رحلتي الأوروبية الجميله يناير 2015

ماطولنا في روتردام كثير لان ماتستاهل حد يضيع وقته فيها وماانصح حد يروح لها رجعنا امستردام الجميله قعدنا في لاونج الفندق نشرب كوفي واحلى شي ان في نت نريح شوي ومع السوشل ميديا والعرب المسافرون واكيد سعادتي معاكم اكبر في الاونج يحطون لكم وجبات اشوف الاجانب ياكلون فيه يوفرون وشي ببلاش فطور غدا عشا مب مثلنا كنا انروح نتعشا برى بس احنا كنا نطلع علشان نتمشى ونشوف المدينه اكثر من سالفة العشا هم شبعانين من هالمناظر الاكل كان اوكي تحصلون شي يناسبنا ممكن اللي يحب يوفر يستغل هذا المكان







محل متخصص في الوافل خيالي ومقابله مطعم ايطالي اللي يشتغلون فيه عرب تعشينا فيه وهو غير عن اللي جنب فندقنا هذا ثاني وكان جيد والسعر رخيييييص














وهذا الجبس اللذيذ










مادري ليش الصور كذا طالعه














الساعه كانت 9 وشي قريب 10 والمحلات فاتحه وناس وحياه وحركه حبيت امستردام غير عن المدن الاوروبية الثانيه اللي كل شي فيها يسكر بدري استغربت ان في شوبنق في هذا الوقت وناس تمشي وحيااااه مشينا مشي مش طبيعي في هاذي الليله وتمنيت اني ارجع لها في يوم



تذكرت ان في مطعم هندي قريب فندقنا كانوا بعد يشتغلون فيه سيك جينا عطانا المنيو وراح جاو ناس بعدنا عطاهم المنيو وراح ياخذ طلبهم مع انهم جاين عقبنا وياخذ طلب ناس غيرنا واحنا مطنشين لنا اتقولون مزهريات مب بشر عصب زوجي قالي قومي نطلع قلة ادب مطنشيين لنا والاجانب يركضون لهم بس احس اكلهم اوكي لان عندهم ناس وحتى يوم قمنا مافتكروا او بينوا اي اهتمام ،،، وفي مطعم هندي تعشينا فيه مره معفس عفيسه مش طبيعيه كراتين طايحه قواطي كلينكس اشكثر طايحه الخضره فوق الفريزر يقطعونها الفريزر عندنا قريب من طاولتنا شي فضيع من اكثر المطاعم المعفسه اللي شفتها في حياتي خخخخخ مقدر اوصف العفيسه ماحس راح اشوف مطعم نفسه في حياتي خخخخخخ صورته انا متاكده بس مادري وين راحت الصور اللي يشتغلون مراه وزوجها والظاهر اعيالها طيبين بس عيبهم هالعفيسه والاكل كان عادي ماانصح بالمطاعم الهنديه في امستردام اقل من عاديه وغاليه ،، فالليل تحصلون مطاعم اكثر من وقت الغدا لكن السعر غالي يضربون ضربتهم ناسيه بكم بس اتذكر ان السعر مايستاهل ابدا


والحين راح اتكلم عن امستردام اللي كثر الكلام عنها ومن كثر الكلام صرنا نخاف نروح لها بس لازم اوضح هالشي لما اخترنا امستردام الكل كان يقول اشتبون فيها بلاد وصخه ومن هالكلام راح اقول اللي انا شفته ويمكن رايي يخالف غيركم


في نظري امستردام مثلها مثل اي دوله اورويه كلهم فيهم محلات قذره صور خليعه بنات ليل الله يكرمكم هالمناظر متواجده كل اوروبا وحتى اسيا ويمكن دول العالم وهالامور طبيعيه جدا عندهم


