نفطر وبعد ما افطرنا طلعنا ونسيته على الطاولة << ياليتني علقته في حلقي ولاضاع العطر نسيته<< وهذي ثاني طعه اسويها ونفسي اعرف وش كانت تقول عني العروسة بخاطرها لكن لحظة الى اللحين باقي ماندري انه نسينا العطر خلاص تعالوا نروح تركيا والله طولت عليكم يالله مشينا بسرعة لحظة باقي ماعلمتكم يوم صرفت فلوس .gif) طيب اجلسوا شوي خلوني اعلمكم انا خذيت 5 الاف ريال سعودي ورحت لبنك الأهلي وصرفتها ليرة تركي وكان الصرف ليرة تركي = 1.85 ريال سعودي وعطيته 500 ريال سعودي عشان اخذ 120 دولار امريكي اتحداكم ليش خذيت 120 دولار؟؟ هذا سؤال الحلقة واللي يجاوب صح بكرة نسحب اسمه ونعطيه جائزة ايفون 6S لا خلاص امزح معكم لا احد يصدق ويوهقني ادري انكم تعرفون المهم خذيت 120 دولار عشاني تركت الفيزة التركية استلمها من المطار كنت باطلعها عن طريق النت بس كان ودي اعرف شلون اجراءاتها عن طريق المطار ما اخفيكم طلعنا الطيارة 10.10دقايق لأن الاقلاع 10.40 دقيقة لكن للأسف يالخطوط السعودية ما اقلعنا الا 11.40 دقيقة يعني اكثر من ساعة جالسين في الطيارة لدرجة اني عديت كل الكراسي وتعرفت على كل الكاب اللي معي في الرحلة ياشيخ من زود الطفش خلصنا كل السوالف وصرت اسولف مع الركاب عن مغامرات اجدادهم لا خلاص امزززح والله ماسولفت مع احد اقلعنا الساعة 11 وصلنا تركيا 4 العصر بتوقيتهم لأنهم قبلنا بساعة وخلوني اختصر لكم الاحداث اللي صارت في المطار لأنه سبق وتكلمت عنها في هالموضوع http://www.arabtrvl.com/vb/t9991.html المهم طلعنا مع السواق ابو عبد الرحمن وكانت هذي اول صورة التقطها بجوالي الحبيب في تركيا  كانت صورة على السريع وانا في السيارة مع اني اول ماطلعت من المطار صقعني البرد لدرجة ان راسي صدع وصلت الفندق وانا مصدع وللأمانه ماكان ودي اوضح للمدام اني صدعت او تعبت لأنها هي خلقه خايفة من السفر لتركيا وخايفة من موضوع المظاهرات والشغب وخذيت هذي الصورة ما ادري وين بالضبط او كيف او من *.* لكن انا متأكد انها ثاني صورة وحنا في طريقنا للفندق  والحمد لله وصلنا الفندق وكان في استقبالنا طاقم الفندق بأكلمه وفرشوا الارض بالورد الأحمر والأخضر والأزرق وملأت الزغاريط ارض اسطنبول احتفالا بقدومي الكريم ودامكم ماصدقتوا هذه النقطة خلاص انا اكتفي بهذا القدر من التقرير وأتمنى اني وفقت في أختياري للصور حتى وان كانت جودتها ضعيفة لكن انا استخدمت كل التصوير بجوالي الايفون 6 يوووه نسيت اعلمكم انه جاني هدية ليلة زواجي من أخواتي أسأل الله ان يسعدهم لكن خلاص هذا انا علمتكم واذا فيه بعض الأخطاء الإملائية فغضو البصر وأول المشاركين في تقريري له جائزة 10 ريال سوى خلاص اهم شيء عطيت جائزة مو لازم اعطيه بنتلي ^_^ وكما بدأنا التقرير بالصلاة على نبينا ننهي هذه الحلقة بالصلاة على نبينا محمد صلى الله عليه وسلم |
|
|
|
07-20-2018, 04:17 PM
|
#2 | |
|
