رحلتي السعيدة إلى 5 دول أوروبيه .. و النمسا جنة الكون ..

مـــــــــــــــــــاريـــــــــــا ألم
السيمفونية العذبة التفاصيل
القرية الحـــــالمــــــــــة

تبعد عن زيلامسي تقريبا 19 كم

بجوار سالفلدين







هنا مدخل القرية ويأتي على يمينه مركز التسوق بيلا billa



الصورة هذي من النت للأمانة
بعد بيلا يوجد محل خبز ..
وكوفي صغير فيه وحده تبيع الخبز صارت صديقتنا
ــــــــــــــــــــــــــــــــــــــــــ

الصورة هذي من النت للأمانة

استقبلتنا كريستينا الجميلة بـ أخلاقها وابتسامتها

تبارك الله يمكن حتى وهي نايمة تبتسم

من جد قمة أخلاقها

هي اللي بـ الوسط في الصورة

الصورة هذي من النت للأمانة

وهذي صاحبة الشقق المالكة لمجموعة Alpen parks

اللي ثاني وحدة على اليمين واقفه ..

تخيلوا كانت هي اللي تمر على الشقق ..

تغير المفارش وتوفر أكياس النفايات ومواد التنظيف ..

عشان كذا هم ناجحين بحياتهم ..

لو أحد فينا يملك مجموعتها السكنية ..

بيكون له

مكتب 600 م وموظفين

عدد السكان اللي بيسكنون المجمع وما عندهم شغلة

الصورة هذي من النت للأمانة

اللوحات اللي ع الجدران بالشقة فيها صورها وهي تبني الشقق وتأسسها من البداية

" كم أنت عظيمة ياسارا"

أعطونا المفتاح وطلعنا للشقق فوق جبل




وهذي شقق الجيران ساكن فيها أمريكان
وكورتهم كل يوم يرمونها عندنا











تدرون إنه قلبي يتألم
وأنا جالسة أكتب عنها


















رغم صغر القرية لكن يوجد بها كم واحد من هذا الشيئ الموية اللي يسمونه سبيل






كنا نشتري الموية وماندري إن أفضل موية على مستوى عالمي هي موية النمسا ..
حسب المعلومات اللي ذكرها الأستاذ "طائر الغربة ".









من أول يوم تسوقنا من بيلا وكنا بنموووت جوووع
وملينا أكل المطاعم من باريس وانترلاكن وميونيخ

فطرنا ع الظهر ..
وجهزنا العشاء مع وقت المغرب
وكان له لذة خطيييرة
طبعا أكيد يفرق طبخ البيت عن المطاعم مهما كانت جودتها

يوجد في القرية مطعم تركي يفتح 20 ساعة بـ اليوم
عنده بيتزا
وكباب ساندويتش
وشاورما
لكن احنا البنات ماحبيناه كثير ..
الأولاد عاجبهم

وصباح اليوم الثاني أخذنا جولة على القرية
وطلعنا التلفريك












هذا المبنى الكيووت روضة الأطفال




وهنا كانت جلسات شبه يومية ممتعة جدا
بعد كل طلعة للمنتزهات ننزل من السيارة ...
نمشي عند مدخل القرية وأهلي يسبقوننا للشقة بالسيارة ..
وناخذ لنا كل يوم جولات ع القرية ...
ومحلاتها وكل مكان فيها وناخذ آيسكريم ..

ونجلس على النهر ..
لايروح تفكيركم بعيد











اللوحة هذي أتوقع لها علاقة
بـ بداية إنشاء وتأسيس
القرية ..
ويوجد عليها تاريخ 1950 ..



ماريــــــــــا ألم ..
كانت نقطة الانطلاقة ..
لكل مكان جميل ..
كان الحب يتبعثرعلى أرضها ..
كل صباح ..
فتحتويه بهدوئها كل مساء ..

والحيــا قــد جـلَّل الـرّوض سـنا ...

فثغـــور الزّهــــــــــــــــــــرِ فيــه تبســمُ ..

يـا أُهيْـلَ الحـيّ مـن وادي الغضـا..

وبقلبـــي ســـكَــــــنٌ أَنتـــم بــــــــــــــهِ ...

ضـاق عـن وجـدِي بِكُم رحْبَ الفضا.

لا أبــالى شــرقَـــــــــــه مــن غربـــــــــهِ ..

فــأعيدوا عَهْــدَ أنسٍ قــد مـــضـى ...

تُعْتِقـــــــــــوا عــانيكمُ مــن كرْبــــــــــــــهِ ..