وانا اشوف تايلاند اقذر من امستردام واغلب الخليجين طايحين في تايلاند ويحبونها ويروحون لها علاج وناس سياحه استغرب انهم يروحون لها ويسبون امستردام ،،، بقولكم ليش اشوفها هي اقذر للي راح تايلاند من قبل انا رحت لها 3 مرات الله يعزكم القذاره وبنات الليل منتشرين بصوره كبيره ومقززه ومقرفه يتعلقون في اي حد مار في الشارع حتى ابوي كان معاي ماسلم منهم وشياب كبار في السن بعصاتهم يكونون جاين علاج بعد يجونهم اشكثر اشوف ناس تسبهم ادزهم ناس ميتين من الجوع يبون فلوس بأي طريقه


اما في امستردام في اماكن مخصصه لهم مباني خاصه تكون مولعه بالليت الاحمر وهم داخلها وهالمباني منتشره في كل امستردام اذا كنتوا تمشون في الشارع ممكن تلفووون او تروحون الشارع المجاور وهالنوعيه من البنات منتشره في كل اوروبا حتى في هامبورغ حصلنا وفي فيينا ماعرف ليش الناس خاصين هولندا بس بالكلام هذا اشوف القذاره وهالامور والصور والمحلات القذره في كل اوروبا مب بس هولندا والمباني الحمرا اللي قلت لكم عنها تكون بهاذي الطريقه





على فكره ممنوع التصووير وعليهم رقابه وكيمرات تصور اللي يجونهم انا صورت لان ماكان في حد هم بالعاده اذا موجودين ماتشوفون هالستاره البيضا تحصلونهم ورا القزاز كنهم بترينات وكل القصد من هالصوره علشان بس تعرفون اذا رحتوا امستردام تتحاشون هاذي المباني ومحد يمشي جنبها خصوصا اذا معاكم اعيالكم ،،،


واهم مافي الموضوع ان محد يتعلق فيكم او يجننكم او حد يعترض طريقكم مثل تايلاند وسالفة المخدرات للامانه ماحسيت فيها وماشفت ناس تضرب ابر مثل ماسمعت ابدا ماحسيت بالمخدرات بالشكل اللي قالوا عنه الكل يدخن مثلهم مثل اي شعب اوروبي الاوروبين مدخنين بشراهه ماتعرفون اذا هي زقاير طبيعيه او حشيش ماحسيت في فرق بينها وبين الدول الاوروبيه وعلى فكره نسبة الامان فيها كبيرررررره مستحيل حد يعترض لكم او يسوي لكم شي وزوجي قالي كلمه اللي يدور هالاشيا حتى في بلادنا راح يحصلها وفي اكثر مكان تدين بعد راح يحصل


وعلى ان الشعب الهولندي كل شي عندهم بلد حريه من قلب مافي شي ممنوع عندهم وعند كل اوروبا الا انهم شعب جدا محترم ماشفت اي مناظر مقززه في الشارع شعب في حاله طيب خدوم مافيهم عنصريه بلاد رخيصه من ناحية السياحه المطاعم الفنادق والاهم انها دوله جميله جدا وسياحيه من الدرجه الاولى

والحين باخذكم معاي الى براغ


بتقولون لي ليه براغ اتذكر كنا رايحين دبي من سنتين تقريبا وكنت اول مره اسافر علىها الاماراتيه وهي كانت اخر مره مارجعت سافرت وكان قدام كرسينا كرسي المضيفه اللي تقعد عليه وقت الاقلاع والهبوط وقلت فرصه نسولف وياها وناخذ منها معلومات عن دول العالم وسألتها شنو اكثر مكان حبيتيه في كل سفراتك الا تقولي براغ قلت لها ليش براغ غريبه قالت هالبلد مش طبيعيه خصوصا وقت الكريسماس كانت تقول اعشق السفر لها ومن ذاك الوقت دخلت براغ في راسي من كثر ماامدحتها لنا وقلنا انا وزوجي لازم في يوم نجرب ونروح لها خصوصا اني قليل جدا اسمع عن هالبلد احسها مشهوره عند الكويتين التشيك اكثر منا واكثر منطقه مشهوره منطقة المصحات والعلاج اكثر من براغ


