كل انسان يصبح شاعرا اذا لامس قلبه الحب - اليونان

منو منا ما يعرف بلاد الفلاسفه











بلاد فيثاغورس - كزينوفانيس - افلاطون - ارسطو - سقراط والخ من الفلاسفه


انها اليونان الدولة الاغريقية









فمن اقوال افلاطون " محك الرجال صغائر الاعمال "


" نحن مجانين اذا لم نستطع ان نفكر ومتعصبون اذا لم نرد ان نفكر وعبيد اذا لم نجرؤ ان نفكر "


" كل انسان يصبح شاعرا اذا لامس قلبه الحب "


وانا اقول لافلاطون لامس قلبي الحب من اليونان بس مااعرف اشعر




ومن اقوال ارسطو " هناك اشخاص يدخلون حياتنا فجأه ويخرجون منها فجأه وتعبت من المفاجأه ونزلت دمعتي "




ومن اقوال سقراط " الذكاء يحول القبح جمالا في حين لايستطيع الجمال اصلاح الجهل "




من بعد هالاقوال ماراح ابتدي في النبذه والمعلومات من الحين في كل مكان ازور راح اكتب نبذه ومعلومات عن الوجهه يعني في كل جزء راح احط لكم كل شي ..


والحين ابتدي معاكم بتقريري المتواضع


اليونان كانت فكره في بالي من جم سنة بس ماكنت محصله اللي يشجع ويروح معاي واهي وحده من الدول المهمه اللي كنت اتمنى ازورها


من تقريبا شهر 11/2014 او 10 كنت مخططه وحاطة في بالي انه لازم اروح اليونان بسنة 2015 وطبعا اذا الله كتبلي هالشي


والحمدلله وتحققت السفره لكن بعد عدة تردد ات مو بسبب قلة المواضيع او المعلومات عنها لا بالعكس هذا كان دافع لي اني اروح وحتى لو ماعندي معلومات وايده السبب كانت وحده من المجندات واللي اهي اختي صارت لها مشكلة مع دوامها فقلت انخليها على عطلة العيد وكنسلت حجوزات الفنادق واشوه كانت فري كانسليشن من غير خصم الا التذاكر ماغيرتهم ولاكسنلتهم ماادري ليش


بعد الشد والجذب مع اختي وداومها انتصرت اختي هههه وتمت الرحلة مثل ماكنا متفقين عليها بس ها في مشكلة اني كنسلت الفنادق والاسعار ارتفعت وفنادق فل
وهذا الحجي كان في اخر ابريل يعني مابقى شي واتم يمكن اسبوع انا بين السايتات للفنادق واحسب وارتب للرحلة والحجوزات والحمدلله تمت الحجوزات والترتيبات على مايرام


وبعدها جهزنا شنو نبي للسفره وبما انها صيفيه اكيد بتكون خفيفه بالوزن


وعرفنا ان جوها في هالوقت حلو وزين مو حار لان الصيف عندهم حار وشمسهم تحرق حتى وقتنا في النهار كان حر بس باليل وايد حلوو


الفـــــــــيزا


طبعا شنغن


عبيت الابليكيشن وخذيت الحجوزات والتأمين وحطيت لي موعد كان بشهر 4
رحنا المكتب ومكانهم في الكويت :


مكان البريطانية القديم


مقابل بنك الكويت المركزي - المباركية - مجمع البنوان ( شارع علي السالم )


وتضم كل من : النمسا - سويسرا - اسبانيا - اليونان


دشيت ومعاي صوره من جوازي - والبطاقة المدنية - ومبلغ اعتقد 37 دينار - وصوره شخصية - وصوره من فيزا شنغن في الجواز -


وبس نطرت الدور وخصلت اموري بصمت وخذيت الوصل بعد 4 ايام اتصلوا وقالوا تعالي استلمي الجواز وحاطين لي سنتين




وبدت الايام بالعد التنازلي والفرحه طالعه من عيوني


رحنا صرفنا بيزاتنا من الكويتي الى اليورو









تاريخ الرحلة من 2015/5/21 الى 2015/5/31


11 يوم ب 10 ليالي


الحجز كان على الخطوط القطرية


وتكلفة التذكره 130 دينار كويتي للشخص


تكلفة كل شخص 714 د.ك


شاملة : 5 فنادق مع ريوق الا واحد من غير و طيران داخلي لمنطقتين و عبارة وطيران دولي ..
سعر ممتاز هذا كله من ترتيباتي مو من مكاتب سياحية احم احم ..