ــــ ــــ ـــــ ـــــ ـــــ

حنيــــــــــــــــــــــن ...

لكل مكـــــــــــــــــان ..

كل نـــــــــــــــــــــــهر ..

كل طريـــــــــــــــــــق ..

كل شــــــــــــــــــــارع ..

حتى السكان تعرفنا على كثير منهم وحبيناهم

البائعات في المحلات ..

وبائعة المخبز ..

ومدرِسة الروضة ..

والكاشيرات في الماركت ..

ومديرة المكتب السياحي ..

وحكايتنا

مع

سائق التاكسي ..

أحداث كثييير صارت في هذي القرية ..

في يوم الخميس 14/6 ...

طلعنا الصباح أنا وأختي للبحث عن محل اتصالات ...

لشراء شرائح اتصال وانترنت ..

أخذنا جولة في القرية ..

وتفاجأنا بوجود مكتب سياحه ..

دخلنا المكتب نسأل عن محل اتصالات ..

قالت أطلب لكم تاكسي ...

يوصلكم لمحل هاردلوير في سالفلدين ..

وأثناء انتظار التاكسي أعطتنا معلومات كثير...

عن القرية والقرى المجاورة لها

والأماكن السياحية في النمسا ...

وصل التاكسي وطلعنا معاه ...

رحنا سالفلدين ..

هناك مركز تسوق جميل وصغير...

نزلنا للمحل وأخذنا شرايح ..

T.Mobail

Aktuelle Handys und Tarife mit Online Rabatt T-Mobile

وأخذنا مقوي انترنت

غريبه إنهم ماطلبوا منا أي إثبات ...

رغم إن الشرائح استخدام اتصال ونت ...

بعكس باريس اللي وقعت لهم 4 أوراق ...

مع تصوير الجواز والاحتفاظ بصورته ...

والشريحة مجرد اتصال مكالمات بدون نت

يعني النت غير متاح لغير المقيمين في باريس ..

إلا إذا كانت إقامة طويلة ...

ـــــــــــــــــــــــــــــ

يلوموني ي النمسا ..

في سنتر سالفلدين يوجد محلات

فيها عروض مستمرة

وتخفيضات " خاصة " على ملابس الأطفال ..

ومحل أثاث صغير ..

صورته لكم ..

قال لنا الشيبه سائق التاكسي

تبون مشوار ثاني ؟؟؟

قلنا لاا شكرا ...

بس وصلنا لمركز بيلا في قريتنا ...

أعطيناه الحساب ودخلنا بيلا ...

وأخذت شوكليييت كثيير ..

تفاجأنا بسائق التاكسي في المارت

عند الأجبان والحليب ..

أخذنا أغراضنا ومسكنا السايد عند الكاشير ..

قام يتكلم ألماني مافهمت له ...

أحسبه يقول أنا بحاسب ...

شفت أغراضه حبتين موز و 1/2 لتر حليب وخبزه ..

قلت لاااا مستحيييل ..

الحساب علي

مين اللي وهقنا وقال العربي كريم ..

إلا دلوخ وملعوب علينا بهالخرطي ..

وأختي تقول منتي

صاحيه ..

قلت أغراضنا كثيير عيب يحاسب .

وطلعنا والعم مستانس ...

ولما جيت أرجع العربة حضرته يبي يرد الجميل

قال خذي هذي تريحك بدل ما تحطين يورو ..

طلعت منتب سهل يالشيبه

طلعنا

وخفت توهقني أختي
تقول لهم إني دلخه
ويقلقوووني ...

ولو بتشيل الأغراض معاي
لـ الشقة بتسويها سالفه ..
قمت قلت له أغراضنا ثقيييله !!!
ياليت توصلنا الشقة ...

لو ما قلت كذا ما رح أسلم منها
وبروح مسخره وتهزيييئ ...

وصلنا الشقة ..

قال خذوا الكارت لو احتجتوا مره ثانية ..
قلنا لااا عندنا سيارة ..

وامتلأ وجهه استفهامات ..


تناولنا الفطور ..

جهزنا أغراضنا وطلعنا...
...
فجأة اكتشفنا
قرية اسمها يعقوبيان ...
مادري عن صحة الاسم ؟؟؟
كانت قرية صغيرة ..
جميلة على مطل مرتفع من الجبال
يوجد بها تلفريك وألعاب أطفال ومطعم وكوفي ..
لكن للأسف كان الوقت متأخر ..
وعند وصولنا كان الوقت على الساعه 6 ,,,
والتلفريك يغلق ,
وجلسنا تحت المطر واستمتعنا فيها بعض الوقت ..

