رحلتي الشتويه إلى الشواطئ المكسيكيه

السلام عليكم جميعا

كل عام وانتم بخير ، عساها سنه سعيده ع الجميع وان شاء الله تتحقق كل امنياتكم واحلامكم فيها ، والله يحفظ لكم كل عزيز وغالي
..
نبدى في الموضوع !

رحلتي اللي انتهت قبل اسبوع كانت للاراضي المكسيكيه كانت بالتحديد لجزيرة Cozumel ومدينة Cancun
...
يمكن كنكون تكون معروفه عند كثير من الناس .، بس كوزيميل نادر يروحون لها العرب وفيه واحد عربي عايش هناك يقول اول مره اشوف عرب هنا
غالبا العرب يمرون كوزيميل اذا كانو ماخذين كروز .. مو رحله كامله و منتجع وكذا ..
قبل ماندخل في تفاصيل الرحله خلونا نشوف ليش اخترت المكسيك وراح اعطيكم شويه معلومات عن المدن اللي زرتها ..
..

قبل مااحجز ع المكسيك كان عندي 3 خيارات للرحله الشتويه
كاليفورنيا - كروز للكاريبي - المكسيك
كاليفورنيا استبعدتها علطول علشانها بتكون بارده وخصوصا سان فرانسيسكو وانا ابي انحاش عن البراد
الكروز وقتها كان غبي .. قبل مايعطل زوجي بيوم والثانيه بتبدى دراستي واحنا فيها فاستبعدتها كليا .. وغير كذا بنتي ماينفع لها كروز ابدا يالله اتحملها في الارض ، اتحملها فوق البحر
واخيرا اخترنا المكسيك
وجهتنا كانت بتكون على كنكون بس ولمدة اسبوع .. بس قبل الحجز بكم يوم كنت اتصفح موقع Groupon كالعاده .. وشفت عرض على منتجع في كوزيميل ماكنت اعرف ايش كوزيميل ساعتها .. بس بحث عنها ولقيت فيها مطار دولي ونقدر نروح لها علطول وهذا الشي حمسني اكثر ..
ماراح اتكلم عن حجوزات الفنادق الحين .. كل فندق راح يكون في جزء مختلف وفي رد مختلف ..

معلومات تهم الجميع ..

هل احتاج فيزا للمكسيك ؟
نعم ولا
اللي معاهم فيزا امريكيه سياحيه او دراسيه مايحتاجون فيزا مكسيكيه اذا كانو بيروحون اقل من 30 او 60 يوم نسيت كم بالضبط
بس اللي رحلته ع المكسيك علطول ولا عنده فيزا راح يحتاج فيزا مكسيكيه .. وطبعا ماانصح احد يروح لها ولا يروح لامريكا .. امريكا اولا وبعدها المكسيك كم يوم

هل المكسيك آمنه ؟
المناطق اللي زرتها امان مرررره .. وهي اماكن سياحيه ومليانه سياح والاحتياط واجب يعني لاتاخذون معكم الا فلوس تكفي للطلعه .. والباقي خلوه في السيفتي بوكس

ماافضل وسيله نقل في المكسيك ؟
بالنسبه لي التاكسي .. كوزيميل مافيه الا التاكسي ، والسعر موحد لكل التكاسي يعني الواحد مايخاف ان التاكسي يلعب عليه
بالنسبه لكنكون .. فيه الباص وفيه التاكسي .. اشوف سياح كثير يستخدمون الباص ارخص لهم .. بس احنا استخدمنا التاكسي اسرع واريح

ترتيبات ما قبل الرحله ..

الطيران
حجز الطيران كان عن طريق موقع Priceline والخطوط الناقله American Airlines
تم الحجز قبل شهرين ونص من الرحله علشان نضمن اقل الاسعار
الرحله كانت ترانزيت
Hartford-Miami-Cozumel
Cancun-Dallas-Hartford

وقت الرحله
من 15 ديسمبر الى 25 ديسمبر .. 10 ايام مقسمه بين المدينتين ..

الفنادق
تم حجز الفنادق قبل شهرين من موعد الرحله عن طريق موقع Groupon و الموقع العالمي Booking

وسيله النقل من كوزيميل الى كنكون كانت الفيري ، بين قوسين سفينه

هالرحله كانت رحله المقالب .. اول مره اسافر ويسير لي هالكم الهائل من المقالب المبكيه المضحكه
للامانه على كثر الاشياء اللي سارت لنا ماتشائمت وقلت اكيد فيه شي شي جاي ومع كذا مستمره المقالب الله لايوريكم ، بس ابدا ماخربت علينا الرحله، لا خربت بس شوي ههههههههه وسببت لنا احباط شوي بس
..
مثل ماقلت لكم فوق
الرحله كانت من يوم 15 وكان يوم الاحد وبالضبط كانت بتنطلق طيارتنا الساعه 6 الصباح من مطار هارتفورد .. وتوصل ميامي الساعه 8 الصباح وفيه انتظار 3 ساعات قبل الطياره اللي رايحه كوزيميل ..
بس مو هذا اللي صار
كانت خطتنا انو السبت بالليل يوم 14 نسكن في فندق جنب مطار هارتفورد لانه يبعد عن مدينتنا 45 دقيقه ..
يوم الجمعه بديت ارتب الشنط وبديت بالاشياء الضروريه اللي هي الملابس .. وبعدين تركت الشنطه وقلت بكملها السبت ..
وجاء يوم السبت اللي مخططين فيه الف خطه وخطه .. من ضمنها اروح اجيب باكيج من البريد وفيه ملابس احتاجها في الرحله .. اشتري نظاره شمسيه جديده .. واشياء ثانيه ثانويه ومو مهمه كثير ..
وصحيت الصباح .. كلمت اهلي سكايب و سكرت منهم الساعه 11 ، صحيت زوجي علشان نطلع نخلص الاغراض ..
هنا كانت المصيبه الاولى فيه ايميل واصل لزوجي ان الرحله تكنسلت، انا هنا ضاق صدري على حجوزات الفنادق ، اما الطيران عادي الغلط منهم ويرجعون اللي دفعناه ..
كنسلو الرحله لان فيه عاصفه ثلجيه يوم الاحد ومافيه طيارات راح تقلع بسببها ..
انا هنا مافقدت الامل .. قمت اراكض في البيت ارتب الشنط وعندي امل انهم يقدمون الرحله .. ويوم سألهم زوجي اذا فيه رحله بعد كم ساعه قالو ايه فيه رحله الساعه 3 و اربعين دقيقه .. وكانت الساعه 11 ونص .. قالهم ايه مو مشكله راح نجي المطار الساعه 1 ونص والحمد لله كان ضني في محله ومراكضي فاد ولله الحمد..

