| كَلِمةُ الإِدَارَة |
 |
 |
 |
 |
 |  |  |
| جديد المواضيع |
|
||||||
| رِيَاض إبْنُ بَطُوطَة لِسْيَاحَة والسَفَر ( لسياحة ورحلات الطبيعية ) |
 الإهداءات |
 |
|
|
|
أدوات الموضوع | إبحث في الموضوع |
02-23-2018, 02:06 PM
|
#11 | |
 
|
رد: رحلتي الجميله لطوكيو 2015
الوجهه الثالثه وهي ساكورا كروز  رجعنا من نفسه المحطه اللي يينا منها وهي Otemachi Station 大手町駅 ومنها سرنا لمحطة اكيهابارا وهي Akihabara Station 秋葉原駅 نزلنا من المحطه وتمت سايا تسأل وين مكان المرفأ اللي تطلع منه السفينه وماطولنا وسرنا ع طول في اتجاه السفينه استقبلونا بترحيب ولكن كانت الصدمه الأولى وهي السفينه كانت عباره مركب صغير وكراسي مصطفين فيها كنا نتوقع شي أحلى من جيه بس قلنا ممشكله أهم شي الرحله اللي كلنا متحمسين لها وهي شوفت الساكورا عطيناهم حجزنا ودفعنا وما أتذكر كم دفعنا وركبنا المركب اللي كان متروس وتفرقنا في مقاعدنا لانه نحن يايين آخر الناس انطلقت السفينه وكانت الصدمه الثانيه الرحله جدا بايخه وماتستاهل العنوه واشجار الساكورا ماكانت وايد مميزه في هالمكان وعقب شفنا انه أشجار الساكورا في كل مكان في طوكيو يعني مافي داعي الواحد يطلعها رحلة خاصه ويخسر عليها ويضيع وقته لو تمينا في القصر جان أحسن  عشان جيه ما اهتميت أييبلكم تفاصيل هالسفينه من ناحية سعرها أو موقعهم الاكتروني لأنه ماتستاهل أصلا وايد ملينا ونحن فيها وكنا نبا نطلع منها ونستغل باقي اليوم بس ماقدرنا وانربطنا فيها ساعه ونص وخلصت رحلتنا البايخه الساعه 6 ونص مقتطفات من الرحله      ما أدري شو كان يشرح ماشفنا شي مميز كنا نمشي في قناه مائيه محجوزه بين جدران وكم شيرة ساكورا فيها وغير جيه مافي شي مهم      كان منظر ورد الساكورا وهو طايح ع الماي أحلى شي  انتظروني في جولتنا الأخيره في هاليوم
|
|
|
|
02-23-2018, 02:15 PM
|
#12 | |
|
رد: رحلتي الجميله لطوكيو 2015
نتابع معاكم
جولتنا في اليوم الاول في طوكيو  والحين الى وجهتنا الاخيره وهي برج سكاي تري   معلومات عنه يعد أطول برج للبث الإذاعي بالعالم يحتوي على أكواريوم ومرصد و300 متجر ومطاعم عند قاعدة البرج تفاصيل هذا اليوم رجعنا من نفس المحطه اللي يينا منها Akihabara Station 秋葉原駅 وانطلقنا الى برج سكاي تري Soramachi and Skytree في محطة Oshiage Station 押上駅   من توصلون المحطه بتدخلون ع طول في مبنى المطاعم اصلا المحطه في المبنى التابع لسكاي تري  أول ماوصلنا ع طول سرنا طابق المطاعم ، نسيت أي طابق كنا يوعانين وقلنا بندور مطعم مناسب شفنا قائمة المطاعم الموجوده  وبالصدفه حصلنا مطعم هندي ويقدم أكل حلال  من القايمه هاي عرفنا هو في أي طابق وسرناله  أكلهم كان زين وخدمتهم بعد  ماشاءالله زحمه عندهم ومطعمهم بعد كان صغير              عقب ماهدأت المعده أنا وبوعيسى دوخنا هههههههههههههه سرنا صوب البرج عشان نقطع التذاكر ونصعد  يوم وصلنا شفنا زحمه وطابور طويل بوعيسى قال انا بسير الكوفي وانتوا اصعدوا  وقفت فتره وياهم وعقب حسيت اني مسطله ومب قادره أصلب طولي وانتظر وياهم قلتلهم انتوا كملوا وانا بسير أيلس ويا ابوكم   الطابور من برع المبنى يمكن خذوا ساعه أو أكثر لين يام  أنا سرت عند بوعيسى أ في المبنى اللي عداله وكان فيه محلات وكوفيهات   المكان حلو بس انا مول مالي بارض خلاص حاسه بالانهاك وتعبانه وايد       يلست ويابوعيسى في هالكوفي وطلبت شاي قلت يمكن يصحصحني  ومن التعب كنت ناويه أحط راسي ع الطاوله وأرقد خلاص مافيي حيل وبعد فتره قالولنا نطلع عشان بيسكرون وسكرت كل المحلات والبنات ماوصلوا وعقب طردونا من المبنى يعني ماطردونا انما خبرونا انهم بيسكرون وانا قلتلهم بدخل الحمام عزكم الله وسار ويايي واحد من الامن لين الحمام واترياني عند الباب من برع وأنا خذيت راحتي وخيسته وحليله وهو يترياني .gif) ويوم طلعت كان مبتسم ووداني لين بوعيسى وعقب طلعنا من المبنى واضطرينا نطلع وننتظر برع لين شرفوا الحلوات سكاي تري فيه مستوىين وهم قطعوا تذاكر أعتقد للمستوى الاول وماقدروا يسيرون المستوى الثاني من كثر الزحمه غريبه انه هذا اليوم كان وايد زحمه ، شي ماكان طبيعي هل هو دايما جيه ، الله أعلم ؟ وما أدري بكم كان سعر التذكره ، عموما بتحصلونه في موقعهم بعطيكم الصور اللي صوروها البنات  شوفوا الزحمه اللي فوق      تعرفون حركات البنات في التصوير   عقب ماخلصنا كانت سايا تبا تمر مكان أعتقد مكان فيه مكينه عشان تطلع تذاكرنا حق الاوت ليت لانه سايا كانت حاجزه بالنت رحلتنا للاوت ليت ولازم تطلع التذاكر من مكينه معينه في الجزء الياي بييبلكم التفاصيل من سايا المهم نحن كنا في قمت تعبنا وريولنا تعورنا وماعنثرنا نركب القطارقلت لبوعيسى بناخذ تكسي وكانت المره الاولى وتقريبا الأخيره اللي نركب فيها تكسي اول شي وقفنا التكسي في مكان قريب من سكاي تري ونزلت سايا اظن في سوبرماركت وطلعت التذاكر من المكينه وعقب نزلناها عند محطة القطار عشان هي بترد منطقتها ونحن كملنا طريجنا لين الفندق وكانت الصدمه الكبيره أنه التكسي طلع علينا ب 250 درهم تقريبا  ماقدرنا نقول شي ودفعنا وتعلمنا الدرس كان يوم مرهق ومتعب واحس رغم جولاتنا الا انه ماشفنا الكثير رحلة القصر اللي الغيناها ورحلة محطة طوكيو اللي الغيناها ورحلة الكروز البايخه وسكاي تري اللي وصلناله ونحن منهكين وماشفناه عدل مثل الناس انطباعي عن السكاي تري يستحق الزياره انصح تزورنه من العصر وقبل المغرب تصعدون فوق عشان تشوفون الغروب ومدينة طوكيو تابعوني ... ورحلتنا القادمه بتكون في الاوت ليت 
|
|
|
|
|
02-23-2018, 02:20 PM
|
#13 | |
|
رد: رحلتي الجميله لطوكيو 2015
جولاتنا في اليوم 2 رحلتنا للاوت ليت Gotemba قبل سفرنا بحثت ودورت عن الاوت ليتات الموجوده في اليابان والقريبه من طوكيو وبغيت أفضلها واكبرها وسألت سايا وهي اقترحت عليه كم واحد ، وهاذيل هم In terms of outlet mall, I recommend to go Makuhari outlet or Yokohama outlet. These are relatively big and easy to get there. Makuhari outlet MITSUI OUTLET PARK MAKUHARI If you go Makuhari, there are other shopping mall nearby. Yokohama outlet MITSUI OUTLET PARK YOKOHAMA BAYSIDE بس أنا قريت عن أوت ليت جوتنبا وصديقتي مدحته وقالوا هو أكبر أوت ليت وسألت وحده أسمها ريم من الامارات وهي تدرس في اليابان عن طريق الانستا وبعد رشحتلي جوتنبا فخبرت سايا عنه واعتقد انه ماكان عندها فكره عنه وسوت بحثها عنه ورتبتلي حجز المواصلات وكيف نسيرله عنوانهم 1312 Fukasawa Gotemba-Shi,Shizuoka,japan 412-0023 GOTEMBA PREMIUM OUTLETS® - PREMIUM OUTLETS®[ENGLISH] سايا حجزتنا الباص عن طريقموقعهم هذا Shinjuku Station New South Exit(Yoyogi) | Shinjuku | Direct Bus | GOTEMBA | PREMIUM OUTLETS®ENGLISH وانا وهي نسقنا الوقت للسيره Shopping at Outlet Mall（御殿場アウトレット） من هاي المحطه ناخذ الباص رقم 3 اللي بيطلع الساعه 8:50 دقيقه ، واسم المحطه Yoyogi Station(代々木駅) وبنوصل الاوت ليت في هالوقت 10:25 Gotemba Outlet（御殿場アウトレット） ومن الاوت ليت بناخذ نفس الباص اللي نزلنا على الساعه 7 للعوده 19:00 御殿場アウトレット)Gotemba Outlet وبنوصل محطة شينجكو تسع الاربع 20:45 Shinjuku Station (新宿駅東口) ومن هناك بناخذ القطار لين محطة شيوبيا خريطة جوتنبا ينقسم الاوت ليت الى قسمين ، غربي وهو الاصغر  وهذا اللي تتوقف عنده الباصات  وبعدين نعبر جسر الى الجزء الشرقي والاكبر  تفاصيل هذا اليوم رحلتنا اليوم بدون مرشدتنا سايا صحينا بدري وتريقنا وطلعنا واليوم الجو يخبل غيوم وبروده حلوه وأمطار خفيفه أتجنن ع هالجو واشعر بسعاده كبيره تمشينا لين محطتنا محطة شيبويا وسرنا بالقطار لين محطة Yoyogi وهناك نزلنا ودورنا مخرج East الشرق  نمشي نتبع الاشاره  وراها  أخيرا حصلنا الباص رقم 3 واقف ويتريانا  طبعا شالين شنطة ترولي فاضيه حق التسوق وفيها قفازات ومظلات عطينا السواق التذاكر ويلسنا في كراسينا   الباص نظيف والاحلى انه شبه فاضي يعني ناخذ راحتنا ع كيفنا وانطلق الباص في الوقت المحدد ناس سيده تتأخر يروح عليك الباص يبعد الاوت ليت تقريبا من ساعه ونص الى ساعتين الاربع عاد نحن قررنا نرقد شوي في الباص بس في البدايه يلسنا نتفرج ع شوارع طوكيو والصراحه الجو يخبل ماودك تغمض عينك شوارع طوكيو ونحن في الطريج        الساكورا في كل مكان    وصلنا الاوت ليت   باجر بكمل وبدخل معاكم الاوت ليت |
|
|
|
|
02-23-2018, 02:25 PM
|
#14 | |
|
رد: رحلتي الجميله لطوكيو 2015
نتابع جولتنا في الاوت ليت
