رحلتي مع اغلى البشر الى جوهرة اسيا 2017

بسم الله الرحمن الرحيم







اليوم الرابع عشر



اللهم مااصبح بي من نعمة او باحد من خلقك فمنك وحدك لاشريك لك



الاماكن المراد زيارتها



1 - حديقة البرجين

تفتح يوميا من 5:30 ص - 12:30 م

الدخول مجانا



2 - الاكواريوم

Aquaria KLCC - Homepage

يفتح يوميا من 10 ص - 8 م

الكبار = 64 رنجت - الصغار = 53 رنجت - ( 0 - 2 ) مجانا

3 - متحف بتروناس

Petrosains, The Discovery Centre

يفتح يوميا عدا الاثنين من 9:30 ص - 5:30 م

الكبار = 30 رنجت - الصغار = 18 رنجت - (0-2) مجانا



4 - سوق لويات بلازا وسونغوا ونغوا

يفتح يوميا من 10 ص - 10 م







صحينا اليوم الساعة 5 صلينا وفطرنا وجهزنا نفسنا رحت شفت حرارة البنت لقيت الحمد لله مافي سخونة نزلنا الاستقبال وسالتهم عن الغسيل قالوا ان تبغي تدفعي هنا ونعطيك العملة وتغسلي قلت تمام اخذت عملتين وتوكلنا على الله واتجهنا الحديقة عشان البزورة يلعبوا وكان الجو جميل ولطيف







































طبعا في قسم فيه مسابح وكذا مامريته عشان الصغير بس جبت لكم صور من النت



























بعدها صارت الساعة 9:30 اتجهنا للاكواريوم ووصلنا وكانت الساعة 10 اشترينا التذاكر ودخلنا وهنا ولدي جنني نزل من العربيو وكانه اول مرة بحياته يشوف والا مصر انه انه يدخل جوا الحوض ويلمس السمك























































المهم قضينا قرابة الساعتين والنص واتصورنا وانبسطوا البزورة بس زعلوا لانهم كانوا يحسبوا في عرض دلافين





بعدها سالت البزورة جوعانين قالوا لا دخلنا سوريا مول و اعطيتهم كتكات تصبيرة عشان لايجوعوا صلينا ظهر وعصروطلعنا لمتحف الباترونس اشترينا التذكرة ودخلنا











































قعدنا فيه 3 ساعات ومابغوا البزورة يخرجوا كل شوي يجربوا شي وهاتك يااسئلة للامانة المتحف تعليمي ترفيهي ممتع للكبار والصغار يعني باختصصار اللي يحب يشوف برامج ناشنوال جغرافيك مثل برنامج متع ذهنك بيعجبه المتحف







بعدها اتجهنا لسوق لويات بلازا هو سوق الكترونيات عبارة عن 8 طوابق او 9 كلها الكترونيات وفيه كافيهات ومطاعم بالطابق الارضي المهم اول ماوصلنا كانت الساعة 4 العصر ابو حسن اشترى له كوب قهوة من مقهى قولدن تاون عند البوابة وقعدنا نلفلف في المول وانا صدعت لان مافي شي يجذب اهتمامي







بعد ساعة البزورة قالوا ماما جوعانين وطبعا جودي نائم لانه تعب بالاكواريوم والمتحف قلت لابوحسن ايش رائك قال ايش رائك عشان مانضيع الوقت انتي انزلي قسم المطاعم واشتري لهم اي شي قلت تمام نزلت انا والبزورة واخذت لهم ثلاث علب فواكه ودخلت مقهى وقعدنا وطلبت كابتشينوا بعدها خلصنا ونحنا خارجين لقيت صيدلية قلت ادخل اضيع وقت ولقيت الاسعار خرافيه فيها اخذت كم غرض وكم عطر عليهم عرض هدايا وخرجنا























شوي ابو حسن يتصل يالله وين نتقابل انا مرة جوعان المهم تقابلنا ولقينا الساعة 7:30 انفجعنا قلت لابوحسن ايش رائك ناكل هنا اونروح مول سوريا قال انا ميت جوع ناكل باي مطعم ووقع اختيارنا على ذا المطعم الياباني











































اكلنا وخلصنا وخرجنا لمول سونغوا ونغوا للاستطلاع وعجبنا

ولقينا محل يبيع كيك ياباني اخذنا واحدة وفي كرسي مساج استخدمه ابوحسن وقلنا خلاص بكرة باذن الله نمره







وطلبنا اوبر ورجعنا للفندق الساعة 10 صلينا وكل واكلنا نص الكيك ونمنا والحمد لله







تقيمي لحديقة البرجين قسم الالعاب

20/20

رائعة متنوعة شاملة وممتعه اهم شي تختاروا وقت تكمام لزيارتها يااول الصباح يا العصر



تقيمي للاكواريوم

20/15

حلوة ومتكاملة بس احسه صغير والتذكرة مبالغ بسعرها والله عشان اطفالي رحته والا كنت مستبعدته يعني اقل شي دام رفعوا سعرالتذكرة يعملوا عروض دلافين المهم لو انتم عرسان لاتروحه قيمة التذكرة روحوا مكان ثاني او الساعتين باي مكان



تقيمي لمتحف الباترونس

20/20

والله مرة مرة ممتع لدرجة خرجنا بالغصب لان ابو حسن يبغي يروح السوق والله حتى انا استمعت فيه تقريبا يشبه سايتك اللي في الخبر بس ذا على اكبر واجمل لازم الكل يروحه للاي يحب العلم وكدا



تقيمي لمول لويات بلازا

20/20

مو مرة واو بس تلاقوا فيه عروض جميلة وممكن يناسب عشاق الالكترونيات والاسعار متوسطة الى رخيصة



تقيمي للمطعم

20/15

الاكل كله لذيذ وطعم وسعره طيب



تقيمي للصيدلية

10/20

روعة متنوعة شاملة







مصاريف اليوم الرابع عشر

تذاكر الاكواريوم = 234 رنجت

تصويرثلاثي الابعاد = 100 رنجت

تذاكرمتحف الباترونس = 96 رنجت

اوبر للويات بلازا = 10 رنجت

قهوة وفواكه وماء = 50 رنجت

غداء في المطعم = 100 رنجت

اوبر للفندق = 10 رنجت

المجموع = 600 رنجت = 500 ريال

بسم الله الرحمن الرحيم















اليوم الخامس عشر







اصبحنا واصبح الملك لله لا اله الا الله محمد رسول الله







الاماكن المراد زيارتها



1 - سوق سونقوا وانقوا



‏Jalan Bukit Bintang, Bukit Bintang, 55100 Kuala Lumpur, Wilayah Persekutuan Kuala Lumpur, ماليزيا