واتى اليوم المشهود ويازينه من يوم وانتوا تستعدون للطيران









رحنا مطارنا الصغير والمتواضع وخلصنا وركبنا طيراتنا


وهذي طيارتنا وكانت رحلتنا الساعه 11 ص ونوصل الدوحه 12:25 و 1:10 طيراتنا الثانية الى اثينا يعني ترانزيت 40 دقيقه ركضه


هذي من الكويت الى الدوحة ونفس الحجم خذيناها من الدوحه الى اثينا









مطار الدوحه ماشاءالله تبارك الرحمن واايد كبيير واحنا ترانزيتنا حيل قصير حتى كانوا ينادون علينا وكانت فاينل كول واحنا جحته وركض والله عيزنا 20 دقيقه عشان نوصل بوابتنا ووصلنا وكبنا والابتسامة شاقه الحلج من الوناسه واشغل الفلته واتابعها وبعدها فلم هندي على ما وصلنا









وهذا الكرت وزعوه علينا قبل ما نوصل اثينا حق الصحه ( والكل يعبيه )









والله وتحقق منايا شوفوا اثينا معايا


لقطة جويه معهوده )









بصراحه وايد ذكرتني في الاردن لان جبالها مره تشوفون خضرا ومره صفره









مطارهم صغير ولابج مثلنا























طلعنا من المطار نبي نحط خطوط ولا الشركة سستم داون عندها ف توجهنا على فندقنا اللي نمنا فيه ليلة وبعدها انتقلنا الى اولى وجهاتنا لهذي الرحلة


وكنت حاجزه فندق سوفتيل اثينا المطار ماكو تطلعون من الباب عبرة شارع انتوا في الفندق


الحجز ليله وحده من 5/21 الى 5/22


بسعر 88 د.ك شامل الضرايب والريوق ل 3 مجندات


وهذا ريسبشن الفندق واللوبي
















ونصعد الى غرفتنا بعد رحلة تقريبا 7 ساعات





































وهذا مطار اثينا من غرفتنا

والحمام عزكم الله





































على مايوصل عشانا صورة ثانية للمطار











وصل وصل العشا







شورة بصل كلوب ساندويش بالخضره وواحد بالدياي و دياي بالخضره وكـــــــريم بروليــــه














يمي يمي
















وهذي صوره طلعتنا الفير لطيراتنا والوجهه الاولى




















بس بوقف لي اهني بعد خسارة اليوفي باجر اكمل الجزء الاول من وجهتنا الاولى

نبتدي معاكم بالجزء الاول من هالرحله والوجهه الاولى
صوره توضح وسيلة نقل مهمه لهم ومشهوره فيها
عزكم الله







مممم مااطولها عليكم كانت اولى وجهاتنا على جزيره









ســـــــــانتوريني ويازينها من جزيره


بكتب لكم هالمقدمه البسيطة عنها وبعدين بحط لكم تقسيمتها في اهم المناطق والفنادق المرشحه فيها


اول معلومه ولازم اتعرفونها ان وسائل النقل فيها قليييله جدا تخيلوا جزيره ما فيها الا 38 تاكسي فقط


معتمدين على عزكم الله الحمير واغلبها تكون في المينا تنقل الزوار اللي من الكروزات الى سنترها - والتلفريك نفس الشي من المينا الى السنتر


والوسايل الثانيه اما تكون التكاسي - او تأجير سياكل وبقيات(البانشي=الدباب) - جيبات وسيارات صغيره بس الاغلبيه معتمدين على البقيات والسياكل ...

الطقس في سانتوريني

- اللي يدورون الحر والتشمس والسباحه من ( يونيو الى سبتمبر )


- اما اكتوبر و ابريل ومايو يعتبرون من احسن الاجواء وممكن فيهم السباحه لكن غير مضمونه مثل الصيف الاسعار ممتازه.


- الاجواء البارده حيل ولاينصح فيها من ديسمبر الى فبراير


- الهاي سيزون عندهم من ( اخر يونيو الى اول سبتمبر ) الاسعار عندهم ترتفع


- مارس ونوفمبر عاديين


الجو من ابريل الى نص اكتوبر ممتاز مع جو حار من يونيو الى سبتمبر..


