رحلتي الميمونة لبلاد العم سام ( نيويورك -لاس فيغاس - لوس انجلوس )

السلام عليكم ورحمة الله وبركاتة

كنت متردد صراحة انزل التقرير لصعوبة تصغير وتحجيم الصور والوقت اللي راح تاخذها !
لكن مع تطبيق الاقلاع الجديد اشوف ان الموضوع اصبح ميسّر
ولو ان الصور اشوفها كبيرة حبتين لكن مو لدرجة تشوية الصفحة


الرحلة كانت في اواخر مايو الماضي
عن طريق محبوبتنا الاماراتية
البلدة الاولى اللي زرتها كانت نيويورك
كثير ناس خوفونا بمطار JFK ! مابالغ عليكم انها كلها 5 دقايق اجراءات واخذت شنطتي وانا برا المطار مع انها اول زيارة !
نيويورك ارتحت فيها جدا ولا احتجت فيها لا سيارة ولا تاكسي
الاهم نكون ساكنين في مانهاتن وبمنطقة قريبة من السنترال بارك
سكنت في فندق The Surrey فندق 5 نجوم وصغير وقريب من متحف متروبوليتان وشارع الفيفث افنيو

باختصار نيويورك مدينة لا يعلى عليها مريحة للسائح وصاخبة وممتعه وكل شي متوفر فيها
كثير ناس يقولون يكفيها 4 ايام !
بالعكس فيها اماكن ومعالم كثيرة صعب جدا نستكشفها في 4 ايام
اسبوعين ويادووب حتى

اخليكم مع الصور لهاليوم
صور لرحلة الطيران من دبي لنيويورك والسكن
وبكرا راح نكمل معاكم عن بعض الاماكن اللي زرتها بنيويورك ومع صور اكيد

فندق بلازا
طبعا هم حاطين علم السعودية لان المالك هو الوليد بن طلال
فندق مشهور وتصور فيه افلام كثيرة اشهرها
home alone2
وعطر امرأة ال باتشينو




فندق بلازا من الداخل




مجوهرات تيفاني
هنا بنفس المكان وقفت الممثلة الاسطورة اودري هيبورن
بفيلم افطار عند تيفاني




متحف متروبوليتان




المتحف من داخل







قاعة جلوس من القرن ال١٧ بكامل اثاثها وتحفها

متحف التاريخ الطبيعي










بالشاتل نقطة الانطلاق
واول محطة التايمز سكوير




جسر بروكلين




مقر قناة nbc

انتهينا من نيويورك واللي عنده أي استفسارات عنها لا يتردد ويسأل

-اولا التكاسي هناك نادر ماتحتاجون لها لان المشي بنيويورك متعة صراحة

-الوقت اللي كنت فيها كان بارد وممطر اخر شهر مايو

-فنادق نيويورك غالية وصغيرة مساحتها ومستهلكة

-بالمطار كثير قالوا لي ان التاكسي ياخذ 150 دولار !
ايوه فعلا 150 دولار في حال انصب عليكم وجاكم واحد بسيارته وقال لكم اوصلكم وركبتوا معه
فيه تاكسي نظامي وعالم واقفين طابور ياخذون ارقام
ياخذ مابين 55 الى 60 دولار من المطار الى أي مكان بمنهاتن !
وهالشي ينطبق على مطار LAX بلوس انجلوس

-نصيحة بنيويورك اذا جاكم أي احد يعطيكم سي دي او يبيعكم شي لا تردون عليه لانهم نصابين ويستقصدون السياح

-باصات الشاتل تحصلونها بمنطقة التايمز سكوير

في نقطة نسيت اقولها بخصوص الرحلة من دبي لنيويورك- 14 ساعة
ومن لوس انجلوس لدبي -16 ساعة
طبعا ماتعبت فيها ابد عشان الدرجة الاولى
سويت خاص ووجبات مفتوحة اطلب باي وقت
وسبا وحمام شاور غير الافلام والمسلسلات والمسرحيات
والخدمة والاجراء السريع في المطارات وخدمة التوصيل المجانية حتى في امريكا
بصراحة شي ممتع ومريح كان وتستاهل القيمة اللي اندفعت فيها



