سواليف أردنية من أرض النشامى الأبية

الأربعاء 11/9/2013

قلتلكم انه بنت اختي نامت عنا الليلة بس ما قلتلكم انه سهرنا سهرة عائلية رائعة على فكرة أنا لاحظت اني لما بنزل عمان فى غير فترات الاجازات بيحصل تقارب بيني وبين أهلي أكتر وأكتر يعني فى هاي السفرة أنا وبنت أختي كتير قربنا من بعض و صرنا أصحاب مع أنها لسه خريجة جديدة . طبعا كانت نتيجة هالسهرة انه صحينا متأخرين. رحت جبت كعك بسمسم القدسي (سميت التركي) من عند كعكوك وموقعه مقابل مطعم الضيعة فى مجمع جبر فى شارع عبدالله غوشه. فطرنا وحمدنا ربنا واستعدينا لرحلة جديدة.

كنت سمعت عن مطعم جديد فى موقع جميل جدا اسمه نسيم الجبل فى منطقة جلعد وهي منطقة على طريق السلط وقريبة جدا من منطقة زي.

طلعنا من الدوار السابع على شارع المدينة الطبية ومنها الى صويلح ثم اتجهنا الى طريق السلط مرورا بجامعة عمان الأهلية

ومرورا بمطعم

جلسات رائعة جدا جدا ولسه فى المساء تحلو الجلسات والمناظر الخلابة أكثر من النهار

قعدنا شربنا فنجان قهوة مرتب

كملنا مشوارنا باتجاه زي

خربطنا بالطريق وبدل ما نطلع فوق الجسر نزلنا تحته ولقينا حالنا فجأة بنص السوق، سألنا صبايا كانوا بيتسوقوا وكانوا فى قمة الذوق ودلونا على الطريق الصحيح

وبدينا نطلع لفوق فوق وهون أول ظهور لمطعم نسيم الجبل الحمد لله

وبدأت تظهر أمامنا مزارع الزيتون الرائعة ماشاء الله

قربنا نوصل

وصلنا الحمد لله وأخد منا الطريق مع الضياع والتوهان ساعة ونص تقريبا

واضح انه المطعم بالأصل مزرعة شخصية وكأنه صاحب المزرعة قرر يقلبها مطعم بس بيسكر أبوابه الساعة الثامنة مساء أعتقد لأنه الشارع المؤدي للمكان غير مضاء

المكان جميل جدا

شجر التين أطعمنا الله واياكم من ثمار الجنة

أشجار الزيتون الأسود تحيط بنا

ولقينا شجرة رمان

ياترى رح تعرفوا شو هاي الشجرة؟ يلا رح أغششكم هاي شجرة فلفل أسود وهاي أول مرة بشوفها شخصي

وهون مطل قعدتنا

طلبنا مشاوي ومقبلات بس للأسف الشديد كل هالجلسة الحلوة كان أكلهم مش طيب ولايستحق سعره على الاطلاق سواء على النوعية أو على الكمية.
مومشكلة المهم انبسطنا كتير وغيرنا جو وتعرفنا على منطقة جديدة أنا شخصيا أول مرة أزورها.
روحنا قبل المغرب وماطلعنا مكان ثاني لأني لازم أرتب شنطي وخصوصا انه بكره أتوقع انه يكون طويل وممتع

الخميس 12/9/2013
الجزء الأول

بتتذكروا النشميات اللي قابلتهم بالباص واحنا راجعين من العقبة، وقتها دعونا لزيارة عجلون والحقيقة انها ما كانت بالخطة كنت مفكرة أروح البحر الميت وتحديدا على منتجع البحيرة لانه منتجع اسلامي وبرك السباحة منفصلة وسبحان الله عجبتني جدا فكرة زيارة عجلون خصوصا اني ما زرتها الا مرة وحدة قبل أكثر من عشرين سنة.
وهذا ما حصل اتصلت بالنشمية سهير القضاة لتأكيد الموعد ووجدت منها كل الترحيب واتفقنا انه أروح لها على المكتب ودعتني لحضور افتتاح معرض فني عندهم مع أني ما كنت عارفه وين بتشتغل بالضبط.