الفنادق اللي رشحوها لي وقالوا لي عنها :

- صوفيا سويت في اميروفيقلي

- سانتوريني سيكرت في آيا

- امايا سيلكشن في آيا

- كتاكيس في اويا

- استارا سويت في اميروفيقلي

- هومريك في فيروستفاني

- ابف بلو سويت في اميروفيقلي

- انتيلز في فيرا
هذيل بعض الفنادق اللي رشحوهم لنا وانصحونا فيهم .. بس الاغلبيه قالوا سكنوا في فيرا احسن من آيا لانها العاصمة والسنتر وحركه فيها وايد غير الباجي ..




هذي نبذه بسيطة عن سانتوريني ..









معلومه صغيره سانتوريني كانت جزيره دائريه كامله بس بسبب البركان اللي صار فيها تغير شكلها وصارت مجزأه وبتشوفون صوره خريطتها تحت بعد النبذه..




سانتوريني هي جزيرة بركانية في بحر ايجه الجنوبي على البحر المتوسط وتتصف بأنها احلى الجزر اليونانية وعلى بعد حوالي 200 كم من البر الرئيسي جنوب شرق اليونان ، وتشتهر سانتوريني بالمناظر المذهلة الدراماتيكية ومشهد غروب الشمس المذهل والمنازل باللون الابيض بالاضافة الى البركان النشط للغاية.




فيرا fira ، عاصمة سانتوريني من البندقية والسيكلادية للهندسة المعمارية والمرصوفة بالحصى ، وتعج الشوارع بالمتاجر والمطاعم والكافيهات والفنادق .


سانتوريني هي اكبر جزيرة صغيره للارخبيل الدائري التي تحمل نفس الاسم وهي بقايا من كالديرا البركانية. وكما تشكل العضو الجنوبي من المجموعة سيكلاديز من الجزر حيث تبلغ مساحتها ما يقارب من 73 كم 2 و يبلغ عدد سكانها حوالي 15,550 في تعداد عام 2011 ، وتضم بلدية سانتوريني الجزر المأهولة من سانتوريني والجزر الغير مأهولة من نياكاميني ، بالايا كاميني ، وكريستيانا.


سانتوريني اساس ما تبقى بعد الانفجار البركاني الهائل على اقد المستوطنات على جزيره واحده سابقا وانشئ كالديرا جيولوجية الحالية وفيها منحدرات حاده من 3 جهات.


الجزيرة الرئيسية تنحدر نزولا الى بحر ايجة وعلى الجانب الرابع ويتم فصل البحيره من البحر بواسطة جزيرا اخرى اصغر بكثير تدعى therasia .


عمق كالديرا في 400 م ، اذ من الممكن ان ترسو اكبر السفن في اي مكان في خليج المحمية وتم بناء مارينا حديث في vlychada على الساحل الجنوبي الغربي ، والجزيره هي موقع احد اكبر الانفجارات البركانية في التاريخ المسجل التي وقعت قبل نحو 3600 سنه المينوية.
ترك ثوران كالديرا الكبير محاط بالرماد البركاني مع الودائع وعمق مئات الامتار ، وربما ادت بشكل غير مباشر الى انهيار الحضاره المينوية في جزيرة كريت وفقدان ما يسمى بالقارة المفقودة ( اتلانتس ) التي غرقت في قاع البحر حسب ما تقولة الاسطورة القديمة على بعد 110 كم الى الجنوب.


اخذت المعلومات من موقع مرسال وكتاب سانتوريني بالانجليزي ..




تم حجز التذاكر من موقع Expedia


من اثينا الى سانتوريني


على طيران Aegean طيران يوناني جيدجدا


طرنا الفير الساعه 5:15 ووصلنا 6 ( 45 دقيقه )


سعر التذاكر ل 3 اشخاص 112 د.ك








معتمدين في مطار اثينا على الاجهزه اكثر للبوردنغ واستعمالا حيل سهل وسريع وهذي صورته









ومن تطلعون البوردنغ بعدها تروحون وتقطون الجناط في الشحن


طيرانهم من غير وزن وياخذ على الجنطة 30 يورو









وصور من مطار اثينا
















من داخل طيراتهم









مطار سانتوريني المجكنم







شروق سانتوريني
















وقتنا اغلب السواح اجانب من جناسي مختلفه مافي عرب كلش ماصدفنا الا معاريس بس _ شرق اسيا دوود ودبى والهنود وايد والكنديين ...