اضافه مهمه اليوم خبرتني سايا انها لما حجزت الباص من موقعهم اللي خبريتكم عنه استملت التذاكر من سوبرماركت أسمه فاميلي مارت Family Mart ファミリーマート أكيد هالموضوع موضح في الموقع بس حبيت أخبركم مثل ماخبرتني سايا نرجع لتفاصيل هاليوم وصلنا الاوت ليت   نزلنا من الباص وسحبنا شنطتنا وبدأت انطلاقتنا                شكلي ودرت التسوق وانشغلت بس أصورلكم       وقفنا عند هذا والبنات اشتروا كريب منه بس ماعيبهم  مره سألت سايا عن هاذيل اللي يحطون قناع ع حلجهم ليش يحطونه ؟ قالت عشان يحمون نفسهم من التحسس ، وايد اتيهم حساسيه من الربيع وانا منهم بس الحمدالله مايتني هاي الحساسيه هناك واعتقد انه بعضهم يحطون هاي الاقنعه اذا كانوا مرضى عشان مايعادون حد والعكس عشان ما أتيهم عدوى من حد    عقب عبرنا الجسر في القسم الثاني وهناك المحلات أكثر والجو ممطر  شفت هاي اللعبه من بعيد ما أدري شو تسوي بروحها هناك   شفنا هاي حاطينها للتصوير ونحن ماصدقنا  عاد عقب هالتعب والتلفلف يعنا ( جعنا ) وشفنا جدامنا هذا مجمع للمطاعم   عاد يوم دخلنا شفنا زحمة الاجانب سواء يابانيين ولا غيرهم  حجزلنا طاوله وسرنا دفعات الصراحه الاكل ماكان يشجع وما عرفت شو أطلب فشفت محل أكل ياباني ويبيع نودل وراويتهم البطاقه ، فلما قراها اقترح عليه نودل بالخضار  كأنها ديدان وطلبت تامبورا وهي عباره عن ربيان مقلي في خلطة شرات الكنتاكي أكيد كثير منكم يعرفها  ومن مطعم ثاني طلبت أكله وايد قريت عنها وشفت صورها واشتهيت آكلها وأسمها Takoyaki وهي عباره عن كرات محشيه بالاخطبوط وتقدم مع صوص أو بدونها  البنات ماطلبوا ماعيبهم الموجود وتهبشوا ويانا وهاي الطلبات اللي أنا طلبتها لي ولبوعيسى رأيي في أكلهم النودل كان أتعس من التعيس مافيه لذه وفيه طعم غريب ولاعت جبدنا وماكملناه والتمبورا كلها زيت وتغفي ع الجبد وكورات الاخطبوط اللي العالم ذبحتنا عليه مافيها لذه ولا طعم ومحد منا كملها عاد نحن مافكرنا شوي نفتح الخريطه اللي ميودينها في ايدنا من دخلنا ونشوف شو المطاعم المتوفره فيه  عفانا ساعات جيه يتجمد تفكيرنا عن التفكير المهم عقب ماتذوقنا الاكل الملغ قلنا بنغير الطعم واشترينا أيس كريم  عقب ماطلعت من المطعم تنحت البنات ساروا يتسوقون وانا وبوعيسى خذينا لفه شوي وعقب قلت خلاص ما ابا اتسوق من يينا ونحن نلف في المحلات ولكن ماحصلت شي عيبني صح هو كبير وفيه ماركات معروفه بس ماعجبتني بضاعته وهذا كان راي البنات بعد وما أبا أحكم عليه يمكن في وقتنا ماكانت البضاعه مناسبه لاذواقنا وعموما الأذواق تختلف بس أنا ما أتذكر اني اشتريت شي أنا وبوعيسى رجعنا من صوب محطة الباصات وكانت المفاجأه شفنا كوفي فوشون جدامنا عدال موقف الباصات يعني أول مادخلنا فوشون هو اللي معلمتنه بالاخضر  يوم دخلنا شفنا أصناف من المخبوزات والساندويشات اللي تشهي اتصلنا في البنات وخبرناهم اذا خلصوا ايونا في هالمكان وانه عقبها بنروح عاد سامحوني نسيت أصور المحل بس صورت بعض طلباتنا  عاد شوفوا التناحه اللي فينا نحن قررنا نرجع طوكيو ولكن موعد الباص الساعه 7 ووقتها كانت الساعه يمكن 2 بدال مانسير ونشيك ع الباص اذا بنحصل مكان فيه يلسنا في الكوفي ورحرحنا فيه وعقب سرنا نشوف الباص اللي بيرجعنا ما أدري منو خبرنا انه نسير مكتب المعلومات وهو اللي عليه حرف i سرنا وكلمناهم وقالوا الباص الياي بيكون فل ولكن فيه باص ثاني بيطلع الساعه 4 ولكن بتضطرون تدفعون مره ثانيه واللي دفعتوه قبل بتقدرون تسترجعونه وقالت لازم تتصلون من التيلفون العمومي وتحجزون قلنالها وين هالتلفون ، قالت موجود هنيه قلنالها بس نحن مانعرف انتي ساعدينا الحرمه ماقصرت ورتبتلنا الحجز والحمدالله تمت كل الامور في صالحنا أول شي مابندفع شي واعتبروا المبلغ اللي دفعناه قبل مقبول ثاني شي انه بترجع بدري من الاوت ليت ومابنضطر نيلس هالساعات كلها والشي الثالث والاحلى انه هالباص بينزلنا في محطة طوكيو الرئيسيه وبهاي الطريقه بتكون عندنا فرصه نشوفها ونعوض عن رحلة أمس لما كنسلناها رجعنا الكوفي وتنحنا فيه لين يا موعد الباص وانطلقنا ع خير انتظروني في محطة طوكيو الرئيسيه 
|
|
|
|
|
02-23-2018, 03:13 PM
|
#15 | |
|
رد: رحلتي الجميله لطوكيو 2015
