رحلة الى الاقصر واسوان

رحلة الى الاقصر واسوان

السلام عليكم ورحمة الله وبركاتة
الموضوع دة والمواضيع اللتى تلية بنفس الاسم لكن على اجزاء ربما تكون اربعة او خمسة هى تفاصيل رحلة قمت بها عائليا الى الاقصر واسوان فى الفترة
من الجمعة 3-10-2014 الى الجمعة 10-10-2014وكانت فى العيد الكبير

و انا هحاول اشرح الموضوع بكل الجوانب باختصار ووضوح عشان تكون مرجع لاى حد يحب يروح يتفسح فى الاقصر واسوان

يعنى مثلا اية افضل الاماكن للزيارة
ومواعيد الزيارة
والاسعار
والفنادق وتكلفتها
والطريق ووصفة
وتحذيرات ونصائح عامة

فى البداية دى كانت رحلة عائلية بسيارتى دايو لانوس .......كنت انا وزوجتى وابنى عمر 9 شهور وبنتى ملك سنتين

والرحلة لم تكن تابعة لشركة سياحية او برنامج محدد سلفا
لكن نقدر نقول انها رحلة حرة

طلعت من البيت يوم 3-10-2014 الساعة 10 صباحا من العاشر من رمضان واخدت الطريق الدائرى الاقليمى



ونزلت منة على طريق الكريمات بتاع الصعيد
او طريق الجيش زى ما بيقولو
ووصلت بنى سويف ودخلت فولت بنزين وعملت رست لمدة ساعة وبعدين رجعت تانى طريق الجيش وفضلت علية لحد ما وصلت اسيوط وهناك بردو عملت رست لمدة ساعة








الطريق ممتاز فردتين رايح جاى كل فردة منهم 3 حارات والسرعة القصوى الرسمية 120 كم
بس تقريبا مفيش علية خدمات
بنزينة عند الكارتة وبنزينة تانية عند الكارتة اللى فى اسيوط
وشبكة المحمول موجودة فى اماكن واماكن لا

بعد اسيوط الطريق بيبقى فردة واحدة رايح جاى بس واسعة ومعقولة جدا وكثافة السيارات عليها قليلة

من بعد اسيوط الطريق متعرج لمسافة 40 كيلو فحاول تسوق بسرعة متوسطة فى المنطقة دى






وهتلاقى بعض الكافتريات على اليمين واليسار
3 كافتريات من بعد ما تطلع من الكارتة بتاعة اسيوط لسوهاج
وبعد 80 كيلو تقريبا فى 2 كافتريا وبنزينة اسمها النيل
بس غالبا مش هتلاقى فيها بنزين

فانت اعمل حسابك انك تفول التنك للزور فى البنزينة اللى بعد كارتة اسيوط لان التفويلة دى هيا اللى هتوصلك الاقصر

هتعدى من برة على سوهاج وتاخد الصينية شمال وبعد حوالى 90 كيلو تانيين هتلاقى صينية كبيرة بردو هتاخدها يمين وبعدها بحوالى 100 كيلو هتلاقى
نفسك داخل يمين اجبارى الى قنا

هتاخد اليوترن بعد 500 متر وهترجع تانى وتدخل يمين من جنب الكمين ومن بعد الكمين بيبقى تقريبا فاضل 60 او 70 كيلو على الاقصر

بصفة عامة انت مش محتاج تسأل اى حد لو التزمت وركزت مع اليفط الارشادية اللى على الطريق من بدايتة لنهايتة هترشدك من القاهرة للاقصر بدون اى مشاكل

ودى صورة خط السير اللى انا مشيت علية والخط الازرق الرفيع هو دة الطريق اللى انا مشيت علية ومحدد على الصور مكان الانطلاق ومكان الوصول





بعد ما تدخل الاقصر طبعا محتاج فندق او شقة مفروشة

بالنسبة ليا الاختيار كان فندق وكتير منهم موجود فى وسط البلد وفى شارع التليفزيون

وبعد بحث ومشاهدة اكتر من فندق طلعت بالنتيجة دى:
الفنادق فى الاقصر متقسمة لاربع مستويات

1 - المستوى الشعبى ودى سعر الغرفة 2 سرير بيترواح من 35 الى 70ج وبتكون حاجة بسيطة خالص عبارة عن غرفة بها 2 سرير + 2كرسى + دولاب + مروحة سقف

2 - المستوى المتوسط ودى بتكون معقولة جدا وسعرها بيتراوح ما بين 90 الى 150ج وفيها كل اساسيات الخدمة الفندقية يعنى بتكون غرفة 2 سرير + 2 كرسى + دولاب +تكييف
+ مينى بار + 2كومودينو + ترابيزة + تليفون الروم سيرفيس + + تليفزيون بدش مركزى او بوصلة دش متعددة القنوات

بس دايما بيكون فيها ملاحظة بسيطة يعنى مثلا ممكن تلاقى كل حاجة تمام وزى الفل بس الاسانسير مثلا مش شغال
او الاسانسير بيطلع ومينزلش
او البانيو بتاع الحمام صغير شوية

يعنى بتبقى ملاحظات بسيطة لكن غير كدة كل حاجة بتبقى تمام

3 - المستوى فوق المتوسط ودى اسعارها بتتراوح من 180 الى 300ج وبتقدم الخدمة الفندقية على اكمل وجة وبتكون هاف بورد او فول بورد ودى اللى بتتصنف كفنادق 3 او4 نجوم