رد: تركيا أسطنبول .. طرابزون ازنجول .. وش نخلي وش نقول
وبعد ان خربشت خربشة مبعثرة تعالوا نكمل جلستنا وسوالفنا خاصة انه صرنا داخل الديار التركية يعني الشاي التركي بيحلي الجلسة الا تعالو على طاري الشاي التركي انا قبل اسافر كنت اقرأ بعض التقارير والتعاليق تمدح في الشاي التركي لدرجة اني تخيلت اني بذوق شاي خارق شاي ماله وصف يعني قلت هالشاي التركي شكلة عسل اصلي مطبوخ وعلى طول بس طلعت اول يوم من الفندق اول شيء سويته دخلت مقهى عشان اطلب شاي وتفاجأت يوم جاب لي الشاي انه اقل من عادي لدرجة ان شاي بوفية ابو علي احلى منه .gif) لكن بصراحة اكثر الشاي هناك يعطي جو حتى لو مو بحلو يعني لازم تأخذ شاي عشان تحس انك بتركيا المهم ماعلينا تعالوا نكمل جلستنا ونطلب لنا شاي تركي  بعد ماوصلنا الفندق وقابلني عزيز و ليلى هذول اللي شغالين في الاستقبال وبصراحة اخلاقهم جدا حلوة وهذا الشيء لاحظته في اكثر من فندق الاستقبال خلوقين مرة سلموني الغرفة ودخلت تفاجأت ان الفندق اقل مما كنت اتوقع يعني انا مختاره بالذات لأن توه جديد والاثاث جديد والصور في بوكنق كانت مغرية وموقعه كان عاجبني على حسب ماقريت عنه خاصة الاطلالة اللي على البحر اول مادخلت الغرفة تفاجأت مافيه اطلالة وللأمانه بالفعل موقعه قريب من كل شيء يعني يغنيك عن سالفة تاكسي او ترام مثلاً السوق المصري رحلات البسفور مطاعم السمك تحت الجسر يعني كل شيء قريب وماتحتاج تاكسي وصلت مع المغرب صليت مغرب وعشاء جمع وقصر جوعان ومصدع ومرهق << بس اتظاهر قدام المدام اني قوي خلصت الصلاة ودورت الجوال عشان اسوي لي جدول حق بكرة للمعلومية انا جيت تركيا وحاط جدول لكن يوم وصلت تغير الجدول 180 درجة وكثير من الخطة تغيرت يعني جزر الاميرات وتل العرائس كانت من ضمن الخطة لكن كنسلتها ما ادري ليش لكن هذا انا اخطط ولا امشي على الخطة المهم دورت الجوال وكما ذكرت لكم في الموضوع السابق نسيته مع السواق وكما ذكرت احداث الطعة الفلم اللي صارت تداركت الموقف بشاجعة ورجعت الجوال نرجع ونقول الله يصبر العروسة على هالعريس << معذور ترى مصدع وهنا اوضح لكم الصور اللي اعتمدت عليها في تنقلاتي داخل اسطنبول وكنت راسم اغلب خطة السير منها والف شكر لزهرة نيسان اللي نزلتها في المنتدى القديم رغم ان الخطة تغيرت لكن استفدت منها في التنقلات  .............................  ..........................  ............... هذي في السلطان احمد كنت ابي خزانات المياء وما احد فهم وش اقصد ثم طلعت الجوال وأشرت لهم عليها بالتركي << كم انا ذكي  ويالله اصبحنا واصبح الملك لله خلونا نبدأ احداث اول يوم بعد ماصحينا من النوم فتحت الشباك لألقي نظرة على الجو وعلى تراحيب تركيا بقدومي ولكن ياللأسف الارض قريبة مني احس لو اعطس انطح الأرض من قربها وهنا قررت اطلبهم تغير الغرفة المهم قالت المدام خلنا نطلع ونتمشى واذا رجعنا يصير خير هنا قلت في خاطري اي والله صح