وفي عودتنا مرينا عند شاطئ الخليج
عفوا أقصد بحيرة زيلامسي .
ماتصدقون لو قلت لكم
ما حطينا رجولنا من السيارة
عند بحيرة زيلامسي
زحمممممة !!!
وكأن النمسا مافيها إلا زيلامسي ؟؟؟
ـــــــــــــــــــــــــــــــــــــــ
وفي اليوم اللي بعده
طلعنا زحليقة سالفلدين
وتغدينا في مطعم مقابل الزحليقه
جمييل ورايق وصاحبته وحده تجننن
مرره أخلاق وذوق وابتسامه تفتح النفس
بغيت أجيب العيد وأقول إقلطي معنا

حسيت ودها تخدمنا بزياده
من جد ما تتخيلون كيف كانت تتفانى في تقديم الأكل
بطريقة جميلة
وتسأل أي لون تحبون الشموع تكون ؟؟؟

وبعد الغداء قدمت لنا الشاي في الجلسات الخارجية
تحت المظلة
تقول تعالوا داخل عن المطر

ماتدري إننا مسافرين عشان نشوف المطر

حتى الأكل كان لذيذ
أعطيه تقييم 10/ 10
يمكن لأن روحها حلوة
ترى الابتسامة عندي تساوي الدنيا

كل هذا السحر كان عند زحليقة سالفلدين ..

وفي يوم طلعنا لزيارة شلالات كريميل
وعلى الطريق صدفة كان هذا الجمال
بحيرات
كلهم على شكل قلب
لكن اللي بالأخير
شكل القلب واضح أكثر

وبعد ما استمتعنا مع البحيرات
والخضرة والمطر
ركبنا السيارة إلى شلالات كريميل

ما قدرنا نوصل الشلال من الأول
لأنه مطر ...
وفي الطريق راجعين من الشلال
نزل المطر بقوووه مررره
تفاجأنا بسيارات الطوارئ منتشرة
وأعلنوا إخلاء المكان

كان المطر غزير

وبعد نزولنا كانت هذي القرية قريبة

تغدينا فيها

لوحة على أول الطريق
مورفن
murfen
يمكن هذا اسمها أتمنى الخبراء يفيدوني
كانت قرية منظمة وكأنها هيكله هندسية
تبارك الله

ــــــــــــــــــــــــــــــــــــــــــــــــــ ــــــــــ
بعده بيوم طلعنا لبحيرة هالشتات
الهادئة

.....................................
بعدها بيوم طلعنا سالزبورغ
وأيضا كان الجو مطر غزير
رحنا الأوت لت طلع مقفل عشان الويكيند
للأسف
سألنا عن السينما طلعت مقفله
تجولنا في المدينة
الريفية
التي تجمع بين نبض المدينة الساخن
وجمال الريف الهادئ
تغدينا في مطعم تركي
الأكل كان سيئ جدا
الويتريس وحدة كبيرة شوي في السن
ومعاها اثنين رجال
واحد كبير والثاني أصغر شوي

قدموا لنا

الشاي التركي

بعد الغداء
وهذا أحلى شيئ عندهم

وجلسنا نسولف معها

ونتكلم عن تركيا وغيرها

أمي انبسطت معها بس أنا ما حبيتها

ــــــــــــــــــــــــــــــــــــــــــ

وفي أحد الأيام...
كان الجو معتدل مشمس

قررنا نطلع من الصباح الباكر

إلى الكهف الثلجي

اللي قال عنه موظف السفارة المصري

يقول اسمه كهف هتلر

مشينا مسافات طويلة جدا
بعييييد لكن كان تعب ممتع
ورااايق

الكهف بالداخل بااارد
وظلام والتصوير ممنوع
وأخذت تهزيئة من المرشد اللي معانا
كله عشان أنزلها بالتقرير

ورجعنا لقريتنا الغالية
كل يوم أحد
يكون فيها استعراض

بعض الأيام كنا نطلع نتجول بالسيارة
إلى
كابرون وزيلامسي
وناخذ غداء ونرجع نتغدى في الشقة
خاصة لما يكون الجو مشمس
أو نطلع انسبروك وتيرول
وهذيك المناطق ونتسوق من السنتر
.. ..
يوم 6/7/2013
كان تاريخ مغادرة ماريا ألم
قبلها بيوم قررنا نقضي الوقت طول اليوم
نتمشى في القرية
ونوادعها