4 - المستوى الرابع ودى بتبقى الفنادق العالمية ودى طبعا مش محتاجة شرح

وصلت الاقصر الساعة 10 باللليل
يعنى الطريق اخد منى 12 ساعة
المسافة الفعلية المقطوعة 912 كيلو متر من باب البيت لباب الفندق

طبعا اول يوم بيخلص فى السفر والحجز وتبدا من تانى يوم الرحلة بتاعتك

بالنسبة للاقصر الاماكن اللى تستحق الزيارة هيا

1 - معبد الاقصر موجود فى وسط البلد فى البر الشرقى فى ميدان ابو الحجاج ويعمل من 7 صباحا الى 8 او 9 مساء وسعر تذكرة الدخول 3 ج

2 - معبد الكرنك موجود على بعد حوالى 3 كيلو من معبد الاقصر ويعمل فترتين الاولى من 8 صباحا الى 4 عصرا والتانية اللى هيا عروض الصوت والضوء من 7 الى 10 مساء وعرض اللغة العربية
بيكون يوم الخميس تذكرة الصوت والضوء للمصريين ب 20ج والتكرة العادية بتاعة بالنهار 4ج

3 - متحف التحنيط ودى على بعد 500 متر من معبد الاقصر (ميدان ابو الحجاج) على كورنيش النيل ويعمل من 9 صباحا الى 1 ظهرا وسعر التذكرة 4ج

4 - متحف الاقصر ودة على بعد حوالى كيلو من معبد الاقصر (ميدان ابو الحجاج) على كورنيش النيل ويعمل من 9 صباحا الى 1 ظهرا وسعر التذكرة 10ج

كدة يبقى انت تقريبا خلصت الاثار اللى فى البر الشرقى ميفضلش غير طريق الكباش اللى اولة موجود فى معبد الاقصر والمفروض ان نهايتة فى معبد الكرنك بس هما لسة شغالين علية

يتفضل عندك الاثار اللى فى البر الغربى وهيا

وادى الملوك
وادى الملكات
معبد هابو
معبد الرامسيوم
تمثال ممنون
حتسبشوت

بس التفاصيل بتاعتهم هتكون فى الجزء التانى مش فى الموضوع دة




اول ما بتوصل المعبد هتلاقى قدام منة باركن كبير للعربيات وبعدين تقطع تذكرة ب3ج وبعدين هتلاقى قاعة ضخمة هتدخل منها هتلاقى فى منتصفها ماكيت صغير لمعبد الكرنك بالكامل
وعلى الاجناب صور للمعبد قديما ولاعمال الترميم اللى اتعملت لة ولبعض الاليات اللى شاركت فى الترميم ودى صورة للماكيت وفيديو للقاعة



بتخرج من الناحية التانية هتلاقى مساحة فاضية هتمشى فيها لحد ما توصل معبد الكرنك




الصورتين اللى جايين تحت بعض بالترتيب
الاولى لواجهة المعبد التقطت فى اوائل القرن العشرين
التانية صورة لنفس الواجهة حاليا
بعدها ملف فيديو لنفس الواجهة








بعدها بتدخل على بهو طهرقا واللى منة المدخل بتاع قاعة امون

والصور التالية بالترتيب كالتالى
الصورة الاولى لمدخل قاعة امون التقطت سنة 1878
الصورة التانية لنفس المدخل التقطت فى اوائل القرن العشرين
الصورة التالتة التقطت فى خمسينيات القرن القرن الماضى
الصورة اللى تحتها دى الوقت الحالى
الفيديو اللى تحتها لبهو.طهرقا اللى هو يعتبر ضهر واجهة المعبد وفيه مدخل قاعة امون

بعد كدة بتدخل قاعة امون اللى هيا تعتبر اكبر قاعة اعمدة فى العالم

والصور التالية دى مجموعة صور متفرقة لقاعة امون وتحتها ملفين فيديو














بتخرج من قاعة امون الى معبد رمسيس التالت







الصورتين التاليتين
اول صورة لتماثيل فى الصرح السابع التقطت فى اوائل القرن العشرين
والصورة اللى تحتها لنفس التماثيل وتقريبا من نفس الزاوية التقطت ليا









بعد كدة بتخرج على مقصورة المركب المقدسة اللى فيها قدس الاقداس وهتلاقى قبلها المسلات وبعد كدة بتدخل يمين على مسلة حتسبشوت الراقدة وبعد كدة بتدخل شمال على البحيرة المقدسة

















وبكدة يبقى خلصنا معبد الكرنك
يتفضل عندك عرض الصوت والضوء وهو حاجة جميلة جدا وساحرة لكن لازم تاخد بالك ان العرض باللغة العربية بيكون يوم الخميس فقط الساعة 7او 8 على ما اذكر

دة كدة نهاية الجزء الاول لان مينفعش اعمل الرحلة كلها فى موضوع واحد لان عدد الصور اللى صورتها فى الرحلة 2036 صورة وعدد مقاطع الفيديو 84 مقطع فطبيعى انى اقسم الرحلة على اجزاء

اللى اللقاء فى الجزء التانى

لملوك وهو عبارة عن وادى او منطقة ممرات اختارها ملوك الفراعنة لدفن انفسهم فيها فى مقابر تحت مستوى سطح الارض فى باطن الجبل



