تقرير رحلتي لـ #تايلاند

11-10-2018, 08:05 AM

السلام عليكم

كيف حالكم ايها الاقلاعيون ؟

ان شاء الله بخير؟
بالمختصر المفيد اليوم ان شاء الله راح اكتب لكم تقرير عن رحلتي لتايلاند من تاريخ 26 فبراير 2016 إلى 13 مارس 2016 ..
بصراحة كانت رحلة جميلة واستمتعت " بكل يوم فيها " ..

في البداية معلومات بسيطة عن تايلاند ..

تايلاند المعروفة سابقا باسم سيام هي دولة تقع في جنوب شرق آسيا في شبه الجزيرة الهندية الصينية تحدها كل من لاوس وكمبوديا من الشرق، وخليج تايلاند وماليزيا من الجنوب، وبحر أندامان وميانمار من الغرب. تنقسم تايلند إداريا الي 75 محافظة التي بدورها تنقسم الي احياء وبلديات بالإضافة الي عاصمة المملكة التايلاندية بانكوك التي تعتبر منطقة إدارية خاصة وعاصمة البلاد وأكبر مدنها.

علم مملكة تايلاند:

شعار مملكة تايلاند:

خلاص خلونا من القرقرة الزايدة الي فوق ونرجع للتقرير

احسن ولا ؟

..

طبعًا انا زرتها قبل لكن بتخطيط مختلف وكانت الرحلة من الرياض > ابوظبي > بانكوك
رحت لبتايا يومين وماعجبتني
وبعدها رحت لبوكيت 6 ايام < ومع الاسف ماسويت فيها شي يذكر لان خويي طاح وتعب ثلاث ايام

..
وبعدها بانكوك العاصمة 4 ايام وماحبيتها ابداً ..

اما خطتي في الرحلة هذي كانت من الرياض > الدوحة > بانكوك

من بانكوك اخذنا سيارة لبتايا " مع ان ماكان ودي ازورها ابداً " لكن صاحبي قال لازم نزورها عشان الفلوتينق ماركت الي هو السوق البحري الي راح تشوفون صوره تحت .. جلسنا فيها ثلاث ايام ..

وبعدها بوكيت " 12 ليلة " < الرحلة السابقة كانت 6 ايام < واضح اني كنت ابي احللها ؟

حتى لو مرضت او مرض خويي يكون عندنا وقت

اما بالنسبة لبانكوك جلسنا فيها يوم فقط عشان نرجع للرياض من المطار ..

طبعًا بعد ماسافرت وخلصت اكتشفت انك تقدر تطلع من الرياض > الدوحة > بوكيت مباشرة

مايحتاج تمر بانكوك وان شاء الله هذا راح يكون خطتي الجاية " اذا قررت ارجع لها مرة ثالثة "

..

نرجع لأهم التفاصيل ..

في البداية السفر لدولة تايلاند ممنوع على مواطنين المملكة العربية السعودية

يعني مافيه طيران مباشر من الرياض لبانكوك

طبعًا ماحد راح يقول لك حاجة الا اذا جيت تجدد الجواز يمكن يمنعونك من السفر وفيه غرامة لكن مايدققون واجد الا اذا طحت بواحد مستقعد .. عشان كذا حاول تدبر لك واسطة او احد المعقبين برا يضبطك اذا جيت تجدد الجواز

..

^
صورة حسيتها احترافية وحبيت انزلها

" لاتدققون ع الخرابيط ع الكرسي والملابس عزابية

" خخخخخخ

وإتجهنا للفلوتنق ماركت ببتايا ..

وهذا المدخل اخذنا التذاكر وركبنا قارب يمشينا ع السوق ع النهر بعدين ينزلنا بنص السوق ونتسوق ...

وهذا السوق

وهذا هو السوق الي ببتايا ..

بعدها اتجهنا الى جزيرة بوكيت ..
وهذي صورة من امام الغرفة عندنا

وهذي صورة ثانية يوم طلعنا نتغدى في المول حسيتها احترافية

.. وقلت لازم انزلها ..

بعدها تمشينا في بوكيت وقمنا نبحث في الكوشكات عشان نبحث عن رحلة للجزيرة الاولى وهي Phi Phi island ..
وحصلنا ارخص كوشك لشخصين 1200 بات تقريباً ب 120 ريال ..

ومدة الرحلة من الساعة 8 الصبح الى 4:30 العصر ..

وصحينا الصبح وافطرنا وانتظرنا الباص يمرنا مع القروب ..

وهذي الصورة واحنا متجهين للجزيرة ..

11-10-2018, 08:07 AM

وهذي صور من الجزيرة ..