كانت أمطاااار غزيرة
تتوقعون كانت تبكي علينا لما
عرفت الحزن اللي بقلوبنا عليها

نمنا وكل الأغراض بالسيارة
صحينا الصباح ونظفنا الشقة
وفاجأنا الحلوه كريستينا ومدام ساره
بهدايا بسيطة

هنا واحنا طالعين من ماريا ألم

تذكرت أمي السجادة

تقول نسيت سجادتي على الكرسي في البلكونا

اتصلت على كريستينا

شيسمون السجاده

كريستينا أمي تسلم عليك

وتقول لك خلي السجادة عندك

لين أرجع

تلاقينها على الكرسي في البلكون

وتقول أمي ارفعوها عن المطر

ذكريات داعبت فكري وظني ....

لست أدري أيها أقرب مني ....

إنها قصة حبي

لما كنا أطفال ...إذا سافرنا عند خوالي نرجع نبكي

كنت أظن البكاء عشان فراق خوالي ...

لما طلعنا من ماريا ألم كانت قلوبنا مفجوعة

رغم إنه ماعندنا قريب ولا حبيب نبكي عليه

فيس بيموت من البكاء

ولما نتذكر إن فيينا بانتظارنا ...

كان يهدأ الألم

Penthouse Oper 1-8P: Duschel Apartments Wien

حجز السكن كان في شقق دوتشيل Duschel

حجزتها من نفس موقعهم لأنه الدفع مقدم

PENTHOUSE OPER 1-8P

العنوان
...
أرسلته لكل جوالاتهم حتى ما نتقيد
وكل واحد ياخذ راحته

.... وصلنا وقت المغرب الساعة 8 ..
وكان صاحب الشقة
ينتظرنا ..
كنت متوقعته شايب
طلع مدري كم عمره

خفيف دم .. وسيم .. كيوت
ذوووق أتعب وأنا أقول ذووق

الباسوورد حق النت ..
ضعيف النت فيها مرره واستغليت هذا الشيئ

الموقع رااائع

على ساحة ستيفينز

وقريب من شارع ماريا هالفر

ومقابل الأوبرا

وقريب من شارع المشاة

سلمنا السيارة لفرع سيكيست فيينا

الصباح وبعدها بيومين

أرسلوا لنا فرع باريس إيميل

قالوا السيارة اللي سلمتوها فيها صدمات

ومصورين لنا سيارة مكسرة نفس موديل سيارتنا

ياباباااااا

تلعب على ميييين

رديت عليه على طوول قلت ياروح أمك السيارة

هذي صورها عند استلامها في باريس

وهذي صورها عند تسليمها في فيينا

مافيها شيئ

بعدين مصورين اللوحة والأوراق كاملة

وانكتموا

عشان كذا أنصحكم لا تسلمون السيارة

قبل ما تصورونها ..

,,,,,,,,,,,,,,,,,

....

فيينا

تتنفس نكهات القهوة ليل نهار

رومانسيتها لاتهدأ أبدا

نبض الحب فيها

يثير بداخلك بركانا من العشق

جمالها الساحر

يجعلك تعيش حالما

لا تشعر أنك في أرض الواقع

,,,,,,,,,,,,,,,,,,,,,,

الشعب النمساوي

هو الشعب الذي يسحرك بابتسامته

يبهرك بروحه العذبة

أرواح نقية وقلوب صافيه

صدقوني ما أبالغ بكلامي

بقول لكم سالفة

مرة واحنا نتسوق أنا وخواتي

وحده منهم استفزتني

وتعاند تبي تروح مع طريق غير طريقنا

تبي ترجع الشقة

وهذاك اليوم أخلاق العرب كانت حاضرة بيننا

وابليس مشتاق لنا

أنا عصبت بقووه

وكانت معاي الأغراض

وأختي اللي معاي بيدينها الآيسكريم

وهذيك راحت على بالها بتروح الشقة

المشكلة ما تدل الطريق والله

مشيت وأنا أتحلطم

فجأة نزلت مجموعه من الباص

في شارع ماريا هالفر

جت وحده طلت بوجهي

وهي تبتسم وحطت أصابعها على حواجبها

تبعدهم عن بعض وتطل بوجهي أكثر

تفاجأت بعدين ابتسمت

قالت لااا بحركة راسها بعدين ابتسمت بقووه

وبحلقت بعيوني

قلت ياعمري والله لاسامح أختي لعيونك

سألتني أختي الصغيرة اللي معاي ..