طريق الوصول لية سهل لو انت معاك العربية هتاخد كوبرى الاقصر اللى على النيل وتعدى علية طوالى وفى نهايتة هتلاقى اتجاة اجبارى يمين ويسار
هتاخد اليمين وتفضل ماشى علطول مسافة حوالى 8 او 10 كيلو لحد ما تلاقى كمين نقطة شرطة القرنة هتخش شمال فى الشارع الواسع وهتمشى بتاع كيلو ونص لحد ما توصل التقاطع اللى بيسموة
التفتيش ودة فية شبابيك لقطع التذاكر بتاعة معبد الرامسيوم ومدينة هابو

هتاخد يمين لحد ما توصل الصينية وتاخد الصينية شمال فى الطريق المتعرج لحد ما تلاقى نفسك فى الباركن بتاع وادى الملوك ودى خريطة الطريق




الطريق كلة بياخد اقل من نص ساعة .............ووصلت عند الطريق المتعرج اللى بيدخلك على وادى الملوك




وصلت الباركن وركنت العربية




ودخلت على الصالة الرئيسة




ولقيت فى نصها ماكيت معمول لوادى الملوك بالكامل




عشان تفهم الماكيت دة انا هشرحهولك
الخطوط السوداء التخينة والرفيعة دى الممرات بتاعة وادى الملوك
والنقط السودا دى مداخل المقابر
والجزء الشفاف العالى والواطى دى تضاريس الجبل والوادى اللى احنا فية

وعشان تفهمها اكتر انا هحط لك صورة من مكان عالى عشان تستوعب وهتلاقى فيها الممرات اللى بنمشى فيها ومداخل المقابر





نيجى بقة لصورة الماكيت من تحت




وبردو عشان تفهمة
الحاجات اللى نازلة منة لتحت زى ما تكون مواسير مربعة ولكنها متعرجة هيا فى الحقيقة المقابر

وعشان تبقى متخيل النسبة والتناسب فى الماكيت هقولك ان المواسير المربعة اللى انت شايفها دى احنا بنمشى فيها وارتفاعها تقريبا 3 متر وعرضها حوالى مترين الى مترين ونص
عشان تبقى متخيل حجمها
والفراغ اللى حواليها دة هو باطن الجبل وهو مصمت طبعا لكن الماكيت سايبة فراغ عشان تشوف تصميم كل المقابر

يعنى من الاخر الماكيت من تحت عبارة عن صورة لبطن الجبل


بتطلع من الصالة بتلاقى طفطف بتقطع لة تذكرة ب 2ج بياخدك من عند الصالة الرئيسية يوديك عند مكان قطع التذاكر

والصورة اللى جاية صورة الطفطف
والفيديو اللى بعدها تصوير المسافة ما بين الصالة الرئيسية ومكان قطع التذاكر






وادى الملوك فية 63 مقبرة لكن مش هتلاقيهم كلهم مفتوحين
ممكن تلاقى 12 او 15 او 20 انت وحظك وطبعا فيهم مقبرة توت عنخ امون اللى اكتشفت فى اوائل القرن المنصرم
سعر التذكرة العادية 3ج وبتدخل بيها 3 مقابر وبعض المقابر ممكن تكون 4ج او 5ج للمقبرة الواحدة

ومقبرة توت عنخ امون غالية شوية على ما اذكر كانت 15 او 25 ج رغم ان كل محتوياتها اتنقلت الى المتحف المصرى بالتحرير

جدير بالذكر ان التصوير مسموح فقط فى الوادى وخارج المقابر لكن ممنوع داخل المقابر ولو تم ضبط كاميرا معاك هتتصادر واحتمال تدفع غرامة

الصور اللى انت هتشوفها فى الوادى متصورة عادى


لكن كل الصور اللى فى الموضوع اللى ملتقطة داخل المقابر تم التقاطها خلسة
لكن من باب المسؤلية انا قفلت الفلاش عشان مسببش ضرر للاثر التاريخى

ودى صورة ليا وانا بستعد لدخول احدى المقابر




ودى صورة لتصميم المقبرة




والحقيقة على المستوى الشخصى لما كنت بسمع ان احنا المصريين حضارة 7000 سنة كان الكلام بيعجبنى اكيد لكن عمرى ما شفت معناة او لمستة بايدى الا لما رحت وادى الملوك
وهحكيك دلوقتى يعنى اية احنا المصريين فراعنة وحضارتنا 7000 سنة

الاول قبل ما ننزل المقبرة لازم تبقى عارف ان احنا نازلين مقبرة عمقها قرابة 100 متر اى ما يعادل مبنى من 33 طابق بزاوية ميل سالب35 درجة
لحد ما نوصل لغرفة الدفن اللى هيا حكاية لوحدها

يلا ننزل




ودى صورة ليا بعد ما نزلت قرابة 30 متر اى ما يعادل 10 طوابق تقريبا
بزاوية ميل 35 درجة تقريبا بالسالب
وبنتى ملك على كتفى منبهرة وخلف منى سياح طالعين
وطاقة النور البعيدة اللى فى الصورة هيا مدخل المقبرة




وبعد كدة صورتين من عمق قرابة 45 متر تقريبا







وهنا بقة هنقف شوية عشان ناخد نفسنا واقولك على بعض المعلومات

اولا المقابر دة منحوتة فى بطن جبل جيرى مش جبل صخرى وعمرها 7000 سنة اللى انا كنت بقولك عليهم