نتابع الجوله الاخيره من اليوم الثاني محطة طوكيو الرئيسيه تعد المحطة معلم سياحي مهم عند زيارة طوكيو لمكانتها التاريخية و المعمارية المحطة ضخمة كأنها مطار محطة مهمة جدا وبها قطارات الشينكاسن أي يستعملها اليابانيون القادمون من أنحاء اليابان فتتواجد بها محلات خاصة. وخصوصا منطقة في المحطة اسمها شارع الشخصيات بها محلات كل الشخصيات الكرتونية الشهيرة تفاصيل هذا اليوم وصلنا الباص لين محطة طوكيو الرئيسيه والمحطه كبيره ما أدري اذا فيها أكثر من اللي شفناه ولا بس هذا لانه ونحن نمشي استوت الساعه 8 او 8 ونص نسيت الوقت بالضبط وكان هاك الوقت بيسكرون المحطه كبيره وفيها وايد محلات وسوبرماركت ومطاعم وكوفيهات حلو تمرون عليها وتتفرجون تعالوا نشوف الصور  محلاتهم حلوه حق الصغار وتزغلل عيونهم  في هالممر الطويل بتشوفون المحلات ع الجانبين  كالعاده انا وبوعيسى في صوب والبنات في صوب ونتواصل بيننا في الموبايلات ماخبرتكم لما رجعت طلعت فاتورة مكالماتي اللي اجريتها في اليابان بـ 700 درهم هاي بس فاتورتي وغير فواتيرهم ما أاعرف كم بالضبط بس أكيد الاجمالي تعدى 1500 درهم يعني لو خلينا التيلفونات اللي أجرهم بوعيسى جان أحسن  نكمل جولتنا بين المحلات        عقب بوعيسى سار يلس في كوفي وانا كملت تمشي بروحي  حصلت محل يبيع فواكه بس فاكهته جوده وغاليه وايد    حصلت محل يبيع أنواع من البطاطس ، قلت بشتري وبجربها    من هالانواع أنا أخترت اللي في العلبه الخضراء ، والصراحه كان لذيذ  شليت البطاطس وسرت عند بوعيسى ، ويلست وياه وجان اتيني الموظفه معصبه وقالت ممنوع تآكلين في الكوفي قلتلها سوري وعقب قالتلي لازم تطلبين أي شي بما انج يالسه في الكوفي قلتلها أنا ما أبا شي وزوجي طالب قالت لازم تطلبين ، قلتلها اوكي هاتيلي جرين تي ع العموم انا ماتضايقت منها يمكن هذا قانونهم ولازم نحترمه بس انا من تحت لتحت أخش ايديه في العلبه واسحب بطاط واخشه في حلجي وايد أحترم القوانين عقب قلت لبوعيسى بسير أسأل اذا عندهم سوبرماركت كنت أبا أشتري خضرا مثل بطاط وطماط وغيره لزوم الطبخ مخي في الطبخ  سالت وحصلت سوبرماركت كبير أول مادخلت شفت يبيعون ثوم مدخن غريب  تم الموظف يشرحلي كيف يتم عمل هالثوم وعقب تذوقت وحده  هاي السودا اللي كليتها  يوم تشيلون القشره تشوفون الثوم لونه أسود  شفت الفواكه مغريه واشتريت شويه  الغريبه اني ماحصلت خضار ولما سالته قاللي مخلص ماشي طماط ولا بطاط ولاجزر ولا أي نوع من الخضار عجيب والله هالسوبرماركت وسبق دورت في البقلات اللي عدال فندقنا مثل فملي مارت وسفن الفن وبعد ماعندهم ليش هاذيل ماياكلون خضار ولا الشو  عقب رجعت عند بوعيسى ولقيت البنات يالسين يتشرون من محل معروف في اليابان وله فروع عندنا في الامارات ، أسمه محل يوكو موكو للأسف ماصورت المحل بس يبت صور لمنتجاته من النت    منتجاته لذيذه لكن الغريبه انه أرخص عنا بوايد يعني عندنا الدبل  الموقف اللي صارلي البنات اشتروا منه وانا أشتريت من العلب الكبيره المشكله علبتين واشتريت أشياء صغيره وكانوا بيسكرون والمحلات كلها بدأت تسكر طلعنا وشليت الاشياء الصغيره ونسيت العلب الكبيره بعد مادفعت قيمتهم وتخيلوا ماعرفت اني نسيتهم الا عقب كم يوم وطبعا الفتوره عقيتها خبرت سايا وطلبت منها تمر عليهم وتسالهم عن العلب وانا تقريبا فاقده الأمل اني أحصلهم وهذا الكلام يمكن عقب 5 أيام وفعلا سارت سايا وسالتهم عن العلب والمفاجأه انهم ميودينهم لنا وقالوا انه نحن روحنا بسرعه وما انتبهوا انه نسيناهم الا بعد ماروحنا ورجعلولي العلبتين بخبركم الحين عن أهم موضوع في هاي السفره انتوا تعرفون اني ماخذه درس من سفرة كوريا يوم سافرت وماشليت جدري الكهربائي ولما سرت اليابان شليت جدري وشليت كل المؤونه اللازمه ولما رجعنا من هاي الرحله بدري شوي قررت أطبخلهم عشاء وأسوي معكرونه وبدأت مرحلة العذاب الجدر مثل ماأنتوا عارفين الفولت فيه 220 -240 واليابان 100-110 في البدايه حطيت الجدر وحطيت فيه ماي وشغلته واترييت أكثر من ساعه ابا يغلي الماي ومب راضي عقب جربت المحول اللي يبته ويحول لكهرباء من 220 الى 100 ولكن ركبته بالغلط فأحترق وطلعت ريحه منه زين مانقع وسويت مصيبه في الفندق باءت كل محاولاتي بالفشل وفي الأخير لما يأست قررت أشتري جدر كهربائي من عندهم وأنا سويت نودل وتعشيناه  بخبركم عقب شو صارلي يوم اشتريت الجدر الكهربائي الياباني وكيف فجيت طلاسمه  وانتهى هذا اليوم ونتلقى في مشاركاتكم وفي جولات اليوم الثالث طوكيو دوم ، وروبنجي هيل ، ومطعم الننجا |
|
|
|
|
02-23-2018, 03:22 PM
|
#16 | |
|
رد: رحلتي الجميله لطوكيو 2015