يفتح يوميا من 10 ص - 10 م







2 - الباص السياحي



https://www.myhoponhopoff.com/kl/promotion.php



يوميا من الساعة 8 ص - 9 م



الكبار = 45 رنجت - الصغار = 24 رنجت - ( 0 - 5 ) مجانا







3 - المنارة



https://www.menarakl.com.my/



التذاكر الشاملة مع الحديقة



الكبار = 110 رنجت - الصغار = 60 رنجت - ( 0 - 3 ) مجانا







4 - سوق سوقو



‏190, Jalan Tuanku Abdul Rahman, City Centre, 50100 Kuala Lumpur, Wilayah Persekutuan Kuala Lumpur, ماليزيا



يفتح يوميا من 10 ص - 10 م















صحينا اليوم الساعة 6 صلينا وفطرنا ونحنا نفطر البزورة ماما بابا وين بنروح اليوم قلت لهم حديقة الطيور وحديقة الزهور والقبة الفلكية والمنارة قالوا اوف ياماما ماعناد نبغي نروح حديقة الطيور طفشنا قلت والله من جدكم بابا مانبغي نروح



انا / الجو مايتحمل المشي تعرفي الدنيا شمس وصعبة جدا تعرفيني مااداني الحرارة اشوف نتسوق من الصباح للساعة 3 وبعدها نرجع نحط الاغراض بالشقة وبعدها نتجه لاي مزار



ام حسن / مابيمدي نروح باقي الاماكن



انا / نلغي الحدائق لان الجو مايساعد والبنت توها طابت والغبار ماينفع معها وجنتنغ لان فيه اصلاحات نروح بس المنارة وبوتراجايا



ام حسن / تمام براحتكم السفرة مو عشاني وماراح اتشرط



انا / ايش المقصود ؟



ام حسن / والله انا تعبت مع البزورة وماتمشيت عدل لازمني بعد سفرة لمكان احبه وكله طبيعيه



انا / افا عليك ياام حسن ولايهمك الحين نحطك باي حديقة ونروح اي مول دامك تبغي طبيعية الا وام حسن كذا والبزورة.



انا / ولايهمك باذن الله ان ربي راد بنسافر مكان يعجبك ( عاد مااخفيكم سر من عام 2010 وانا واعدها اوديها تركيا )



يا الله الساعة صارت 7 وعليها وش رائكم يابزورة نروح المسبح



ام حسن ماله داعي بعدين بنتاخر قلنا ماراح نتاخر بنحط المنبه















سبحوا البزورة ووانبسطوا وابوحسن طلب اوبر وراح لشقق لانسون بليس لان صديق له نسى شنطة وجوال بالفندق اخذهم ورجع للفندق والساعة 9:30 طلعنا بدلنا الملابس ونزلنا الاستقبال وطلبنا اوبر واتجهنا لسوق سنقوا وانقوا































































واتسوقنا واشترينا ايس وفواكه للبزورة وصلينا ويوم راح ابو حسن يصلي لقى حلبة سباق على حجم المبنى ونزل اخذ حسن وميمي وراح لعبهم وانا كملت تسوق والساعة 2 طلبنا اوبر واتجهنا للفندق وبعده للمنارة



















اول ماوصلنا اخذنا التذاكرالشاملة مع حديقة الحيوان لانه بس تزيد 10 رنجت للكبير و5 رنجت للصغير وتدخلها قلنا يالله نروح عشان الصغير يحب الحيوانات وقضينا طلعنا فوق اول شي للمطلو واتصورنا وللامانة المكان الوحيد اللي يخيروك بالتصوير ويصورك صور بجوالك او كاميرتك المهم لما خلصنا رحنا استلمنا الصور وايو حسن طلب منهم الصور بالايميل او باليوس بي قله ماعندنا بس فيه طريقة اعطانا ورقة فيها رقم سري قال ندخل الموقع او نحمل التطبيق ونحط الرقم السري وبنلاقي الصور كلها قلنا تمام افضل من انه ندفع قيمة الصور وممكن تنعدم وبعدها نزلنا للطابق الاسفل واخذنا لفة واستخدمنا المنظار وبعده نزلنا لتحت وفي محللت ومتاجر تبيع اغراض وبعدها اتجهنا لحديقة الحيوان قرابة ساعتين ونص بالمنارة والحديقة



















































https://www.arabtrvl.com/up/uploads/arabtrvl1490393046468.jpg[/img]







حديقة الحيوان المصغرة مرة مرة انبسطوا فيها البزورة اكلوا اعلب الحيوانات بيدهم واتصوروا معاهم اكثر حيوانات عجبتهم ارانب وطيور والبغباءوات والقرود الصغيرة















قاعد يتفاهم مع الحيوانات































































بعدما خلصنا وقفنا عند باص موقف الباص ووصيت البزورة اول مايوقف الباص على طول يطلعوا الدور اللي فوق قالوا تمام وصل الباص وكان شبه فاضي مافي زحمة مرة ركبنا كلنا فوق وبدينا الجولة



























( ثلاي ارباع تصوير الجولة تم تصويرها بالفيديو لذلك ارجو المعذرة لقلة الصور وقلة جودتها )



للاسف السماعات كانت عطلانه المهم لفينا كذا مكان للامانة ماركزت مزبوط بس بتفرج والجو كان حلو ومرينا عند محطة السوق الصين نزلنا فيها وتجولنا نص ساعة لين يجي الباص الثاني واتصورنا كم صورة وبعدها ركبنا الباص الثاني المهم بعد فترة البزورة ماما نحنا مرة جوعانين تذكرنا اننا مااتغدينا قال ابو حسن خلاص اقرب محطة قريبة من الفندق ننزل قلنا تمام







وصل الباص في شارع العرب ونزلنا قال ابوحسن ايش تبغوا تاكلوا قلت شوف في السكة الثانيه فيه ماك قالوا البزورة ماعاد فينا حيل نمشي قال ابوحسن خلينا ندخل مندي حضرموت صحيح غالي بس يقولوا طعم البزورة ايوه ياماما خلاص نحنا تعبانين مافينا حيل نروح بعيد ومرة اشتقنا للكبسة قلت عادي ياحبيايبي مايهمني ودخلنا المطعم



























