طيب انت ممكن تسأل واية الاعجاز فى كدة ؟؟

اقولك انا

بص يا سيدى
اولا الجبال الجيرية دى اضعف انواع الجبال عشان تحفر فيها نفق او كهف
ولو حصل وحفرت نفق او كهف فلازم تدعم الحوائط والجدران بدعائم خشبية او حديدية لمنع الانهيار بسبب الضغط الهائل للجبل على الفراغ اللى حصل بداخلة نتيجة الكهف او الممر
او النفق اللى انت حفرتة

الكلام دة بيتطبق على المناجم كلها بصفة عامة رغم ان المناجم على مستوى العالم بتكون فى الغالب فى جبال صخرية مش جيرية

ولعلك من وقت للتانى بتسمع عن انهيار منجم فى اى بقعة فى العالم على العمال بداخلة رغم انة بيكون فى جبال صخرية ومدعم من الداخل بدعائم خشبية او حديدية

طيب بالنسبة للشخص العادى ايةالفرق بين الجبل الجيرى والجبل الصخرى؟؟

الفرق ببساطة شديدة انك ممكن بميدالية المفاتيح بتاعتك تحفر وتكتب وتخدش وتلعب زى ما نت عايز فى الحجر الجيرى لضعفة

لكن الحجر الصخرى انت محتاج مطرقة قوية وضربة بكل قوتك على الصخرة اكتر من مرة لحد ما تعمل فية شرخ او تكسرة

انا بضرب لك المثلين دول عشان تعرف الفرق بين قوة الحجر الجيرى والصخرى

طيب واحد ممكن يسأل واية الاعجاز فى كدة ؟؟

اقولك الاعجاز ببساطة ان فية فجوة او ممر او كهف متمثل فى مقبرة فرعونية فى بطن جبل جيرى وما زالت صامدة بقالها 7000 سنة بدون اى دعائم خشبية او حديدة وبدون ما تنهار
علما بان اتخن كهف فى اى مكان فى العالم بيكون فى جبال صخرية وبيكون مدعم بدعائم حديدية او خشبية وبيكون معرض للانهيار فى ى وقت وفية مناجم كتير بتتقفل علشان بتكون
ظهرت عليها من الداخل علامات الانهيار

هتقولى طب ازاى الفراعنة عملوا كدة
هقلك لما يبقوا يعرفوا هما بنوا الاهرامات ازاى هيبقوا يعرفوا المقابر دى صامدة زاى

ونكمل طريقنا وننزل لتحت شوية







هنا برضوا هنقف شوية
عشان برضوا الصورتين اللى فاتوا فيهم اعجاز وحضارة 7000 سنة
وهقولك ازاى
بص الاول فى الصور وركز وتابع معايا

انا كنت بسمع عن مقابر الفراعنة وعن الرسومات والالون اللى متغيرتش بقالها 7000سنة لحد ما شفتها بعينى ووقفت اتاملها

وسألت نفسى بمنطق الشخص العادى او البسيط
هيا الالوان دى بتتكون من اية؟؟

اكيد طبعا من مواد كيماوية
طيب زى الفل
لو رحنا دلوقتى لاتخن واعظم شركة كيماويات بناء فى العالم وقلنا لها ان احنا عاوزين لون ندهنة على مبنى بس
الشركة دى تضمن لنا ان اللون مش هيتغير او يبهت او يتلف لمدة1000 سنة
بلاش نقولها 7000 سنة

يعنى الشركة تدى لنا ضمان 10 قرون على اللون ضد عوامل الطبيعة

يا ترى الشركة دى هيبقى ردها اية ؟؟

اكيد طبعا الرفض لغرابة واستحالة الطلب

طيب يا ترى نطلع من النتيجة دى باية !!!!!

اقولك انا وبمنطقى انا كشخص عادى ......... ....نطلع بنتيجة ان اعظم كيميائى مواد بناء فى العصر الحديث
اخرة يشتغل صبى عند الكيمائى الفرعونى او يعمل لة شاى وقهوة وينضف لة المعمل ....ههههههههه

وبمنطوق علمى ان الفراعنة وصلوا لدرجة فى علم الكيماويات على الاقل كيماويات البناء لسة لحد دلوقتى موصلناش ليها











ووصلنا اخيرا لغرفة الدفن اللى هيا على عمق 100 متر اى ما يعادل مبنى من 33 طابق بزاوية ميل 35 درجة بالسالب تقريبا تحت سطح الارض فى بطن الجبل











عايزك بقة تتفرج على ال3 صور اللى فاتوا دول بتروى وبصبر عشان فيهم حكاية كبيرة قوى وشغلانة جامدة

اولا غرفة الدفن واسعة وفى نهاية المقبرة تحت والنقوش بتزين السقف زى ما انت شايف بالالوان اللى متغيرتش بقالها 7000 سنة وفية اعمدة شايلة السقف المقوس

خد عندك اول اعجاز فرعونى
السقف المقوس دة معروف علميا انة السقف الاكثر تحملا للضعوط لان الضعظ بيتوزع على كامل محيط السقف مش على نقطة واحدة
وتم استخدامة فى العصر الحالى وفى العصور السابقة فى بناء اكبر المبانى الهندسية لفاعليتة