جولات اليوم الثالث طوكيو دوم وروبنجي هيل ومطعم نينجا  صحينا الصبح وانا مافي شي بالي الا الجدر الكهربائي ، واليوم بتطلع ويانا سايا أول ماوصلت سايا سارت ويابوعيسى في الاسواق اللي عدالنا في شيبويا عشان يشترولي جدركهربائي واشترالي بوعيسى الجدر الكهربائي بـ 300 درهم تقريبا أغلى عنا والتعليمات بالياباني شرحتلي سايا كيف أشغله وكيف أسكره طلعنا مشينا في شيبويا شوي هنيه أول ماطلعنا من الفندق قبل لانركب الجسر  ركبنا الجسر   هذا المبنى اللي فيه ستاربكس    مول أسمه لوفت  ندمانه اني ما أشتريت عنهم سوشي  شفت هذا يسوي فطيره ووقتها ماكنت مشتهيه تفرجت عليه وروحنا  وهاي الانواع اللي عندهم  ماطولنا وايد وقررنا نسير وطوكيو دوم Tokyo Dome هي مدينة ترفيهية متكاملة ، تحتوي على استاديوم ضخم لمباريات البيسبول لكن في الكثير من الأحيان تقام الحفلات الموسيقية به و توجد مدينة ملاهي صغيرة وبعض المحلات بالإضافة إلى فندق طوكيو دوم. المنطقة قريبة من أكيهابارا حيث أنها على نفس الخط. أقرب محطة هي Suidobashi Station موقعهم ع النت Tokyo Dome City Attractions | Tokyo Dome City بس بعطيكم خط سيرنا مثل ماعطتني سايا والرحله من منطقتنا لين طوكيو دوم تاخذ 19 دقيقه من فندقنا نطلع ع محطة شيبويا Cerulean Tower Tokyu Hotel Shibuya Metro Station ：地下鉄渋谷駅 ومن شيبويا ناخذ حط جي آر يامانوتي Shibuya Station 渋谷駅 to Yoyogi Station 代々木駅 - JR Yamanote Line bound for Shinjuku：ＪＲ 山手線新宿方面行き  بعد مانوصل محطة يايوجي نبدل وناخذ خط سوبو جي آر ونسير محطة ساودوباشي Yoyogi Station 代々木駅 to Suidobashi Station (水道橋駅) - JR Sobu Lin bound for Chiba：ＪＲ 総武線千葉行き وآخيرا وصلنا   عاد أنا نسيت أخبركم شو الهدف من سيرتنا لهاي المنطقه الله يسلمكم سايرين نتغدى في مطعم أمريكي متخصص في السي فود لما وصلنا سرنا نسأل عنه  من طلعنا من المحطه ومشينا ندور المطعم وانا أشوف المكان شرح وجميل ونشوف الالعاب من بعيد ونحن نتقرب منها    طبعا بناتي تجننوا الله يحفظهم وقالوا لازم نركب هالقطار ومهما حاولت ما أقدر عليهم في هالموضوع  بعد ماسألنا وصلنا للمطعم ، واسمه ...  موقعهم ع النت http://www.bubbagump.com/locations/tokyo/ هذا المطعم خبرتني عنه الغاليه ريم من الانستغرام جزاها الله خير وايد ساعدتني  أول مادخلنا تحسون الديكورات أمريكيه    هاي طاولتنا  وهذا المنظر المجابلنا   خلف هاي النافوره مبنى المول وفيه محلات وكوفيهات  عقب بآخذكم في لفه هاك الصوب الحين خلوني أراويكم اطباقنا اللذيذه  شوربة سي فود       الصراحه أكلهم كان لذيذ ويستحق الزياره ولكن للاسف نسيت كم دفعنا عقب ماتغدينا قرروا البنات يسيرون وياسايا يركبون قطار الموت وانا قررت أسير أسوي مساج عرفت انه عندهم اسبا وبوعيسى حب ايلس في ستاربكس يروق نفسه هدف البنات هدف بوعيسى  وهذا هدفي  الاسبا وايد راقي وله باب خاص  ولكن صارتلي سالفه ماتوقعتها  قائمة الأسعار  أول مادخلت ويلست في الانتظار يابولي قايمة الاسعار واخترت اللي أباه وعقب عطوني شوز البسه وقالولي أفصخ بوتي وسرت عند الاستقبال عشان أدفع واسير أسوي مساج وتفاجأت انه اللي مسوين تاتو يعني وشم في جسمهم مايسوولهم مساج ولما شافوا ايدي وريولي فيهم حنا اعتذروا انهم مايقدرون يسوون لي قلتلهم ليــــش  قالوا عشان هذا اللي في ايدج وريولج قلتلهم هذا حنا مب تاتو قالوا ولو سوري ممنوع من الاداره المهم حاولت وياهم وابدا مصرين يلست برع ألبس بوتي وانا ماغطه بوزي شبرين ياني الموظف والظاهر كسرت خاطره وعطاني خريطة المول وقاللي سيري هالمكان بيسوولج مساج اهنيه مايرضون قانون الشركه جيه  فرحت شوي وسرت وين مادلاني  سألتهم اذا أقدر أسوي فوت مساج ، الحمدالله مامانعوا  السعر ماكان رخيص شرات بانكوك ياسلام عليج يابانكوك بـ 25 درهم ويسولنا فوت مساج مدة ساعه أحلى مساج الصراحه ماعجبني مساجها شو أسوي هذا حظي  عقب ماخلصت أجتمعت بأسرتي لقطات متنوعه من المكان          البنات حصلوا باسكن روبنز     وخلصت جولتنا الاولى في هاليوم ونلتقى معاكم في الردود والجولات الثانيه روبنجي هيل ومطعم نينجا |
|
|
|
|
02-23-2018, 03:25 PM
|
#17 | |
|
رد: رحلتي الجميله لطوكيو 2015