لاتسألوني وش حطيت في الشنطه مابقى شي ماحطيته والمشكله اغلب الاشياء مااستفدت منها .. واغلب الاشياء المهمه نسيتها عادي اهم شي اسافر
...
كلم زوجي صاحبه وقال تعال ودنا المطار .. لان كان فيه ثلج وراح يتأخر التاكسي .. وركبنا شنطنا وانطلقنا للمطار

طيب تعالوا شوي .. تذكرون رحلتنا من ميامي ل كوزيميل يوم 15 .. يعني وش بنسوي الحين ..
الموضوع عادي جدا .. اقرب فندق في ميامي ننام فيه الين بكرا .. اهم شي نوصل المكسيك
..
وصلنا المطار وللاسف ماصورت من السرعه .. نبي نسوي تشيك ان علشان نرتاح نفسيا ونضمن مقعدنا
اهم شي في المطار نكون مجهزين جوازاتنا .. والطلاب الاعزاء لاتنسون الاي توني كانكم تبون ترجعون لامريكا ..
..
كانت الساعه 1 وشوي يوم وصلنا .. سوينا تشيك ان واخذوا شناطنا .. كانو شنطتين بس .. الشحن للوحده 25 دولار .. ( الحمد لله على نعمه الخطوط السعوديه) يعني كان المجموع 50 دولار وكان معنا كرسي سياره وشحنه مجاني ..
فتشونا وكذا ودخلنا ندور بوابتنا وشفنا هاللوحه اللي تجيب الكآبه


كثير رحلات كنسلوها .. هنا حمدت ربي انو لقينا مقاعد في الرحله الثانيه

ويوم وصلنا للبوابه وريحنا قلنا نفطر لان تونا نستوعب اننا ماافطرنا


و جلسنا نتفرج ع العالم اللي تتكنسل رحلاتهم ويرجعون خائبين وقلبنا يقرقع نخاف يكنسلون رحلتنا مثلهم ..
..
واخيرا علئ الساعه 3 وربع فتحوا البوابه ورحنا لمقاعدنا اللي في اخر الطياره .. اهم شي انها مقاعد لو في الجناح
ولما تواسينا وكلن خذ مكانه وسمينا بالله



شمينا ريحة مثل الدخان من الحمام والمضيفات جلسو يدورون ويحوسون في الحمام .. انا هنا بغيت اقول نزلوني . مااابي اسافر اهم شي مااموت كل الناس قاموا يتلفتون ووجيهم فيها الروعه .. والحمد لله راحت الريحه واضن واحد خذ له زقاره قبل الرحله وبغى يجيب فينا العيد
..
صوره من شباك الطياره وواضح الثلج مغطي الارض



وصوره مع صديق الرحله ميكي ..



درجه الحراره قبل الاقلاع



جت الساعه 3 واربعين دقيقه ولا تحركت الطياره .. وانتظرنا شوي .. وبرضو شوي .. وانتظرنا شويتين ... الين كملنا ساعه في الطياره والحمد لله جاء ابو لمبه وتحركنا



مشينا الين وصلنا مكان الاقلاع ووقفنا مره ثانيه ، طلعوا يغسلون كل طياره قبل تطير .. مدري غسيل والا يحطون عليها شي .. الموهيم كبوا عليها شي ونظفوا الثلج اللي في طريقها والحمد لله الساعه 5 انطلقنا ل ميامي ..
وحطوا لنا مسلسل بلاك ليست



ووزعوا علينا مشروبات ،، واللي جوعان يشتري سناك من عندهم ..



والامور كانت مستتبه اول نص ساعه وكلنا سعيدين ومتحمسين الين بدت المطبات الهوائيه .. وصرخوا الناس وهبلوني
مطبات هوائيه اول مره اجربها .. قويه لدرجه جسمنا كله يرقى فوق ونرجع للكرسي مره ثانيه
بنتي تقول اقين اقين .. تحسبها لعبه
كانت مده الرحله 3 ساعات .. ساعتين منها كانت خوف ورعب ومطبات هوائيه .. ولا ارتحنا الين شفنا ميامي تحتنا



والحمد لله الساعه 8 بالليل وصلنا لميامي الجميله واخذنا شناطنا ورحنا لهالاختراع الجميل اللي في المطار


هذي مثل اللوحه فيها ارقام الفنادق اللي حوالي المطار .. للي ماحجزوا من قبل .. بس تضغطون اسم الفندق وتكلمون الفرونت ديسك وتسألونهم اذا عندهم غرفه فاضيه ..
كلمنا فندق نسيت اسمه للاسف لان كان نصي نوم .. وقالو خلاص تعالو .. طلعنا ننتظر الشتل اللي تبع الفندق ورحنا معاه للفندق ونمنا اعمق نومه علشان من بكرا رحلتنا ل كوزيميل الساعه 11 وشوي ولازم نكون في المطار بدري لانها تعتبر رحله دوليه ...