واحد هيسال وفين الاعجاز بقة ؟؟

اقولك انا ان الاعجاز ان من 7000 سنة فى الوقت اللى فية شعوب بعض دول اوربا بتحصل على طعامها عن طريق مطاردة الحيوانات فى الغابات بالرماح الخشبية
كان الفراعنة وصلوا لمستوى فى علم الهندسة المعمارية اللى يخليهم يفهموا ان الشكل المقوس للسقف هو الاكثر تحملا للضغط الهائل من الجبل والذى قد يصل لبعض الاطنان على البوصة المربعة

مش بس كدة

ارجع تانى بص للـ3 صور
هتلاحظ ان فية اعمدة شايلة السقف
الاعمدة دى لم تبنى
يعنى مجابوش حجارة وصخر من برة وحطوها فوق بعضها وحشروها عشان تشيل السقف المقوس اللى بدورة متحمل الضغط الهائل للجبل

لا

الاعمدة دى منحوتة من قلب الجبل فى ذات نفس المكان
يعنى الفراعنة لما دخلوا ينحتوا غرفة الدفن فى بطن الجبل كانت عبارة عن كتلة صماء فقاموا بتفريغ المساحة حوالين مواقع الاعمدة عشان يبقى العمود منة فية وبعد كدة قاموا بنحت السقف بالشكل المقوس اللى انت شايفة

مش بس كدة

لا خد عندك اللى جاى

معروف انك كل ما تنزل لتحت وتقرب من مركز الكرة الارضية الحرارة بترتفع ودى مسلمات علمية مفروغ منها

مفيش الكلام دة

انا كنت واقف فى غرفة الدفن والجو جميل جدا ولطيف ومنعش

حالة واحدة بس ممكن تكون فيها المقبرة حر وهيا ان يكون فيها كثافة عالية للسياح فبفعل التنفس بتلاقى حرارة الجو بتزيد شوية

غير كدة الجو زى الفل

خليك ملاحظ ان انا بتكلم عن غرفة دفن على عمق 33 طابق تحت سطح الارض وبزاوية ميل 35 درجة بالسالب تقريبا

وقفت اتامل المقبرة وانا عمال اتخيل العمال والمهندسين الفراعنة وهما شغالين على قدم وساق فى المقبرة ومش عايز اطلع من المقبرة لكن الرغبة فى تغطية ورؤية بافى المقابر هيا اللى اجبرتنى انى اطلع من المقبرة
واضطريت استريح 3 مرات وانا طالع وخصوصا انى كنت شايل بنتى على كتفى

وطلعت من المقبرة

ودخلت غيرها

ودخلت غيرها

خلى بالك ان التذكرة ام 3ج بتدخلك 3 مقابر وانت داخل كل مقبرة الحارس بيخرمها خرم واحد ولما التذكرة تتخرم 3 مرات يبقى كدة انتهت

وانت ممكن تقطع تذاكر العدد اللى انت عايزة طالما فيك صحة تنزل وتطلع المقابر

خلى بالك برضوا من حاجة تانية ان انت غالبا ممكن تقضى اليوم كلة فى وادى الملوك فانت اعمل زى ما انا عملت .......خد معاك زجاجتين مياة وبعض البسكويت لان مفيش كافتريا هناك غير عند الباركن بتاع العربيات
وعشان تشترى زجاجة مية لازم ترجع للمكان اللى ركنت فية العربية يعنى على بعد حوالى كيلو

دى حاجة

الحاجة التانية انك حاول متشيلش اى حاجة فى ايدك لان نزول المقابر والطلوع منها هيرهقك وحطها فى شنطة على ضهرك

وكملنا المسيرة فى المقابر نزولا وطلوعا

لحد انتصاف اليوم
وكنا تعبنا
قعدنا على السور المجاور للاستراحة لالتقاط الانفاس جنب مقبرة تحتمس الثالث اصعب المقابر فى الدخول
وسالت بنتى ملك تطلعى مع بابا ولا تستنى مع ماما
لقيتها محتارة ومش عارفة تاخد قرار
تطلع معايا
ولا تلعب بالتذاكر اللى فى ايديها




قلتلها طيب على ما تاخدى قرار تعالى نقعد فى الاستراحة شوية
يدوب قعدنا ناخد نفسنا ومفيش دقيقتين ولقيتها دخلت فى نوم عميق




راجعت التذاكر اللى معايا كلهم ودورت على تذكرة لسة فيها خرم واحد
عشان ادخل بية مقبرة تحتمس الثالث اللى هي غريبة شوية فى دخلتها لانها الوحيدة اللى مدخلها مرتفع عن سطح الارض




لقيت تذكرة لسة فيها مقبرة خدتها وطلعت على مقبرة تحتمس الثالث
اللى احنا عشان نوصلها لازم نطلع لها بسلم حديدى










بس للاسف الشديد لقيتها مقفولة
فجبت الصورتين دول من النت للمقبرة





بكدة ابقى خلصت الجزء التانى من الرحلة

ونلتقى فى الجزء التالت

ونبدا الجزء التالت وهو زيارة لمعبد الاقصر اللى فى قلب مدينة الاقصر فى البر الشرقى






مبدئيا المعبد موجود فى وسط البلد يعنى مش محتاج مواصلات وتذكرة دخولة على ما اذكر كانت 3ج
ومواعيدة من 8 صباحا الى 9 مساء