تعرفينها ؟؟

قلت لا والله أول مره أشوفها

الحمدلله إنها بنت

كان تقولون صديقي

طلعنا الصباح نتمشى على شارع ماريا هالفر

أمي شافت الأترنج على الطاولات ..

متعودين ورد بلاستيك

أو من غير شي
أو شمعه إذا مطعم 5 نجوم
وما يولعونها إلا إذا أنتم شخصين

المهم ماعلينا ..

أمي لما شافت الاترنج قالت ياملحهم والله
والبلد الطيب يخرج نباته بإذن ربه والذي خبث لايخرج إلا نكدا ..

سلامات ماما

ياحلوووها آآآه

مقهى سنترال

من المقاهي التي لها تاريخ قديم جدا في وسط فيينا

فندق ساخر

تناولنا فيه الفطور والقهوة الجلسات الخارجية

محمصة الرفاعي فرع فيينا

موزارت شوكو

مقهى هافيلكا ..

عمره أكثر من 100 عام صور مؤسس المقهى

على الجدار

يعتبر أحد المعالم الهامة في فيينا

ويرتاده كثير من مشاهير الفن والسياسة والثقافة

الويتريس اللي فيه الآن هم أحفاد المؤسسين
للكوفي يعني نظام وراثة
وحضر افتتاحة رئيس البلاد وقتها

هذه الصورة تم اعادة تحجيمها . الحجم الافتراضي لها هو 800x1200.

متجر OXCOLAT

تديره سيده جميلة ومعاها بنوته .
روحهم حلوه نفس حلوياتهم
أخذنا منها هدايا

لكن للأسف الأنواع اللي من غير كحول قليلة و نكهاتها عادية

في فيينا نفطر ونتغدى ونتعشى كوفي ..

إحنا بطبيعتنا نحب القهوة

صار ما يهمنا أي شيئ المهم نروح كوفي
تغدينا مره عند مطعم فرايديز ومره عند مطعم بحري
طبعا كل الوقت كنا نتمشى ونتسوق
الأولاد راحوا قصر الشونبرون
وحديقة الحيوان والسينما
واحنا نتسوق ليل نهار

حاولنا تأجيل حجزالسكن في بودابست
رفضت إدارة الفندق
كان فيه يوم بالنص بين حجز فيينا وبودابست كنت مرتبة له استراحة بأحد القرى على الطريق
لكن جمال فيينا ما في راحه أكثر منه
دورنا على سواقين
طلعنا نسأل حصلنا إيرانيين كثير
ونصابين أكثر وأكثر النصابين عرب
للأسف
أعطاني المستشار رقم شركة
اتصلت وكلمني السواق
تركي الجنسية
مسلم
أخلااااااق
أخلاااااااق
وسعره أنصحكم ما تدورون غيره
كان يومها صايم واحنا ماصمنا
وقف عند محطة وكوفي على الطريق
يبي يفطر
قال صايمين

سكتنا أستغفر الله والله استحينا
قام أعطى أمي تمر قال أكيد ماما صايمة
الله يتقبل منك ويوفقك لكن
الإسلام يسمح للمسافر يفطر أفضل من الصوم
اسمه ورقمه راح أضيفه لموضوع في بوابة النمسا
(( أرقام السائقين في النمسا ))
اسمه "سالم "
069910472157
..................
وتابعوا معاي الجزء الهنغاري

بعد قليل ..

الطريق من فيينا
إلى بودابست كان جميل ..






هنقاريا
بودابست
معلومات سريعة عن هذه الدولة
بودابست هي عاصمة " المجر " وأكبر مدنها.
تعتبر المركز السياسي والاقتصادي والصناعي للبلاد.
يسكنها 1.7 مليون نسمة.
أصبحت بودابست مدينة واحدة على ضفة نهر الدانوب
بعد اتحاد مدينتي بودا على الضفة الغربية
مع مدينة بست على الضفة الشرقية ..
بودابست هي السادسة في قائمة أكبر المدن في الاتحاد الأوروبي .
في عام 1686 م وقعت تحت حكم عائلة هابسبرج حكام النمسا.
ــــــــــــــــــــــــــــــــــــــــــــــــــ ـــــ

وصلنا بودابست وكان الوقت الساعة العاشرة ليلا




استقبلتنا إدراة الفندق ...
كانت وجوههم تحمل استفهامات كثير
عن سبب زيارة عائلة إلى بودابست ..
قالت وحده منهم كل القادمين إلى بودابست للتجارة أو للدراسة ..
أحد أصدقاء محمد