وخلص اول يوم في رحلتنا .. والحمد لله ضاقت وفرجها ربي وتسهلت امورنا

السلام عليكم ..
صباح/ مساء الخير جميعا

نكمل رحلتنا الاكشنيه ؟

وين وصلنا
ايه يوم نمنا في ميامي ..
قبل مااكمل هذي صوره توضح درجه الحراره في ميامي نسيت احطها امس


فرق بينها وبين مدينتنا
..
يوم 15 صحينا الساعه 7 وافطرنا ع السريع واخذنا اغراضنا ورحنا مع الشتل اللي تبع الفندق للمطار .. طلعنا الساعه 8 علشان نضمن اننا نخلص بدري ولا نتوهق ..
سوينا التشيك ان وسألتنا اللي تشتغل مع الخطوط كم بنجلس هناك علشان تتأكد اذا نحتاج فيزا او لا..
خذوا الشنط وكان شحنها مجاني لانها رحله دوليه ..
وفتشونا.. وكالعاده انا انشب في بنتي علشان مايدخلوني هذاك الجهاز اللي يشوفون البتاع كلو اذا شافو بنتي يدخلوني في هذاك العادي اللي مثل الباب ..

شوية صور من داخل المطار






كانت رحلتنا الساعه 11 وشوي ، وجلسنا ننتظر عند البوابه ..
ميامي تنطلق منها 3 رحلات اضن يوميا لكنكون .. ورحله لكوزيميل ..
..
جاء وقت الرحله ودخلنا الطياره وجلسنا في مقاعدنا .. والطياره كانت شبه فاضيه .. ووزعوا علينا اوراق الجمارك


..
وبسم الله تحركت الطياره واقلعنا




..
مدة الرحله ساعتين ..
عاد استحيت على وجهي وجلست اكمل واجبي اللي ثالث مره اعيده .. للامانه عقلي مع شباك الطياره .. مناظر الواحد مايقدر يفوتها


..
وفجأه وصلنا لهالمكان وكنت احسب خلاص وصلنا



بس تعدينا المكان وكملنا الرحله فوق البحر



منظر للمطر جوى البحر



صوره ثانيه للبحر



وبعد فتره وصلنا



واستقبلنا المطر



هنا بس بدنا قلبي يدق ويدق جو عجيب ومناظر تجيب العافيه ..

نوقف هنا شويه .. وجايتكم ب جزء كوزيميل ومعلومات عنها .. وايش سار لنا في المطار اكشن جديد بس ابدا ماخرب رحلتنا

وبحمد الله وصلنا للاراضي المكسيكيه



بالتحديد كوزيميل



كوزيميل او كوزيوميل تعتبر ثالث اكبر جزيره مكسيكيه .. وتقع على البحر الكاريبي ..
قاموا بتسميتها بهذا الاسم المايان الذين كانو يعيشون فيها..
حضاره المايا لازالت موجوده في كوزيميل وفي مدن ثانيه في المكسيك وتعتبر وجهه سياحيه خصوصا لمحبي التعرف على الحضارات ..
..
المساحه والسكان
تبلغ مساحة كوزيميل 647 كيلو متر مربع .... ويبلغ عدد سكانها 100 الف نسمه حسب احصائيات عام 2011 ..
..
تبعد كوزيميل عن كنكون 90 كيلو متر .. ووسيله المواصلات بينهم السفينه او الطياره ..
..
درجة الحراره
تتراوح درجه الحراره في كوزيميل في شهر ديسمبر مابين 20 و 28 درجه مئويه وتنخفض حتى تصل الى 19 درجه في شهر فبراير..
اقل درجه حراره سجلت في كوزميل كانت 9 درجات مئويه في شهر فبراير واعلى درجه كانت 39 درجه في شهر جولاي ..
..
اللغه
اللغه الرسميه الاسبانيه ، ويطقطقون انجليزي

العمله



العمله الرسميه هي البيسو ..
1 دولار = 13 بيسوس
ويقبلون الدولار الامريكي

صوره لدرجه الحراره فيها


..
من هنا تقدرون تقولون بنبدى بالجد

قبل مانبلش ب كوزيميل .. احب اشكر جوالي اللي تحملني


ابد مو مكسور ووصخ وحالته صعبه

وكاميرتي اللي لازمتني في حلي وترحالي







مثل ماقلت في اول رد .. حجز الفنادق كان قبل شهرين من الرحله .. وحجز فندق كوزيميل كان عن طريق موقع Groupon
سعر الفندق الاساسي لليوم الواحد 246 دولار .. وكان عليه تخفيض وطلع سعره 104 دولار بس والفندق All inclusive يعني شامل الفطور ، الغداء، العشاء .. وسناك بار مفتوح طول اليوم واشياء ثانيه بوضحها في باقي الموضوع

عرض حلو والا
طلع لنا سعر الفندق لمدة 4 ايام 400 دولار وشوي


..
اسم الفندق Allegro و هنا موقعهم
..