والصور اللى جاية بالترتيب كتالى

الاولى صورة تخيليلة من اعلى للمعبد وقت بناءة ايام الفراعنة
التانية صورة تخيلية لواجهة المعبد وقت بناءة
التالتة صورة حقيقية لواجهة المعبد التقطت 1880 تقريبا
الرابعة صورة حقيقية لواجهة المعبدفى بداية القرن الماضى من الناحية اليسرى ونلاحظ الزحف العمرانى عليها وقتها التقطت 1900 تقريبا
الخامسة صورة لواجهة المعبد من الجانب الايسر التقطت 1901
السادسة صورة واجهة المعبد حاليا

والفيديو اللى تحت الصور دة من تصويرى لواجهة المعبد


















بعد كدة بتدخل فناء رمسيس التانى
وهتلاقى على شمالك وانت داخل جزء من مسجد ابو الحجاج داخل فى المعبد وسبب وجود المسجد فوق جزء من المعبد هو ان الاثار الفرعونية زمان
كانت مهملة جدا وكانت الاقصر عبارة عن قرية صغيرة فى الصعيد فجاء احد الرجال الصالحين وهو الصوفى يوسف بن عبد الرحيم بن يوسف بن عيسى الزاهد وشهرتة ابو الحجاج
وبنى المسجد سنة 658 هـ (1286م) فوق جزء من المعبد ومن يومها وهو على هذا الحال

وعشان تبقى متخيل انا هحط لك صورة تخيلية لكامل المعبد من فوق وهتلاقينى محدد الجزء اللى تم بناء المسجد علية على التصميم الاصلى وتحتها صورة جوية للمسجد فى الوقت الحالى








والصور التالية بالترتيب
الاولى صورة من الداخل للخارج وهتلاقى فيها مسجد او الحجاج على اليمين فوق وضهر واجهة المعبد فى وشك
التانية صورة لنهاية الفناء وهتلاقى فية تمثالين لرمسس التانى
والفيديو اللى تحتهم للفناء نفسة







بعد كدة بتدخل على بهو الاعمدة وهو عبارة عن بهو مستطيل يوجد به صفان من الأعمدة
وبكل صف سبعة أعمدة ضخمة يبلغ ارتفاع العمود الواحد 18 متراً
اى ما يعادل 5 طوابق ارتفاع
والصور التالية بالترتيب
الاولى تخيليلة للبهو وقت بناءة ايام الفراعنة
التانية صورة من اوائل القرن الماضى
التالتة صورة بالليل حاليا








وبعد كدة بتعدى من بهو الاعمدة وتوصل لنهايتة والصور التالية من نهاية البهو كالتالى
الاولى قديمة التقطت سنة 1900
التانية قديمة اثناء اعمال الترميم فى المعبد
التالتة من نفس الزاوية فى الوقت الحالى بالنهار
الرابعة من نفس الزاوية فى الوقت الحالى بالليل
وبعد كدة فيديو لبهو الاعمدة













وبعدكدة بتدخل فناء امنحوتب التالت
وهو عبارة عن فناء ضخم تحيط به الاعمدة من 3 جهات
وعددهم 64 عمود

والصور التالية كالتالى
الاولى تخيلية للفناء وقت بناءة ايام الفراعنة
التانية صورة خارجية التقطت للبهو من على النيل سنة 1875
التالتة صورة تانية لنفس البهو وفى نفس الزمن لكن من زاوية تانية
الرباعة والخامسة التقطها انا بالنهار
السادسة لنفس الفناء التقطتها انا بالليل
والفيديو اللى تحتهم للفناء دة بالنهار

















وبعد كدة بتدخل على منطقة قدس الاقداس ودة مدخلها




بعد ما تخلص المعبد وترجع تانى للمدخل الرئيسى هتلاقى فى وشك طريق الكباش
ودة المفروض انة واصل بين معبد الاقصر ومعبد الكرنك ودة قصتة انة كان معمول لتسير به المواكب المقدسة للملوك والآلهة في احتفالات اعياد الاوبت من كل عام فكان يسير الملك يتقدمه علية القوم من الوزراء وكبار الكهنة ورجال الدولة خلف الزوارق المقدسة التي كانت تحمل تماثيل الآلهة‏,‏ بينما يصطف أبناء الشعب علي جانبي الطريق يرقصون ويلعبون في بهجة وسعاده
والصور التالية كالتالى
الاولى تخيلية لشكل الموكب ايام الفراعنة
التانية صورتة حاليا بالنهار
التالتة صورتة بالليل من نهايتة













بعد ما خلصت معبد الاقصر رحت متحف التحنيط وهو قريب جدا من معبد الاقصر حوالى 500 متر ومواعيد عملة من 9 صباحا الى1 ظهرا والتذكرة على ما اذكر كانت ب3ج او 4ج



ودة الجزء الرابع وهيكون عن معبد الدير البحرى (حتشبسوت) فى البر الغربى فى الاقصر ووادى الملكات

الطريق لية من وسط المدينة سهل لو انت معاك العربية هتاخد كوبرى الاقصر اللى على النيل وتعدى علية طوالى وفى نهايتة هتلاقى اتجاة اجبارى يمين ويسار
هتاخد اليمين وتفضل ماشى علطول مسافة حوالى 8 او 10 كيلو لحد ما تلاقى كمين نقطة شرطة القرنة هتخش شمال فى الشارع الواسع وهتمشى بتاع كيلو ونص لحد ما توصل التقاطع اللى بيسموة
التفتيش ودة فية شبابيك لقطع التذاكر بتاعة معبد الرامسيوم ومدينة هابو