من هامبورغ رحنا لها كانت تبعد تقريبا 3 ساعات وشوي رحله سريعه وحلووه ماحسينا فيها ،،، طريق براغ كان فيه خضار عكس طريق المانيا مع انه شتا وكان لون الخضره يجنن اتوقع في الصيف طبيعة التشيك رهيبه واصلا الكل يقول هالكلام طبيعتها خيال ،،، اتذكر زوجي حط في القارمن اسرع طريق وكنا تونا طلعنا من دريسدن الالمانيه ماكانت تبعد عنها كثير دخلنا القارمن طريق متعرج بس فضيع بين طبيعه وفي كم بيت من هالبيوت المكوخه المكان طبيعي ميه بالميه الا تخيلوا اطلعت لنا ثعالب بسم الله من اعيونهم في هالظلام اشلون تولع
اشكالهم اطير القلب كنت اقول لزوجي اهل هالبيوت مايخافون من هالثعالب مايخافون على اعيالهم صادفنا اكثر من ثعلب في هالخط ومر علينا واحد على سيكل يمشي عكسنا وجاي صعود الطريق كلش ماكان سهل اشلون يصعد فوووق شي يهد الحيل واحنا كنا نزول وحزت مغربيات ومافي بشر الكل بسيارته والدنيا صارت ظلام للاسف دخلنا براغ والدنيا خلاص بدت اتليل والجو كان مطر مخلوط بثلج كان قوووي وبرد قارص ومافي ناس وفي غابه والله فيلم مرعب اقول لزوجي ياقو قلبه ماانسى هالرجال مستحيل انساه


وهاذي كانت درجة الحراره



هذا المنظر الوحيد اللي صورته اول مادخلنا براغ





واول مادخلنا براغ حسيت مب هي براغ اللي انا اعرفها وشفت صورها اقول لزوجي لا براغ مب كذا اللي شفتها صور غير وبديت احس بإحباط وضيقتي بينت علي وكنت مصدومه اللي شفته غيررر عن الصور هذا الشعور بس كان اول ليله ماكنت فاهمه براغ وبتعرفون السالفه عقب


هذا الفندق اللي سكناه في براغ وكان مقابله بالضبط فندق هيلون
Booking.com: ظپظ†ط¯ظ‚ ط¨ط±ط§ط؛ ظ…ط§ط±ظٹظˆطھ - ط¨ط±ط§ط؛, ط§ظ„طھط´ظٹظƒ


سبب اختيارنا له ماعرفنا وين نسكن قام زوجي قالي رفيقه دوم يجي براغ وقال بكلمه اكيد هو خبره وهو نصحه بلفندق هذا لما وصلنا الفندق وشفت المنطقه الاحباط زاد وجاني شعور ابي اقول لزوجي خلاص خلنا ننكسل ونروح لبراغ اللي شفت صورها مب هاذي اللي انا شفتها وكنت متحمسه لها وجاني شعور ثاني بعد مانضيع المده فيها نروح اي مكان ثاني ماكنت حابه اضيع وقت في منطقه ماتكون حلوه بس سكت ماحبيت اضايق زوجي واكدره وقلت لازم ادور براغ اللي شفتها


سلسلة فنادق الماريوت تحسونها قديمه في كل شي صحيح راقيه بس على قدم هم كذا ستايلهم ومب اول مره اسكن في الماريوت صرت اعرف اشلون شكل الغرف لكن للامانه الفندق ابدا مب شييييين ومن حظنا بعد عطونا لاونج مع الغرفه وكان يجنن اللاونج في هذا الفندق بعد كم مره كنت اقعد فيه جدا مريح واكله حلووو الفندق كان اووكي والموقع بعد اوكي بس انا تسرعت وبقولكم ليش تسرعت