خرجنا بعدها وتجولنا بشارع العرب ورحنا البافليون صلينا واتسوقنا والساعة 10 قال ابو حسن خلاص نرجع قلنا تمام اشتريت فواكه للبزورة بالشوكلاته بعدها قلنا الحمد لله شبعنا







[url=https://www.arabtrvl.com/up/][/url



وقلت ل ابوحسن يالله اطلب اوبرقال ايش رائكم اول مرة الجو يكون حلو بكوالالمبور ايش رائكم نمشي قلت اسال الصغار قالوا ايوه نمشي عادي ووصلنا فندقنا ونمنا والحمد لله. انتهى يومنا















تقيمي لسوق سونقوا وانقوا

10/15

سوق حلو ومرتب ومكيف فيه مطاعم وفيه ومتنوع اسعاره رخيصة وفيه محلات ماركات ومحلات عادية اهم نقطة فيه محلات ملابس سهرة نسائية اسعارها بطلة بس ها لاتنسوا تكاسروا



تقيمي للباص السياحي

20/20

تقيمي لجولة الباص جدا روعة روعة روعة وللاسف ندمت ماخصصت لها يوم كامل بدون ارتباط باي مكان

انصح الجميع بانه ضروري يخصصوا يوم كامل لاجولة عشان يقدروا ينزلوا باي محطة براحتهم او يخصصوا اماكن بيمر الباص فيها ويجربوه



تقيمي للمنارة

20/15

جدا جميلة ومرتبه ومنظمة حلو اني في شي ممكن تسوه وانتم فوق يعني ممكن تشتروا شي وتقعدوا تاكلوه عكس برج خليفة والاهم ان التكيف جدا جدا رائع وحتى فكرة المربع الزجاجي روعة مع العلم كان نفسي اجرب المطعم الدوار بس اجلناه للزيارة المقبله باذن الله



حديقة الحيوان التابعة للمنارة

20/15

والله حلوة وتفي بالغرض والاهم العاملين اللي فيها ودودين ويعطوك الاكل عشان تاكلي الحيوانات اول مرة اشوف كنغر على الطبيعة ومابيننا حواجز ولا فواصل وحلو انهم مستغلين المكان صح واللهم في مغاسل تغسلي يدك وانتي خارجه

عيبها المكان صغير فيه طلوع ونزول وانه مافي كل الحيوانات



تقيمي لمطعم مندي حضرموت

20/18

والله طعم ولذيذ بس عيبه الاكل قليل مقارنة بالمبلغ



تقيمي لمول البافليون

20/20

حلو وجميل ومنظم وكل شي فيه عيبه زي مول سوريا غالي







مصاريف اليوم الخامس عشر

اوبر لفندق لانسون بوكيت = 10 رنجت

اوبر لسوق سونقوا وانقوا = 10 رنجت

ايس كريم وموية وخفائف 32 رنجت

اوبر للفندق = 10 رنجت

اوبر لبرج المنارة = 10 رنجت

تذاكر المنارة = 340 رنجت

جولة الباص السياحي = 138 رنجت

العشاء في مندي حضرموت = 180 رنجت

المجموع = 730 رنجت = 600 ريال

بسم الله الرحمن الرحيم





اليوم السادس عشر

اصبحنا على فطرة الاسلام وعلى كلمة التوحيد لا اله الا الله وعلى دين نبينا محمد صلى الله عليه وسلم وعلى اله وصحبه اجمعين

الاماكن المراد زيارتها

1 - الباص السياحي

https://www.myhoponhopoff.com/kl/promotion.php

يوميا من الساعة 8 ص - 9 م

الكبار = 45 رنجت - الصغار = 24 رنجت - ( 0 - 5 ) مجانا



2 - سوق سوانقو وانغوا

Jalan Bukit Bintang, Bukit Bintang, 55100 Kuala Lumpur, Wilayah Persekutuan Kuala Lumpur, ماليزيا

يفتح يوميا من 10 ص - 10 م



3 - بوتراجايا والانشطة فيها

يوميا من 11 ص - 12 م



4 - رحلة بحيرة بوتراجايا

‏Cruise Tasik Putrajaya - Cruise Beyond Your Imagination..

page_id=25



5 - ملاهي مول ioi city

IOI City Mall, Lebuh IRC, IOI Resort City, Ioi Resort, 62502 Putrajaya, ماليزيا

يفتح وسط الاسبوع 12 ص - 9 م

والسبت والاحد 10 ص - 11 م

في نص الاسبوع = 58 رنجت

في اخر الاسبوع والاجازات = 76 رنجت

الاطفال الاقل من 90 سم مجانا







صحينا اليوم الساعة 6 صلينا وفطرنا وشوي ابو حسن يحس بصداع ودوخه قال شكلوا مافي خروج اليوم قلت تمام اهم شي الصحة عاد البزورة كذا صارت وجوههم قالوا ايوه يابابا مانبغي نخرج انت تعبان ونحنا طفشنا خلاص انت ارتاح ونحنا بننزل المسبح وانا طالع فيهم قلت اي مسبح بابا تعبان قالوا عادي هو ينام ونحنا ننزل معاك قلت طيب طيب بعد ساعة قال ابو حسن لبسيهم خلاص خفت الدوخه والصداع خلي برنامجنا اليوم خفيف اذا شفت نفسي بخير نكمل قلت تمام وتجهزنا







نزلنا عند محطة الاكواريوم وانتظرنا الباص جاء وتوكلنا على الله وركبنا وبدينا نكمل الجولة مرينا ساحة مرديكيا وسنترال بارك وسنترال بارك وحديقة الطيوروشارع العرب كله على مااعتقد مااذكر والله لان اليوم كان زحمة الباص بس الجو لطيف ممكن لان البارح نزلت امطار بالليل المهم استمتعنا وصورنا وقفنا فقط عند محطة واحدة مدري ايش ايسمها المهم فيها متحف او شي كذا دخوله مجاني بسال ابو حسن ( بدات انسى المعلومات ) وبعدها كملنا الجولة بباص ثاني وقت ما وصل الباص بمحطة الاكواريوم نزلنا ورجعنا للفندق عشان صلاة الجمعة قال ابو حسن بينزل المسجد قلت والله كلنا سوا افضل قال تمام طلبنا اوبر وقلنا يودينا مسجد الشاكرين قال مرة الخط زحمة الحين ممكن ماتوصلوا قلنا طيب انتظر وطلعنا صلينا ونزلنا



