وصلنا للمطار الساعه 12 .. وكان المطار مره صغير .. عباره عن صالتين .. وحده فيها الجوازات والتختيم وسير الشنط .. والثانيه الاستقبال وللاسف ماصورت..
اول ماوصلنا وقفنا في الطابور ننتظر دورنا .. وبعد تختيم الجوازات رحنا ننتظر الشنط .. شوي جتني وحده تبع الخطوط وقالت وش عائلتك .. قلت لها الفلاني قالت وزوجك الفلاني ! قلت ايه وماكنت مرتاعه ابد .. قالت فيه شنطه نسيناها في ميامي .. انا كنت انتظر مصيبه اكبر .. يوم قالت كذا هان علي الموضوع وقلت لها طيب عادي قالت بنوصلها لكم اليوم العصر او بكرا ..
مثل ماقلت اول كان معنا شنطتين في الشحن وكرسي السيارهة.. شنطه لزوجي .. وشنطه لي انا وبنتي .، واحنا ننتظر الشنط طلعت شنطة زوجي وللامانه ضاق صدري لان شنطة بنتي اهم الا شوي تطلع الشنطه الثانيه .. وطلع اللي ناسينه كرسي السياره ومو اول مره ينسونه لنا تجارب سابقه معهم ..
اخذنا شناطنا وتوكلنا على الله وطلعنا لصالة الاستقبال علشان نشوف لنا احد يودينا للفندق .. شوي الا يكتشف زوجي انه ناسي جواله في الطياره .. في الجيب اللي قدام المقعد وراح لهم علطول وبلغهم وللاسف انزرف قلنا مو مشكله وبرضو مو اول مره ينساه في الطياره هذا ثاني جوال ههههههههه ..
اخذنا شناطنا قلنا لهم نبي احد يودينا الفندق .. قالوا فيه باص ب 23 دولار .. ركبنا الباص وكان معانا كذا عائله بيروحون فنادق مختلفه .. وكنا ننتظر اخر عائله تركب علشان يمشي الباص .. الا يجي واحد ويقول لزوجي انت اللي مالقيت جوالك .. قال ايه .. قال تعال معي .. انا انبسطت قلت اشوى لقوه بس للاسف قالو مالقيناه ومدري ليش نادوه
..
انطلق الباص وكانت المده بين المطار للفندق 20 دقيقه تقريبا .. ولاصورت الطريق لان كنت جالسه بالنص ولايمديني اتحرك ..
ووصلنا الفندق وهذي صور للريسبشن واللوبي








شجره الكرسميس في كل مكان

ومجسم مريم وعيسى برضو في كل مكان ..



اول ماوصلنا كانت الساعه 2 وشوي .. قالو التشيك ان الساعه 3 روحوا تغدوا الين تجي الساعه 3 .. رحنا تغدينا ورجعنا لهم
حطو في يدنا اساور علشان ندخل المطاعم هناك وناكل .. واعطونا 3 بطاقات مثل بطاقات فتح الغرف بس كانت للمناشف .. اذا ضاعت البطاقات لازم ندفع لهم .. ولانقدر ناخذ مناشف للبحر الا بهذي البطاقات ..
ورحنا لغرفتنا وهذي صور من الطريق ..





المنتجع عباره عن اكواخ . كل كوخ فيه 8 غرف .. 4 فوق و 4 تحت



ووصلنا كوخنا



وهذي غرفتنا من برى والصوره مو من نفس اليوم

الغرفه من جوى ونسيت اصور السراير اول يوم
كانت الغرفه سريرين كوين .. وحمام الله يكرمكم .. ومكان صغير فيه الدولاب والسيفتي بوكس .. وللاسف مافيه ثلاجه ..

المغسله ومبين عليها مو نظيفه .. وتوني انتبه اضن بس لونها متغير



وعاد شوفو السراير في المرايه والمفارش العجيبه ههههههههه عاد غيروها ثاني يوم


المفارش غير ! عادي عادي السرير اللي مفرشه ابيض تحته نفس المفرش البيج ،، بس ماحطوا الابيض على السرير الثاني لان احنا حاطينه على جنب ونصلي عليه علشان كذا ماحطوه ع السرير
..

السيفتي بوكس من العصر الحجري .. هذاك الشي الابيض اللي بالزاويه .. واعطونا قفل ومفتاح له ..
للاسف الصوره مو واضحه



وهذا المنظر اللي تطل عليه الغرفه



ناخذ فاصل سواليفي

للامانه ضاق صدري يوم شفت الغرفه ، مع انها نظيفه بس الالوان تجيب الهم يعني لو مخلين الجدار ابيض ومفارش بيضاء ابرك .. بس يقالهم متفننين .. والحمد لله مع الوقت اقتنعت بالغرفه وقلت اكيد بسعر 104 دولار ماارح اطلب اكثر
..
البلا يوم جيت انام بالليل طلعت المخاد مو مريحه ..بس ماعاقت معنا .. نمنا بعمق من التعب
..

اول يوم كان اليوم الاستكشافي
اغلب الاكواخ ما تطل على البحر لان المنتجع جاي بالطول .. وكان موقع كوخنا بالنص قريب من كل شي
المنتجع فيه مسبحين للكبار .. وفيه مسبح للصغار فيه العاب مائيه

المسبح الاول







المسبح الثاني وهو اللي قريب من الشاطئ





المسبحين يفصل بينهم المطعم اللي يقدمون فيه الغداء





للامانه الاكل مو مره .، خصوصا الغداء .. قليله الاطباق و طعمه موش ولا بد ..

واخر مسبح للاطفال وموجود في نص المنتجع



وفيه قدامه العاب اطفال ، ماعندي صوره كامله للاسف


..
وبرضو عندهم كيدز كلوب .. بس ولا مره شفته مفتوح بس عندهم انشطه برى عند الشاطئ مثل كره الطائره وهكذا
..

ونكمل جولتنا ..

غرفة الغسيل وجنبها غرفه الصراف الالي.. فيه صرافين واحد يصرف دولارات والثاني بيسوس



ومسرحهم .. يعرضون افلام بالليل



وملعب التنس



واخيرا الشاطئ وبالاسباني Playa هاه علمتكم كلمه اسبانيه





وعند الشاطئ فيه انشطه بس كل نشاط بتكلم عنه في جزء مختلف ..

