عندما شاقني الشوق إليها !! { أسطنبول , يلوا , بورصة }

قبل البداية من جديد أكرر أعتذاري للتأخير ,, و هذا يعود لأسباب كثيرة أسأل الله أن يوفقني في القادم ..

اليوم الخامس

بعد يوم كامل قضيناه في المياه الحاره و ما حولها ,, خلدنا إلى النوم في الغرفة الصغيرة ,, الحمد الله أمد الله في أعمارنا و قمنا من النوم و كانت الخطة أن نتجه إلى بورصة بعد الفطور ,, طبعا الفندق في اليوم الماضي عطانا خبر أن الماي راح ينقطع عن الفندق في الساعه 10 صباحا للصيانه ..

بعد ما فطرنا و عملنا شك آوت خذنا السيارة و كانت الفكرة هل نتجه إلى بورصة من الطريق الريفي أم الخط العادي ,, الجو كان جميل و أمطار خفيفة فقلنا نروح من الطريق الريفي لأنه بتكون فيه المناظر أحلى ..

و نحن في بداية الطريج شفنا هذا الشيبه ,, رحب فينا يوم عرف أنه نحن من الإمارات و عزمنا على الغدا لكن أعتذرنا له ,, هذا الشايب أدى فريضة الحج في السنة قبل الماضيه ,, الله يتقبل منه و منا ..

باي باي مدينة يلوا الجميلة ( فريج قوقشجر ) << إن شاء الله الإسم صح ..

الطريق الريفي في يلوا جميل جدا ..

و نحن نمشي شفنا بذرة الكستناء ..

بحيرة يلوا ..

يا محلاك يا خضار الربيع ..

سبحان الله كيف تتجرد الأشجار من الخضار في الشتاء ..

مياه ذوبان الثلوج ..

إحدى مجاري الوديان ..

سبب أخر لأختيارنا الطريق الريفي ,, كنت أبغي أمر على الشلال و أشوفه في فصل الشتاء كيف يكون بعد ان شاهدته في فصل الصيف ..

الطريق إلى الشلال ..

الشلال كانت مياهه قوية جدا ,, في فصل الصيف تقدر تعبر الوادي و تروح إلى الطرف الثاني من الشلال لكن في الشتاء أنسى يا حبيبي ..

مجرى مياه الشلال البارد جدا ..

الشلال من بعيد ..

طبعا و انته في الطريق راح أتشوف مناظر جميلة كثيرا ,, راح تشوف الوديان و الشلالات الصغيرة و الكثير من الأشياء إلي تونس القلب ..

و نحن في الطريج شفنا من بعيد قطعه بيضاء قبل الوصول إليها أختلفنا هل هو كومة ثلج صغيرة أم هي حجاره بيضاء ..

يوم جربنا منه طلع ثلج عاد الشباب أول مره يشوفون ثلج حقيقي من السماء ,, فنزلوا و تحسسوا الثلج ..

بعدها كملنا طريجنا الجميل ..

مرينا في طريجنا على قرية صغيرة جميلة ,, يا حلاة الحياه هناك طبيعه مالها وصف ..



يا حلتها المواشي ,, كلي من خير الله ..







المدينة هادية جدا ,, و يوم دخلنها ما شفنا حد يتحرك غير واحد كان يرعي الحلال ,, الغريب أن يوم دخلنا هذي القرية ما كان فيها شبكة للتيلفونات ..







يا حليله الصغير ,, له مستقبل باهر ..







عد ماطلعنا من هذي القرية الصغيرة بشوي وقفنا عند أعلى قمة ,, و بعدها بنبدأ بالنزول ..



وقفنا وقفه بسيطة قبل النزول .. مناظر من أعلى نقطة للمنطقة ..













عند نزولنا قمنا نشوف الخضار و الزهور أكثر ..







مدينة قبيل وصولنا إلى بورصة ..



مناظر على مشارف مدينة بورصة الجميلة ..





دخلنا مدينة بورصة ..





هذي ماركة شهيرة في تركيا و تشتهر هذي الماركة بالمناشف الجميلة ذات الأسعار الجيدة ,, طبعا هذي الماركة عندها محل كبير في بورصة تبيع جميع أنواع الملابس و الأغراض الأخرى ..



اللوحه تبين الأماكن السياحية ..



الطرق إلى الفندق ..








وصلنا للفندق ALMIRA HOTEL ,, الفندق جدا جميل من موقع و غرفة و ترتيب و نظافة سعره 180 يورو لـ3 شباري << سرير ,, طبعا فيه مطعمين قريب جدا من الفندق تقدر تروحها بالمشي و المطعمين فاتحين 24 ساعه ..