بعدين سالنا السواق وين بتروحوا قلنا سونقوا وانقوا قال عملتوا جولة بكوالالمبور قلنا لا ورحنا كل الاماكن قال اذا تبغوا تروحوا مكان ممكن اوديكم انا انظم رحلات وكذا المهم واعطانا كرته تذكر ابو حسن انه ذاق شوكلاته زميله جابها من ماليزيا وقله ماتنباع الا بالمصنع بكوالا قله تودينا مصنع الشوكلاته ردعليه تمام وودانا المصنع ووتذوقتا الشوكلاته واشترينا الشوكلاته المطلوبة وكان عندهم عرض ان اشتريت بقيمة 250 رنجت ممكن تشتري 10 حبات ماكرون بنص قيمتها وكان شكلها مشهي والكل جوعان قلنا فرصة اخذنا كرتونين من كل نكهة حبة وخرجنا























































خرجنا وركبنا السيارة قلنا اوديكم مصنع الجلود ومدري ايش قلنا لا بنروح بوتراجايا نبغي نلحق صلاة العصرهناك قال تمام ساله ابو حسن في مطاعم هناك قله ايوه قلنا تمام وطول الطريق يتكلم معانا ويورينا الاماكن واخذ بينا جولة بالسيارة للحديقة حق بو تراجايا واعطانا كتاب عن كوالالمبور وساله ابو حسن لو بنروح جنتنغ بكم توصلنا قله اوصلكم واقعد معاكم ب 300 رنجت قله تمام نشوفاذا بنقدر نروح ونبلغك وساله بكم توصلنا المطار قله ب 100 رنجت قله تمام بيننا تواصل وصلنا وكان في عساكر كثير مرة قله ابو حسن ليه قله ممكن في مسوول كبيرهنا انا مااعرف اعطيناه اجرته ونزلنا























وصلنا ونزلنا تحت لانه لسه مااذن بعدما اتصورنا وبعدها شافوا البزورة البغباءوالا يتصورا معاه مرة ثانيه بسبب ان ماعجبتهم صورهم بالمنارة مو حلوة قلنا طيب صورة جماعية ماتفرق ولعبوا البزورة شوي واشترينا لهم عصير برتقال وتمشينا شوي











































وبعدها اتجهنا للمسجد وصلينا العصروكان في الحفل الختامي لمسابقة حفظ القران وفي مسوؤل كبير جاي والدنيا زحمة عرفنا سر العساكراولاد وبنات والمسجد بارد ماشاء الله تبارك وروعة فعلا خلصنا الصلاة وتجولنا شوي وابو حسن يقلي والله شمس ايش رائك نحضرالاحتفال ممكن نقابل الرئيس ونسلم عليه قلت من جدك قال كوش كوش قلت وش ذا قال امزح بالتركية قلت غلط بدات تنسى معناها شكا شكا قال طيب وكوش بوش قلت كوش اركض وبوش ادفع بالانجليش قال كويس مانسيتي لا بس لازم نروح تركيا قال الله يوفقهم وخرجنا























وكان الجو حر حر مرة شديد عكس الصبح قلنا يالله شوي الجو يزبط مشينا ونزلنا بالسلالم مرة ثانيه وسالنهم فين حجز رحلات البحيرة ووين القصر المغربي ورونا وكان القصر المغربي بعيد كنسلناه عشان لايتعب ابو حسن اتحهنا للمكتب وحجزنا قارب لوحدنا واتوكلنا على الله وركبنا وبدانا الجولة وانا خايفة على الصغير يبغي ينط هههه الا وابو حسن ترجع له الدوخة وقلي لازم نرجع شايف الدنيا تدور طلب من الرجال يرجعنا قله كيف لسه باقي وقت قله لا مو لازم مانبغي رجعنا ووجلسنا بالظلة وكان جدا دايخ















صور للقصر المغربي اللي كنسلنا زيارته للي يحب























ريحنا وقعدنا نسولف والشمس تخف بس الجو مكتوم مافي هواء وبعدها قلت نرجع الفندق قال ابو حسن لا انا ارتاح شوي ونرجع نكمل وعدت البزورة اوديهم الملاهي قلت ماله داعي قال مو المول قريب خلاص نروح دام الالعاب زي ادفنشر زون يصير نريح انا وانتي وهم يقعدوا يلعبوا بعد الدواء اشترينا خفايف وقعدنا ناكل لين وصلنا للمسجد وطلبنا اوبر للذهاب لمول ioi city

( ذي صور من النت للالعاب والمول )







هذه الصورة تم تصغيرها . الحجم الافتراضي لها هو 1200x800.



هذه الصورة تم تصغيرها . الحجم الافتراضي لها هو 1200x800.























ونحنا باوبر قلت لابو حسن مافي وقت الساعة 5:30 الحين يادوب نروح للسونغوا وانغوا ارجع الاغراض اخاف نروح هناك وننسى قال تمام وغيرنا الوجهه لسوق سوانغوا وانغوا وصلنا للسوق والكل جوعان ولقينا على اليسار مطعم ناندوز دخلنا وطلبنا الاكل واكلنا الحمد لله











































وبعده دخلنا السوق وصلينا المغرب واستبدلنا الاغراض واتسوقنا ولقينا شوكلاته ارخص من المصنع بس مالقينا نفس الحلاوة اللي بالمصنع للامانه وها لقطت لكم كم صورة















وبعدها قال ابو حسن ايش رائك نروح التايمز سكوير ناخذ لفه ونشوف الوضع ممكن الالعاب ماتناسب البزورة يصير بكرة نغير خطتنا قلت تمام وتوكلناعلى الله







مشينا على رجلنا لين وصلنا التايمز سكوير لفينا المول بسرعة بس كذا نطلع الادوار ودخلنا كذا محل نشوف البضايع لين وصلنا الملاهي بعدها شفناها وانبهروا البزورة بيهاقالوا نبغي نلعب شفنا الساعة كانت قريب 8:15 قلنا خلاص شوي بيقفلوا قالوا لا يابابا مكتوب 10 وريناهم الساعة وصارت وجوههم كذا قالوا بكرة نجي قلنا لهم بكرة بنسافرالسعودية خلاص بعدها كملنا الجولة بالمول واشترينا فطائر ومعجنات من دا المحل المعروف للاغلبية بالمنتدى











