شيكاغو يونيو 2018 Chicago

مونتريال
اليوم الثالث








للأسف اليوم الثالث ماخذت صور وايد
تمشينا في شارع Saint-Catherine St الشارع طويل و مسافته 11.5 كيلومتر








حفل Jazz













وصلنا هذي الجزء من الشارع، هالجزء كله محلات حلوه ومطاعم وكافيهات لكن للأسف اسمه Gay village









شرينه آيسكريم 6.5 دولار وجلسنا، كنت ابي اشوف معارض سيارات كلاسك ادور في قوقل وحصلت John Scotti Classic Cars ، اتصلت فيهم اسأل اذا كانو فاتحين ، وقالو نعم فاتحين، شوي كان بعيد وخذينه Uber



وصلنا منطقة كلها وكالات سيارات وطلع الأخ John scotti وكيل لعدة شركات سيارات مثل السبارو و الفولفو، وشركات وايد وايد، و معرض خاص حق شركة لامبورغيني لكنه بعيد عن المدينه وشفته في الدرب واحنا كنا رايحين مونتريال

المهم دخلت المعرض وانا ماشوف سيارات كلاسك وكانو اكثر شي سيارات سوبارو و ميتسوبيشي، سألت الموظفة وين صالة السيارات الكلاسك، قالت انتقلو لمكان ثاني في الخلف مسافة مشي 5 دقايق، طلعنا تمشيته و وماشفت اي معرض! ورجعت ونلف ونلف في المنطقة! اخر شي شفت مبنى شكله ابد مايوحي انه معرض سيارات، ومسكرين ستاير الدرايش/النوافذ، وانه امشي يم المبنى، لمحت جزء من سيارة كورفت يبين من الدريشة، وطلع اهوه المبنى رحنا للباب ومسكر!! اتصلت عليهم وردة علي نفس الموظفة قلت لها ان المعرض مسكر، تقول مايصير، بخليه يفتح لكم،،،،، بس المكان كان مسكر مسكر بالكامل مو بس الباب الرئيسي،، انتظرت شوي و فقدت الأمل ورجعت بخيبة امل

توصيلة Uber سعر 31.33 دولار
سعر توصيلة العودة 26.29 دولار


لاحظت انه Uber يختلف من منطقة لثانية، في شيكاغو كان في Uber pool ارخص شوي ويكون معاك في المشوار راكب ثاني يوصله السائق قبلك، او تكون انت الراكب الأول وياخذ راكب ثاني، في مونتريال ماكان في هذي الأختيار


رجعنا للفندق ارتاحينه، الفتره المسائية نزلنا شارع سينت كاثرين مشينه عكس الجهة الي مشيناها الصبح، وتعشينا في مطعم صيني كان جدا لذيذ

نهاية اليوم الثالث

مونتريال
اليوم الرابع










اليوم الرابع نزلنا الصبح ورحنا محطة مترو قريبه من الفندق اسمها Station Place-des-Arts واخذنا تذكرتين حق ثلاثة ايام بسعر 36 دولار و التذاكر للباصات و المترو







ورحنا مطعم La Banquise معروف بالبوتين ويسويه على خلطات مختلفة، انه خذت بوتين وبرجر، صحن البوتين الصغير يشبع شخصين ! وشفت آسيويين طالبين كل واحد الحجم الكبير و تفاجئو بالمنظر يوم وصل طلبهم




و هذي البوتين الي طلبته ، سعر فطورنا كامل 40 دولار




رحنا بالباص Mount Royal park




















مشينا مسافه و صلنا فوق جبل Mount royal لمكان الإطلاله على المدينه وشفنا محطة باص موجوده، الباص الي ركبناه نفسه يوصل لفوق الجبل واحنا مشينه المسافة من تحت الحديقة



Montreal Olympic park تأسس سنة 1976 للألعاب الأولومبية الصيفية












مشينا مسافة بسيطة لأرفع نقطة وفيها صليب Mount royal cross الي موجود من سنة 1924، مب متأكد من المعلومة بس قريت انه ممنوع اي برج او مبنى في مونتريال يكون ارفع من النقطة الي موجود فيها الصليب




رجعنا الفندق للراحة، من غرفة الفندق يبين الصليب




كنا هناك





بعد الراحة نزلنا كالعادة رايحين شارعنه saint catherine st، بس هالمره عن طريق شارع Rue cresent

هذي الشارع و فيه بعض المحلات




هذي رسمة للمغني الكندي Leonard Cohen رسمها الفنان Kevin Ledo بالقرب من بيت المغني للذكرى بعد وفاته في سنة 2016




امطرت واحنا في شارع saint catherine st

















نهاية اليوم الرابع

مونتريال
اليوم الخامس و الأخير





اليوم الخامس والأخير، اليوم الي بعده يوم المغادرة، وعلى حظنا انه آخر يوم كان تاريخ 2 يوليو واهوه يومهم الوطني Canada Day وجاليات من كل دول العالم تحتفل فيه و في الليل عرض العاب نارية عند منطقة الميناء







هذي الطابور يبون نصيبهم من الكيكة




وهذي الكيكة








الجالية الفلبينية





تسوقنا في بعض المحلات و اغلبهم مسوين تخفيضات







العصر طلعنا نحلي ونشرب قهوة عند Joliette chocolate في شارع Saint Denis





الجو كان حار







تمشايه في الشارع














رجعنا بالمترو من محطة Beaudry








رجعنا الفندق انجهز امورنا لأنه في صباح اليوم الي بعده رايحين المطار راجعين الديره



المساء طلعنا وجهتنا كانت منطقة الميناء حق عرض الألعاب النارية





























وهذي كان آخر يوم في كندا

بلد عجيب و متنوع و الجو فيه حلو بس آخر اليوم صار حار ورطب مع ان مونتريال اكثر مدينة كنت اسمع عن بردها الخشن في الشتاء


رأيي الشخصي في المدن الي زرتها بالترتيب
فانكوفر كانت احلى واجمل منطقة ودي ازورها مره ثانيه

مونتريال حلوه وماحسيت بالملل فيها، فيها حركة مستمره

كويبيك جميلة ممكن تكون رحلة يوم واحد كامل من مونتريال في نظري تكفي

اوتوا هادئة جدا


تورونتو كانت المفاجئة، ماعجبتني وايد، مع العلم ان احلى شي عندي هذي النوع من المدن، ولكن ماعرف ليش مدخلت مزاجي، لكن ضروريه المدينة خصوصا حق زيارة شلالات نياقرا



سامحوني على التقصير

واتمنى يكون التقرير مفيد حق اي شخص يحب يزور كندا



وان شاءالله نلقاكم في رحلات و تقارير اخرى


النهاية