صلينا المغرب والعشا وطلعنا نشوف براغ وزاد الاحباط اكثر واكثر اقول لزوجي في شي غلط براغ اللي شفتها مب هاذي صرت اروح وارد على هالسالفه انا حنانه من قلب اذا ماعجبني شي خخخخ ،،، لما تطلعون من الماريوت تلفون على يدكم اليسار وتمشون مسافة 6 او 7 دقايق وتكونون بالسنتر محلاتهم اتجنن حبيت الشوبنق عندهم براغ رخيصه رخص مش طبيعي من كل النواحي شوبنق مطاعم فنادق مواصالات ولايفوتكم محل الجواتي الله يعزكم على يدكم اليمين بتحصلونه على طول اول ماتطلعون من الفندق شريت منهم جوتي مش طبيعي والله مرررررريح شنو ارتحت عليه الالم اللي كنت حاسته في امستردام راح الظاهر المشكله كانت في جوتيي الله يكرمكم انصحكم اخذوا الجواتي من اوروبا مب اللي عندنا اي كلام والله المحل صدق غالي بس شي مضمون ويعيش،،،


شفنا صور قديمه حاطينها على الطوفه من سنييين قديمه اتوقع ايام الحرب العالميه اشكال الناس في هذا الشارع وهم طايحين ميتين واشلون كان الوضع ايام الحرب واشكال الناس وهم كلم طالعين يحيون العسكر ووقت المظاهرات اتوقع صور عجيبه تعيشكم الجو بس مادري ليش ماصورتها راح عن بالي


المهم فكرنا وين نتعشا قعدنا اندور مطعم يناسبنا ماااااافي عقب حصلنا كشك في الشارع اتراك حتى مافي كراسي خذ سندويجتك وكلها بالشارع في هالبرد اللي يقطع القلب صعب جدا والمكان شكله وصخ مافي نظافه بيدهم يمسكون كل شي مافي قفاز والسلطه مكشوفه قلت لزوجي لا مانبي ناكل عنده قام بواعيالي قاله تعرف مطعم تركي يكون فيه قعده ويكون قريب قال ايه ودلنا وين ورحنا ووصلنا له اللي يشتغلون في المطعم قاعدين على الكراسي حقت الزباين ومالهم خلق يتحركون وكم واحد منهم يتعشا مطعم الله لايراويكم اي كلام من قلب بس ماقدرت اقول لزوجي شي سكت بكون مصختها لو قلت مابي هالمطعم بعد ولاني ماشفت برى شي يناسبنا والوقت كان متاخر الساعه كانت قريب10 المطعم كان نظام بوفيه وهو يقولك اشتبي احط لك والخيارات الله لايروايكم الاكل مستحيل يكون تركي خذت شوربة عدس علشان تشبعني وعطوني صحن فيه عيش ابي شي بس يسد الجوع قلت لنفسي الحمدالله على النعمه غيري مب محصلين شي ياكلونه قمت وكلت وانا اكل شوي الاحصلت رمشه استخفيت ماااااقدرت حسيت ابي ارجع الله يكرمكم وقعدت اشرب في البيبسي علشان يطير اللوعه على طول قلت لزوجي شبعت ورحنا الفندق وهاذي كانت اول ليله في براغ تحطيم مش طبيعي جاااااني

صحينا الصبح وانا اقول ان شاءالله نظرتي اليوم تتغير واشوف وجه براغ اللي شفته وانجنيت عليه في الصور وتعنينا علشانه ،،، فطرنا في اللاوونج وطلعنا نمشي في السنتر يقولي زوجي هاه مب حلووه براغ وانا اقول ايه حلوه اكيد فرق شكلها في النهار عن الليل لان لما وصلنا لها كانت الدنيا ليل ،، بس عايشه صدمه تعرفون شعور لما تشوفون شي ويطلع شي غير هذا اللي صار معاي وللامانه السنتر كان يجنن بس اللي انا حسيته شعور حد يطلب اورودر ويجيه اوردر ثاني غير عن اللي اطلبه هذا اللي صارلي بس بعدين حبيته لما شفت وجه براغ اللي اعرفه وحبيت مكان فندقنا ارتحت اني شفت شي حقيقي مب كذب