والبزورة وجوههم مقلوبة وقاعدين يعاتبونا ليه ماكان جينا من الصبح وكذا واتفقنا بعدها انه نرجع نخليهم يسبحوا لانه اخر يوم قلنا طيب كملنا جولتنا بالمول لين قفلت المحلات بعدها نزلنا وعلى طول طلبنا اوبروالى الفندق اتعشينا بالفطائروالمعجنات وناموا البزورة ونزلنا انا وابوحسن نغسل الملابس بالغسالة وابوحسن قعد ينتظرعند المسبح وانا طلعت وبعد ساعة رجع وطبقت الملابس ونشرت اللي يبغاله لسه تنشيف ونمنا وانتهى يومنا ولله الحمد







تقيمي لجولة الباص السياحي

20/20

روعة تحفة تجنن يبغالكم بس تختارو الوقت المناسب والحمد لله تحس حللنا قيمة التذكرة بس زي ماقلت لكم خصصوا لها يوم حر او ضموها ضمن الجولة للاماكن وندمت اني ماجربت حق بينانغ



تقيمي لمول سوانقوا وانقوا

20/15

حول وجميل ورائع فيه الغالي والرخيص ومنظم ومكيف عيبه المصعد شوي يتاخراحيانا



تقيمي لمطعم ناندوز

20/10

المطعم مرتب ومنظم ونظيف والاكل طعم ولذيذ عيبه الصوص مو طعم الافضل تاكلوا معاه كاتشب فقط ممكن اشبه الدجاج بطعم فروج الطازج اللي في السعودية مع اختلاف التتبيلة والاسبياليد ان شاء الله اكون كتبتها صح بطعم الدجاج المكعبات المشوي اللي يجيك مع اي مشاوي مشكلة

عيبه الحمص لايمت لطعم الحمص بصلة مرة مرة لاتطلبوه و احس المكان مكتوم ممكن بذا الفرع بس لكن الفرع اللي بسوريا ارتب



تقيمي لمصنع الشوكلاته

20/10

المميز فيه الشوكلاته بالفراولة والشوكلاته السادة والشوكلاته بالترامسيوا بس اسعاره غاليه للامانة بس عروضهم روعة اللي عليها عروض واخذت قهوة بيضاء بس مو مرة واو طعمها زي الكابتشينوا اللي هنا وممكن اللي انا اسويه بالبيت اطعم



تقيمي لمسجد بوتراجايا

20/20

جدا رائع المسجد وتحفة معمارية وروعة لازم تزوره



تقيمي لمنطقة بوتراجايا والانشطة فيها

20/20

روعة تجنن تحفة الكل لازم يروحوها وحرام تقولوا يبغالها كم ساعة احس حلو الواحد يخصص لها نص يوم لان الانشطة فيها كثيرة افضل الاوقات لها من بعد العصر للمساء بس بشرط مايكون الجو مشمس وحار العصر زي يومنا



تقيمي للتايمز سكوير

20/15

مجمع شامل متكامل فيه كل اللي تتخيله يشبه السونغوا وانغوا يبغاله يوم كامل لو بسرعة لكن لو تبغوا تدخلوا كل محل يبغاله 4 ايام







مصاريف اليوم السادس عشر

اوبر لمصنع الشوكلاته ولبوتراجايا = 40 رنجت

خفايف وعصير وموية = 20 رنجت

تذاكر رحلة البحيرة = 142 رنجت ( على مااذكر نسينا نسجل قيمة التذاكر )

اوبر لسوق سوانغوا وانغوا = 35 رنجت

غداء في ناندوز = 133 رنجت

خفايف من التايمز سكوير = 20 رنجت

اوبر للفندق = 10 رنجت

المجموع = 400 رنجت = 280 ريال

بسم الله الرحمن الرحيم



اليوم السابع عشر
اصبحنا واصبح الملك لله لا اله الا الله محمد رسول الله

الاماكن المراد زيارتها
1 - مول Kenanga Wholesale City
يفتح يوميا من 10 ص - 10 م

2 - ملاهي التايمز سكوير
‏https://www.berjayatimessquarethemep...om/buy-tickets
تفتح يوميا من الساعة 10 ص - 10 م
الكبار = 51 رنجت - الصغار = 41 رنجت - ( 0 - 2 ) مجانا
بكج عائلي ( 2. كبار - 2 صغار ) = 147 رنجت

3 - مول التايمز سكوير
‏Imbi, 55100 Kuala Lumpur, Federal Territory of Kuala Lumpur, ماليزيا
يفتح يوميا من 10 ص - 10 م



صحينا اليوم الساعة 6 وصلينا وفطرنا ووقعدنا نتشاوروين نروح فترة الصباح قلت لابوحسن اولا تعال اقيس ضغطك وكيف انت الحين اذا تعبان ماله داعي نروح مكان مفتوح قال لا والله احسن امس شكله كنت تعبان وفوقها الشمس تعبتني قلت تمام كذا طبعا البزورة يبغوا المسبح وقلت لهم مستحيل بكرة سفرومتى الملابس تنشف صارت وجوهوهم كذا وابوهم نفسه يروح جنتنغ عشان البرد وانا خايفة على البزورة من البرد وودي نوديهم ملاهي التايمز سكوير عشان نحنا خلينها لاخر يوم وودي اروح سوق شوي والبزورة يطلعوا بفكرة ماما مانروح مكان قلت ليه قالوا البزورة ماما نحنا نفسنا تطبخي لنا خلاص نبغي الاكل اللي كنتي تطبيخه بالبيت قلت امروا ايش تبغوا ماما نفسي في سليق و ماما نفسي في زربيان قلت تمام روحوا قولوا لبابا يشتري الاغراض واطبخ لكم قال ابو حسن اقول مشوا حالكم بكرة باذن الله نرجع السعودية قالوا يابابا امس قلتم اليوم ومارجعنا قلت لهم غلطنا بعدين سالتهم يعني انتم طفشتوا قالوا بصوت واحد ايوه مرة طفشنا خلاص قلت الغلط على اللي يخليكم تسافروا صح ياابوحسن قالوا لا نمزح نمزح قال ابو حسن خلاص المرة الجاية نسافر انا وماما لانكم طفشتوا