يدرس في بودابست

وقال بما إني قريب راح أقابله وأسلم عليه

من فرحة الموظفة في الريسيبشين فينا
جلست تكلمنا عن بودابست ومعالمها السياحية
وأفضل الأماكن فيها
وإحنا بنموووت جوووع وتعب ,,,
والله ماندري شتقول ..
قالت أمي قولوا لها إذا صحينا الصباح تقول كل اللي عندها بس نبي نرتاح الحين ..
كانت رجولها تعبانه من السيارة وطفشت من كثرة هذرتهم ..
حاولنا ننهي الكلام مع الموظفة بأسلوب لائق..
واعتذرنا عن إكماله معها حتى الصباح ..
وأعطونا المفتاح أخيرا .. ورحنا الشقة ..









طبعا ما تتخيلون كمية التعب والإرهاق والجوع اللي كنا نعانيها
وما تتخيلون الوقت الطويييل جدا اللي أخذته منا موظفة الاستقبال
لدرجة الملل والتضجر ..
وصلنا واحنا بنموووت جوع ..
نزل محمد ومعاه عملة اليورو يشتري لنا عشاء
حصل مطعم تركي عنده بيتزا وشاورما
لما جاء يحاسب
قال له الحساب 2200 فورنت
أخوي مسك راسه بينجن ..
ما كان يعرف عن تفاصيل البلد وعملتهم أي شيء ..
قال ما معاي غير 50 يورو ..
ضحك التركي قال أعطيني 7 يورو بس ..
مراكز التسوق سوبر ماركت ..
نفس فيينا ( بيلا ومحلات بيبا للتجميل ) منتشرة في كل زاوية ..
هناك البلد رخيص لدرجة مو معقولة أبدا ..
3 يورو نتسوق فيها من بيلا خبز وعسل وجبن وزيتون وشوكليت ومشروبات ..
مره كنت أبي أسحب من الصراف بعملتهم الفورنت ..
للأسف الصراف مستحيل يصرف لك أكثر من 25000 ألف فورنت في اليوم
وتساوي 80 يورو ..
يعني من غير كاش ما تقدر تعمل شي ..




الشعب الهنقاري متمسك جدا بعادات وتقاليد البلد ..
كثير من المطاعم تقدم فقط الأكلات الهنقارية ..
يرفضون التعامل باليورو غالبا
ويفضلون عملتهم عدا المحلات الكبيرة ..
هذا فندق جراند كان هو المكان الوحيد اللي تقبلنا الأكل منه ..
وصرنا نزورهم للأكل وجلسات الشاي ..






هذه الصورة تم اعادة تحجيمها . الحجم الافتراضي لها هو 960x720.

هذه الصورة تم اعادة تحجيمها . الحجم الافتراضي لها هو 960x720.

طريقة غريبة وجميلة لتجميل طاولات الأكل في أحد المطاعم ..

تخيلوا الأكل هذا قيمته 9.998 فورنت
كنت محتفظة بالفواتير لكن طفشت منها ورميتها
ــــ ــــ ــــ
ويست إند مركز تسوق كبير يتكون من عدة طوابق
وتختلف المبيعات في كل طابق
يعني الطابق اللي في الأسفل -1
هذا يشبه سوق البطحاء
كله يبيع شنط سفر وكاميرات
وأجهزة وجزم أي كلام "الله يكرمكم"
وملابس خلاقين وخرده كثييير
الطابق 0
مطاعم وفروع بنكية وشركات
الطابق 1
مبيعات محلات أجهزة أبل وسامسونج ونظارات

الطابق 2
محلات اكسسوار وعناية بالبشرة وصيدليات
ويكثر عندهم اليهود وصناعاتهم وبضائعهم منتشرة بكثرة
الطابق 3.4
كله ماركات عالمية

هنا الكل يرمي أموال معدنية وينتظر أمنياته تتحقق ..
أتوقع الوحيد اللي أمنياته بتتحقق صاحب هذي النافورة







هنا النافورة الراقصة






هذي إحدى الجامعات في بودابست

الجسر اللي يوصل بين بودا وبيست على نهر الدانوب ..
وحسب المعلومات اللي عرفتها
إن أكبر مصب لنهر الدانوب يقع في بودابست ..



