رحلتي الأوروبية الجميله يناير 2015

رحلتي كانت في تاريخ 19-01-2015 وحتى31-01-2015 ،،، الوجهات كانت :-
1)امستردام
2)هامبورغ
3)براغ
4)برلين
النزول كان في مطار بروكسيل لان القطريه للاسف ماتنزل امستردام اضطرينا ننزل هناك وناخذ سياره ونروح بعدها امستردام


طيارتنا كانت الصبح الساعه 8 او 9 جد جد كان اجمل صباح واتذكر كانت قطر تمطر واجواء خياليه وبااااارده صلينا الفجر وطلعنا اول مره في المطار مشغلين دفايه مب مكيف اول مره احس بالشي هذا في قطر مكان عام فيه دفايه يوم كله جمييييل الحمدالله وهنا صور من مطار حمد الرااااااائع فعلا المطار شي الواحد يفتخر فيه كثير حبيته وهاذي ثاني مره اسافر فيه من افتتحوه وعقبال مليون سفره ان شاءالله













































فيلم ضيع وقتي وماكان شين زوين




ونمت احلى نووومه تقريبا 3 ساعات قمت مصحصحه

بعدها وصلنا بالسلامه والمطار ماكان زحمه كثير والموظفين بعد جدا خدومين خلصنا بسرعه وهالمره اجرنا من سكست لان سعرهم كان رهيب للمده هاذي كلها نسيت بالضبط كم بس مااتوقع اكثر 2500 وتعرفون كان كلللللللي شوق لااوروبا خصوصا في الشتا والاجواء البارده واول مانزلنا بلجيكا كانت بيضا كلها ثلج يالبيه اجمل اجمل شعور ماتتخيلون اشلون حماسي وانا ابي اطلع من المطار


طلعنا من المطار كان ودنا انروح بروكسيل بس قال زوجي بعيده وبتبعد المسافه لين نوصل امستردام ،،، قررنا انروح منطقه بلجيكيه اسمها Antwerb حلوه المنطقه ماشفتها كلها حسيتها مريحه وتخل القلب سنترها كان كله محلات تحسون محليه قديمه سنتر جدا بسيط تحسون نفسكم في اوروبا ايام قبل مريحه نفسيا المنطقه ،،، برغم اني كنت للحين بعبايتي ولابسه صندل مب جوتي ومحد يلبس صندل في هالبرد الشديد وماكنت حتى مشتبه بلبسي وفي منطقه مادري اذا يجونها من الخليج كثير بس مااتوقع شكلي كان ملفت وانا امشي بينهم الا ان محد يطالعني ولاحد درا عن هوا داري خخخخخ قعدنا اندور مطعم يناسبنا شفنا مطعم اسمه من برى اجنبي بس لما دققت على المكتوب داخل المطعم بالانجلييزي كان بابا غنوج حمص فلافل قلت لزوجي بس هوا دا خخخخ ودخلنا رهيييييب هالمطعم مش طبيعي كنت مستمتعه فيه وعجبني انه نظيف كل شي بملاعق مب بيديهم انا اعشق واقدر اللي يستخدم القفاز والسبون احطه فوق راسي خخخ واوروبا خبركم نادر تحصلون حد يسوي هالشي كلهم بيدهم يخبصون








شفتوا هذا سالنا انتو من وين قاله زوجي قطر وساله انت من وين قال اسرائيل ونصي اسباني وفيه عرق عربي بعد اتوقع مغربي قلت لزوجي بال رحنا فيها خخخخخ استهبل طلع يهودي بس تدرون كان طيب واكله يجنن يجنن الذ فلافل كلتها ونظيف ونظام مطعمه انت تحط السلطه داخل الفلافل على كيفك والسوسات موجوده على الطاوله على كيفكم تحطون داخل سندويجتكم السوس اللي تبونه





هاذي السوسات للسندويجات كلهم طعمهم كان واو لعبتي هالسوالف في اوروبا وهذا زوجي بعد بايعها في اللبس نفس مرته درجة ماينس ومخربينها انا وياه باللبس لكن صدقوني رغم البرد الشديد لدرجه اتحسون عضلات وجهكم متيسبه الا اني كنت مستانسه حدي وماكان البرد مزعجني لاني في حبيبتي اوروبا