وصلنا بالسلامه وكنت دازه ايميل لصاحبة الفندق وقلت لها احنا نوصل 6:30 نبي سايق ويحليلها ولا دازتلنا اخوها

واهني بعض الصور اول ما وصلنا العاصمه فيرا









وهذي كنسيتهم معروفه وبحط عنها تالي









طبعا فندق احنا تحت يعني فيها صعده جبال لابغينا المطاعم والسوق الله يعين


وهذا اخو صاحبة السكن


اغلب الفنادق والسويتات عباره عن بيوت واصحابها حولوها فنادق والعايلة كلها تشتغل فيه وناسه ..


راح تشوفون على الصوره تقسيمة المناطق









وهذا اللي جدامنا البركان في هالجزيره واللي نفصلت









قبل ما نروح بيتنا بحط لكم هالخريطة التوضيحية ومرقمة









1- العاصمة فيرا واحسن منطقه للسكن للي يبي كل شي يمه .


2- شاطئ كماري kamari beach


3- جزيره البركان volcano island


4- هوت سبرينغ hot spring


5- الشاطئ الابيض white beach من الشواطئ المهمه


6- الشاطئ الاحمر red bech من الشواطئ المهمة.


7- شاطئ بيريزا perissa beach من الشواطئ المهمه


8- منطقة آيا oia منطقه جميله للي يبي الاسترخاء ولمشاهده احلى غروب ينصح منها ممكن السكن في فيرا والذهاب الى ايا نص يوم للغروب والتمشي .


9- منطقة اميروفيقلي ينصح فيها للسكن من بعد فيرا و آيا .


10- منطقة فيروستفاني بين فيرا واميروفيقلي .


11- المينا اليديد athinios port منه تمشي العبارات والطراريد الى رحلات وجزر .


12- المطار


13- المينا القديم والتليفريك old port


طبعا في شواطئ غير اللي ذكرتهم وايد بس هذيل اشهرهم واللي ينصح فيهم ونفس الشي للسكن ..


راح اتكلم عن كل مكان رحتله في جزئة مع الصور ان شاءالله


والحين ندخل بيتنا او فندقنا واللي توه فاتح في 26 ابريل 2015 يعني يديد ونااسه


وهذا اسمة وبصراحه ممتاز من كل النواحي وخصوصا ماريا صاحبته وامها اللي كل يوم اتسوي لنا ريوق ولا احلى كل شي طبيعي


اسما سويت









وندخل بيتنا ومعانا مفتاحنا لازم نقفل الباب عقبنا بالدخلة والطلعه ..









السكن عباره 6 غرف من ضمنهم 3 سويتات معاهم جاكوزي ويسمونه هوت تيوب hot tube









وهذا سويتنا لنا بروحنا محد يضايقنا ويازين المنظر زيناااااه
































داخل سويتنا





















تقعدون من النوم وجدامكم هالمنظر




























وهذا الفراش الثالث منه قعده وفراش
















الجنطة الصغيره جنطتي







الحمام تكرمون




























وهذي الدريشه مجابله القعده























ترا هذا التصوير اللي فوق كله بأول يوم لما وصلنا الصبح
















وهذي تقسيمة بالصورة









وجزيرة البركان









ويازين الريوق على هالمناظر السنعه


الكوكييز من ايد ماريا والكيك والكورواسون من امها يحليلها ..


ودوووووووووووووووووووووووووووووووووووووووووووووووو ووووووووووووووووووووووووووووووووووووووووووونيييييي ييييييييييييييييي







شنو شعور صاحبة المكان ما ملت واهي تتريق على هالمنظر كل يوووم اووووووووووف كفاار







ياربي







لما دزيت حق اهلي هالصور مو مصدقين يقولون فوتوشوب جان اقوم واجابل الريوق واصور عشان يصدقون


سبحان الله المنظر يرررررد الرررررروووووووح







بعد هالريوق الصحي واللطيف استسلمنا للنوم لان مانمنا عدل قبلها


وهذيل الصور عقب ماقعدنا على الساعه 12









ولا نشوف الحبايب زايرينا
















الحين انا قاعده اصور لكم وانطر الثنتين يخلصون يلبسون ونطلع






























تقريبا الكروزات اتنزل يوميا ما يقارب 4000 - 9000 سائح للجزيره

وهذا الباب الريسبشن













يالله سرينا نتمشى فوق بالسنتر









الصعده حييييل متعبة الاجانب عادي واحنا عند كل دجه قعدنا ريحنا














اول التقرير كنا فوق عند الكنسية وفندقنا تحت يعني بنصعد فوووووق حق السنتر





















شوفوا بالخريطة حطيت لكم طريج تكرمون الحمير من المينا القديم يصعدون السواح اللي من الكروزات لي فوق وهذا طريجهم مأشرة عليه بالسهم لهم طريج بروحهم على شكل زق زاق










