رحلتى الى الامارات 3 ايام

في شهر 3 الماضي كنت خارج البلاد ما عدى 3 أيام فقط ,, و كنت في هذا الشهر مسافر مع الشباب يعني المدام في البلاد " الله يكون في عونها " ,, عاد و أنا في تركيا قلت ما يستوي أرجع للبلاد هذي الـ3 أيام و أيلس في البيت و عقبها أقول لهم مع السلامة مسافر ..

فقررت أني اخذ لي جولة في هذي الـ3 أيام و حجزت ورتبت و أنا في تركيا ,, الفكرة كانت أنه كل يوم نكون في مكان فقررت يكون اليوم الأول في العين وبعدها دبي و اليوم الأخير في الفجيرة ..

طبعا في هاكي الوقت ما كنت مفكر أنزل تقرير عن هذي الـ3 أيام لكن شفت الصور إلي عندي وقلت خلني أنزل يمكن أفيد أحد أو ناس ثانيين يفيدوني في أشياء طافت علي ..

اليوم الأول

اليوم أول كنت حاجز في روتانا العين و الفندق أبد ما يضيع ,, تمسك شارع دبي – العين و خل دربك كله سيده لين ما توصل العين ,, أول ما توصلها كمل طريجك لا تاخذ يمين و لا يسار بس بيجيك دوار ما فيه إلى يمين و يسار تاخذه يسار ,, إلين ما توصل جامعة الإمارات ,, خل الجامعة على يديك اليمين و روح في طريجك عدي التقاطع و بعده بيجيك دوار عقب الدوار بتشوف الفندق على يدك اليمين ..

فندق روتانيا العين من الفنادق الجميلة و الراقيه و الحلو فيها انها قريبه من نص البلاد ,, يعني ما تتعب إذا تبغي مطاعم أو تروح لمركز العين مول أو المول إلي أفتتح عن جريب ..

في شهر 3 جزة الفندق تقريبا بـ900 درهم لليلة الواحدة شاملة الفطور ..

طبعا السموحه عندي بس صور للغرفة ..

أول ما تدخلون الغرفة بتشوفون المني بار على إبدكم اليمين ..

طبعا هذي الصينية بفلوس فلا تقربون منها أحسن : ..

أما هذي أفري ,, الماي مع عدت الشاي ..

على إيدكم اليسار بيكون الحمام - أجلكم الله - ..

الغرفة جدا جميلة و وسيعه ..

طبعا و انتوا في العين لا تفتوا على عمركم زيارة المبزرة المنطقة الخضراء الرائعه ,, التي أنشأت على عهد زايد - رحمة الله عليه - ..

تتميز مبزرة بمياهها الجوفيه الحارة و المسطحات الخضراء و فيها مسابح خاصة للرجال و أخرى للنساء و فيها شاليهات لمن أراد السكن فيها ,, لكن عليك بالحجز من بدري لأن عليها زحمة ..

الفندق فيه خدمة إذا تبغون تسوون حركة في الغرفة ,, يعني أدلعون اعماركم شوي و ترجعون شباب مثلي ,, المهم شفت الأسعار شفت انها شوي مبالغ فيها بس يستاهلون الحريم لكن أنا قلت بتطلع أحلى وأروع يوم أسويها في إيدي وبلاش الخساير : ..

عطوني رايكم ..

طبعا مدينة العين تشتهر بقلعة الـجاهلي ,, و هي شعار نادي العين أيضا ..

و هذا المتحف ,, أكثر زواره من الأجانب ..

اليوم الثاني
بعد ما نشينا الصبح و فطرفا في العين خذت الطريج ورديت على دبي و بالتحدبد على فندق ريدسون ساس إلي في المدينة الإعلامية بجميرا ..
الفندق جدا جميلة و عجبني كثير من ناحية الديكور و الترتيب و النظافة ,, و الحلو فيه أن في مدينة وسط مدينة جميرا تقريبا ..
سعر الغرفة كان تقريبا 900 درهم شاملة لليلة الواحدة شاملة الإفطار ..
الصراحه عيبني الرسبشن و خاصة هذا التمثال ..





مثل ما قلت لكم سابقا إني جدا أعجبت بالديكور ,, صور من الطريق إلى الغرفة ..




الحمد الله وصلنا غرفتنا الميمونه بسلام ..

طبعا مفتاح الغرفة في هذا الفندق مختلف أيضا ,, فهو يشتغل على اللمس و الجهاز مركب في الجدار مب في الباب .. يعني ديكور الباب مب مخترب ..

الغرفة جدا جميلة و هي ليست بالواسعه و ليست بالضيقة ,, يعني المهم عجبتني و عجبت أم مايد الله يحفظها ..







عن نفسي أول ما أخل فندق اضع ورقت عدم الإزعاج و في هذ الفندق بدال الورقه جهاز في الجدار ,, لا تنسون تسوون مثلي : ..

الحمام - أعزكم الله - جدا مريح واسع ..







الحلو في الفندق أنه قريب من مدينة جميرا ,, فقلت أروح أتعشى هناك ..
برج العرب ..

و هذي مناظر من مدينة جميرا ,, صح صح أكلنا في مطعم المكان أكله نظيف وجميل و ليس غالي ..

اليوم الثالث

أختتمت جولتي القصيرة في ربوع الإماراة بفندق جال بالفجيرة ,, و الفندق تحت قيادة فريق ياباني ,, الفندق بوجه عام جميل و مريح وهادئ جدا ,, و الحلو فيه أن الغرف جدا واسعة ,, لكن عيبه انه فيه مطعم واحد فقط و مدينة الفجيرة تقريبا بعيده عنه ولا توجد حواليه مطاعم ,, لطني اخترته لأنه بعيد عن كل ضوضاء المدينة ..

الغرفة تقريبا كانت بـ900 درهم شاملة الإفطار ..

ما تشوفون إني متيم على الرقم 900 ..

ممر المؤدي للغرف ..

الغرفه بدون مجاملة وسيعه جدا و مريحة جدا ,, كان خاطري ألعب فيها كرة ..

دورات المياه - أعلى الله مقداركم - مثالية أيضا مثل الغرفة ..

بس فيه شي يديد أول مره أشوفه ,, عند البانيو ( الحوض ) نافذه تفتح و تغلق على الغرفة ,, ما عرفت شو العبره منها ,, يمكن عسب تريح في الحوض وتشوف تلفزيون أو يمكن إذا حسيت بالحرارة تفتح النافذه :114: ..

النافذه مفتوحه ..

و هي مسكره ..

هذي النعل - أعزكم الله - هدية من الفندق ..

صور من بلكونت الغرفة ,, يظهر المسبح و البحر الجميل ..

في الأسفل يوجد تنس طاولة وملعب كرة طائرة الشاطئية ..

شي جديد عندهم ألعاب في وسط البحر ,, غير القوارب إلي تقدر تاخها و تتحرك فيها في نطاق محددينه لك ..

عندهم جلسات جميلة مطله على المسبح و البحر ,, بس مرات يكون في ألغام بشرية : ..

و أختتم الصور بلقطه للمسبح المطل على البحر ..

أتمنى أني وفقت في إفادتكم ولو بالشيء القليل ..

السموحه على الإطالة و على أي تقصير ..