هتمشى يمين بتاع 500 متر وهتاخد اول شمال وتمشى فية بتاع نص كيلو هتلاقى معبد حتشبسوت فى وشك ودى خريطة تفصيلية



بتقطع تذكرة ب2 ج للدير نفسة وتقطع تذكرة ب2ج عشان الطفطف اللى هياخدك للمعبد لو انت مش غاوى تمشى




وانا هتناول الموضوع وكانة رحلة عبر الزمن للدير نفسة

الاول دى صورتة حاليا



ودى صورتة بالليل



بس قبل ما نحكى قصتة لازم تعرف مين هيا الملكة حتشبسوت
الاول دى صورتها الحقيقية كتمثال



ودى صورة تخيلية ليها



المعبد نفسة اتسمى بالدير البحرى لان كان فية جزء منة من المتهدم فية اقام علية المسيحيون ديرا اسمة دير فويب أمون وظل يستخدم كدير للعبادة فترة طويلة حتى جاء بعض علماء الاثار فى بداية القرن المنصرم وازالو الدير فى بحثهم المحموم عن الاثار الفرعونية ومن ساعتها ومعبد حتشبسوت شهرتة الدير البحرى

طيب يلا بينا نبدأ الرحلة عبر الزمن للمعبد
اولا المهندس الفرعونى اللى بنى المعبد اسمة ((سنموت)) ودة كان من عامة الشعب مش من السلالة الحاكمة لكن من شدة اجتهادة ونجاحة فالملكة حتشبسوت اوكلت الية مهمة بناء المعبد بعد ما تدرج فى عدة مناصب فى معبد الكرنك ودى صورتة



المهندس الفرعونى سنموت بدا فى بناء المعبد الجنائزى للملكة جنب معبد منتوحوتوب التانى وفى النص بينهم بيقع معبد تحتمس التالت

بمعنى ابسط ان المعبد وقت ان تم بناءة كان يعتبر جزء من 3 معابد دة كان شكلها


لكن دة شكلها دلوقتى


ودة تقريبا تصميم تخيلى للمعبد وقت بناءة







ونسافر فى الزمن للامام الاف السنوات لنجد اول صورة موثقة لة بعد الاف السنين من الاهمال هيا الصورة التالية والتقطت لة سنة 1875




ونسافر فى الزمن للامام قليلا ونشوف حالتة فى سنة 1895




ونسافر فى الزمن للامام قليلا ونشوف حالتة فى سنة 1902



ونسافر فى الزمن للامام قليلا ونشوف صورتة سنة 1923



ونسافر فى الزمن لامام قليلا ونشوف صورتة فى الاربعينيات مع بداية الترميم



ودى صورتة الحالية



على جدران الدور التانى من المعبد هتلاقى رسومات بتوضح انجازات الملكة حتشبسوت وسفرياتها الخارجية واضحة
ودى بعض الصور المتفرقة للمعبد فى الطابق الاول والتانى والتالت
















بتوصل فى نهايتة فى الطابق الثالث لقدس الاقداس او الغرفة المحرمة والتى كان بيتم فيها عبادة الالة امون ولما توصل ليها هتلاقى الجبل واقف فوق منك بشكل عمودى تماما وعشان اوضح لك مدى هيبة الامر ووقارة انا هرفع صورتين من قدس الاقداس من اسفل لاعلى لدرجة تحس معاها ان الجبل هينزل فوق دماغك

كدة احنا تقريبا غطينا المعبد كلة كمزار سياحى
لكن انا هتكلم عن الملكة حتشبسوت نفسها لانها حدوتة كبيرة

اولا هيا مجرد ما استلمت الحكم شرعت فى انشاء دولة بالمعنى الحرفى للكلمة فامرت بشق الطرق وتشييد المعابد وفتحت التجارة الخارجة مع دول الجوار واعادة بناء الجيش المصرى وتحسين الاحوال الداخلية للبلاد

وفى عهدها ارسلت بعثات الى بلاد بونت (الصومال) للتبادل التجارى معها
البعثة دى منحوتة على جدران المعبد فى الدور التانى على الشمال وانت طالع


وارسلت بعثة الى اسوان لاقتطاع اكبر كتلة حجر جرانيتى فى العالم كتلة واحد ليتم نحت عدة نسخ من مسلتها الشهيرة الى موجودة دلوقتى منها 12 مسلة فى روما، ومسلة في أمريكا " نيويورك"، وتركيا، و2 في باريس



لكن الكتب والتاريخ بيقول ان كان فية بعثة غامضة امرت بها الملكة حتشبسوت الى المحيط الاطلسى ولم يتم الاستفاضة حول هذة البعثة فيتم ذكرها على اقتضاب كجزء من سيرة الملكة وانجازاتها

لكن علشان مكانش معايا مرشد سياحى فمقدرتش اتحقق من صحتها ومن وجودها منحوتة على الجدران

وبالبحث عنها على النت وجدت كلام علماء وباحثين اثار بيقول ان الفراعنة هم اول من عبر المحيط الاطلسى واكتشف امريكا الحالية قبل كريستوفر كولمبس بفترة طويلة جدا لكن لم يتم ذكر زمن او اسم الملك او الملكة اللى حصل الاكتشاف دة فى عهدة

وكلام على ان حضارة المايا واهراماتها هيا من اصل ونسل فرعونى فى الاساس

مش بس كدة

لا

دا فية عالم اثار ومغامر نروييجى اسمة ثور هايردال كان متبنى نظرية ان حضارة المايا فى امريكا اصلهم فراعنة وان الفراعنة اول من وصل الى هناك ودى صورة العالم