هذا سيتي سنتر مركز تسوق كبير وجميل
إدارة هذا السنتر أتوقع إنها تابعة لـ شركة قطرية
لما دخلنا داخل السنتر
كان فيه 3 من موظفي الشركة

تفاجأنا فيهم وتفاجأوا فينا

جالسين يتناقشون بصوت عال وكان المركز
مافيه أحد غيرهم لأنه دخلنا السنتر قبل موعد الدوام

سيتي سنتر
مركز تسوق كبير وجميل جدا

يوجد فيه الكثير من الماركات العالمية


الكنيسة




هذا شارع المطاعم ..
وهذا الرمز مادري من يكون المهم إن إحنا صورنا معاه



هذا الكوفي تديره 2 بنات كيوت وأخلاق وذوق ..
طبعا هو كوفي تحت وحديقة
وفوق تأجير غرف أو شقق ماعرف بالضبط
لكن لاحظنا نزلاء يدخلون ويطلعون من فوق ..
أيضا يوجد هنا بيع لوحات وأزهار ..
مكان جميل ورايق ..






هنا في هذا المكان على شارع الماركات
حصل معانا موقف أكشن كبير
كنا راجعين الساعة 10 الليل من سيتي سنتر ..
وجلسنا نتمشى ع شارع الماركات ..
فجأة ....!!!


جاء واحد سألنا أنتم من وين قلنا من الخليج ..
صرخ بصوت عالي وكأنه يبي يعطي أحد خبر قال الخليج بالانجليزي طبعا ...
بعد قام يكلمنا كلام يتعمد إن إحنا ما نفهمه ويصارخ موني موني ...
فجأة طلعوا لنا 3 أشخاص معاهم سلاح مسدسات ومعاهم شارات البوليس شكلهم شارينها من أبو ريالين ...
قام يصارخ بوجوهنا بولييييس بوووليسسسسسس
ويقول أعطواا الرجال هذا فلوسه
إنتم طلبتوا منه تغيير العمله وما أعطيتوه الفلوس ..
وطلب الجوازات منا ..
هنا أم الرررركب قام تخبص فينا وخواتي يقولون
خذ كل اللي تبغى بس رووح
قالت أمي عطوه اللي يبي الله ياخذ عمره ريحونا ..
وخواتي يبكووون
.. هنا ع طوول تذكرت منتدانا الغالي زاد المسافر ..
وتذكرت في أحد التقارير موضوع تكلم صاحبه عن العمليات والجرائم والسرقات اللي تحصل
ومنها اللي ينتحل شخصية البوليس
وتذكرت كلامه لما قال إذا طلب منك أي شيئ
لا تستسلم لطلباته وأطلب منه إثباته ..


كنت أنت المرشد والمعين بعد الله ..
التفكير هذا كان مجرد لحظات قصيره
لأن الموقف ما يستوعب تأخير وتأمل ..
قمت صرخت بوجهه ..
قلت أعطيني بطاقتك البوليسية وأعطيني إثباتك ..
هنا جلسنا نتلفت يمين يسار
ماعاد شفناهم
ورجعنا الشقة نحكي لأخواني الأكشن اللي صار
والكل يقول لي إنتي بطلة إنتي كذااا

لو الشارع فيه غبار كان عمانا الغبار من ركضتهم ..
بعد هذا الموقف للأسف توقفت جولاتنا السياحية في هذي المدينة ..
حلفت الوالده مانطلع بعد كذا
رغم إنه كان من تخطيط الرحلة زيارة بيت الرعب ..
لكن بعد هذا الموقف مو بحاجه لرعب أكثر ..
صرنا نتجول عند الفندق في أوقات النهار
ونطلع بالتاكسي للأسواق إلى أن جاء موعد الرحلة ..
الشعب الهنقاري طيب ودود جدا
لكن يكثر فيها المهاجرين من جنوب آسيا وأوروبا الشرقية
وروسيا وتركيا...
في آخر يوم
طلعت أنا وأخوي نشتري شنط زيادة من ويست إند
وفجأة شفنا وحده عربية ..
فرحنا بشوفتها وهي كانت فرحتها أكثر ..
جت عندي وكلمتني وتعرفنا ع بعض ..
طلعت طالبة سعودية مبتعثه في بودابست
ورحلتها ع نفس رحلتنا مع الخطوط القطرية ..
تبادلنا الأرقام واتفقنا نتواصل عشان نتلاقى في المطار ..
كان المطار فيه طلاب وطالبات كثير من السعودية والامارات وقطر ..
كلهم في بودابست ..
وراجعين يصوموا ويعيدوا مع أهاليهم .. ..
وصل موعد الرحلة .. وطلعنا الطيارة راجعين ..


1

2
مبنى البرلمان


3

4

5

6

7
الصور من (1- 7) من النت للأمانة ..
وتابعوا معاي في الجزء القادم
التكاليف الماليه
والصعوبات
والنصائح ..
وأشياء أخرى ..