وشو له المشاكل شوفوا الارض ياقربها كنت في الدور الثاني او الثالث ما اذكر واصلا انا مقهور ليش ما عطوني اطلالة على البحر .gif)  بسم الله يالله نبدأ وتلحفوا ترى الجو بارد يالله تعالو اقولكم على طاري الجو بارد وش احكي وش اقول  بصراحة جوهم حتى لو انه بارد يجيب العافية يعني مجرد تلبس جاكيت تحس البرد بعد عنك وخلاك في حالك جو مطر ومو مطر قوي مطر يعطيك ابتهاجة تعيش فرحة قدومك طيب خلونا نرجع للموضوع واللي مو لابس جكيت رجاء يجلس في الفندق اللين نرجع له نغير الغرفة طلعنا من الفندق وكان على يمينا البحر مباشرة بس تقطع الشارع الخطة كانت للسوق المصري وحافظ مصطفى لأنها قريبة منا وصلنا حول البحر وكان هذي اول صورة التقطها  بعد ماصورت الصورة اللي فوق التفت خلفي وكان خلفي مباشرة الفندق قلت لأجل عيونكم اصور لكم وقوفه الشامخ وكنت احسه يراقبني وين اروح وين اجي الفندق معجب في وجودي وهذي الصورة حلو من هذي الصورة اكتشتفت اني كنت بالدور الثاني قبل اطلب تغير الغرفة << ماشاء الله علي  التهيت عن التصوير واكتفيت بالتلذذ بالعيش داخل انفاس ذاك الجو يزداد الجكيت ضماً لجسمي ليدفئني من برودة الجو وكلما ازدت دفأة كلما ازدادت سعادتي بجوك ياسطنبول .gif) تعالوا كلمة ليدفئني هل انا كتبتها صح؟؟ احسها صعبة المهم اذا هي غلط فغضو النظر وانتبهو للبحر وبعد ان عشت وقت بين اصوات ارتطام الأمواج وانتشار الناس من حولي ورذاذ المطر من حولنا رجعت لكاميرا جوالي العزيز والتقطت بعض الصور  .......................................  بعدها توجهنا لحافظ مصطفى كنت متحمس اذوق طعم الحلقوم اللي عنده وطعم حلوياته بصراحة بالفعل عنده حلويات حلوة واشتريت من عنده كثير هدايا وجبتها معي السعودية وعلى فكرة ابشركم الحلويات مانسيتها في تركيا  .........................................  اكتفيت بهذي الصورتين من حافظ مصطفى بعدها توجهنا للسوق المصري لكن ماصورت فيه ولاصورة والسبب زحمة الناس ولافيه شيء يستاهل التصوير كلها محلات مقابله بعض وكل محل فارش بضاعته مقابل الباب يعني انا يوم دخلته تذكرت سوق المباركية بالكويت لأني زرت الكويت اكثر من مرة واحب سوق المباركية فلاينا في السوق المصري وقت طويل وبصراحة تعبنا من المشي السوق كبير وبواباته كثير يعني بغيت اضضيع بوابة الخروج اللي ترجعني على الفندق وأتوقع لو ضيعتها كان رجعت العروسة للسعودية مشي وتركتني لوحدي اعيش فرحة تركيا بعدها طلعنا صلينا الظهر في مسجد قريب من السوق المصري اتوقع مسجد السلمان او مادري وشو بصراحة ما عرفته لكن خذيت له عدة صور وبتشوفونها في الحلقة القادمة لأني صورته في اليوم الثاني بعد الصلاة قرر معالي السفير انا نروح نتغداء تحت الجسر وعزمت العروسة على غداء بحري على حسابي يالله كم انا كريم جايبها تركيا على حسابي وبعد اغديها على حسابي الله يعطيك العافية يايبه اللي جبت رجل كفو مثلي لحظة لحظة