جولتنا الثانيه في اليوم 3  بعد ماخلصنا الدوم سرنا روبنجي هيلز معلومات جمعتها عن هاي المنطقه حي روبونغي لا ينام فهو مليء بالملاهي الليلية والمطاعم الراقية يتشكل مثلث وروبونغي الفني من المركز الوطني للفنون ومتحف موري ومتحف الفن الحديث، في حين يتميز مجمعي التسوق وتناول الطعام روبونغي هليز وطوكيو ميدتاون الحديثين بأجواء خاصة. منطقة روبونجي مغطاة ومناسب زيارتها في الاوقات اللي الجو فيه ممناسب اوقات العمل : 10:00 to 23:00 10:00 to 25:00 Friday and Saturday, فيه السكاي ديك هو السطح ممكن رؤية طوكيو من فوق واذا كان الديسك مسكر ممكن نسير الطابق 52 ونتفرج ع طوكيو وفي نفس المول فيه مطعم هندي اسمه مطعم ديا وفيه بعض الوجبات حلال تفاصيل هاليوم كان هذا خط سيرنا من Tokyo Dome City：東京ドームシティ محطة طوكيو دوم (Suidobashi Station：水道橋駅) الى Hibiya Station日比谷駅 أعتقد عشان نسير نحطة هايبيا لازم ننزل في هاي المحطه ونبدل هنيه وعقب ناخذ خط هايبيا اللي يودينا لمحطة روبنجي هيل - Mita Line bound for Shiroganetakawa 都営三田線白金高輪行き Hibiya Station 日比谷駅 to Roppongi Station 六本木駅 وصلنا منطقة روبنجي هيل ودخلنا في مكان شرات مول كبير وفي ساحته مجسم عنكبوت كبير وفي هالمكان متحف ومحلات ومطاعم تمشينا شوي وتصورنا وتمللنا بصراحه وتندمنا انه طلعنا من طوكيو دوم حسينا هاذيج المنطقه أشرح وأحلى وهاي ماحبيناها وايد الحين نشوف الصور مع بعض مخطط لروبنجي هيلز  من طلعنا من المحطه ومشينا شوي الا نشوف المبنى اللي مكتوب عليه روبنجي هيلز  دخلنا وشفنا هالمجسم جدامنا عاد سوينا حركات استهبال وصورنا لين شبعنا  ماكان عندنا رغبه ندخل متاحف دخلنا وتفرجنا شويه ع المحلات الموجوده   يطل علينا برج طوكيو بس ماحسيته قريب انه نسير نمشي لين عنده  ماتمشينا وايد صوب المحلات بس شويه ع السريع وماحبينا ننزل نشوف المطاعم لأنه بعدنا شبعانين والاهم انه حاجزين بنتعشى في مطعم الننجا حصلنا ستاربكس ويلسنا فيه شبكنا ع النت وكل واحد انشغل بفونه لين ايي الوقت المناسب ونسير صوب المطعم  وانتهت جولتنا هاي واللي ماحبيناها وايد انتظروني في مطعم الننجا |
|
|
|
|
02-23-2018, 03:53 PM
|
#18 | |
|
رد: رحلتي الجميله لطوكيو 2015
نتابع جولتنا الأخيره في اليوم 3 عقب ماخلصنا من روبنجي هيلز سرنا المحطه متجهين لمطعم اسمه الننجا  قبل خلوني أخبركم عنه قبل لا أسافر اليابان تعرفت ع ناس كانوا سايرين اليابان وقالولي لاتفوتين مطعم الننجا وعن طريق الانستغرام واحد وصاني اسير هالمطعم بدون مايشرحولي عنه شي وانا قلت لازم أزوره وأشوف شو هالمطعم الفلته وهالمطعم ماتقدرون تزورونه الا بالحجز حسب ماسمعت كلمت سايا وقلتلها احجزيه لنا في هاليوم وحددنا الوقت وهاي المعلومات اللي قدرت أطلعها عنه مطعم الننيجا NINJA kASAKA Ninja Dinner Theater in Tokyo DINING THEATER-NINJA is a theatrical restaurant where guests can enjoy a live Ninja show as well as aesthetic food and drinks. The Ninja show combines magical images utilizing projection mappingamazing acrobatic dancing and dynamic wire- stunt battleaction. . Ninja appear and visit guests during the meal right at their table. Guests can also take photos of the ninja's performances. المكتوب شي واللي شفناه شي ثاني ما أدري هل نحن ماعجبناهم وماكان لهم بارض علينا أوهم خرطي ودعايه ع الفاضي تفاصيل هاليوم طلعنا من محطتنا اللي روبنجي هيلز الى المحطه اللي بتنزلنا عند مطعم الننجا من .. Roppongi Station (六本木駅) to Kasumigaseki Station (霞ヶ関駅) - Hibiya Line bound for Kitakoshigaya (東京メトロ日比谷線北越谷行き) وصلنا المحطه المطلوبه ونزلنا في اتجاه المخرج تعجبني ثلاجاتهم تحصلون وايد حركات فيها ، مثل هاي ثلاجة فواكهه  وفي منها عصائر ومنها عصير جرين تي ودوم سايا تشرب منه وجربته مره تحملته وهو بارد وشربته بس من فتر طلع مر ومب حلو  عقب مانزلنا ومشينا في الشارع شفت هالمحل واعتقد هو معروف بالاجهزه الاكترونيه  شفنا محل تركي في ويهنا وياليت دخلناه  وصلنا المطعم  وكان هذا في استقبالنا المطعم ديكوراته سودا من برع وتخيلوا بعد من داخل  قال أصبروا ويانا واحد متلثم ودخلونا المطعم وكانت صدمتنا الاولى فيه المكان شبه مظلم ، ممرات ضيقه وسودا والصراحه في لحظه كنت بغير رآي وبقولهم أبا أطلع من المطعم وياليت قررت هالقرار مشينا في الدهاليز وأحس عيالي مب عاجبنهم الوضع وعقب وقفونا في منطقه وفيها مثل جسر وقبل لانعبر سوولنا حركات استهبال عبرنا ودخلونا غرفه خاصه اللي فيها طاولتنا أعوذ بالله من المكان يكتم ع القلب  يلسنا ونحن مب عاجبنا الوضع حتى ماصورنا وايد ولما يلسنا يانا واحد ملثم وعطانا المنيو ولما خبرناه انه نبا الوجبات اللي بدون كحول ولاخنزير  تفاجأنا انه الاختيارات جدا قليله الصراحه قلنا بنطلب أي شي بس نطلع من هنيه وسايا استأذنت عشان بيفوتها القطار وهي تأخرت رخصناها بعد ماطلبنا من المنيو وكانت هاي طلباتنا          سوالنا حركات غبيه بالسيف حق هاي السلطه  وطلع دخان منها عاد ضحكنا يوم يينا بناكلها شفناها شويه ونحن نتحسب الجره متروسه سلطه  رأيي في الاكل اتعس أكل كلته في هاي السفره رأيي في المطعم أتعس مطعم دخلته ومايستاهل العنوه انتهت جولاتنا في هاليوم واجمل مكان استانسنا فيه كان الدوم وهو حلو من كل النواحي اما باقي الاماكن ماكانت هاك الزود تابعوني في اليوم الرابع اليوم الرائع من بدايته لين نهايته |