Las Vegas

الرحلة من نيويورك الى لاس فيغاس عن طريق طيران جيت بلو
المدة كانت 5 ساعات تقريبا
جلست فيها 3 ايام وانا اشوف ان حدها يومين فقط وزيارة وحدة بالعمر تكفيها
اذا انت مو راعي كازينو وقمار gambling
والديرة صاخبة وكل اوتيلاتها فيها كازينوهات ومزعجة واللوبي كله ريحة سجاير نهار وليل
اسواقها كلها ماركات وعليها ضرايب
وصرافاتها ياخذون نسبة عالية

اخترت وسكنت بفندق Mandarin Oriental Las Vegas
على شارع ووسط الستريب
ميزتة مافيه كازينو وهادي جدا لكن المسبح العام طول النهار مزحوم



















فندق سيزار اللي تصور فيه فيلم Hangover










اطلالة الغرفة بالمساء






ستيك rip eye لذيذ كان





داخل فندق Wynn










باقي لوس انجلوس ونختم التقرير

Los Angeles

تسمى المدينة الحالمة
ومسمى اخر وهي مدينة الملائكة
والمدينة الترفيهية للعالم
بصراحة يوم رحت لها اكتشفت ان امريكا تحب شعبها وموفرة لها كل وسائل الترفيه
الى جانب الديمقراطية والحريات اللي يتمتعون فيها
الله يخلف علينا بس


وصلت هناك من لاس فيغاس عن طريق طيران فيرجن واخذت الرحلة ساعة فقط
طبعا هناك ماستاجرت سيارة لان قابلت خويي وشفته هناك فقط 4 ايام وفسحني ووداني لاهم الاماكن
اخر الايام قضيت مشاويري مع تاكسي وبعض الايام ماحتجت فيها السيارة وجلست اتجول بالمنطقة اللي هي سانتا مونيكا .

سانتا مونيكا هي الخيار الاول للسكن
منطقة جميلة وعلى البحر وطول النهار غيوم عكس بيفرلي هيلز من الصبح والشمس تضرب فيها مدري ليه الجو فيها مختلف كان !
وفوق هذا فيها مقاهي ومطاعم قريبة وسوبر ماركت
باختصار لو تجلسون فيها 3 ايام ماتملون منها ولا راح تحتاجون فيها لسيارة


اول ماوصلت سكنت بفندق Montage Beverly Hills مدة 4 ايام
والفندق الثاني The Peninsula Beverly Hills مدة 3 ايام
واثنينهم بمنطقة بيفرلي هيلز

واخر فندق اخذته Viceroy Santa Monica ليلتين فقط
4 نجوم ومستهلك كان ومعطيني غرفة مع اطلالة على البحر ولا تهنيت فيه من ازعاج السيارات والدبابات والشاحنات فترة النهار وحتى الليل لكن اخف شوي في الازعاج

اترككم مع الصور












مسبح فندق مونتاج








اطلالة الغرفة





السبا غرفة الاسترخاء








الوقت الفجر كان

غرفة فندق بينيسيولا





هناك استقبلني موظف تونسي !
فيه موظفين عرب بالفندق وقنوات عربية واكلات عربية بالمنيو
يعني ماراح تحسون بالغربه فيه

خلف الفندق مدرسة بيفرلي هيلز الثانوية
اللي تصور فيه مسلسل التسعينات الشهير Beverly Hills 90210








فندق بيفرلي هيلز هيلتون









فندق فايسروي سانتا مونيكا













عجبوني اشكال الكلابة وصورتهم






فندق شاترز وجمبه فندق كاسا ديل مار
هم افضل فنادق سانتا مونيكا
لكن غالية شوي وحسيت انها ماتستاهل الغرفة قيمتهم

طبعا اهم الحاجات والخطط اللي كنت ابيها هي اني ازور كنيسة فيلم Kill Bill اعشق هالموفي
وبحثت عنها وعرفت انها تبعد تقريبا ساعة ونص عن لوس انجلوس
طلبت سيارة من الفندق ووفروها لي ومشيت لها

هذا بوستر الفيلم وصور لمشاهد الكنيسة من الفيلم


























وهذا مقطع فيديو تصويري رفعته قبل كم يوم على اليوتيوب
كنيسة فيلم كيل بيل Kill Bill Church






وودعنا امريكا

وختمنا الموضوع
وعسى يكون اعجبكم