لو تلاحظون ترا بنايهم داخل الجبل يعني عباره عن كهوف بيوتهم









بنفس طريج الحمير عزكم الله يمر من صوبهم التلفريك بعد
















ياليل ما اطولك على ما نوصل السهم







الدجه اللي لو تنطق جان صرختت من قمة راسها قومووووووا امشووووا كثر ما ريحنا عليها
















وصلنا السنتر









كل البيبان اللي على اليمين مداخل لفنادق ومطاعم وننزل لي تحت
















هذا متحف بس ما دشيناه










































محلات السوفنير









ورا السهم اللي بالصوره الشارع الرئيسي main street كل شي في تكاسي تأجير سيارات سياكل رحلات وعبارات وخطوط تليفونات صيدليه احنا هذا مطعمنا اول يوم تغدينا فيه









دشينا سوبرماركت صغير شرينا قروضات حق تالي الليل
















وهذا فيديو لام حسين ( في موسيقى )









ورحنا مطعمنا
















مكان السهم اللي بالصوره مدخل السوبر ماركت
































طلباتنا


ومن اكلاتهم المشهوره روب وخيار والسلطة اليونانيه ودولمه وطماط مقلي









روزيتو سي فود









سباغتي بيستو









ربيان مشوي
















الحمدلله هذا غدانا وعشانا


فاتورتنا طلعت 65 يورو

الجزء الثاني من اليوم الاول


عقب ماتغدينا رحنا الشارع الرئيسي اللي ورا المطعم عشان نحط خطوط انترنت ونشتري كريمات حساسيه من الصيدليه
الشارع كل شي فيه ودشينا نشوف لنا رحلة وهذي قائمة صغيره بالرحلات





طبعا هذي الرحلات في طراريد عاديه او قديمه جنهم قراصنه اذا تبون الاكشخ في وبسعر اعلى طبعا وعلى حسب الساعات اللي تبونها ..

هذا الشارع وشعارهم




في سهمين بالصوره وحد نازل تحت وواحد يمين اللي تحت محلات التليفونات نزل الشارع نلقاهم عاليمين وسهم اليمين الكافيه اللي حلينا فيه





في الصوره هذي بعد سهمين فوق مكان الدري اللي نزلنه منه وعلى يمنا المكتب السياحي واذا رحتوا يمين على مكتب حجوزات العبارات






قعدنا اهني وحلينا من غير قهوه يا امووون







احلى ايس كريم بصراحه ما ذقت مثله

اسم الكافيه واضح على الصوره




وبعدينا رحنا نتمشى في السكيك




























من اقوال سقراط " عندما تثقف رجلا تكون قد ثقفت فردا واحدا ، وعندما تثقف امرأة فإنما تثقف عائلة بأكملها "

















والحين تصوير الغروب


































قلتي لي انسى
ومن يومها وانا كل ليلة قدامي البرواز

















حبيبتي مابيدي حيلة
لاصرتي الصورة .. وعيوني البرواز
اشلون ابنسى

















































من احلى لحظات الغروب

ودعتها والشوق بيني وبينها الشوق بيني وبينها
بحوور ودعتها ودعتها رغم خوفي والوله مجبور



































وهذا طريج سكنا























الله وكبر يا هوى البال وشفيك
وشغيرك وش جاك طبعك غريبي
لا وحسايف عبرتي يوم اناديك
تسمع ولكن للاسف ما تجيبي
عبرت جريح الصوت بسمك تسميك


















واهني انهي معاكم اليوم الاول في سانتوريني الجميله
على امل ان القاكم في اليوم الثاني
وسامحوني على كثره الصور والحجي

الجزء الاول في ســــانتوريني


الــــيوم الثـــــــاني


من خصائص الجزيره انها متعددة الانشطة و راح اتكلم عن بعض الانشطة ..


الشواطئ البحرية :


وتتميز جزيرة سانتوريني بوجود أحلى الشواطئ في البحر المتوسط واغلب الشواطئ هناك تشترك بصفة أساسية وهي الرمال السوداء.


أشهر الشواطئ في سانتوريني هي: بيريسا perissa beach ، كاماري kamari ، الشاطئ الأحمر red beach ، و مونوليثوس monolithos



بيريسا Perissa

حاصل على العلم الازرق للشواطئ من الاتحاد الاوربي


اول شي وسيلة النقل متوفره من السنتر الى الشاطئ .