شفت باص سياحي قلت هذا اللي بيخليني اشوف براغ عدل قال زوجي لا باصهم خايس شوفي شكله وشوفي دريشته اشلون شكلها وصخه مب نظيفه ماتحمس لها زادت ضيقتي وامشي بس كذا


زوجي اقترح فكرة ان نلف مع تاكسي ونشوف براغ كلم تاكسي جينا له قال روحوا للتاكسي الثاني نظامهم لازم بالدور اتروح لأول تاكسي شااااااااايب حده ولايعرف انجليزي قاله نبيك تلف فينا مسك دفتر وطالعه الظاهر يشوف وين اماكن سياحيه ويتكلم بلغتهم واحنا يس يس خخخخخ المهم قال اركبوا وركبنا وياه ومشينا مسافه يمكن 20 او 25 دقيقه الا اشوف ملااامح خيااااااليه بدت تطلع لي صرخت اقول لزوجي ايييييه هاذي براغ اللي اعرفها حتى زوجي انبهر وهو استانس بعد ااكثر مني قلنا الحمدالله الصور اللي شفناها مب كذا اطلعت حقيقيه
ونزلنا في هذا المكان الخياااااالي والله مابالغ روعه روعه روعه من جماله اتحسونه حلم خصوصا مع الاجواء الشتويه شي رهيييييييييييييييييييب والحين اخليكم مع الصور ومحد راح يلوموني

















أجمل ستار بكس شفته في حياتي واجمل موقع شي شي بصراحه












































هنا البرد لعب فيينا قلنا لازم نشرب شي حار حصلنا نفس الكوفي شوب صغيرون خشبي حتى بابه غريب اتحسون له مية سنه واكثر في مكان مرتفع والدنيا كانت تثلح شعور ولاأروع وانا اشرب كوفي في هاذي الاجواء الثلجيه والمكان شكله ريفي للاسف ماصورته كنت مندمجه مع المناظر الجميله اللي اشوفها بس صورت اللي طلبناه ماتوقعت في يوم بقعد في مكان نفس هذا الجمال حلم هالمدينه ماتحسونها حقيقه اتحسون مسلسل كرتوني
لما دخلنا حصلنا عجوز يمكن عمرها 75 ولا 80 راعية المطعم مقعدتها على كرسي ومعاها كتب اشكثر عن السياحه في براغ فيها الخير والله مخليه العجوز تترزق في مطعمها لاقعدتوا تجي تسلم عليكم وتكلمكم عن كتابها يحليلها حدها ذوق وانا اكثر شي ذبحني مكياج العجوز حاطه ظل ازرق وروج احمر وبلاشر كاشخه حدها لانها في العمل مش طبيعيه شكلها يجنن مت عليها قلت لزوجي والله مانردها خذ الكتب السياحي وخذناه وعقب عطيناه سياح يبانين لانه ثقل علينا تعب واحنا نشله















































شوفوا جمال الشارع جد جد والله ماابالغ من اجمل المناظر اللي شفتها في اوروبا براغ سحر هذا اللي اقدر اقوله

قررنا نتغدا طلع في وجهنا في هالشارع اللي اتعب وانا اتكلم عن جماله مطعم ايطالي الحلو في الايطالي انه يكون شي مضمون انه حلو مارغريتا بيتزا وباستا احلى شي في اوروبا





هذا الطباخ واتوقع اللي معاه زوجته شنو يطالعونا متخرعين منا واتوقع بسبب حجابي اللي معاه اطالعني وهي كانت اتسوي الببيتزا واطالع زوجي لاشفناها صدت على طول ولاتبتسم اتحسونها خايفه نذبحها ولانسوي لها شي خخخخ











هالراهبه شنو ابتسمت لنا من قلبها يحليلها





في هذا المكان شفنا سياح من اليابان ماتوا علينا انا وزوجي خخخخ ان احنا من قطر وعرب وخذوا فيس بوك زوجي وقالوا لازم نصور صوره جماعيه قلت نو ماحب التصوير ويصرون علي وانا نو نو نو خخخخخ مابغوا يتقنعون اني مابي شوي الا مطرشينها لزوجي على الفيس بوك شنو حمدت ربي لان ارسلوها على صفحته واشكثر عطوه لايكات وهم نفسهم اللي عطيناهم الكتب السياحي اللي خذناه من العجوز افرحوا من قلب فيه