كنا الوقت قريب من العصر تقريبا ,, و كان الجو وصل مبلغه ,, قلنا لازم يكون أكل جامد لأن بالليل فيه مباريات دوري أوروبا و يمكن مانقدر نطلع نتعشى ..

طلعنا متجهين إلى المطعم الذي يوجد في الجبل و إلي يتمتع بالمنظر الجميل و الأكل الرائع ..

و صلنا المطعم إلي كان فاضي تماما بس نحن فيه وبعدين جت عايلة سعودية ..

المطعم جدا رائع رائع ,, و فيه جلسات خارجية خلابه بس ما تنفع إلى في الصيف لأن الدنيا برد و مطر في الشتا,, و شفت طاولة في وسط مجرى الماء ,, طبعا هذا المجرى في الشتاء قوي لكن في الصيف خفيف ..

المطعم من الداخل ..



و هذي الجلسات الخارجية للمطعم ..









هذا المجرى لا تفكر أنك تمشي عليه في الشتا ..



تبريد المشروبات الغازية بالمياه الطبيعية ..



و نحن كنا برع شفت هذا الرجال يقطع الخشب للشوي و للتدفأه ..



فقلت لازم أساعده ..

رحنا المطبخ و طلبنا الأكل من لحم و سمك و سلطة و أشياء أخرى ..

تقطيع السلطة اللذيذة ..



الفرن زاهب << جاهز >> للسمك ..





اللحم جاهز للشواء ,, و الله أشتقنى لأكل تركيا ..









رحنا و جلسنا على طاولة الطعام ..



الروب أو الزبادي ,, ياربي عليه طعمه لذيذ جدا كيف ما بيكون لذيذ و هو فرش ,, شوف كيف شكل الروب تقول لبنه ..



السلطة ,, يم يم يم ..



البطاط المقلي ..



و صل صحن ثاني كان فيه فطر بالموزيرلا ,, عجيب يا ناس عجيب ..



أول طبق رئيسي وصل هو السمك بالموزيرلا ,, يا سلام عليه حتى إلي مايكل سمك بياكل من لذته ..



بعدها وصل اللحم المشوي ,, ياريت ترد هذي الأيام ..







الحمد الله على النعمة ..



بعدها وصل الحلاة ,, طعمها مميز اول مره أتذوق مثلها ..



لا مجال لبقاء شي ..



بعد هذا الأكل تاخذ شاي تركي ..



خذنا الفاتورة و السعر يشمل 4 أشخاص ..



طلعنا من المطعم قريب المغرب ,, و نحن طالعين من المطعم شفنا هذا الشلال ..



بعدها رحنا على طول للفندق لأنه كنا تعبانبن للأخير و شي ثاني كانت فيه مباريات دوري الأبطال ..

المصرف لليوم الخامس :

الفندق : 180 يورو

الغدا : 187 ليرة تركية ..

اليوم السادس

صحيننا في هذا اليوم على أذان الفجر الذي أرتفع من مآذن مدينة بورصة و بعدها عدنا للنوم و نشينا على الساعة 8.30 نزلنا للفطور و قلنا نجرب فطور الفندق .. سبحان الله ما أفطر غير في السفر




الصراحة فطورهم لذيذ و لحد الأن أتذكره .. يم يم




بالعافية علي






بعد ماخلصنا الفطور و لله الحمد و المنه .. قلنا نروح نتمشى في أسواق بورصة و نشوف معالمها ..

أحدى سكك مدينة بورصة ..





ماء سبيل المنتشره بكثرة في تركيا بكبرها ..



بعدها مرينا على مسجد له قصة تاريخية لكن للأسف لا تذكرها حاليا بس بإذن الله بذكرها في القريب العاجل ..

هذا هو المسجد ..







القصة التاريخة مرتبطة بين هذه الرموز الثلاثة ..



الشجرة التي نفضت أوراقها من قسوة البرد ..



أماكن الوضوء ..



بعدها قلنا ندخل و نشوف السوق ..



السوق كبير جدا و فيه الكثير من التفرعات و فيه كل حاجه تخطر على بالك ..





و الله أشتقت للشوارما التركية :4:



مستمرين في المشي ..







طبعا في تركيا الختان أو الطهور له مراسم خاصة .. يعني يكشخون الواحد و يعدلونه ويزهبونه قبل لا يصارخ من الألم :3:





و نحن نمشي شفت أحدى تفرعات السوق فقلت خلنا نروح نشوفه ..