شاطئ بيريسا من أحلى الشواطئ في سانتوريني ومن الشواطئ المزحومه دايم، وهو يتميز برماله السودا مثل باجي الشواطئ في المنطقة و في مشهد جميل يقدمه بالليل ان الصخور تضيئ .وهو يمتد على مسافة 7 كم و من الشواطئ الأكثر شعبية بسبب جمالة و تنظيمه الحلو اللي يقدم كل ما يحتاجه السائح من رفاهية واستجمام وخدمات( كاياك - سكوبا دايفينغ غوص - سنوركلنغ - ركوب الامواج والخ ).


كاماري Kamari


حاصل على العلم الازرق للشواطئ من الاتحاد الاوربي


وسيلة النقل الباصات والسيارات


قرية كاماري تتميز بشاطئها ويشابه حيل بيرسا ويتميز بطوله وبرماله السوداء ومنظم ويحتوي على عدة انشطة ترفيهيه و في الصيف يزدحم بالسواح .




الشاطئ الاحمر red beach


الشاطئ الأحمر أحد أجمل وأشهر الشواطئ في سانتوريني

يتميز هذا الشاطئ برمال حمراء وصخور سوداء وحمراء وهذا هو سبب تسميته بالشاطئ الأحمر وهذا السبب أيضاً الذي يجذب العديد من السياح سنوياً .
هناك كراسي ومظلات للإيجار وقوارب تاخذكم لشواطئ ثانية في المنطقة .. الوصول له يا توقفون بالمواقف وياخذكم قارب مخصوص له يوصلكم او تمشون على حافه الجبل مشي تقريبا 5-10 دقايق والاغلبيه يختارون مشي لان الحافه نقدر نمشي فيها .. ومافي الا كانتيين واحد عند المواقف يعني الكل يحسب حسابه وياخذ معاه ماي وسناك ..

مونوليثوس monolithos


يتميز هذا الشاطئ بأنه لليهال اكثر وبرماله السوداء وهذا سبب أيضاً الذي يجذب العديد من السواح فيه مساحه لليهال يلعبون فيها وتكون مفتوحه لي الساعه 7م وملاعب طائره وسله للكبار.


هذيل بعض الشواطئ المهمه ممكن زيارتها ..


نيي على الانشطة :


- في تأجير اليخوت والكاتماران مع قروب او برايفت وانتوا اتحددون اشكثر تبون .
- في تأجير القوارب اليونانية القديمه..
رحلات البحرية ممكن ياخذونكم لفه حوالين الجزيره وتمرون على كل بيتش او يودونكم البركان وتنزلون تصعدون الى فوهة البركان وهوت سبرنغ palia kameni او غوص ..
- ممكن رحله على الحمار عزكم الله في الجزيره او الخيول على الشواطئ - باص وهليكوبتر تور .
- جت سكي وكاياك وبراشوت وركوب الامواج على الشواطئ.
- التسلق الصخور ورحلات المسيرلمسافات طويله.
- غروب الشمس من منطقه ايا oia
- لهواه التاريخ زيارة منطقة اكروتيري فيها مدينة منوان الاثرية وزيارة المتاحف .


بعض المتاحف :

Archaeological Museum

المتحف الأثري يقع في العاصمة فيرا وأنشأ سنة 1960 ليحل محل المتحف القديم الذي انهار بعد الزلزال.
المتحف يحتوي على العديد من الآثار التي استخرجت من مختلف أعمال الحفريات التي أقيمت في الجزيرة.
من الآثار المكتشفة والموجودة في المتحف، تماثيل ومنحوتات هيلينية ورومانية.

Museum of Prehistoric Thira

يقع المتحف في فيرا.
ويحتوي على العديد من الاكتشافات التي تتعلق بحضارة ثيرا
والتي تم الحصول عليها من الحفريات التي أقيمت في قرية أكروتيري.
من الاكتشافات الموجودة في المتحف :-
مجموعة أحافير تحتوي على أوراق الزيتون، مجموعة من أواني الزينة، ولوحات جصية.

The Megaron Gyzi


متحف ثالث من متاحف فيرا أنشأ سنة 1980
يقع بالقرب من الكاتدرائية الكاثوليكية.
هذا المتحف مشهور بأنه مشوق حيث يحتوي على قوالب تعود للفترة ما بين القرن السادس عشر والقرن التاسع عشر.
كما يحتوي على عدة صور فوتوغرافية للجزيرة قبل تعرضها للزلزال.