وهذا الفلافل الخياااااالي




















ومسكنا الخط الى امستردام وسبحان الله مع دخولنا للجميله جدا امستردام جاهم ضباب








شعوووور جميل اول مره اشوف ضباب في يوربوكان كلي كلي حماس اشوف امستردام وبجد اجمل خيار اتخذناه ان رحنا امستردام

هذا هو الفندق اللي سكنا فيه





هنا ممكن تقعدون تشربون اللي تبوونه وفيه تلفزيون للي يبي يشوف مباريات لان قعدنا في هذا المكان كم مره علشان انشوف الكوره








صورت لكم من غرفتنا احلى شي انها وسيعه ماكانت ضيقه كل شي فيها ممتاز بس اتحسون عيبه البرد داخل غرفتكم ماتحسون بدفا الغرفه كانت بارده خصوصا بالليل دخلنا وصلينا وارتحنا شوي وبعدها طلعنا انشوف المنطقه























هالمطعم شنو رخيص مطعم ايطالي اللي يشتغلون عرب تخيلوا بيتزا وباستا مع مشروبات ونسيت اذا طلبنا سلطه مب متاكده بس الفاتوره كانت 81 ريال اشوف السعر جدا ممتاز


مشينا في السنتر وحول فندقنا كثير وبعدها الى غرفتنا واحلى نووومه وانطباعنا اول يوم عن امستردام انها جميييييييييييييله وهاذي صور بسيطه وراح اطلع لكم صور احلى انتظرووووني ،،، بكره ان شاءالله اكمل معاكم واتمنى جزء اليوم عجبكم واي استفسار انا حاضره


تصبحون على كل شي تحبونه

بعد ارهاق السفر نمنا نومه مش طبيعيه و قعدنا الصبح وكلنا حماس نشوف امستردام في النهار لان وصلناها بالليل ورحنا اللاونج معطينا فطور مب الفطور الكبيراذا نبي فطور الفندق الرئيسي لازم ندفع اما الفطور اللي في اللاونج او يسمونه الميزانيين للناس اللي ماتعرف هو يجي مع الغرفه ومفتوح من الصبح لين 12 بالليل واللي نبيه كان موجود من مخبوزات كورنفلكس وفيه بيض للي يبي ومكينة كوفي وجبن ومربى وزبده وعصاير هذا اللي اتذكره اشوفه ممتاز لان اكثر فطورهم لحوم وهالسوالف احنا ماناكلها مايسوى نروح للفطور الثاني الكبيرواكثره مايناسبنا





انا شسوي اعدل الصور تتعدل واذا احملها ترجع تنقلب اسمحوولي بتعبكم وياي


طلعنا الصبح ويامحلا الصبح في اوروبا فضيييييييييييييييييييييييييع الاختصارات ماتشتغل في اللاب توب بغثتكم بهذا الله يعينكم خخخخخ


كنت حدي سعيده وانا امشي الصبح واشوف الكل يبتدي يومه بتفاؤول ونشاط ويصبحون على بعض غير البرد والغيييم شي فضيع سبحان ربي جد طبيعه خياليه عندهم حتى انا الابتسامه صارت ماتفارقني امشي وانا مبستمه


اهم شي سويته وانتو لازم اتسونه اذا بتسافرون في الشتا هو انكم تدفون عدل ،، وجبرت زوجي بعد يدفا عدل مابي البرد يضايقنا علشان تكتمل المتعه انصحكم في مارك سبنسر تحصلون بنطلون قطني مع قميص يده طويله اكيد تعرفونه يجون مع بعض في كيس مااستغنى عنهم في سفراتي الشتويه يدفووون كثير تلبسونه تحت ملابسكم


في هذا اليوم قررنا انجرب العباره+ مدام توسو+ المتحف الوطني شي كذا هو عباره عن قصر أو متحف بتاكد من زوجي وبقوولكم مشكلتي كثير انسى اسمحوولي


وبدينا بالعباره لانها تلف فينا وتخلينا انشوف امستردام وناخذ فكره عنها وكانت خيار جيد عطتنا فكره عن شكل امستردام واكتشفنا ان اعتمادهم كبير على السياكل يمكن اكثر من السيارات وانها مليانه قنوات مائيه فوق الالف نسيت كم وانها جميييييله جدا جدا جدا وشعبها فضيع من احلى الشعوب بعدين بتكلم عن هالنقطه