هنا ملكهم يقعد مقر الحكومه شي كذا ناسيه شنو بالضبط وفي هاليوم كان مسكر بس انشوف الحرس من برى يمشون ويطلعون من باب القصر الظاهر ملكهم كان موجود في هذا اليوم والمكان كله مش طبيعي اتعب وانا اتكلم عن جماله مب لازم تدخلون القصر يكفي بس تمشون في هذا المكان وانصح اتروحون هنا من الصبح وتقضون يومكم هناك


اليابانين ذوقييين يعرفون وين يتسيحون




















سبحان ربي اللي خلق كذا جمال

سويت تشيكي بطعم الكراميل يجنن وخفيف انصحكم اتجربونه





لقطه ثانيه للسويت

















سوري ماتبي تتعدل وياي هذا لها تاريخ نسيت شنو













روعه المكان هنا





















































اكمل وياكم بكره ان شاءالله لان النوم بدا يداعب عيوني ،، تصبحون على كل شي تتمنونه يارب

اكمل معاكم عن براغ

احب اقولكم نقطه نسيت اذكرها في الجزء اللي قبل ان هذا المكان السياحي الحلو اللي فيه الجسر والقصر مكانه غير عن مكان فندقنا انا لوكنت عارفه هالمعلومه من قبل ماكان تحبطت وانا اقوله لكم علشان مايصير لكم نفسي

المكان اللي فيه الفنادق بعيد عن هالمكان الحلو المشهوره فيه براغ لازم سياره وفي هذا المكان السياحي ماشفت الا فندق وكان بو ثلاث نجوم او نجمتين وانا انصح ان محد يسكن هناك حتى لوفي فنادق لان مكان فندقنا الماريوت وهيلتون وفي فنادق كثيره جنبهم السنتر فيه كل اللي تبونه من محلات راقيه ومحلات محليه ومحلات بعد رخيصه مطاعم فنادق باصات سياحيه كثيره بالعربي كله حياه حتى بالليل اما هناك مناظر خياليه اكثر من تواجد محلات ومطاعم وحلاته في النهار اتوقع انه ماينفع بالليل


المهم زوجي قال لازم نروح نصلي الظهر والعصر قبل غروب الشمس وكان باقي شي بسيط وتغيب وانا اقوله خلنا نصلي في اي مكان هنا ماكنت ابي اروح من هالمكان الجميل ابد وهو يقول نصلي في فندقنا احسن شعوري في هذا المكان ذكرني باامنيتي لما كنت صغيره اني اعيش في عالم الرسوم المتحركه سالي وجورجي وسانديبل والفتى النبيل عددت لكم كل اللي احبهم ههههههه بالضبط هذا شعوري حسيت ان امنيتي القديمه تحققت كنت طول الوقت حاسه نفسي بعالم الكرتون مش حقيقه روعه روعه روعه لازم تشوفون جمال براغ وانا اعطيها المركز الثاني بعد روما من حيث القدم والاثار

صلينا الظهر والعصر وطلعنا زوجي دخل محل يبي يشتري له اشيا وانا قلت مابي ادخل مابي اضيع على نفسي جمال براغ وجمال الاجواء الشتويه اللي احبها مستانسه بمظلتي وانا واقفه تحت الثلج المخلوط بالمطر شعور يالله مقدر اوصله لكم كنت ذايبه بجمال المكان المهم وانا واقفه جنبي الشارع وانا واقفه قريب الرصيف الا شايب مر جنبي هو بس شافني على حجاب ويقعد يسب فيني ويسوي حركات بوجهه معصب حده حده لدرجه مايبي حتى يقرب مني وهو يمشي لصق في الطوووفه كنه عنكبوت امبين علشاني لصق علشان بس مايقرب مني بالضبط كان كذا وجهه خخخخخخ اول مره احس اني مكروهه بالدرجه هاذي وانا اطالعه وانا فيني الضحكه اللي امبيه شسالفه اشفيه هالشايب الخبيث جاني شعور ان ودي اصفقه بمظلتي خخخخ