طلع المكان فيح محلات و في الساحه جلسات لمقهى مكان فنتك الصراحه .. قلت يبغيله تركش كوفي ..













شفت كشك الصميت << إن شاء الله نطقتها صح .. من بعيد قلت يبغيله ..



يم يم يم .. طعمه لذيذ ..



و معاه الكوفي ياربااااااااااااااااااااااه ..



بعدها كملنا طريجنا في السوق ..



احدى المقاهي أو الجلسات الأخرى ..

بعدها دخلنا سوق الخضروات و الفواكه و الحبوب ..



و الله لونها يغيرك أنك تاكل فواكه ..









وااااااااااااااااااااااااااااااااااااااااااااااااا اااااااااو على تناسق الألوان ..





ياويلي على الأحمر ..



و مازلنا متمتعين بمنظر الفواكه ..





الزيتون الذس تشتهر به تركيا بكل أنواعه و أشكاله ..





ورق العنب للمحاشي .. خاطري في محاشي :4:



سبحان من خلق هذه الفواكه ..



الله يبارك لكم في البيعه ..



هذا المكان للعيايز ينفع :3:





مكان يفتح النفس لأكل الفواكه ..









في نهاية السوق شفت محل غريب سألت عنه فعرفت أنه يبيع الكنافة .. و ياربي على كنافة تركيا ..





و بعدها كملنا طريجنا في السوق الكبير جدا ..



بعدها طلعنا نتمشى على الشارع و نشوف بورصة ..











و نحن نمشي شفت مدرسة للأطفال ..



قلت لهم يالله صورة تذكارية ما صدقوا الله يحفظهم ..





و يستمر المشي ..











يا سلام على هذي اليلسة .. كلهم شياب فقلت لربعي شكل أي واحد يتقاعد يكون هذا مكانه في فترة الصبح ..



في طريجنا شفنا جنازة راح يصلون عليها بعد صلاة الظهر .. الله يرحمها ويرحم جميع موتى المسلمين ..



عقبها قلنا نروح ناخذ سيارتنا و نكمل جدولنا ..

كان الاتفاق في هذا اليوم نروح أعلى قمة الجبل الذي تشتهر به بورصة .. كان في طريقين لصعود الجبل و التمتع بالثلج .. الاول بالتليفريك و الثاني بالسيارة .. الشباب قرروا بالسيارة عسب يستمتعون بالمناظر .. و قلنا عليها يالربع ..

مدينة بورصة الجميلة ..







الأشجار بدأت بالتزين للربيع الجميل ..







ماء سبيل .. و ياربي على طعمه وبرودته ..



مستمرين في الصعود ..















و نحن في طريقنا للأعلى شفنا غزلان برية و جان أصورهم ..





بعدها كملنا طريجنا إلى الأعلى ..











الطريق إلى الأعلى و هو المطلوب ..














وبعدها بدأت المسطحات البيضاء الكبيرة ..













و صلنا لبوابة الصعود إلى القمة .. فيها رسوم و هذي الرسوم تصرف على تعديل المكان ..





بعد ماعدينا البوابة شفنا هذا الذيب الأبيض في انتظارنا قصدي أخوه :3: ..



بعدها كملنا طريجنا ..

عند هذه النقطة كانت درجة !!



ونحن نصعد كان الطريق فيه بعض الثلوج و الثلج يتحول إلى جليد فلازم الواحد يركب مثبت لإطارات السياراة ..

طبعا و أنتوا صاعدين راح تلاحظون الكثير من الذين يركبون هذي الأشياء ..

احدى هوالاء ..



و قفنا و قلنا نركب و نتوكل على الله .. طبعا في نوعين .. نوع من البلاستيك القوي جدا .. و النوع الثاني سلاسل حديد طبعا ينصح بالأول لأنه أقوى و أفضل ..

لحظة التركيب ..







و هني سيارة مركبة نوع الحديد ..



بعدها كملنا طريقنا إلى القمة حيث المتعه الثلجية ..









و نحن في الطريج شفنا بقعه بيضاء كبيرة .. فقالوا الربع ننزل و نداعب الثلج و نظع بصمتنا :3:











و بعدها مضينا في طريقنا ..

لا حظوا السياراة على الطرف هذيل لتركيب المثبتات على الإطارات ..





تذكرون السيارة إلي كانت مركبة السلاسل شفناها فوق واقفه تعدل السلاسل لأنها أنفتحت أو أنقطعت ..



و يستمر المنظر الأبيض في الإستمرار ..





لا حظوا الطريج كيف متجمد و هذا يخلي السيارة تنزلق بكل سهولة ..