|
|
|
|
02-23-2018, 04:04 PM
|
#19 | |
|
رد: رحلتي الجميله لطوكيو 2015
جولات اليوم الرابع اليوم جميل من بدايته صحينا الصبح وقررنا نتريق في ستار بكس في شيبويا الجو جميل ويخبل    وبعد ماتريقنا وصورنا واستمتعنا بالجو قررنا نبدأ اول جولاتنا واليوم بوديكم ويانا الى حديقة كوجاني العامة في شينجكو فيها الكثير من أشجار الساكورا نزول في محطة قطار : MUSASHI-KOGANEI ثم ركوب الحافلة Seibu bus و النزول في محطة Koganei-koen Nishi-guch شوفوا انا ناسيه اذا هاي هي المحطه اللي نزلنا فيها ولا لأ ولكن أنا متأكده انه نحن ماركبنا باص نزلنا من المحطه ومشينا لين الحديقه ع العموم بعطيكم مخطط الحديقه ومكتوب عليها بالياباني أسمها اووها الفندق وهو بيعطيكم عنوانها   العنوان  ماشاءالله الحديقه كبيره وفيها بحيره وبط بس ماأدري ما شفتها  وهاي الحديقه سرناها بروحنا وسايا ماكانت تعرف عن مخططنا لها لأني قررتها قبلها بيوم قطعنا التذاكر والتذاكر برسوم بسيطه  مدخل الحديقه  انطباعي عن الحديقه الحديقه وايد حلوه واللي زادها جمال الجو غيوم وبروده حلوه وأمطار خفيفه والحديقه مليانه اشجار الساكورا ومناظر ممتعه ع مد البصر تفرجوا واستمتعوا ويانا       هاذيل العشاق منخشبن أنا وبوعيسى  لاتصدقون أسولف نحن منخشين ورا الشيره     لو ماكان فيه مطر وجدولنا مزدحم جان الواحد حلو يفرش هنيه ويقضي وقت وسط الجمال هذا  كلها أشجار الساكورا             عقب ماشبعنا تصوير ومتعنا نظرنا رجعنا من المحطه اللي يينا منها ونحن نمشي شفت مطعم محطي هالورود الجميله عند مطعمه   الصراحه هاي المنطقه اللي فيها الحديقه واعتقد هي شينجكو منطقه حلوه وكان ودي أستكشفها وأتمشى فيها ولكن ورانا مكان ثاني مايتفوت مكان ندمنا انه مازرناه الا مره وحده من حلاته تابعوني ... وبتعرفون جولتنا الثانيه في هاليوم |
|
|
|
|
02-23-2018, 04:12 PM
|
#20 | |
|
رد: رحلتي الجميله لطوكيو 2015
الجوله الثانيه في اليوم الرابع
بعد ماخلصنا من الحديقه رجعنا من نفس المحطه وسرنا جولتنا الثانيه في شارع جينزا http://www.japan-guide.com/e/e3005.html صور لشارع جينزا معلومات جمعتها عنه Ginza كانت غينزا موطنًا للنخبة الثرية في اليابان لعدة عقود جولة من التسوق في ميتسوكوشي وواكو قد تكلف ما يعادل الناتج المحلي الإجمالي لدولة صغيرة كما تناول الطعام في واحد من 50 مطعمًا حاصلًا على نجمة ميشلان في المنطقة للقيام بجولة ثقافية يمكنك استكشاف فن الكابوكي الياباني في مسرح كابوكي - زا الشهير. محل واكو محل ساعات عريق تأسس في عام 1881، تم بناء هذا المبني في عام 1932 و هو من المباني النادرة التي لم يدمرها القصف في الحرب العالمية الثانية. المحل اليوم متخصص ببيع كل شي تقريبا ما عدا الملابس. يتم اغلاق الشارع الرئيسي في اوقات محددة في يوم الأحد لأنه أكثر الأيام ازدحاما يوجد في هالشارع ماركات يابانية مثل Matsuya وفيه متجر ميتسوكوشي العريق أسست الشركة في عام 1673 و كان محل لبيع الكيمونو. و يعود فرع جينزا بالتحديد إلى سنة 1930 .تطور المتجر مع مرور السنين حتى أصبح في 1970 من المتاجر الكبرى في اليابان و له فروع عالمية ايضا. تمثال الأسد الشهير عند المدخل. اوقات العمل: From 10:30 a.m. to 8:00 p.m. المطاعم و الكافيهات في طابق 9 و 11 و 12 from 11:00 to 23:00. يتكون من ال 12 طابق بالإضافة الى 3 طوابق تحت الأرض بعض المحلات عندهم خدمة "Hands-free shopping service" التسوق بحرية تامة من حمل المشتريات من طابق إلى أخر يمكنك ترك المشتريات و الاستمتاع بالتسوق و سيتم تجميع جميع المشتريات من كل الطوابق في الطابق الرابع فقط عليك ابراز الفاتورة عند المغادرة. و يوجد أيضا غرفة لوكر لوضع المشتريات حتى اللوكرات متنوعة و يوجد لوكرات