وبعد مااكتشفنا المنتجع قلنا بنطلع نشتري شباشب الله يكرمكم .. السرعه القاتله في تصفيف الشنط ما خلتني اجيب معاي

واخذنا تاكسي للداون تاون حقهم والسوق الشعبي .. الداون تاون بالاسباني Centro يلا هذي كلمتين
السنترو والسوبر ماركت بالجزء الجاي ، يمكن انزله اليوم او بكرا

من قوة البرد اللي عندنا حلمت اليوم انو فتح جنبنا حي مكسيكي ودافي

درجه الحراره حاليا -19 وتحولنا بطاريق ولله الحمد

نرجع لموضوعنا الدافي
..

بعد مااكتشفنا المكان قلنا بنروح نتمشى ونشتري اللي ناقصنا ..
اخذنا تاكسي وقلنا ودنا السوق .. قال السنترو قلنا السنترو السنترو اللي تبي ، قال فيه سوبر ماركت كبير .. قلنا ودنا السنترو الحين والسوبر ماركت مره ثانيه ..
اسعار التاكسي موحده هناك على حسب الفندق والمكان اللي تبون تروحون له .. يعني من فندقنا للسنترو 16 او 17 دولار ..
في الطريق مرينا على هذا السوبر ماركت ومدحه لنا صاحب التاكسي وقريب من السنترو يعني يمدينا نروح له مشي


..
اول ماركبنا التاكسي ماسألناه بكم .. يوم وصلنا قلنا كم الحساب قال 160 .. احنا طيرنا عيونا نحسبه دولار بس اشوى طلع بعملتهم ..

هذا المكان قدام السنترو .. وهو ميناء الفيري اللي بنركبها اخر يوم
وشجره الكرسميس متواجده في كل مكان



وهذا سوقهم الشعبي









المحل اللي فوق دخلته علشان اسعاره واضحه وراح اعرف انو مارح ينصبون علي ويعطوني سعر اغلى .. باقي المحلات اذا سألتهم عن قطعه معينه يقولون مثلا 20 دولار واذا طلعت وخليتهم توصل القطعه ل 5 دولار ويلاحقوني بس للامانه مارجعت وشريتها .. خلوهم يتأدبون ..

جوله في السوق





وشجره كريسميس اخرى



و تماثيل ل مريم و عيسى عليه السلام


..
لفينا في السوق كذا لفه ولا لقينا اللي نبيه .. قلنا بنتمشى شوي الين نوصل للسوبر ماركت اللي حطيت صورته قبل ..
كان الجو جميل .. والمنطقه مره امان مع انو كان ليل بس ماخفنا وفيه سياح كثير يتمشون ..
ووصلنا السوبر ماركت
صور السوبر ماركت الدور الارضي





تحت فيه بس محلات .. وفوق عاد السوبر ماركت الكبير وموجود فيه كل شي ممكن تتخيلونه .. ونظيف ومرتب وهادي
صورت بس صورتين



دانيت hap: ماعندنا في امريكا انبسطت يوم شفته
عاد قلت اكيد عندهم لبن مادام عندهم دانيت ولقيت مثل علبه اللبن بس مكتوب عليها زبادي .. قلت يمكن يسمون اللبن زبادي .. وخذتها قلت اجرب ..
الله يكرم النعمه طلع زبادي سايل حامض حلو ..



ليز بفهم ليش مغيرين اسمه .. غريبين عجيبين ...

اول مادخلنا السوبر ماركت .. قابلنا واحد وقال لي بتحكي عربي ! قلت ايه .. قال من وين وكذا .. بعدين قال شلون جيتو هنا اول مره اشوف عرب واحد يتكلم عربي هنا من يوم سكنت ، قلت له روح كنكون وبتشوف ..
..

وشرينا اغراضنا الناقصه واخذنا تاكسي وعدنا ادراجنا علشان نتعشى وننام ونكمل اكتشاف من بكرا



يلا نبدى باليوم الثاني في كوزيميل .. الاثنين 16-12-2013

صحينا الصباح ورحنا نفطر ..
المطعم اللي يقدمون فيه الفطور والعشاء موجود فوق اللوبي .. صور سريعه بالاي فون













الفطور والعشاء افضل من الغداء بمراحل .. متنوع اكثر وألذ

بعد ماخلصنا الفطور نزلنا وقلنا نروح نسأل وين ممكن نروح اليوم .. وكان فيه مكان عند اللوبي فيه انشطه وكذا ورحنا له



قمنا نسأل عن الاشياء اللي ممكن نروح لها .. عاد سألنا اللي يشتغل هناك اذا معانا كوبونات تخفيض .. قلنا لا من وين نجيبها .. قال من الفندق اللي جنبنا !!
طلعوا تبع مجموعه فنادق ومنتجعات اوكسيدنتال والفندق اللي ساكنين فيه تبعهم .. واذا رحنا للفندق اللي جنبنا راح يسوون لنا محاظره عن الشركه وتسويق وكذا .. قلنا نروح نشوف ليش لا .. خاصه انو كان هوا وكل الانشطه البحريه موقفه هذاك اليوم .. قالو خلاص تعالو وقت الغداء ونوديكم هناك وتتغدون هناك برضو ..
الشي اللي قهرني انو يوريني رحله غوص بالاجهزه البدائيه ، يعني نظارات الغطس وانبوب التنفس فقط .. قلت له طيب بنتي ينفع تجي معي قال ايه !! تخيلو بنتي تغطس معي هههههههه واقوله الباراسيلينق بنتي عادي تجي معي .. قال ايه هههههههه هذا يسمع بالتسويق
..
تركناهم ورحنا نجلس ع البحر شوي وذبحنا البرد
عاد انا ضاق صدري على واجبي اللي ماخلصته وكان اخر يوم تسليم قلت بشترك بالنت واكمله لو اكمل بس صفحه زياده وارسله ..
النت عندهم بفلوس .. مو هنا الغباء .. الغباء انو النت مايوصل للغرف .. بس في اللوبي وعند المسابح ..
اشتركت يوم ب 20 دولار وجلست باللوبي اكمله وخلصته ويوم ارسلته حسيت هنا بس بدت اجازتي وراحتي النفسيه
..
يوم جاء وقت الغداء رحنا لهم واخذونا للفندق اللي جنبهم ..
الفندقين مثل ماقلت قبل من نفس الشركه ..
..
رحنا هناك وجاء واحد يسولف لنا عن الشركه ورحنا تغدينا معه ..
الزبده انهم يقولون ادفعوا لنا مبلغ وبعدها 25 سنه قدام تقدرون تسكنون في مجموعه فنادق اوكسدينتال في اي مكان في العالم مجانا لمدة اسبوع اضن كل سنه ..
وورونا جناح خاص ويحاولون يقنعونا ..
صور من الفندق اللي رحنا له