في صعودنا وصلت درجة الحرارة إلى درجة التجمد ..










قبل وصولنا بشوي قمنا نتكلم بالسالب ..



و صلنا للقمة و كان البياض يعم كل حاجه .. طبعا في القمة يوجد الكثير من الفنادق و محلات تأجير أدوات التزلج ..















النيا متجمده ..










هناك جرافات دائمة العم على تعديل الطريق و إتنظيفه من الثلج ..



إلى التزلج يالربع ..



ركزوا في الصورة بتشوفون الناس يتزلجون ..







و نحن نتمشى شفنا الدراجات الثلجية ..



قلنا هذي الفرصه مابتتكر دوم نركب دراجات رملية خلنا نركب دراجات ثلجية ..



مناظر من المشي في الدراجات الثلجية ..









سبحانك ربي ..



أشتقت لكم :4: تعبت من الغربة ..

مناظر للبياض في رحلتنا على الدراجات ..











في نص الطريج قلنا نوقف و ناخذ لنا كاس شاي ندفا فيه من البرد ..





مناظر من المنطقة المحيطة للمقهى الصغير إلي شربنا فيه الشاي ..









بعدها امتطينا دراجتنا و عدنا أدراجنا ..



تظليل بطريقة جديدة ..



بعدها الشباب أحسوا باليوع فقلنا نروح نتغدى و نتعشى ( غدعش ) و كان في مطعم في بالي كلت فيه في سفرتي السابقة ..















هذي الشله كانت مستانسه بالثلج عطيناهم بسكوت وكلوه من اليوع ..



و انتوا نازلين راح تشوفون هذي اللوحة الزرقة في أخر الصورة أخذوا يمين للذهاب للمطعم ..









وصلنا المطعم



فيه جلسات خارجية رائعة في الصيف و لكن هيهات في الشتا ..





قلنا ياجماعة ندخل المطعم تراني تجمدت من البرد ..







صاحب المطعم الله يطول بعمره .. يقولكم هذا الشخص من 35 سنة تقريبا عايش في أعلى هذا الجبل و اللحم إلي عنده من المراعي ماله .. وإلي يشتغلون معاه اعياله .. الصراحه المطعم نظيف و مرتب ..

أبو شنب ذكرني في بابا الحارة :3:



في تركيا عامة يوم تروح تاخذ اللحم للشوي ما يكون متبل و مبهر يعني إذا تبغي اتبهره و اتبله أستعمل قدراتك .. بس اللحم في تركيا بدون تتبيل رووووووووووووووووووووووعه ..



صديقي العزيز بو احمد بدأ في الشغل و التقطيع ..









صديقي العزيز بو احمد مع أبن صاحب المحل ..



اللحم جاهز للشوي ..



الطاولة جاهزة .. كل شي عال العال ..

هذا مكان الشوي .. و أنته تشوي بروحك عشان ماتقول محروق أو مب مستوي يعني شغل إيدك ياعم .. و كل المتعه و انته تشوي تحس أنك طالع رحله ..







بدأ الجد يالربع .. يالله كل واحد يشوف شغله ..







و بدأ الأكل يستوي و عصافير البطن بدأت تزقزق .. ياسلام أشوي وأكل وهو حار ..





خلصنا و لله الحمد و المنه .. و نحن طالعين كانت درجة الحرارة تحت الصفر .. و كان تقريبا على وقت الغروب ..



قلنا جينا بورصة ومامرينا على الشجرة الضخمة !! مايصير هالكلام ..











عند الشجرة العملاقة فيه كوفي قلنا نجلس وناخذ لنا شاي ..



عندهم صحن فواكه طازج ولذيذ ..





بس قلنا ناخذ صحن فراولة .. وياربي على الفراولة كان طعمها مميز ..







ومع شاي تركي .. أكتملت المسأله ..



بعدها الشباب قالوا يبغون يروحون ياخذون مناشف .. وبعدها رحنا خذنا تذاكر العودة لأسطمبول و بعدها على الفندق لأن الكل كان منهك و يدور الفراش ..

صورة ليلة لبورصة ..



في نهاية هذا اليوم العذر على أي تقصير و إن شاء الله تنال على الإعجاب ..


المصرف لليوم الخامس :

القهوة في الصباح : 7 ليرة تركية

الباركن للسوق : 5 ليرة تركية

التذاكر لصعود الجبل : 25 ليرة تركية

الدراجات الثلجية : 620 ليرة تركية

المطعم : 125 ليرة تركية

الفراولة و الشاي : 15 ليرة تركية

السعر لـ4 أشخاص