The Folklore Museum


المتحف الفلكلوري أنشأ سنة 1861 وهو يقع في العاصمة فيرا.
قد لا يكون متحفاً شعبياً كبقية المتاحف فهو منعزل عنها لكنه
مع ذلك يعتبر من المتاحف المميزة.
ويعد مخزناً كبيراً للعديد من الكتب والمخطوطات.
زائر هذا المتحف سيطلع على الكثير من المعلومات التي تخص سانتوريني من حيث الثقافة، التقاليد، والتراث.

الحين نبتدي في يومنا بعد كل هالحجي ..


نقعد من النوم على هالمناظر اللي ترد الروح












وصل وصل الطيب





الله على الريوق
فطاير السبانخ بجبنة الفيتا والشبنت من الفطاير المشهوره في اليونان وهذي من ايد ام ماريا الله يسلمها
والمربى والروب والكيكة كله شغل امها الله يعطيها الصحه والعافيه





اليوم الريوق داخلي لان الهوا تارس برا


الكورن فليكس صنع ايدي










بعد ما ترسنا بطونا من الاكل الطيب قلنا ناخذ راحه على ما يصير موعد رحلتنا


ايبااا






























خلصنا من الريلاكس
طلعنا وقفلنا باب بيتنا وتوكلنا على الله







ووقت الصعووود الى السنتر



وما زال الصعود مستمر















الى متى






























وصلنا البيت لو بعد















مصعد الحمير عزكم الله

وصلنا السنتر فوووق





اهني ننطر دريولنا عاش عاش بس ما يوصل ناخذ جم صوره










الورد جميل وله اوراق عليها دليل من الاشواق
اذا اهداه حبيب لحبيب يكون معناه وصاله قريب
شوف الزهور واتعلم بين الحبايب تتكلم
شوف واتعلم





وصدناهم





اميرة الورد لية الورد مفتونك
ليه بحياتة يحاول يشبة الوانك
كم من فراشة تمنت تلمس غصونك
والورد يا ما تمنى يعيش باغصانك





حجزنا رحلتنا هذي نص يوم تقريبا مع قروب رحنا فيها جزيرة البركان والشاطئ الاحمر وهوت سبرنغ لي الغروب في كاتاماران
سعرها الشخص 150 يورو ومعاها غدا
القروب صغير اللي رحنا معاهم من كذا جنسية مخلطين ..
رحنا اول شي الشاطئ الاحمر سنوركلنغ وسباحه واللي بينزل البيتش عادي تقريبا قعدنا فوق الساعتين


هذا كاتاماران catamaran





وهذيل صورتين منه












عقب ما خلصنا رحنا جزيرة البركان


اللي راح تشوفونهم هذيل القوارب اليونانية القديمة ورخاص ويشيلون وايد ورحلتهم اقل ساعات اعتقد 3 ساعات ب 18 يورو ..


ننزل الجزيره واللي يبي يصعد يقدر يكمل طريجه مع القروب واللي مايبي عادي يقعد
طبعا عارفين ربعكم نص الطريج و ردوا












قعدنا اهني تقريبا ساعتين في الجزيره


وبعدها مشينا ورحنا هوت سبرنغ palia kameni
للسباحه فيها .. ودرجة حرارة الماي 30 بسب جزيره البركان اللي يمه ..


هذي سانتو من بعيد

وبعدين بدينا ننتقل صوب ايا oia عشان الغروب ونرجع اراضينا


وهذيل من صور الغروب







وقت الغروب وياد يطلعون في الطراريد





هذا القارب اليوناني القديم







وهذا كاتاماران ثاني







وهذي واحنا رادين وداعا شمس سانتوريني الجميلة







بصراحة من احلى الرحلات البحرية وانصح الكل انه مايفوت هالرحلات في سانتوريني ولا الغرووب والله متعه غير طبيعية بالصج شي ثاني غير الصووور


قبل ما اكمل احنا وقتنا زحمه خفيفه فكان اللبس يمشي حاله في مسترين وفي لا بس بالصيف الله يستر
وصلنا المينا وعلى طول على فيرا السنتر لان ميتيين من اليووووووع ماكلينا واحنا بالرحلة لهينا بالسباحة والتصوير ونسينا الاكل ..