تعالوا وين رايحين خلاص هذي اخر مرة امدح نفسي لاتعصبون تعالوا نكمل واعلمكم بالاحداث اللي صارت في المطعم رحنا وتغدينا هنا  جاب لنا المنيو لكن قبل المنيو جاب لنا السمك في عربية او في كرتون او في خيشة انا مادري لأنه صدمني السمك مافيه اي نظافة زوجتي اول ماشافت القبقب كبير وكأنه عقرب صابته قرفه وطلبت نطلع من المطعم وماعاد تبي غداء لكن مو على كيفها والله تتغداء لا اتفاهم معها تفاهم ثاني << كفو ياقوي المهم ترجيتها تجلس << افا وين القوي المهم تفقنا نطلب سمكه هامور ظلينا مايقارب 40 دقيقة بعدين جاتنا السمكة الوحيدة وطلبنا موية قبل تجي السمكة ومع السمكة طلبنا 2 بارد خلصنا غداء وللأمانه ما أكلناها والسبب باقي نتذكر منظر السمك ونظافتة المهم خلصنا ناديت الكابتن << اي كابتن اي صح قصدي ناديت القرسون وطلبته فاتورتنا يوم جاب الفاتورة تذكرت الملاحظة اللي قالتها زهرة يوم تقول تأكدو من الاسعار وراجعو الفاتورة انا على طول تحملت نتائج غلطتي وعطيتهم 220 ليرة حساب هالسمكة اليتيمة اللي جابوها لنا يعني حسابها تقريبا 400 ريال سعودي المهم ماتكلمت ولاشيء عطيته الحساب وطلعت خلاص بنرجع الفندق دايخين ومرهقين وصلت الفندق وطلبتهم اغير الغرفة ويعطيني اطلالة لكن الاطلالة فل ولافيه فرصة وطلبت دور علوي والحمد لله خذيت هذي الغرفة يالله تعالوا نشوف اذا عطست انطح الارض او بعيد  اوك لا واضح انها افضل من اللي قبل عاد تصدقون هذي الحديقة ما اردي وش اسمها لكن بصراحة عاجبتني ما ادري لو اشتريها كم سعر المتر .gif)  يالله مع السلامة ترى كتبت هالحلقة على السريع اتمنى لو هناك اي تقصير او زلل ان تتقبلون تقصيري ولكم مني كل الشكر والتحايا |
|
|
|
|
07-20-2018, 04:20 PM
|
#3 | |
|
رد: تركيا أسطنبول .. طرابزون ازنجول .. وش نخلي وش نقول
نكمل الرحلة عن ثاني ايام الرحلة ويعتبر ثالث يوم من بعد الوصول بحيث اول يوم كان يوم الوصول ويوم الراحة في الفندق وهذي الرحلة ان شاء الله راح تكون رحلة خفيفة ويوم خفيف فبما اني مسافر شهر عسل لم أبحث عن كثرة التنقلات او كثرة الرحلات وكنت ابحث عن الإنسجام أكثر من غيره صحيت الساعة 6 الصباح صليت الفجر وبعدها القيت نظرة على الجو من خلال الشباك وكان الجو يفتح النفس كالعادة وكانت لي الشباك مثل برج المراقبة من خلالها اراقب كل شيء حول الفندق وخاصة الحديقة كانت الحديقة تفتح النفس وأتمنى اروح اجلس فيها بس المشكلة حولها كلاب والعروسة خافت نروح هناك اي نسيت اعلمكم الكلاب في اسطنبول موجودة في كل مكان يعني لاتستغرب وانت جالس تتقهوى يجيك كلب ويقول كيف حالك يالأخو  .......................  .......................  