بس قرفني شي واحد ،، طبعا فني ماتخلي سوالفها احسكم خلاص تعودتو علي اللي قرفني هو ان الدريشه كل شوي كانت تضبب من نسم الناس العباره كانت مليانه واكثر شي اليابانين وفيه كم اجنبي واحنا الوحيدين العرب وحاطين لكم مساحه عند كل دريشه علشان تنضفونها من الضباب بس انا من النوع اللي مايستحمل اقرف بسرعه قمت فتحت دريشتي شوي رغم البرد اتحمل البرد ولااحس ان المكان مكتوم ابي اكسجيييين وهاذي مقتطفات من الرحله


هنا اول ماطلعنا من الفندق مانسيتكم صورت لكم لين وصلنا مكان العباره وكانت قريبه من فندقنا











بقايا زينة الكريسماس شكلها









































هذا المبنى له قصه بس شنهي نسييييت








بويبنه ربعنا مشاءالله عليهم تاااارسين العباره




























































مباني امستردام الحمرا اتذكرني في بريطانيا خصوصا مانشستر نفس اللون


بقولكم نقطه شفتها في امستردام اكثر المطاعم اللي نبيها يحطون لافته يكتبون نفتح من الساعه 5 المغرب ماعرف ليش وقت الظهر مأساه لين نحصل غدا يناسبنا وصيدليات بعد ماشفت في امستردام لان كان فيني احتقان وكنت ادور صيدليه ماحصلت قليله الصيدليات عندهم عكس المانيا في كل مكان تلقون صيدليه

اتمنى هالجزء عجبكم وبرجع اكمل لكم ان شاءالله بالليل او بكره انتظرووووني

صباااااح الورد بما اني قاعده اكتب لكم التقرير الفجر ومساء الورد للي بيقراه المسا


اول شي انا اعتذر لان تقريري مافي معلومات بالاسم والمكان مثل التقارير الثانيه اللي اشوفها تقريري جدا بسيط صور اكثر من معلومات وصور يمكن تكون سيئه ومب قدركم اسمحووولي سبق وقلت لكم اني ماحب التصوير واغلب الصور كنت اصورها وانا امشي ،،، بس الانسان يتعلم المره الجايه ان شاءالله بكون حريصه اصور بشكل افضل واصور اسم كل مكان اروح له انا بس حابه اعطيكم رايي عن الاماكن اللي زرتها واحب اعدل صورة امستردام لان حسيت بالغوا في الكلام عنها


وراح اكتب عن المكانين اللي زرتهم هم مدام توسو والمتحف


احب اتكلم عن مدام توسو واقول انه مب مثل اللي في لندن اللي في لندن احلى بس هذا بعد مب شين واخلاق اللي يشتغلون عاليه وراقيه حبيت تعاملهم ويانا وراح اوريكم صور بسيطه من اللي صورتها وفي صور احلى من هاذي بس توني اكتشفت ان اغلبها شخصيه










هنا اول ماتدخلون اتحسونهم كنهم صدق افتر راسي ماعاد عرفت افرق بين الناس الصدقين والتماثيل














وهاذي حبيبتي اوبرا احبها







سوري لحد الان ماتبي تتعدل وياي






وهاذي اميرة الاخلاق والانسانيه بس اعترف انها شقتني بالطووول يوم وقفت جنبها علشان اصور




وبعدها طلعنا منه ورحنا للقصر مادري المتحف ماعرف هو شنو بالضبط انا اشوفه عادي بصراحه قصور النمسا احلى بكثير مافي مقارنه ،، احلى مافي هالقصر اثاثه اللي له عمر طويل وديكوراته وانا ماشوفه قديم يازين اثاثهم اذا عمره مئات السنين الله يخلف علينا بس خخخخ اقولكم اذبحتني المقارنات ماعلينا كل هدفي من التصوير ودخول هذا المكان اني اخذ افكار حق بيتنا لان قريب بنبنيه ان شاءالله شفتوا الفرق بيني وبين الاجانب هم داخلين يستكشفون وحدهم جادين وانا شاقه الوجه وكل شوي اقول لزوجي الله يامحلا هالصاله واااو يامحلا هالغرفه ابي نفس هالقعده خخخخخ خليجيه عادي اخليكم مع الصور وبقولكم لحد يتكلم في التلفون كلمت شغالتي اسالها عن ولدي خرعتني افريقيه مادري من وين نطت علي طيرت قلبي تقوولي نوووو سكري قصدها ممنوع تصدقون من الخرعه رقعت في وجه شغالتي الحمدالله اني ماكنت اكلم امي او ابوي لان راح يتخرعون