المهم الساعة ثمانية كنا جاهزين وجالسين نفكر وابو حسن قاعد على الجوال الا يسالني ايش رائك نروح الاوتليت اللي قريب المطار ونكنسل المول ذاك قلت ايش المناسبة قال صراحة اخواتي وصوني بكذا غرض منه وكمان عشان لو ناسبك شي عاد مايحتاج تعرفوا راي مايحتاج مشاورة خلصت ترفيع اللي بيدي واتصل ابو حسن على السواق ادم وساله تودينا بكم للاوتليت قال قد ايه ناوين تقعدوا فيه قلنا لين الظهر قال ب 100 رنجت ووارجع لكم الظهر قارنا السعر باوبر لقيناه ارخص قلنا له تمام. وصل السواق واتجهنا للاوتليت طبعا الطريق اخذ ساعة والبزورة ناموا لين وصلنا عشرة الا ربع

















طبعا دخلنا واتسوقنا وكان في العاب بسيطة كذا للاطفال عاد البزورة فرحوا ماما انتم روحوا اتسوقوا ونحنا نلعب قلنا انسوا وكملنا وبعدها الساعة 12:30 البزورة ماما جوعانين قلت طيب الحين نشوف مطعم ورحنا جهة المطاعم اخذنا لفة اغلب المطاعم ماليزية قلنا نجرب دخلنا دا المحل واخذنا معجنات تصبيرة لانها اضمن شي يكون طعم واكلنا واتصلنا على السواق قال خلوكم عند البوابة 10 دقايق وانا عندكم

























وطول الطريق يسولف ويحكي لنا انتم من وين وسالناه ان بنجي مرة ثانية ماليزيا نقدر ننسق معاه من قبل ايوه مافي مشكلة



وصلنا التايمز سكوير وعلى طول قعدنا ندور على المصلى وفي طريقنا لقينا باسكن روبنز عاد البزورة ماما الله يخليك قال ابوهم طيب بس تسمعوا الكلام وقالوا امرك طال عمرك







وبعدها صلينا واتجهنا للملاهي قصينا التذاكر ولعبنا البزورة وقعدنا ريحنا ابو حسن قال بيروح يشتري كم غرض وبيرجع قلت تمام وانا قعدت مع البزورة وبعدها انا رحت تسوقت وهو قعد مع البزورة المهم الساعة 9 وقفنا لعب واكلنا شويى فواكه وبعدها رحنا عملنا مساج وبعده طلبنا اوبر وعلى الفندق حطينا العفش ونزلنا ثاني









وهنا الاخت تنتظر دورها بالمساج



قال ابو حسن ايش رائكم نروح ناخذ لفة في شارع العرب بالليل دامها اخر ليلة ولاني بمر اللويات بلازا عشان ارجع غرض قلت تمام والبزورة ايوه يابابا ايوه يحسبوا ملاهي تاني المهم رحنا للويات بلازا واتعشينا في فيل شيك



وبعدها اخذنا جولة ليلة لمدة ساعتين ونص وبعدها طلبنا اوبر ورجعنا للفندق ونحنا بالطريق اتصل ابوحسن على عبدالرحمن واكد له على بكرة الساعة 6 يودينا المطار قال تمام





















وصلنا الشقة وجهزت البزورة لبكرة ونومتهم وانا كملت ترفيع الشنط ونمنا والحمد لله انتهى يومنا الاخير في كوالالمبور



تقيمي للاوتليت
20/15
روعة وجميل ومنظم ومرتب واسعارة حلوة جدا عيبه بعيد عن كوالالمبور
‏Persiaran Komersial, 64000 Klia, Selangor, ماليزيا
يفتح يوميا من 10 ص - 10 م

تقيمي لملاهي التايمز سكوير
20/20
تحفة وتجنن ومتكاملة ومتوفر فيها اغلب الالعاب لجميع الاعمار

تقيمي لمول التايمز سكوير
20/15
حلوة وممتع ومتنوع بس عيبه مرهق بالمشي والمصاعد تتاخر

تقيمي لفيل شيك
20/20
لذيذ وطعم وحلو وكل شي روحه

تقيمي لشارع العرب
20/10
للامانة شارع عادي جدا زحمته ذكرني بزحمة ايام رمضان اوالمناسبات اسعاره مقبوله المميز اسواقه اللي تناسب اغلب الميزانيات متوفرة وبكثرة عيبه كثرة محلات الشيشة والبارات وكثرة اللي يعرضون عليك الخدمات بشكل يطفش



مصاريف اليوم السابع عشر
اوبر من والى الاوتليت = 100 رنجت
معجنات وموية من الاوتليت = 40 رنجت
اوبر للويات بلازا = 10 رنجت
ايس كريم من باسكن روبنز = 40 رنجت
فشار وعصيرات وفواكه = 40 رنجت
غداء وعشاء من برجر كنج = 80 رنجت
مساج وكريمات للمساج = 130 رنجت
اوبر للفندق = 10 رنجت
المجموع = 530 رنجت = 380 ريال

بسم الله الرحمن الرحيم







اليوم الثامن عشر

اللهم مااصبح بي من نعمة او باحد من خلقك فمنك وحدك لاشريك لك فلك الحمد ولك الشكر



الاماكن المراد زيارتها

1 - مطار كوالالمبور

‏ Kuala Lumpur International Airport, 64000 Sepang, Selangor, ماليزيا



2 - مطار الدوحة

الدوحة, قطر



3 - مجمع فيلاجيو

شارع الوعب, الدوحة, قطر

يفتح يوميا من 9 ص - 11 م



4 - حديقة اسباير

‏Aspire Park Running Trail, Doha, قطر

تفتح يوميا 24 ساعة

الدخول مجانا



5 - المتحف الاسلامي

الدوحة, قطر

يفتح ( الخميس والجمعة والسبت ) من 2 ظ - 8 م

يفتح ( الاحد والاثنين والاربعاء ) من 10:30ص-5:30م

الدخول مجانا



6 - سوق واقف

الدوحة, قطر

يفتح يوميا بوقتين

الوقت الاول من 7:30 ص - 12 ظ

الوقت الثاني من 4 ع - 10 م







صحينا اليوم الساعة 5 واتجهزنا وفطرنا فطور خفيف وصلينا والساعة 6 بالتمام السواق يدق علينا نزلنا وعملنا التشيك اوت ووركبنا السيارة وودعنا ماليزيا