ولاثبات نظريتة اطلع تورهايردال على عشرات الرسومات الفرعونية التي تظهر قوارب البردي واحجامها وطريقة صنعها


وبفضل ملاحظته الدقيقة اكتشف ان القوارب الملكية كانت تطلى بالقار كي لا تذوب في الماء.. وفي ابريل 1961بنى قارباً طوله 15متراً بمواصفات فرعونية خالصة اطلق عليه اسم رع (الهة الشمس لدى المصريين).. وتم نقل القارب إلى مراكش في المغرب ومن هناك قرر عبور المحيط الأطلسي إلى أمريكا.. وقد رافقه في هذه الرحلة مجموعة غريبة من سبعة أشخاص ـ نرويجي وأمريكي وتشادي ومكسيكي وايطالي وروسي ومهندس مصري يدعى جورج سيريال.





ومنذ اليوم الأول بدا واضحاً أن القارب سينشطر حين يهيج الموج وتغضب الرياح.. وبعد خمس وعشرين يوماً انقلب تماماً وفقدوا معظم المؤونة والطعام.. ورغم ان القارب اصبح مشبعاً بالمياه إلا انه تجاوز نصف المسافة إلى أمريكا.



. وقبل وصوله إلى الشاطئ بستمائة ميل هبت عاصفة عاتية فككته تماماً.. أما الأصدقاء السبعة فقد نفخوا قارباً مطاطياً ووصلوا بسلام!!



* وبعد فشل هذه المحاولة قرر تور هايردال بناء قارب جديد اطلق عليه اسم (رع 2) بعد الاستعانة بالرسومات الهندسية الفرعونية الاصلية للقارب



.. وبدأ رحلته في السنة التالية مع نفس المجموعة ـ باستثناء عبدالله التشادي الذي حل محله ياباني يدعى كاما اوهارا.. وهذه المرة استفاد تورهايردال من التجربة السابقة وبنى مركباً أكبر واستعان بوسائل ملاحة متقدمة



.. ورغم ان القارب تحول في النهاية إلى (كومة قش) إلا انه وصل على أي حال إلى أمريكا بعد 57يوماً.. هذه الرحلة استحوذت حينها على اهتمام وسائل الإعلام وأثبتت ان وصول الفراعنة إلى أمريكا أمر منطقي ومعقول!!




ودة كان مسار الرحلة اللى قام بيها مستغلا التيارات البحرية على قارب فرعونى التصميم والتنفيذ بالكامل




والمركب اللى عمل بية الرحلة موجود فى متحف كون تيكي فى أوسلو فى النرويج كنوع من التكريم لة




بس انا علشان مكانش معايا مرشد سياحى وكان معايا الزوجة والاولاد والجو حر فمقدرتش افحص كل متر على جدران المعبد واتاكد من الرحلة دى لانها لو حصلت يبقى اكيد الفراعنة وثقوها على جدران المعبد

الجدير بالاهتمام انة توجد في معابد الأنكا في البيرو رسومات تظهر قوارب مصنوعة من البردي (وهو ورق ينبت حول النيل) يقودها بحارة بلباس الفراعنة

وكمان في عام 1914اكتشف البروفيسور (إم جونزالس) تمثالين فرعونيين في بلدة اكيجالتا المكسيكية.. تمثالين يتطابقان مع النموذج الفرعوني في الملامح وطريقة الجلوس ولبس العمامة.. وكان هذا الاكتشاف أول من لفت الانتباه إلى احتمال وصول الفراعنة إلى القارة الأمريكية قبل آلاف السنين


لكن مكانش فية فرصة اتاكد من اصل الفكرة وندمت بعدها لما رجعت من الاقصر

وبقيت الفكرة معلقة لا استطيع تاكيدها او نفيها

هل الفراعنة فعلا وصلوا امريكا قبل كريستوفر كولمبس بالاف السنوات

وهل صحيح ان حضارة المايا باهراماتها هيا من اصل ونسل فرعونى

مش عارف بصراحة

كملت فسحتى فى المعبد فى كل الارجاء والتقطت بعض الصور التذكارية والفيديو وانصرفت





خلصنا معبد حتشبسوت او الدير البحرى ورحنا على وادى الملكات
وهو قريب من حتشبسوت المسافة بينهم تقريبا كيلو او اتنين

ركنا العربية فى الباركن



وقطعنا تذاكر ب2ج ودخلنا مشى




العدد الرسمى للمقابر فى الوادى 44 لكن اللى مفتوح للجمهور وشغال 3 مقابر
سعر التذكرة 2ج وبتكفيك للـــ3 مقابر

الميزة الوحيدة ان مقابر وادى الملكات بكامل الوانها وزاهية لكنها غير عميقة كبعض مقابر وادى الملوك
ودى صورتنا بعد ما دخلنا احدى المقابر وبنتى ملك لسة مترددة تدخل ولا لا رغم انها دخلت معايا مقابر اعمق بمراحل فى وادى الملوك




وللمحافظة على الالوان كما هيا اقامت هيئة الاثار حاجز زجاجى بين الزوار والحائط وهتلاقية واضح فى الصور ودى مجموعة صور لينا فى الداخل وهتلاحظ الالوان الزاهية

















بكدة يبقى وصلنا لنهاية الجزء الرابع

واللى اللقاء فى الجزء الخامس