هاذي الخريطه مادري شسالفتها للاسف ماعندي معلومات عن المكان لاني ماحطيت السماعه بس اكتفيت بالصور لكم























روووووعه























حسيتهم عرب من لبسهم ماعرف اذا صح ولا





شايفين الفخامه الله يرحم خليجنا ذاك الوقت خيام وفقر وهم علم وفن









ابي نفس هالمكتب في شغلي


























اكمل وياكم بكره ان شاءالله لان عيوني بدت تتسكر ،، تصبحون على خير

هذا المنظر تحصلونه قدام المتحف مادري القصر للحين مب عارفه هو شنو بس اوعدكم خلاص المره الجايه بفتح مخي عدل وباخذ معلومات كل شي عدل لعيونكم





وبدينا نمشي وين ماعرف اللي اعرفه اني ابي اشوف امستردام اللي جاني فضول اعرفها من كثر ماقريت وسمعت عنها بس كان في شي غريب يصير داخلي اني احبهاااا اكثر وانها تبهرني اكثر بعد وكل شي فيها يعجبني شوفوا معاي الصور









اللى على اليسار شكله مول للي يحب انا ماافضل المولات في اوروبا ابدا احب الشوبنق المفتوح



















هنا الشمس اطلعت بس خمس دقايق وراحت ماشفناها ابدا فكه










اكثر شي مشهوره فيه امستردام السياكل وانا من عشاق السياكل من يومني صغيره لين كبرت بس خفت اجرب في امستردام لان يبي لها ثقه في النفس وقوة قلب تأشر بيدك وتقطع الشوارع وتوقف عند الاشارات وهم طياير متعودين خفت اجازف واجيب العيد





شوفوا محلا امستردام






















يالبيه ياامستردام حبيتهااااا












الجسور في كل مكان اتشوفونها في امستردام

الاكل كان صعب خصوصا الظهر لان كل شي كان يفتح الساعه 5 مادري ليش شي غريب بصراحه وقليل تشوفون تواجد للمطاعم اللي نحبها مب منتشره مثل المانيا في كل مكان تحصلون التركي الهندي الايطالي خصوصا ان احنا ماعندنا ثقافه في الاكل ولانحب نجازف وناكل شي مانعرفه شكل وجبة الغدا عندهم مب ضروريه مادري شسالفه حصلنا مطعم بالموت بعد ولولا الجوع ماكان جيناه حتى نفسية اللي يشتغل كان عربي ماكانت اوكي يمكن عنده ظروف مايندرى هو حق فلافل كان عادي مب مثل فلافل اليهوودي هذاك كان خطير


مشينا مشي في هذا اليوم لدرجه صرت اذا اقعد على الكرسي وارجع اقوم اموت من الالم كان يخف علي اذا مشيت مسافه ويروح واذا رجعت قعدت وقمت يرجع طول السفره وهالالم فيني لازم تتمرنون قبل كل سفره وتمشون علشان ماتعانون الم الشد شييييين







قعدنا على كرسي في هذا المكان










بغينا نشرب شي حار في كوفي شوب قريب منا كان جنبنا بس كذا حد قالنا في امستردام لاتروحون كوفي شوب روحوا كافيه اللي يجيكم مطعم وكافيه او روحوا مكان مشهور مثل ستاربكس لان في ناس عايشين في امستردام قالوا لنا ان ممكن يحطون نسبة مخدر بسيطه علشان تنعنشون شوي عاد ماعرف اذا اكيد هالشي او لا والمنطقه اللي كنا قاعدين فيها تحسون انها مالت هالسوالف عاد قالوا لي قبل لاجرب ماخلوني اجرب وانا مادري علشان احس بالشعور هذا واقولكم عقب اذا حلو ولا خخخخخخ خربوا علي ترى امزح لحد يصدق استغفرالله الله لايبلي حد فيه ويعين كل من ابتلى فيه ويفكه منه


وفي امستردام مسموح بيع المخدرات في الكوفي شوبات اما اللي يجيكم كافيه ومطعم مايكون فيها ،،،