وصلنا المطار وورحنا غلفنا الشنط وشحن الشنط وطلبنا استلامهم في جدة قالوا تمام تجولنا ونحنا بالطريق للبوابة وبعدها وصلنا البوابة وربع ساعة وفتحوها وجينا نطلع الطيارة وهنا صارت سالفه







وقوفنا على جنب ليه طلبوا مني بطاقة الاقامة قلهم ابو حسن ايش المشكلة قالوا مافي مشكلة بس لانها مقيمة بالمملكة ولازم نتاكد بان اقامتها سارية المفعول قلنا طيب اعطيناهم الاقامة قالوا منتهية وذي كانت اكبر غلطة اخذنا الاقامة المنتهية طيب يقولوا لازم تدونا الاقامة قلهم ابو حسن ياجماعة الخير صلوا على النبي ذي زوجتي حاول فيهم لا ماهم راضين انا اتصلت باهلي بس طلع ماعندهم صورة للاقامة المجدد ة حقي ساعتها احترنا ايش نتصرف وقعد يتكلم ويحاول فيهم الا شوي واحد فيهم قال انتظرشوي وجلسنا ننتظر بعدين جانا واحد وقعد ابوحسن يشرح له الوضع قام قله ان ذا اجراء جديد بسبب الاوضاع في اليمن وكذا قله ابو حسن طيب ذي زوجتي وماكنت اعرف قله والله لازم الاقامة والا ماتطلع الطيارة بعدين تذكر ابو حسن انه جاب كرت العائلة وانا مضافة معاه وراه كرت العائلة وان الاقامة مجددة وكذا قال طيب انتظروا شوي بعدها بشوي اعطونا الجواز وقال تفضلوا مسموح لكم بالمغادرة







المهم ركبنا الطيارة واتوكلنا على الله وبدات معاناة ولدي الصغير مع المضيفات بسبب حزام الامان جننهم جنان مو طبيعي الله يهديه مع الاقلاع والهبوط واللي صار برحلة الذهاب صار برحلة المغادرة وزعوا للبزورة شي يتسلوا بيه وبعدها بساعة او ساعتين اعطونا الوجبات وبعدها اعطيت البزورة كلهم دواء لسببين اغلبهم صحوا الصبح واذنهم تالمهم وفوقها البارح جدا جدا ارهقوا صاحين من 6 وماناموا الا الساعة 1 وذا عن قصد مني ومن ابو حسن عشان يناموا بالطيارة المهم دخلنا بنوم عميق انا والبزورة و مادريت عن نفسي الا قبل الهبوط بساعة صحتني المضيفة وتسالني تبغي سمك او دجاج قلت دجاج للكل المهم اكلت انا وابوحسن بعد نص ساعة صحيت البزورة وخليتهم ياكلوا وجباتهم ويروحوا الحمامات الله يعزكم عشان لايطفشوني بمطار قطر















ووصلنا مطار حمد الدولي الساعة 12 ونص او 1 رحنا قسم العفش اساس ناخذ العربية وانتظرنا انتظرنا ماهي فيه سالنا قالوا لا سيتم تسليمكم هيا ساعتها انا قلبي وجعني المهم لان الولد بيتعبني بس قلت لعلها خيرة

بعدها قمنا اتجهنا لجهة الدخول لقطر في موظف شافنا وقال ترانزيت من هنا وخلانا نروح قسم متابعة الرحلات وصلنا هناك قالوا لنا لا اذا بتدخلوا قطر روحوا بوابة الدخول لقطر قلنا تمام قال انتظروا ايش الجنسيه قلهم ابو حسن انا سعودي وزوجتي اجنبيه قال الموظف طيب عندك تاشيرة قلهم قالوا لي لايلزم لان عندنا ترانزيت فقط قله مستحيل انتم ممكن تدخلوا لكن زوجتك ممنوع قله طيب اقعد ترانزيت 13 ساعة قله اقل شي لازم يكون عندك حجز فندق او تحجز بفندق المطار قله ابو حسن متاكد انا سالت قالوا مسموح قله روح جرب حظك رحنا ووصلنا لقسم الجوازات وسالنهم قالوا انزلوا تحت واسالوا سالنا الموظف وقال خليها تروح تطابق هات هويتها دامك زوجها تدخل معاك شاف الهوية قال بس ذي منتهية قله ابو حسن والله نسيت المجددة قله مايخالف في طريقة دامك كفيلها كويس وبنعرف ان اقامتها مجددة او لا قلي اروح اطابق البصمة بعدين قله تمام كذا خلاص الله يحيكم تدخلوا والحمد لله











خرجنا من المطار واشترينا موية وحلاوة للصغير لانه كان بس يبكي بسبب اني دخلت اخذوا البصمة وتركته عند ابوه وحولنا باقي الرنجت لريال قطري المهم بعدها طلبنا اوبر واتجهنا لمول فيلاجيو



















وصلنا المول الساعة 2:30 اول شي صلينا ظهر وعصر وبعدها قعدنا ندور ونلفلف واحترنا ايش ناكل قال ابو حسن اقلك نطلب شي نعرف طعمه اختاروا ماك او هارديز او برجر كنج قالوا البزورة برجركنج وصلنا لين عند برجر كنج جينا نطلب ابو حسن شاف صرصور يمشي قال ماعاد نبغي ناخذ هارديز قلنا تمام والبزورة ماعاد يبغوا اكل يبغوا ملاهي بس مادخلتهم بسبب ان الاسعار غالية جدا وكمان الالعاب عادية جدا رحنا اخترنا طاولة قريبه من ساحة التزلج وطلبنا واكلنا والحمد لله وبعدها كملنا جولة بالمول واتصورنا كم صورة ونحنا نتصور برضوا الصغير الله يصلحه حجز راسه بالحديد ويالله خرج راسه وكمان يبكي وبعدها كملنا ندورعلى البوابة اللي تخرجنا للحديقة































































الساعة 4 لقينا البوابة وخرجنا الحديقة الجو كان يجنن يجنن يجنن روعة مايوصف صراحة والحديقة تحفة فنية من جد ومنظمة ومرتبة فيها كل شي لعبوا البزورة واتسلوا وقعدنا لين قبل المغرب بنص ساعة بعدها دخلنا المول لان الجوصارثلج وودنا نصلي