المهم جاء الليل وقال زوجي لازم نتعشا واحنا اندور الا مطعم لبناني دخلناه الا حصلنا قرسون عراقي طيب خلوووق جدا جدا قعد يكلمنا عن براغ وعن العراق حسيت انه ماصدق يشوف عرب محتاج يتكلم ويقول عقب احداث باريس صرت وانا طالع وداخل اقول يالله سترك كثير اثرت علينا الحادثه وصرنا نخاف والشعب عنصري واي مكان فيه فقر يعني فيه عنصريه هالشي خلاص تاكدت منه بس مايسون لكم شي اكثر من نظرات وممكن سبه وهو رايح غير كذا مافي شي ومب الكل يتعرض في ناس تتعرض وناس لا اما اذا كانت المنطقه غنيه يكون شعبها متفتح مع الشعوب الثانيه مش همجي كثير استفدنا من كلام هالعراقي وفي كل سفره اوروبيه اكتسب خبره وثقافه اكثر





والمشاوي على اساس انها لشخصين جاتنا كذا والله يعز النعمه من الثوووم على طول قلنا لهم يشلونه



المشاوي كانت عاديه جدا وقلت الحمدالله انها كانت شوي بس المقبلات حدها لذيذه


وبما ان اكلنا كان خفيف قلنا تخربها ونحلي



كل شي عندهم شووي


وبعدها الى الفندق ونووووم


وفي صباح اخر يوم لنا في براغ نزلنا لوبي الفندق اقترحت علينا اللي في اللوبي نخلي سايق الفندق يدور فينا قالي زوجي هاه اشرايج قلت قداااااام والسعر كان يجنن اتوقع الساعه بميه او اقل بشوي نسيت بالضبط كم والسياره كانت مرسيدس بس شفتها قلت الحمدالله مارحنا مع الباص السياحي اكيد السياره اللي من الفندق افضل ركب معانا دريولنا قعد يدور فينا ويروينا براغ شوي الا قال بوديكم مكان احلى بار وسكي من نوع فاخر الا زوجي قال لالا مانشرب خمر خخخخخ قال اووووه ماتشربون بس هذا نوع مافي مثله اي سايح يجي براغ الا يجربه مشهور قال لانجربه ولاشي احنا مسلميين مانشرب الاقال اشلون ماتشربون الشراب شي حو يعيشك جووو اتحس بسعاده حتى اذا تقعدون الصبح اتحسون بنشوه التفت لزوجي اقوله بس هذا اللي بيخربنا ترى انا وحده عندي استعداد خخخخخخخخخخ زوجي على طول عطاني نظره فهمت انا ان قصده كذا خخخخخخ المهم قالنا القصر اللي امس انتو رحتوا له كان مسكر اليوم مفتوح لازم تدخلونه مايصير ماتدخلونه وماتشوفونه قلنا اوكي المهم ان البرد كان قااااااااااااااااااااااااااااااااااااااااااااااتل مش طبيعي بس دخلنا القصر شوي كنا في حوش القصر مادخلنا داخل وكل مكان علشان تدخلون تشوفون التراث اللي داخله لازم قطع تذكره قال زوجي مانبي ندخل ونضيع وقتنا واحنا مب عارفين شسالفه خلينا اندور برى افضل وكان احسن قرار
















هذا مايتحرك فيه الا عويناته








الحرس وهم يمشون طالعين من القصر







قررنا نتمشى على رجولنا الى الجسر والجسر بني في عهد الملك تشارلز الرابع في القرن 14
وهو من اشهر المعالم السياحيه في براغ (هالمعلومه منقوله من اخوي القطري شكرا لك )