وهذا السنتر على اخر الغروب






























الاسد اللي فيني بدا يزئر من اليووووع


ونختار هالمطعم















المشروبات





ايوا الطلبات





لذيييييييذ الكبااااااااااب


اقتلني يا السي فوووود







السلطة والبطاط





الكلاماري


وعيش ودياي





الفاتوره والحمدلله على النعمه
73 يورو ل 3 اشخاص





اشوية تهضيم قبل نومة الضفدع





تحلاية عالخفيف





تهضيم تايم






























الى نومة الضفدع سر





وننهي يومنا البحري الزفر واتمنى انكم تستمتعون فيه ويفيدكم مثل ما احنا استمتعنا فيه
انتظروا اليوم الثالث قريبا ان شاءالله

الجــــــــزء الاول
اليـــــــوم الثـــالـــت


قعدنا على درجو الحراره هذي







في احلى من جذي


نقعد ونلقى هالريوق الطيب عاد كيفكم تحملوا الصور مكرره











ومن زاوية ثانية













والله لاشعوري خذيت للريوق اكثر من صوره مو مني من اللي فيني





بس خلاص مصختها ريووق


المهم خلصنا ريوقتنا واتجهزنا وطلعنا لان اليوم حافل نوعا ما


وبدت مرحلة الصعود










ومن هالطريج ناخذ التكاسي يكونون ورا الكنيسة










بالاتجاة الى منطقة بيرغوس pyrgos


اقدم مدينة في سانتوريني وكانت تعتبر العاصمة قبل فيرا وتبعد عن فيرا 7 كم واهي مبنية على تلة مرتفعه وتعتبر اعلى تلة في سانتوريني واللي تقدرون منها تشوفون كل الجزيره من فوق بصوره بانورامية حتى اويا اتبين منها ,وتم اعلان انها محمية عام 1995 وفيها قلعه البندقية وتعد اقدم قلعة في الجزيره وتعتبر المنطقة مثال نموذجي للعمارة العصور الوسطى مع الشوارع الضيقه والسكك .. وقلة فيها سواح ..





وهذا احنا وصلنا


بصراحه احنا رحنا عشان نصعد ونشوف من فوق بس الكسل ما خلانا نصعد والقروب عيزانين يصعدون معاي فقعدت معاهم وجربنا الكافيه اللي موصيتنا عليه ماريا ويعتبر اقد واحد في المنطقة












اهني مكان الكافية















وبيني بينكم المجندات يننوني كل اشوي امشي نحرك ونغير المنطقه والسبب شنو كثره الجلاب عزكم الله المهدوده من غير اصحابها واللي معاي خوافات


ديكوراتهم تفتح النفس





وهذا اسم كافيهنا





من داخل










هذا كرت المطعم





وهي الطلبات ماريا كاتبتهم لنا وقات لازم اتجربونها





طلبنا بس شيين و2 غير متوفرين للاسف





هذا واحد من الطلبات
طماط مقلي بس اعتقد انه مجفف وهذا يعتبر اكل تقليدي





وهذي بعد ( مالح حلو )
فيها جين بعجينة القلاش اعتقد وفوقها شيره ويعتبر طبق تقليدي










وبطاط















وهالشيبان طايحين له جنجفه وصراخ








وهذه صاحبة المطعم










صعدنا اقل من الربع

ونرد ننزل وننطر التاكسي على ما ايي


لازم عقب كل مكان نمشي منه نقول حق الموجودين يدقون على اي تاكسي ياخذنا لانهم ما يتواجدون



























تفنن في طروق الحب شرقني وغربني
معك يا زين دوخات الهوى ويا حلو مشوارة





في طريجنا الى وجهتنا الثانية





شوفو الشوراع كله بانشيات (دباب) وسياكل





ووصلنا وجهتنا

شاطئ بيريسا Perissa

حاصل على العلم الازرق للشواطئ من الاتحاد الاوربي .
اول شي وسيلة النقل متوفره من السنتر الى الشاطئ .
شاطئ بيريسا من أحلى الشواطئ في سانتوريني ومن الشواطئ المزحومه دايم، وهو يتميز برماله السودا مثل باجي الشواطئ في المنطقة و في مشهد جميل يقدمه بالليل ان الصخور تضيئ .وهو يمتد على مسافة 7 كم و من الشواطئ الأكثر شعبية بسبب جمالة و تنظيمه الحلو اللي يقدم كل ما يحتاجه السائح من رفاهية واستجمام وخدمات( كاياك - سكوبا دايفينغ غوص - سنوركلنغ - ركوب الامواج والخ ).

ايوااااا










العشق بلوى من دخل في وسط بحر و غيب الجاه















وقت الراحه










اللطيفات يقندون الراس



وانا اللطيفه ابرد على قلبي