دخلنا المول وصلينا مغرب وعشاء وبعدها ابو حسن دخل فيرجن استور وانا والبزورة دخلنا كوفي واخذنا قهوة وفشار وقعدنا قرابة ساعة البزورة كلهم ناموا قلت تمام افضل بعدها جاء ابوحسن وشرب الكوفي اتجهنا للبوابة وطلبنا تاكسي واتجهنا لسوق واقف























































وصلنا سوق واقف الساعة 7:30 تمام ولفينا فيه واشترينا كم حاجه ولفلفلنا والجو ياناس ياعالم والله يجنن بس مايناسب اطفال ابد صدقوني قاعدة الف الف وانا خايفة على البزورة الا شوي ميمي تقول ماما انا مرة بردانه قلت تمام خرجت بطانية حق الطيارة قال ابو حسن اخذتيها قلت كلمت المضيفة وقالت مافي مشكلة خفت الجو يبرد والجاكتات ماتكفي البزورة قال متاكدة الموظفة قالت عادي قلت والله قال تمام شوي قلي اقلك في بطانية تانيه قلت فيه جبت ثلاث اخذ واحدة قال كويس عملتي خير قلت دحين































































المهم كملنا الجولة بالسوق والساعة 11 طلبنا تاكسي وعلى المطار وصلناهناك 11:30 تجولنا بالمطار في الطريق للبوابة ووصلنا وكانت الساعة 12:10 وقعدنا ننتظر لين تفتح البوابة طبعا الكل نام وانا مع البرد جاني النوم حاولت اقاوم ماقدرت قلت مافي الا اشرب كوفي طلبت لي كوفي ولابوحسن شاي وانتظرنا والساعة 1 مافتحت البوابة استغربنا راح ابوحسن سالهم قالوا بتتاخرالرحلة ساعة وتم اخباركم قلنا بالله شفنا الجوال لقينا فعلا ارسلوا لنا ونحنا ماانتبهنا المهم قلنا كل تاخيرة وفيها خيرة والساعة 1:50 دقيقة فتحوا البوابة وطلعنا الطيارة والساعة 2:45 اقلعنا الى جدة



























بعد ساعتين ونص وصلنا مطار الملك عبد العزيز ونزلنا من الطيارة الا وفيه هتان يالله قد ايه فرحوا البزورة ركبنا الباص ووصلنا بحمد لله المطار وبعدها رحنا نستلم العفش والحمد لله نحنا اول ناس نزلت شنطنا







وجينا عند فحص الامتعه ووقفونا على جنب ليه ايش فيه افتحوا الشنطة دي قلهم ابو حسن طيب طلعت شنطة البزورة وقعدوا يفتشوها استغربت الحين الشنطة اللي انا حاطه فيها كل الاغراض اللي اشترينها عشان لو في شي ممنوع يصير تنفتح شنطة واحدة الا ويفتحوا شنطة البزورة وخرجوا حاجه وابو حسن راح وراهم وانا فتحت تحقيق مع البزورة حطيتوا شي بالشنطة وهم يقولوا ولاشي ياماما وانا عصرت مخي مليون عصره مافي نتيجة الا حسن يقلي ماما انا حطيت القلم اللي اشتريته بالسحاب حق البنطلون بالشنطة قلت طيب قلم لايكون حطيتوا شي ثاني قالوا لا المهم وقعدنا انتظار ساعة وللامانة بدات اخاف ايش ذا ايش اللي صاير دقيت على ابو حسن ويديني مشغول قلت كل تاخيرة فيها خيرة شوي ويجي ابو حسن قلت خير قال تصوري بسبب قلم الليزر اللي اشتراه الولد يقلك ممنوع قلت بالله ينباع في كل مكان قلي قالوا لا ممنوع ويتصادر وتدفع غرامه 50 ريال قلت يارباه قلم قيمته 15 ريال غرامته 50 قال لا وازيدك من الشعر بيت كمان كتبوني تعهد اني ماعاد اجيب ممنوعات







المهم طلبنا اوبر طلع سعره نفس سعر تكسي المطار قلنا ناخذ من تكسي المطار اسهل وركبنا بسيارة انوفا وتوكلنا على الله واتجهنا لمكة العشق وصلنا بيتنا بعد ساعة ونص ونزلنا العفش وكانت الساعة 6:30 الفجر فتحت الباب وقلبي اوجعني قلت لابوحسن ودي ارجع ماليزيا قعد يضحك عاد الحريم بس بيفهموا ايش اقصد حطينا الشنط وصلينا وعلى طول رحنا بيت اهلي سلمنا عليهم واطمنا على لولا لانها وحشتني مرة مرة اول مرة اتركها الفترة الطويلة ديعندهم وحطيت البزورة ورجعت البيت رفعت ونظفت وخلصت والعشاء جبيت البزورة البيت تعشينا ونمنا احلا نومه حسيت نفسي كان ليا سنة مانمت







تقيمي لفيلاجيو مول

20/15

مول جميل وتحفة تصميمه روعة وجذاب عيبه جدا جدا غالي صراحه



تقيمي لحديقة اسباير

20/20

جدا روعة تجنن متكاملة ماينقصها شي لازم لازم تروحها وافضل مافيها انها قريبة جدا من مولين فلاجيو مول وحياة بلازا مول



تقيمي لسوق واقف

20/20

جدا جدا جدا رائع يذكر الشخص بايام زمان وفيه شغلت حلوة ويتوفر فيه كل شي بس اتوقع بالصيفية الجو بيكون مو مناسب لزيارته







مصاريف اليوم الثامن عشر

تاكسي للمطار =150 رنجت

تغليف الشنط = 50 رنجت

اوبر لفيلاجيو مول = 50 ريال قطري

غداء من هارديز = 55 ريال قطري

قهوة وماء وفشار = 50 ريال قطري

اوبر لسوق واقف = 50 ريال قطري

اوبر للمطار = 30 ريال قطري

سناك للاطفال وقهوة من المطار = 50 ريال قطري

تاكسي من المطار للمنزل = 250 ريال سعودي

المجموع = 690 ريال







وبكذا انتهت رحلتنا لجوهرة اسيا والحمد لله حمدا كثيرا كما ينبغي لجلال وجهه وعظيم سلطانه وصلى اللهم وسلم على سيدنا وحبيبنا محمد عليه افضل الصلاة واتم التسليم