الفندق كبيعته واشجاره اكثر من فندقنا .. والسبب ان فندقنا مبني قبل 27 سنه والفندق الثاني 9 سنوات .. وكان فيه قرار من رئيسهم انو ممنوع يشيلون الشجر ويبنون فوقها .. علشان كذا الطبيعه اكثر .. والشاطئ بعيد عن الغرف .. بعيد جدا بينهم مثل الجسر خشبي وحواليه اشجار وغابات ..
..
اخر شي جت مديرتهم وقالت مدام انكم طلاب بعطيكم عرض .. تدفعون 14 الف دولار وشوي والحين الان حالا تعطوني 1900 دولار والباقي تقسيط شهري وزياده على كذا بعطيكم يومين مجانا في كنكون في فندقنا ..
عاد زوجي قال لها شركتكم مو عالميه .. بس موجوده اضن في جزر الكاريبي ! وبيفتحون فندق في اسبانيا .. يعني لو رجعنا السعوديه ماراح نستفيد منها .. ! والا تبي تقنعه واحنا مافيه امل نقتنع .. عاد زوجي يقول لها مابي اكذب عليك واقول مامعي 1900 ، معي اكثر بس ماراح اجي هنا كل سنه احس ولعت نار من القهر ..
وعاد بعدها عطونا الكوبونات بس مااستخدمناها .. طلعوا نصابين ومعطينا سعر اعلى من السعر الاساسي وحجزنا عن طريق شركه ثانيه موجوده في نفس الفندق ..

وبس جلسنا نحوس في الفندق باقي اليوم علشان الهواء وجاء مطر وماكان فيه امل نطلع برى ..

اليوم الثالث ..

اليوم كان مطر من الصباح ، يوقف شوي ويرجع .. والانشطه البحريه اللي في الفندق كلها تكنسلت .. عاد قلنا مالنا الا الدلافين
رحنا ل شركة السياحيه اللي ب الفندق وقلنا للي يشتغل هناك يشوف اذا نقدر نروح هناك ونسبح مع الدلافين والا علشان المطر قفلوها !
كلمهم وقال لا عادي تروحون ماقفلوها ..

قبل مانروح كان عندي خيارين .. كلهم دلافين بس مكانين مختلفين .. واحد بحر وحاطين عليه حواجز والدلافين جواته .. والثاني مسباح فيها الدلافين ..
كلهم سعرهم متقارب .. وكلها فيها اكل مجاني .. وانشطه وكذا..
اخترنا ابو بحر واسم المكان Chankanaab
يفتح من الساعه 9 الصباح .. وفيه شاطئ تقدرون تسبحون فيه ، واشياء ثانيه بتكلم عنها تحت ..
السباحه مع الدلافين لها 3 اوقات .. 10 الصباح و 1 و 3 الظهر
اخترنا 1 علشان مايمدينا على 10 ونص ..
كان السعر 99 دولار للشخص .. وبنتي ببلاش علشانها صغيره ..
رجعنا الغرفه جهزنا اغراضنا وطلعنا ..
واخذنا تاكسي للمكان



المكان من فوق ..



المكان فيه كذا ركن
هذا مكان يشرحون فيه كيف يسوون التاكيلا







بعدها ماقدرنا نتمشى في الحديقه من قوة المطر ورحنا جلسنا تحت مظله عند الشاطئ



فتره ريلاكس واستمتاع ب البيناكولادا بدون كحول


..

بعد ماوقف المطر قلنا نتمشى الين نوصل نكان الدلافين







وبعدها رحنا قسم الدلافين ووقعنا على اوراق واعطونا اساور وقالو ترى فيه غوص مجاني بس ماامدانا عليه واساسا مطر خفنا ندخل البحر ولاعاد نرجع
ويوم خلصنا رحنا علشان نبدل ونستعد



المكان مثل الصوره اللي من فوق .. اماكن مسوره وفي كل جزء دلافين
عندكم كذا خيار .. لمس الدلافين وتعطونهم بوسه وكذا وهذا حقنا .. وفيه تمسكون يدينهم وهم مقلوبين وتسبحون معاهم وفيه اللي يجي دولفينيين من تحتكم وكل واحد يمسك رجلكم ب خشمه ويرفعونكم فوق كأنكم تمشون على المويه .. ان شاء الله تفهمون

بعد ماتجهزنا وكل واحد لبس اللايف جاكيت قال المدرب يلا الحقوني ..