نسيت اقولكم ان اول يوم وصلنا فيه امستردام وكان ليل اول ماطلعنا من الفندق ومشينا شوي الا افريقي قعد يأشر لزوجي بعيونه احنا فهمنا على طول ان قصده مخدرات شفناه ورحنا عند مكينة البنك ولحقنا يحسب نبي زوجي يسحب وهو واقف قريب ينطر نشتري منه اقول لزوجي ليش ماأشر لي يمكن انا ابي بعد مالت عليه مب معطيني وجه طايحه من عينه خخخخخ شكلهم كانوا حاطين لي انا شي كنت اقط خيط وخيط واااجد وانا هناك هههههههههههههههههاي شافنا مشينا ورحنا وفهم ان احنا مب مال هالسوالف اهم شي ماغثنا وقعد يلحقنا


رحنا نشرب شي حار لان البرد لعب فينا بس والله روووعه يازينه ولا الحر الحراره كانت بين ماينس 2 و3 واذا ترتفع تصير 2 او 3 ماشفنا 5 طول السفره الوقت صار مغرب والبرد زاد حصلنا كافيه في مجمع قريب من هذا المكان اللي قعدنا فيه حلو المجمع كله ماركات

طفحنا من الكوفيهات قلنا نغير ونشرب شاي احمر بنعناع وكان اختيار حلوو







طلعنا من الكوفي شوب وخلاص الدنيا بدت اتصير ليل مادري ليش ماحب يجي الليل وانا في اوروبا نهارهم رووووعه ماودكم اليوم يخلص










حصلنا محل ييع هذا الشي الخيالي ماقدرت اقااااومه





الذ الذ وافل كلته مش طبيعي الشوكه نفسها فيها سكين على جنب عجبني هالشي اول مره اشوفه لايفوتكم الوافل في امتسردام ،،، يوم ممتع قضيناه في امستردام ماكنت حابه انه يخلص ياليت بيدنا نقدر نوقف الوقت في اللحظات اللي نحبها لكن هاذي هي الحياه ان شاءالله ايامنا كلنا الجايه احلى


اتمنى هالجزء عجبكم وراح اغيب عنكم كم يوم لظروف خارجه عن ارادتي وان شاءالله برجع اتواصل وياكم وارد عليكم كلكم واحد واحد خلال هاليومين لضيق الوقت عندي ولاني ماحبيت اتاخر عليكم كثير في الاجزاء


تحياااتي لكم جميع والله يحفظكم وين ماكنتوا

اليوم قيلت مقيال مش طبيعي شكلي صباحي وجبت قهوتي الحين علشان امخمخ وانا اكتب لكم واحلى مساء لعيووونكم


صحينا من النوم كالمعتاد الساعه 7 الصبح لان كنا نايمين على 11 واليوم كنت متحمسه للجولات لان بنروح لأشهر مكان في هولندا وهو مكان الطواحين ومصنع الجبن والاحذيه


فيه مكاتب سياحيه في سنتر امستردام ممكن يوديكم للمكان هذا بس ماانصحكم تروحون معاهم الا اذا انتو تحبون تعرفون تفاصيل كل شي لان الاجانب فيهم سخافه نوعا ما مثلا اذا اليوم مشمس يقعدون سنه يتكلمون وهم يقولون Sunny day و Sunny day يفجرون راسكم ويطالعون الجو وماعرف شنو احنا ماعندنا وقت ولانحب القرقره الواجد خلاص نشوف ونطلع خخخخخخ هذا مثال بسيط عطيتكم ياه جد سوالفهم واجد


اول شي قلت لزوجي هاه انروح معاهم لان في كذا حد قالي عنهم قالي لااا عندنا سيارتنا وعقب مارحنا هناك قعدت طول الوقت اقوله شكرا شكرا من كل قلبي لان مارحنا وياهم لان كل مكان يروحون له سنه يهذرون مايسكتون احنا رحنا وشفنا وطلعنا وهم ماسكتوا


هذرت عليكم واجد واخليكم مع الصور


اصبحنا واصبح الملك لله صحينا من نومنا وطلعنا من الفندق يازين ذكر ربي الصبح وتقولون اذكاركم اللي حافظينها وتقرون المعوذات واية الكرسي وانتو تمشون بالشارع تحسون بطمأنينه وراحه وسعاده


بتحصلون كافيه جنب الفندق بالضبط انصجكم تفطرون فيه ريوقه حلوو يشتغل فيه اندونيسي له سنين طويله عايش في هولندا يقول كنت في السعوديه اشهر بس وعقب جيت هنا وممكن يعلمكم على اماكن سياحيه كثيره خدوم كثير