الرحلة التي كانت النمسا هي الأطول وقتا
والأكثر جمالا وعذوبة وأناقة وصفاء ..
بدأت الرحلة بمدينة الحب بلا حدود .







. مدينة الخيال الحالم والعشق الناعم باريس ..
مدينة العطر والمطر ..
ثم كانت بعدها ..
........................



جميلة سويسرا الأنيقة أنترلاكن ..







المدينة التي كل ملامحها تذوب في بحر الجمال
وكل ممراتها تعزف لحنا عذبا خالدا في عالم الجمال ..
وبعد الصفاء الحالم في أنترلاكن ..
..................................


كانت ميونيخ المجنونة ..







التي تعزف التقنية على أوتار الطبيعة ..
وتمرح في زحام التكنولوجيا
وتنوع الصناعات ..
المدينة النابضة بهدوء منظم
والصخب المزعج
في تألق وجمال ..
بعد كل هذه التنقلات الممتعه ..
كانت النمسا الرحلة الأكثر وقتا
والأمتع والأهدأ والأعذب في جدول رحلتنا ..












جمال الريف النمساوي هو هتاف رباني
يذكرنا بأن كل ما نراه من جمال
لايقارن أبدا بجمال الجنة ونعيمها
والتي فيها مالا عين رأت ولا أذن سمعت
ولا خطر على قلب بشر ..
كانت الرغبة أن تكون عودتنا من فيينا ..








لكن وجود هنقاريا ضمن الجدول
جعلها المحطة الأخيرة من رحلتنا..
وإن كانت الأقل متعة في سجل تنقلاتنا ..
















إلا أنها لا تخلو من الفائدة في الاكتشاف
والمغامرة
ولا تخلو من الجمال ..
وهي منطقة تخدم التجار أكثر من السياح ..
وقد شاهدنا فيها عدد كبير من التجار الخليجيين ..
ــــــــــــــــــــــــــــــــــــــــــــــــــ ـــــ

تفضلوا فنجان قهوة بسولف لكم شوي




















.......................................







ــــــــــــــــــــــــــــــــــــــــــــــــــ ـــــــ


2- عند الاستعداد للسفر عليك أن تعتمد
على نفسك بعد الله بإنهاء إجراءات سفرك
فهو أفضل بكثير
من المكاتب السياحية وأوفر لك .
.........................................


3- احذر من سماع كل الآراء واستخدم عقلك
ولا تملأ الحقائب بما يزيد عليك الوزن ولن تستفيد منه ..
ولا تأخذ مع ملابسك
سوى القهوة والتمر وماعدا ذلك
ستجده أفضل مما لديك في بلدك .
...........................................


4- لاتنس الجارمن فهو من أساسيات الرحلة

في ذكر الأنواع الجيدة من الجارمن
وشرح طريقة استخدامه ..



5 - لاتنس أن تضع على حقائبك بطاقة تعريف
تسهل الحصول عليك عند فقدان الحقيبه في أحد المطارات







................................................


6 - اجعل عائلتك تستمتع بهواية الشراء
أكثر من المعتاد عليه في بلدك وتذكر
أن الرحلة لإسعادهم
ومتعتهم ...
وقد تجد بعض المنتوجات التي لا تتوفر في بلدك.
وحقيقة انصدمت من العديد من أخواتي
في جهلهن بالكثير من مزايا بعض الدول
في المنتوجات التي لا تتوفر لدينا
وهي موثوقه الانتاج والجودة ..
كـ هذه المنتجات من صيدليات ميونيخ على سبيل المثال








كريمات للجسم رائعة جدا .






وهذا المنتج لتنعيم الأظافر المتعرجة
وهذه الظاهرة تكثر عند التماسيح والشيبان
أخذناه من صيدلية في سيتي سنتر بودابست ..

.............................................


7 - لاتنس توثيق جميع لحظاتك السعيدة
واجعل بعضا منها عاما تستطيع عرضه للآخرين
والآخر خاصا بك و بعائلتك ..






8 - تذكر أن الله وحده هو من يسر لك السفر
وهو وحده القادر على حمايتك من كل خطر
أو مكروه قد تتعرض له ..
ف "احفظ الله يحفظك"






وتقبلوا مني جميعا الشكر على طولة بالكم معي
وأرجو أن أكون قد حققت ولو لمسافر واحد جزءا يسيرا
من الفائدة ..
بكل الحب أودعكم وأدعو لكم ..