مبردة لوضع الطعام محلات الماركات غير في جينزا و اغلب المحلات تحتوي على مقاهي خاصة بها او حتى حديقة في السطح مقهي غوتشي يوجد منه 3 فروع في العالم فقط ستجدونه في الطابق الرابع من المبنى اوقات العمل: 11am-8pm شانيل و البتحديد التراس او السقف وفيه كوفيه سوارفسكي كافيه راقي تفاصيل هذا اليوم لما وصلنا محطة جينزا خذينا المخرج اللي يدخلنا مباشره ع مولميتسوكوشي وطلعنا منه كان هدفنا ندخل ع أي كوفي في واحد من الماركات العالميه وقتها كنا نبا ناحذ بريك ونرتاح شوي وناكل شي وأهم شي نستخدم حماماتهم الراقيه عزكم الله وقع اختيارنا ع بلغاري المبنى كبير ومبهر وللاسف الصور اللي خذيتها لهالشارع ماكانت كفايه يلا تعالوا نتجول مع بعض في شارع جينزا   وصلنا أول شي بلغاري   اخترنا نيلس في كوفي بلغاري الكوفي كبير وراقي وعندهم مطعم وكوفي  صورت المطعم اللي كان في الطابق اللي تحت وأنا فوق في الكوفي  وهذا المنظر الخارجي  وهاي الصوره الوحيده من طلباتنا كانت كلها حلويات ومشروبات  للاسف يلسنا وايد أنا وبوعيسى بس البنات كلوا وساروا عنا يتسوقون هاي فاتورتنا  عقب ماخذنا راحتنا أنا وبوعيسى طلعنا أخيرا نتمشى في هالشارع الجميل   ونحن نتمشى قال بوعيسى بندخل هالكوفي أبا أشرب قهوه     حصلت عندهم ألذ كرواسون بالشوكليت  عقب مريت ع بقاله عدال الكوفي واشتريت سلطه  تتوقعون ليش أشتريت سلطه ؟  اليوم قررت أجرب الجدر الكهربائي وأطبخ أو طبق في اليابان عاد عقب بتيكم العلوم الحين بكمل تجولنا في شارع جينزا   واعتقد هذا المبنى يديد من كارتيير  لاحظت انه أسعار الماركات أرخص عنا وجربت هالشي في كارتيير لما سألتهم عن شغله شارينها ولقيناها أرخص عندهم واربيعتي بعد خبرتني انه خواتها لما زاروا اليابان لاحظوا انه الماركات عندهم أرخص     عقب مرينا غوتشي وسرنا الكوفي مالهم وكنا أنا وبوعيسى وقب ييونا البنات           كنت أتمنى أجرب كوفيهات ثانيه وقعدات غير وأتسوق أكثر وأدخل الكثير من المحلات ، لكن للاسف بدأت تسكر المحلات ونحن كنا واصلين متأخرين عشان سرنا الحديقه نصيحتي لكم هذا اتونه من الصبح لين فليل والصراحه يستاهل تزورونه كم مره ولكن نحن كان وقتنا ضيق ومازرناه مره ثانيه ان شاءالله اذا الله كتبلي سيره لليابان مره ثانيه بيكون هالشارع من ضمن الاماكن اللي بعيد زيارتها  كوفي لادوريه  كوفي هارودز  طبعا لما سكروا المولات رجعنا الفندق واليوم ناويه أطبخ في الجدر الكهربائي قصتي مع الجدر الياباني  عاد اليوم انا وايد متحمسه أطبخ في البدايه قلت بغلي ماي وبشوف كيف يشتغل شغلته وضغط ع زر التشغيل مثل ماعلمتني سايا وتميت فتره وانتهت المده اللي مبرمج عليها الجدر والماي مثل ماهو شفت فصوص ماعرفت شو سالفتها ولاكيف أستخدمها لأنه كل التعليمات بالياباني كل شوي أدقدق ع الفصوص وماشي فايده تخيلوا شكثر يلست وانا كل ربع ساعه أجرب واشوف ومب راضي يسخن الماي وعقب قلت ماشي الا اتعلم اللغه اليابانيه وافهمها  يبت ورقه وقلم ويلست أضغط ع الازار واختار واحد واحد وكل ما أختار اختيار واحد أكتب الرموز اليابانيه في ورقه وانتظر واشوف مثلا هالاختيار ماحرك شي أقوم أحط عليه اكس وعقب الاختيار الثاني واكتبه بالياباني وانتظر واللي يشتغل حطيته عليه علامة صح واكتب كم مدة الطبخ فيه لين فجيت الشفره وعرفت أي اختيار اللي يشتغل ويطبخ الاكل بالصوره اللي اباها  وبعد ما أدري كم ساعه من الانتظار سوينا معكرونه باللوبيا الحمرا وكانت لذيذه  صبرنا ونلنا والحمدالله   تابعوني في اليوم الخامس والمفاجأه اللي ماتوقعناها وخربت البرنامج كله ...
|
|
|
|
|
| مواقع النشر (المفضلة) |
| الكلمات الدليلية (Tags) |
| 2015, لطوكيو, الجميله, رحلتي |
| الذين يشاهدون محتوى الموضوع الآن : 1 ( الأعضاء : 0 , والزوار : 1 ) | |
|
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| رحلتي إلى سويسرا 2015 | السعيد | رِيَاض إبْنُ بَطُوطَة لِسْيَاحَة والسَفَر | 16 | 08-16-2018 08:53 AM |
| رحلتي الأوروبية الجميله يناير 2015 | السعيد | رِيَاض إبْنُ بَطُوطَة لِسْيَاحَة والسَفَر | 16 | 02-17-2018 02:51 PM |
| صور من رحلتي الجميله لبلاد الأندومي | السعيد | رِيَاض إبْنُ بَطُوطَة لِسْيَاحَة والسَفَر | 12 | 02-03-2018 09:42 AM |
| رحلتي إلى بــراغ : اغسطس 2015 | السعيد | رِيَاض إبْنُ بَطُوطَة لِسْيَاحَة والسَفَر | 13 | 10-20-2017 04:20 PM |