The Charles Bridge in Prague: A Podium for Ceremony | Mittelalter

منظر والله ولااحلى خيالي حلم



























بعدها ركبنا مع سايقنا وقلنا له شكرا على هالجوله الجميييييله وكنا رايحين صوب منطقتنا سأله زوجي اذا يعرف مطعم هندي قريب من فندقنا ويكون حلو علشان ينزلنا ويرح قال فيه ويبعد تقريبا عشر دقايق او ربع ساعه مشي من فندقنا لما نزلنا اطلعت بعد مدينه قديمه وشكلها يجننننن وقريب من عندنا ولادرينا عنها وشفت فندق الانتركونتنتال حسيت موقعه حلووو بس ام عيسى اتقول ان موقعه ماعجبها وهي سبق اسكنته

هذا هو المطعم وانا اشوفه من الذ المطاعم الهنديه اللي مرت علي اكله يجنن انصحكم فييييه والسعر بلااااااااش ميه وشي شي كذا





وهذا كان طلبنا



هذا هو عنوان المطعم واسمه






وعناقيد الربيع حبيبة قلبي اطلبت مني اصور لها الشوز حقي الله يكرمكم اللي شريته من براغ رهيييييب من لبسته حسيت بالعافيه والالم اللي متعبني من جيت اوروبا راح انصحكم تشترون شوزاتكم من اوروبا اللي عندنا اغلبها مش مريحه وهاذي الصوره لعيونها





وانتهى تقريري البراغي اتمنى انه عجبكم وانه عطاكم صوره عن براغ وكان مفيد وراح اتكلم عن براغ اللي شفتها


الاشيا الايجابيه

حدهاجميييييله والمناظر اللي عندهم رهيبه كل شي قديم اثري اجدد مباني عمرها فوق الميه رخص مش طبيعي في المطاعم الاسواق الاماكن السياحيه تنفع للناس اللي ميزانيتهم قليله ،، مليانه مزارات للسياحه بس احنا مامدانا الوقت نروح كل الاماكن واسوقها حلوووه واسعار الاسواق بعد رخيصه

السلبيات

اول سلبيه وانا اعتبرها مهمه مايحبون المسلمين نسبه كبيره كانت اطالعني بحتقار احنا البنات نتعرض للعنصريه اكثر من الشباب لان لوشاب يمشي بروحه محد راح يعرف انه مسلم اما لو حد من هله معاه اكيد بيعرفون واثنين اللي سبوني او ثلاثه تقريبا بس

انا وانا بحجاب بس بدون نقاب وسواد وتعرضت للنظرات وكم موقف عنصري كيف اللي يلبسون اسود كامل ونقاب علشان كذا ماانصح اللي يلبسون نقابات يروحون لها لانهم مايحبون المسلمين واللي يحب يروح لازم مايفتكر في نظرات الاحتقار او الكلمات اللي ممكن يقطونها ،،، اهل النقابات افضل لهم يروحون الاماكن اللي متعوده عليهم واللي مليانه سياح خليجين مثل النمسا لندن سويسرا ليه انا قلت هالشي علشان محد يضايق عليهم وتكتمل وناستهم اما اماكن يندر فيها تواجد المسلمين والسياح الخليجين وماعندهم خلفيه عن النقابات ولا عن لبسنا الا في الكريكاتير في جرايدهم ابدا ماانصحهم خصوصا بعد حادثة باريس وداعش الكره صار لنا كبيررررررر وحسيت بالشي هذا في سفرتي هاذي اكثر من اي سفره لاني رحت مباشره بعد سالفة باريس الشعوب كارهتنا مش الكل اكيد بس نسبه كبيره لازم ماتجازفون باماكن يندر فيها تواجد الخليجين

الشي الثاني قلة تواجد المطاعم اللي تناسبنا ماشفت الا هاللبناني والهندي وفي ايطالي وباقي المطاعم متفررررقه يبيلها دواره عدل واكيد اللي بيدور عدل بيحصل

وبس

اتمنى تقريري كان مفيد ويفيد كل شخص ناوي على براغ واي استسفسار انا في الخدمه


تحياتي لكم