وهذا ريوقه



هنا بالطريق واتخيل هذا المكان في الربيع جنه





نسيت كم يبعد بس مااتوقع اكثر من ساعه وهنا وصلنا للمكان الحلوو





في تصليحات في المكان بس بعد ماكانت مخربه لان المكان جميييييييل جدا








البرد حجب الكل خخخخ


















تعرفون شنو يعني بارد قارص حسيت فيه وانا هناك كنت طول الوقت اسكر اذني بيدي من قوة الهوا كان صقييييييع لايحتمل في هذا المكان لانه مفتوح بس ماخرب علي متعتي استمتعنا فيه

























احب هذا العصر في اوروبا نفس اللي في الصور اشكالهم وملابسهم لدرجه اي فيلم يمثلونه في هذا العصر يجذبني كثيررر








شوفوا النهر اشلون تجمد







داخل المصنع

















مت عليهم







طلعنا نكمل جولاتنا والمكاتب السياحيه للحين تشرح قصة كل مكان

















المكان هذا حجب الاجانب الكل لف راسه واللي سوى لثمه من قوة البرد خخخخ

هنا ماقدرت اطلع فوق لان الدرج صعب ابي اتذكر شنو فوق نسيت











المكان يجنن في الشتا كيف لو في الصيف والجو حلو اتوقع المتعه فيه بتكون خياليه











النهر متجمد







قررنا ندخل هنا ونشرب شي حار يدفينا





هذا الشاب هو اللي عطانا الكوفي انا خذت كابتشينو حسيته الذ كابتشينو شربته





وهنا مصنع القبقاب شي كذا اسمه





هاذي جواتي الهولندين القدامى الله يعزكم مادري اشلون كانوا يمشون فيها














تذكرت طفولتي ومسلسلات الكرتون والافلام اللي كنت اشوفها كانت كذا جواتيهم



















المكان يجنن انصح بزيارته لجمال شكل القريه واللي يشتغلون هناك كل شوي يقولون هيلوه هيلوه خخخخ وهم يصورون حتى لزوجي يقولون هيلوه اول ماتدخلون يصورونكم وعقب يحطون الصوره في كلندر وانتو تشترونها منهم طيبين كثير واخلاقهم حلوه وشكلهم متعودين على العرب دام احفظوا كم كلمه عربيه

في مناطق كثيره حلوووه بجانب امستردام بس احنا كنا مقررين مانضرب خطوط طويله في كل سفراتنا الا اذا بننتقل من منطقه لين الثانيه لان الخطوط الطويله يروح اليوم وانتو ساعتين ولا ثلاث ساعات رايحين والعكس يعني قولوا 4 ساعات تروح على الفاضي وكنا بعد يومين بنضرب خط الى هامبورغ 4 ساعات علشان كذا ماحبينا نتعب نفسنا قالي زوجي في منطقه قريبه من مكان الطواحين تقريبا نص ساعه شي كذا الذاكره الله بالخير قلت له توكل على الله


اسم المنطقه هارلم حلوووه تنفع للتمشي فيها سنتر ومحلات حلوووه اخليكم مع الصور


هذي مقتطفات من الطريق


















































الاسم عجيب خخخخ شكل هالماركه عندهم معروفه لان في كل مكان اشوفها
































جميله المنطقه وتنفع للشوبنق



















شعب يجنن حبيت الهولندين










هاذي جايه بكل ثقه تبي تضم زوجي خخخخخ الا اقولها Not allowed نووو خخخخخ احسها تستهبل تقولي ليش بما ان شكلها اسيوي اتوقع اكيد عارفه عادات المسلمين عقب جات وضمتني قاعده وتضم الناس يحليلها امسويه جو في المكان





وعقب بدينا اندور لنا مكان نتغدا فيه يناسبنا حصلنا مطعم هندي حاط لافته نفتح الساعه 5 لحووول المطاعم قليله جدا شي بسيط ومتفرقين وعقب حصلنا مطعم ايطالي فاتح فرحنا دخلناه الا قالوا احنا مسكرين لحوول وش هالحظ والحين ظهر تقريبا الساعه 2 اخر شي حصلنا قدامنا مكدونالدز قالي زوجي مافي الا هو شنسوي قلت يلا قدام