وصلنا عند المكان اللي فيه دلافينا هنا انا تنحت وكنت بهون .. لاني اساسا مااحب الاسماك واخاف منهم .. واخاف من البحر وحدي الشاطئ الناس كلهم نزلوا الا انا كملت تتنيح .. واشاور نفسي انزل او لا ..
وبسم الله نزلت والدرج يزلق فيه اعشاب بحريه يعني انا ناقصه مثلا وتعوذت من الشيطان ودخلت جوى الا شوي اشوف السمك تحتي طيب انا مااحبكم وخرو عني مدري شلون كملت الموضوع
عاد سلمنا على الدلافين وبنتي فيها انفصام ساعه تبي تلمسه وساعه ماتبيه ..
عاد اول شي لمسته وكذا ويوم جاء دور البوسه قالت لا .. قالو خلاص اجل دغدغيه وانقلب وقامت تدغدغه .. بس اشوى قالوو مافيه روحه الا وانتي معطيته بوسه .. والحمد لله تمت البوسه بنجاح
كان شعور جميل انك تلمس وتلعب مع كائن مو بشري خصوصا كائن بحري وش حليله
..
بعد ماخلصنا وطلعنا من البحر ونبي نعود ادراجنا .. قالو على وين فيه اخ ثاني ينتظركم ..
طلع فقمه اضن انها فقمه . الموهيم هي شي كبير وخشن شوي ،، ترى مالمستها بس اعطيكم توقعاتي من مجرد النظر ... ابشركم بنتي صاحت وخلاص ماعاد تبي تنزل وانا انبسطت اني لقيت عذر مايخليني انزل عنده وانحشت وخليت زوجي ينزل ويتفاهم معه ..

بعد ماخلصنا رحنا مطعمهم .. كان بوفيه بس قالو ترى مالكم الا صحن واحد .. حركات كل شوي ترجعون تاخذون مافيه مالت عليهم وعلى اكلهم بس من زينهم كش



بعد الغداء قلنا نروح نتمشى في المكان لان المطر وقف

كان فيه جزء عن حضارة المايا





وفيه مكان فيه عروض اسد البحر ومامدانا عليه



وفيه اماكن ثانيه ماامدانا نروح لها لان امطرت مره ثانيه وقلنا ننحاش احسن

في الرجعه يعطونا تاكسي مجاني للفندق .. عاد قلنا للتاكسي ودنا السوبر ماركت مانبي الفندق

وودعنا الدلافين



وخلص اليوم الثالث

السلام عليكم ..

اليوم الاخير في كوزيميل كان يوم مشمس وقررنا نجلس ع البحر طول اليوم ونتمتع بالدفا ..

قبل ماابدى هالجزء اهدي لكم هذا الشي



هالسحليه مرررره كبيره وتخوف .. ممكن تلقونها عند باب الغرفه تطلع بس اذا فيه شمس .. علشان كذا ماشفناها الا اخر يوم ..

صور من الشاطئ













رحنا لقسم الانشطه اللي موجود عند الشاطئ وسألناهم ايش الانشطه المجانيه اللي ممكن نسويها اليوم .. قال ادوات الغطس مجانيه لمده ساعه وبرضو الكاياك او التجديف لمدة ساعه
قلنا خلاص الحين نبغى الغطس وبعدين عاد نرجع لكم





صور من جوى البحر





وبعد ساعه رحنا للتجديف



بعد متخلصنا ماكان فينا حيل لاي شي ثاني .. رجعنا للغرفه نبدل ونروح نتغدى وكنا ناوين نرجع للشاطئ علشان نشوف الغروب ..

تغدينا وجلسنا نتمشى في المنتجع ونلعب بنتي الين قبل الغروب رجعنا للشاطئ











صور للشاطئ بعد الغروب





وخلص اليوم كان يوم ممتع

نتكلم عن كوزيميل شوي ؟
صح انها مره صغيره بس فيها هدوء جميل وكانو معانا عائلتين في الباص اللي من المطار للفندق وكلهم زاروا كوزيميل اكثر من مره واضن كل سنه يروحون هناك
تنفع للي يحبون الانشطه المائيه .. بس ماانصح فيها لاكثر من 4 ايام ..

نجي لتقييم الفندق
النظافه 10/10
الغرف 8/10
الخدمه 10/10
الاكل 7/10
الشاطئ 10/10

المصاريف .. صرفنا تقريبا 400 دولار غير سعر الفندق .. ال 400 شامله اغراض السوبر ماركت و دخول الدلافين وكل الاشياء الثانيه ..
ال 400 صرفناها كاش من مطار ميامي .. وبعدها ماصرفنا الا يوم جينا نروح كنكون علشان ندفع التاكسي والفيري ..

هل راح ارجع لها مره ثانيه .. ؟
مااضن .. احس هي من الاماكن اللي تروح لها مره وحده وتكفي .. وعندي اماكن ثانيه مارحت لها .. اذا خلصت كل الاماكن اللي اتمنى ازورها ممكن ارجع افكر في كوزيميل
وش بعد

هذا اللي في بالي الحين .. نشوفكم في وقت لاحق مع كنكون المقالب

وصلنا لاخر يوم في كوزيميل .. نسيت كم كان التاريخ !
الموهيم كان اليوم الرابع في مكسيكو ..

اليوم الخامس كان يوم رحلتنا ل كنكون ..
صحينا الصباح متحمسين hap: .. افطرنا وخذنا اغراضنا وطلعنا .. بس قبل نركب التاكسي قلنا بنصرف علشان ندفع للفيري اللي بتودينا ل كنكون .. صرفنا 200 دولار وطلعنا متوجهين للميناء ..
الميناء موجود في الداون تاون .. فيه رحلات ل بلايا دي كارمن بعدين لازم ناخذ باص او تاكسي ل كنكون ..