بردوا ع قلوبكم

^

خقيت مع نفسي كثير يوم صورت الصورة هذي

الصور السابقة كانت لجزيرة بي بي ايلاند .. ومعاها كم جزيرة في نفس الرحلة .. كانت رحلة جميلة جداً جداً .. مع شاطئ القرود .. ايضًا توقف وتنزل القرود وتعطيها اكل

..

وهذي صورة منوعة

..

بعدها رحنا لمملكة النمور .. والتصوير مع النمور وتختار صغير جداً / صغير / وسط / كبير / كبير جداً ..

وطلعنا ايضًا لرحلة ركوب الفيلة / وعرض الثعابين / وعرض القردة / وعرض الفيل الصغير/ وركوب الدبابات ..
وهذي صورة من ركوب الدبابات

بعدها اتجهنا لجزيرة جيمس بوند الي مثل فيها فيلم المسدس الذهبي

وهذي صورة من الفيلم

^
وهذي هي الي اسمها جيمس بوند

..

بعد هالرحلة يبي لها مساج رايق ..

بعدها اتجهنا للخيول وركوبها ع الشاطئ ..

بالطريق للشاطئ..

11-10-2018, 08:13 AM

هذي من فندقي في بوكيت في اللوبي ..

وهذي من فندقي في بانكوك من البلكونة .. وصور من الفندق تمشيت فيه اعجبني بصراحة

^

ينفع شهر عسل بس معصي اروح شهر عسل عشان اجلس بفندق

..

نرجع للموضوع .. والكلام المهم الي نسيت اكتبه + بعض الاخطاء

..

اذا تبي تسافر لتايلاند يجب الآتي :

1/ استخراج فيزا سياحية من السفارة التايلانديه بحي السفارات من الرياض او " القنصلية بجدة " < وماني متاكد من جدة.
متطلبات الفيزا :
أ/ 3 صور شخصية
ب/ صورة للجواز
ج/ صورة لبطاقة الاحوال
د/ جوازك الاصلي
هـ/ حجوزات الفنادق والطيران
و/ مبلغ 160 ريال لاستخراج الفيزا

الفيزا تطلع بيوم واحد فقط.. تسلم جوازك اليوم تستلمه بكرا

.. سمعت انهم غيروا النظام هذا وصارت تاخذ 5 ايام ..

طبعاً مب لازم تطلعها من الرياض تقدر تطلعها من مطار تايلاند لكن " تحمل الزحمة الي هناك لان تايلاند معروفة بوجهتها السياحية والزحمة عليها من العالم " ..

الاغلاط الي سويتها :

أ/ مع الاسف اني حجزت لبانكوك بدل بوكيت بس كنت مادري عن هالرحلة
ب/ التصوير تم عن سناب شات " يعني اغلب الصور والفيديوات طارت في يومها

" ماعدى الي حفظتها في الاستوديو ولحقت عليها حمدلله ..
ج/ سكنت في فندق بعيد وكنت اخذ تاكسي رايح للمول او منطقة الشاطئ بـ 30 ريال سعودي وراجع بـ 30 ريال سعودي باليوم مرتين ثلاث مرات ع الاقل .. وهذا اكل من ميزانيتي .. الفندق جميل لكن مع الاسف ياكل ميزانيتك بالتاكسي .. طبعاً عندهم باص من الساعه 10 الصبح الى الساعه 8 الليل يوديك للمول او الشاطئ .. لكن مشكلته يطلع كل ساعه يعني اذا مالحقت عليه بتضطر تركب تاكسي

..

في النهاية .. اتمنى اعجبكم الموضوع واسف على التصوير والصور .. مثل ماقلت لكم فوق الصور عن طريق السناب شات

المواضيع المتشابهه
الموضوع	كاتب الموضوع	المنتدى	مشاركات	آخر مشاركة
تقرير رحلتي إلى تُركيآا	السعيد	رِيَاض إبْنُ بَطُوطَة لِسْيَاحَة والسَفَر	3	11-01-2018 02:46 PM
تقرير رحلتي لكيرلا	السعيد	رِيَاض إبْنُ بَطُوطَة لِسْيَاحَة والسَفَر	0	09-06-2018 02:28 PM
تقرير عن رحلتي إلى سريلانكا	السعيد	رِيَاض إبْنُ بَطُوطَة لِسْيَاحَة والسَفَر	3	08-01-2018 12:39 PM
تقرير رحلتي الى سنغافور	السعيد	رِيَاض إبْنُ بَطُوطَة لِسْيَاحَة والسَفَر	46	07-01-2018 08:30 AM

الذين يشاهدون محتوى الموضوع الآن : 1 ( الأعضاء : 0 , والزوار : 1 )