بعد ماخايلت الجو مع الدريشة اللحين تعالو قبل نبدأ خلونا نتفق ان الدريشة اسمها شباك والدريشة والشباك يعني النافذة لازم نشوف حل لإختلاف اللهجات هذا للتوضيح عشان لا احد يسأل يقول وش الدريشة المهم بعدها طلعت فوق للمطعم حق الفندق لن مطعمهم في الدور الاخير كانت عندي صور للفطور وترتيبهم لكن لإسف راحت قبل اكتب هالتقرير وللمعلومية وللأمانة انا يوم كنت بتركيا لم اصور واجهز اي شيء لكتابة تقرير لأني كنت اعلم بخلاف منتدانا مع موقع ياهو وكنت فاقد الأمل في عودة هذا المنتدى وبصراحة تفاجأت بعد فترة بعودة هذا المنتدى ورجاله القائمين عليه فشكرا لهم من الأعماق فمازال الكثير يتنفس أكسجين فضلهم على كثير من المسافرين العرب المهم خلوني اكمل لكم السالفة وأقولكم بعد ماخلصت فطور وين رحت خلصنا فطور وطلعت من الفندق بودون اي خطة وبدون اي جدول رغم اني قريت من الصور اللي كانت معي لكن انا بعد وصولي هناك تغيرت خطتي كلياً وان افر حول الفندق وحول بحر امنينو وصلت هنا  وانا كنت هنا مع المدام جانا واحد عراقي وعرض علينا رحلة البسفور وعلى طول بدون تردد قلت له تم وأخترت رحلة مدتها ساعة خذيت منه تذكرتين ودفعت له فلوسهم بعدها طلب مني اجلس في الباص عشان يكتمل العدد وينقلنا مكان تحرك الرحلات دخلت الباص لكن تأخر وبعدها طلعت من الباص وعطيته رقمي قلت اذا اكتمل العدد كلمني بصراحة حسيت اني مطلوب أمنياً وانا جالس داخل الباص طلعت وكملت فرة حول البحر وبعد مايقارب ربع ساعة كلمني ورجعت لهم وانتقلنا الى السفينة وصلنا السفينة وطلعنا وكنت افكر انه خلاص بنمشي على طول لكن الصدمة الأخرى انه لازم ننتظر اكتمال العدد لكن ماعليه هنا في السفينة وداخل البحر ارحم من الإنتظار داخل الباص واخذيت كم صورة وحنا ننتظر   ...................  وحنا في السفينة لاحظت المبنى هذا ويوم قريت اسمه كأنه مكتوب جامعة لأنه مكتوب باللغة التركية لكن اللي استشفيته بخبرتي انه جامعة تدرون انا خبير في تركيا واعرف كل شيء فيها<< والله امزح ماعمري سافرتها .gif)  المهم اكتمل العدد وبدينا تحرك وقريت في داخلي دعاء السفر  ...................................  .............................................  ...................................  ....................................  واعتذر ماصورت صور استعدادا للتقرير فأكتفي بهذه الصور والبعض منها كانت صور خاصة وبعض الصور حلوة وكان ودي اقصها وانزلها هنا بس للأسف معلوماتي الفتوشوبيه طالعة تدرس برى << يعني ماحولكم احد طبعا لاتنسون اني محترف في التصوير وعندي بعض اللقطات الإحترافية العالمية المهم بعد ماخلصنا الرحلة رجعنا تقريبا على وقت صلاة الظهر  وانا في طريقي شفت هذا المسجد والتقطت له بعض الصور الإحترافية العالمية  ياشباب وياصبايا قولوا ماشاء الله اخاف تعطوني عين وماعاد اعرف التقط صور إحترافية وعلى فكرة هذي الصورة مطلوبة مني بـ مليون ليرة عشان يحطونها على غلاف أحد المجلات التركية << اللي مايصدق الله يسامحه  المهم انا اسمي هذا المسجد المسجد السلماني استنادا لتقارير قديمة قريتها قبل سفري فهل هذا هو المسجد السلماني او انا ملخبط؟؟ المهم وحنا نفر حول المسجد لاحظت درج ينزلون منه العالم وكأنهم يدخلون تحت الأرض قلت في خاطري ياولد لاتكون هذي هي ارم ذات العماد اللي تكلم الله عنها القران لأن كما هو معروف ان ذات العماد مدفونه تحت الأرض بعد ان ارسل الله على قوم عاد ريح صرصراً عاتية وانا اللي اشمر وأعض ثوبي وأروح ركض الى هذا القبو اللي يدخلونه الناس تحت الأرض << نسيت المدام وانا اركض تعالوا والله امزززززح طيب خلو اعلمكم الصدق أنا يوم لاحظت االناس كلها تحدر تحت << تحدر كلمة كويتية توي سارقها وتحدر يعني تنزل << ماشاء الله على تقرير يجيب لكم كل المعلومات المهم يوم شفتهم نيزلون مع الدرج قلت يالله خلوني الحقهم وأشوف وش السالفة يوم نزلنا مع الدرج طلع سوق   السوق هذا بصراحة صغير وحلو يعني لقيت فيه هدايا حلوة خاصة للإطفال وخذيت فيه مايقارب الساعة بعدها طلعنا عشان نصلي الظهر في المسجد اللي اعجبني شكله بعد ماطلعنا من السوق وتوجهنا لدورة المياة الله يعزكم لاحظت حاجة عندهم عكس اللي عندنا تماماً اول حاجة دورات المياة عندهم نظيفة جداً والدخول لها بليرة فقط مقابل هذه النظافة ومقابل الخدمة واتمنى من اعماق قلبي ان دخول كل دورات المياة العامة اللي عندنا بريال لكن نحصل نفس هذه النظافة والخدمة وهذي صورة لأحد العمال اللي يهتم بنظافة دورة المياة  ياعم حتى العامل لبسه كشخة بنطلون وجاكيت وشكل مرتب مو نفسنا أشكال عمالنا كأنه محكوم عليهم اعدام وأخيراً وليس اخر ما اطول عليكم صلينا الظهر وافتريت في الحديقة اللي حول المسجد وبعدها دورت اقرب مطعم كنت جوعان حدي والوقت اللحين 2 الظهر مع انه خلاص قرب الليل لأنه يأذن المغرب 5 وربع ولازم ارجع الفندق عشان اسوي تشك اوت فإلى هنا اكتفي معكم بهذا الكلام وهذه الصور من هذا التقرير البسيط و الحلقة القادمة من التقرير ان شاء الله راح نتكلم لكم عن السلطان أحمد والأجواء والراحة اللي فيها |
|
|
|
|
| مواقع النشر (المفضلة) |
| الكلمات الدليلية (Tags) |
| .., أسطنبول, ازنجول, تركيا, نخلي, وش, نقول, طرابزون |
| الذين يشاهدون محتوى الموضوع الآن : 1 ( الأعضاء : 0 , والزوار : 1 ) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| تركيا الصيفية | السعيد | رِيَاض إبْنُ بَطُوطَة لِسْيَاحَة والسَفَر | 33 | 01-11-2018 03:15 PM |
| تركيا التي رأيت | السعيد | رِيَاض إبْنُ بَطُوطَة لِسْيَاحَة والسَفَر | 29 | 01-10-2018 10:00 AM |
| عندما شاقني الشوق إليها !! { أسطنبول , يلوا , بورصة } | السعيد | رِيَاض إبْنُ بَطُوطَة لِسْيَاحَة والسَفَر | 23 | 11-23-2017 02:34 PM |
| جزر الاميرات في تركيا | محمد العتابي | رِيَاض إبْنُ بَطُوطَة لِسْيَاحَة والسَفَر | 13 | 07-15-2014 06:46 PM |
| لماذا نقول اللهم اغسلنا من خطايانا بالماء والثلج والبرد | سجى | رِيَاضٌ رَوحَانِيَـاتٌ إيمَـانِيَـة | 6 | 04-13-2013 11:17 AM |