الله يعز النعمه الاكل مأساه تعرفون لدرجه ماقدرت حاولت اكمل بس خذت لقمه وحده الدجاج زفرر ماانصح بمكدونالدز هولندا ابدا ابدا قلت لزوجي سوري كلش مقدر اكمل قالي كيفج استغربت انه ماجبرني خخخخ لان هو بعد ماعجبه بس هو عكسي ياكل الموجود يقولي هاذي نعمه وغيرج مب محصل دايم يعصب علي في سالفة الاكل مجننته بس شسوي انا مب اي شي اتقبله كلت جبس وبيبسي الحمدالله شبعني والحمدالله على النعمه





طلعنا وكنا خلاص رايحين للسياره









وبعدها رجعنا امستردام صلينا الظهر والعصر وتجولنا في شوارعها وتعشينا بسرعه علشان زوجي يلحق يشوف مباراة برشلونه في لوبي الفندق هالفندق فيه ميزه حلوه للرياضيين انهم يقدرون يشوفون مباراياتهم وانا كنت استمتع طول وقت المباراه بكوب الشاي ومع منتداي وحبيبي العرب المسافرون الله لايحرمنا منه






انطباعي عن المنطقه جميييييله وتستحق الزياره انصحكم فيها ،، اتمنى تكونون استمتعوا معاي في هالجزء وبحاول اكمل اخر جزء عن امستردام بكره اذا الله راد وشاكره لكم متابعتكم وجد وجودكم جميع اسعدني كثير شكرا لكم

وهذا هو اخر يوم لنا في امستردام وحاسه بحزن لاني بفارقها تعلقت فيها وكانت مدة اقامتنا فيها 4 ايام كاملين وفي اخر يوم خصصنا زياره الى نوتردام مادري ليش اسم هالمدينه له رنه في اذني من سنييين ومن زمان كان خاطري ازورها


صحينا من النووم الفجر واحلى شي ان الفجر عندهم الساعه 7 صلينا والى اللاونج علشان نتريق ونطلع ولاحظوا اني تارسه صحني وحاطه اكل فوق طاقتي احاوول اكل اكثر علشان مااجوع لاني عارفه راح نتلته لين نحصل مطعم يناسبنا وقت الغدا بس للاسف ماقدرت اكمل حرام الكوفي شبعني





احلى مافي هالمكان مكينة الكوفي على كيفكم تشربون لين تشبعون كوب كوبين الكوفي يروق المزاج من قلب كل شي في هالفندق ممتاز انصحكم فيه








وبدت توضح معالم نوتردام وتبين لنا انها منطقه سكنيه ومدينه مالها خص بالسياحه







ياليت هالمنظر قدام بيتي




















مش حلوووه خاب ظني فيك يانوتردام


























واحنا نتمشى حصلنا مطعم هندي كبير من داخل وطلع فاتح يافرحتنا


ماكان في المطعم غيرنا اقولكم شكل وجبة الغدا مش مهمه يمكن لان الكل يشتغل ماعرف اللي يخدم هندي سيكي الاكل ماكان ذاك الجوووده بس الحمدالله على النعمه


وهاذي كانت طلباتنا









والسعر كان مبالغ فيه 300 ولا 400 شي كذا والاكل اقل من عادي فرق بينه وبين المطاعم الايطاليه رخيصه والذ




وهاذي صور خذتها من النت











حطيتها لكم علشان توضح اكثر صورة نوتردام مع اني ماشفت هالمناظر يمكن مادرتها عدل كل شي جايز،، اسمحولي ماصورت في المنطقه كثير لاني ماشفت فيها منظر يستاهل التصوير رايي فيها انها مش حلوووه عاديه واقل من عاديه منطقه سكنيه كلها عمارات وليت العمارات حلوه واحسها مدينة اعمال وشغل ماشوفها سياحيه ولاانصح حد يروح لها ويضيع يومه مثل ماسوينا لان في مناطق هولنديه ثانيه اجمل منها بمراحل وهذا اللي كنت حابه اوصله لكم واللي حاب يشوف صور اكثر عنها ممكن يسوي سيرج من قوقل ويشووفها


لكن الحمدالله ان شاءالله انها خيره والحلو اني شفت شي كان بخاطري اشووفه ولاحظت تواجد الجاليات العربيه المسلمه بشكل كبيررررر اشوف حجابات وعرب في نوتردام اكثر من الاجانب يمكن هم يحسون نفسهم في بلادهم مب في غربه من كثرهم مشاءالله