صوره للميناء من برى


حجزنا تذاكر واعطيناهم الشناط ورحنا فوق ننتظر الفيري







ووصل الفيري



وركبنا وتواسينا وصورت صوره بس وقلت الباقي اذا مشينا hap:



وللاسف جاني دوار البحر لاول مره في حياتي .. بلا مبالغه تقريبا اغلب اللي في الفيري كان تعبانين لان جوى مره كتمه .. وبرى هو يحرك الفيري يمين ويسار ومخي وكبدي تتحرك معاه زوجي كان يحاول ينام علشان مايتعب زياده .. حاولت اسوي مثله ماقدرت لان بنتي فوق راسي بس تحوس وتخليني اتحرك ..
عاد وصلت لمرحله اني ماعاد اشوف ورحت للحمام والحمد لله وصلت بالسلامه وبغيت انسدح في الحمام الين نوصل
..
يوم وصلنا بلايا دي كارمن ونزلنا من الفيري علطول جلست في الارض ابي هوا مع ان منظر الشاطئ حلو بس ماكنت مركزه مع اي شي ..
ميناء بلايا دي كارمن مرررره حلو عباره عن محلات وميناء ..
اول ماوصلنا لقينا تاكسي وقال اوصلكم ب 75 دولار .. هذاك الوقت مافينا حيل نكاسر قلت يلا مشينا نبي بس نجلس ونرتاح ..
المسافه بين الميناء وكنكون تقريبا ساعه ..
عطينا السواق اسم الفندق وقلنا بننام الين نوصل
...

وصلنا يوم ركبنا التاكسي

الطريق كان نظيف و يوسع الصدر .. و فهينا شوي الين وصلنا للفندق ونزلنا بكل ثقه ورحنا للريسبشن وعطيناهم اسمنا على اساس عندنا حجز .، قالو مافيه ! وعطيناهم رقم الحجز قالو مافيه حجز بهالرقم !! قلت بس هذا المقلب الجديد وبعد نقاشات اكتشفنا ان فندقنا واحد ثاني بنفس الاسم تقريبا وصاحب التاكسي هو اللي غلط وودانا لهالفندق
خذنا عفشنا ورحنا للفندق الثاني ..

ويوم وصلنا ولقينا اسمنا انبسطنا وقالو عطونا بطاقتكم علشان تدفعون .. قلنا دافعين من اول يوم حجزنا من بوكينق .. قالو لا بس ينحجز المبلغ وهنا تدفعون .. قلنا يلا ماعليه .. وخذت البطاقه وقالت البطاقه انرفضت ... ! هاه ! نعم ! شلون ! والله فيها فلوس اكثر من سعر الفندق قلنا بنجرب نصرف طيب ونعطيكم كاش .. دخلنا البطاقه في الصرافه مارضت تصرف !! قلنا طيب نصرف من البطاقه السعوديه .. برضو ماتصرف .. هنا بس قلت ابي ارجع خلاص .. ابي شقتي .. ابي انام .. ابي اكل .. ابي اصيح وصحت شوي هههههههههههه ..
..
قلت لهم اكيد هذا من البنك .. واني بكلمهم وارجع .. قالو فيه تليفونات في الشارع كلمي منها .. قلت ابي صرف دولارات علشان ادفع للمكينه .. قالو بنكلم المدير قبل وكلموه وقال بس صرف 5 دولار تكلمين فيها ..
وخذت قروشي وعفشي ورحت للتليفون وكلمت البنك وقالو ايه انك استخدمتي البطاقه خارج امريكا ولا علمتينا انك بتستخدمينها ووقفناها .. قلت طيب رجعوها .. وانا اتناقش معهم خلصت الفلوس وقفل مايحتاج اشرح لك الوضع المزري والمخزي هذيك اللحظه ..
تعوذت من الشيطان وراح زوجي يكلم المدير يقول له نبي صرف ترى والله بس صرف .. قال روح للبقاله بتلقى كرت شحن اشتره وكلم ..
وشريناه ورجعت ادق ع البنك .. طبعا الصوت مو واضح والسماعه شوي وادخلها جوى اذني .. وجوعانه و حر والتليفون يقفل كل شوي في نص المكالمه .. بلا مبالغه يمكن كلمتهم 6 مرات واخر مره قلت لها تكفين ترى كل شوي يفصل ابي بسرعه .. قالت طيب وبسرعه سألتني عن اسمائنا وكم بطاقه عندنا واسأله سريه وقالت خلاص فتحنا البطاقه .. تمنيت انها قدامي هذيك اللحظه واضمها
قلت لها يعني ملاص ادفع للفندق ! قالت ايه .. قلت عادي اسحب كاش .. قالت ايه .. ارتحت هذيك اللحظه .. طبعا هالشي كله صار خلال ساعتين من المناقشات والصياح والتعب النفسي والجسدي ..
رجعنا للفندق وعطيناهم البطاقه والحمد لله اشتغلت
ورحنا غرفتنا

اسم الفندق Barcelo Costa Cancun .. الحجز كان عن طريق بوكينق
السعر 1196 دولار لمدة 6 ايام شامل الاكل الموقع الرسمي للفندق هنا

صورة للريسبشن واللوبي





غرفتنا كانت في الدور الثاني وغير مطله ع البحر










الدرج اللي تحت التلفزيون فيه الثلاجه .. كل الي في الثلاجه مجاني وكل يوم يعبونها



البلكونه







ريحنا شوي وقلنا بنطلع قبل وقت العشاء نتمشى داخل الفندق ونتعشى ..

تمشينا بس ماخذت صور كانت النفسيه للحين تعبانه .. ويوم دخلنا المطعم نتعشى كان اليوم الياباني لان كل يوم لهم اطباق معينه ..
قلت بس هذا الناقص ما القى شي اكله
النكته انو زوجي راح ياخذ قبلي وانا جلست مع بنتي .. ورجع ورحت انا اخذ .. ويوم رجعت وراني شي مثل الكباب يقول لذيذ هههههه عاد هذا الشي انا شايفته ومكتوب فوقه انه خنزير والاخ من الجوع كله ويمدحه ههههههه عاد صدمته صدمة حياته وقلت له تراك كلت خنزير ،، وحامت كبده هههههههههه

وبس هذا المقلب الكبير اللي مافيه مقلب مثله .. وخلاص توبه اسافر ولا اعلم البنك ..

راجعه باليوم الثاني في كنكون