ماما وبابا ما حبوا يروحوا خصوصا لما عرفوا انه برنامجنا رح يكون طويل لليوم فطلعنا أنا وبنت أختي وكانت هي اللي بتسوق فأنا أخدت راحتي بالتصوير. من أول الطريق لقينا مطاحن ازحيمان مقابل مجمع جبر على الدوار السابع وهون بتلاقي الزعتر الطيب والفريكة والسماق البلدي والبهارات الطازجة

والعمارة اللي جمبه مباشرة بتلاقي حلويات السهل الأخضر أطيب كنافة بين نارين عندهم

طلعنا على شارع المدينة الطبية باتجاه صويلح وعلى يمينا سيتي مول

مشينا باتجاه جرش وعجلون

جمال لامتناهي من الغابات الخضراء (غابة الشهيد وصفي التل)

جامعة فيلادلفيا على الطريق بتصدقوا اني اشتغلت فى الجامعة قبل 21 سنة كانت لسة أول سنة تفتتح الجامعة وكانت بس مبنى واحد وهلأ ماشاء الله مباني كبيرة وكتيرة

بائع الرمان الجرشي الطيب على الطريق

كملنا طريقنا وكل شوي أقول لبنت اختي لحظة لحظة بدي أصور هون وبالآخر صارت هي تقولي خالتي ما صورت هون

معصرة زيت زيتون - على فكرة قرب كتير موسم عصر الزيتون

أول ما دخلنا جرش لقينا على يمين الطريق مشتل رائع

شجرة زيتون رومانية قديمة

مقابل للمشتل هذا المطعم أنا شخصيا ما جربته بس بعرف انه أكله طيب كتير

وعشان يصرح لك تدخل جرش لازم تمر على

وهي من أروع النشميات السيدة الفاضلة والكريمة والمشرقة أم فادي، من سنين وهي تملك هالمحل وبتشتغل بايديها مع العاملات
أشعر أن جمال الدنيا بين يديك سيدتي
اللهم بارك فى عمر السيدة الرائعة ام فادي وارزقها من حيث لاتحتسب

هذا القماش المنشور فى الصورة هو قماش لعمل الجبنة النابلسية اللذيذة

وهاي مشترواتنا وقبل لا أروح قالتلي ام فادي اذا بدك الجبنة للسفر حطيها بالفريزر سنة مابصرلها اشي ولما تطلعيها من الفريزر ساعة قبل ما تحطي عليها ماي مغلية واتركيها كم ساعة عشان تروح الملوحة منها. ابتسمت وشكرتها جدا على النصائح اللذيذة مثل الجبنة واللبنة.

كملنا طريقنا وكانت بوابة أثار جرش بوجهنا

ومشينا باتجاه

عجلون جنة الزيتون

ماشاء الله لاقوة الا بالله طريق رائع

وصلنا على المكتب واكتشفنا انه مضيفتنا هي الفاضلة رئيسة مركز شابات عجلون النشمية سهير القضاة باستقبالنا

لاأخفيكم أن استقبالها كان حارا وجميلا كجمال عجلون وأهلها وعرفتني على العديد من اداريي المركز وعلى أنشطتهم الرائعة وعلى بعض الضيوف وعجبني هذا العمل الفني فى مكتبها

ثم بدا افتتاح المعرض الفني

فوجئت بكاميرا التلفزيون الأردني والمذيعة حولي تطلب لقاء تلفزيوني ولبيت لها طلبها مع اني والله مو عارفه أي برنامج.

عرفتي رئيسة المركز على نشمية رائعة السيدة ام مقداد من كفرنجه وهي رئيسة جمعية المبدعات حيث كانت ام مقداد هي مرافقتنا لبقية الرحلة. ودعناهم على وعد بالعودة لهم بعد استكمال جولتنا فى عجلون.

الخميس 12/9/2013
الجزء الثاني

ما أجمل الصحبة والرفقة الصالحة

ام مقداد سيدة رائعة جدا تعمل فى المجال التطوعي والخيري كرئيسة لجمعية المبدعات، تخيلوا تركت كل مشاغلها عشان تفرجينا على البلد وكنت فى قمة الامتنان لها.

طلعنا احنا وام مقداد الى قلعة صلاح الدين الأيوبي لنشتنشق عبق التاريخ وعبق الأجداد وعبق عظمة الاسلام

وبدأ الجمال يطل علينا

بدأنا فى الصعود الى قلعة صلاح الدين (قلعة عجلون)

استقبلنا محل لبيع الهدايا التذكارية

استغلينا الفرصة واشترينا شوية هدايا

وكملنا

آه لو بقدر أحضن كل حجر فى هذه القلعة المنيعة
آه لو يرجع في الزمن وأعيش فى زمن صلاح الدين

بعض قطع الآثار

وكل شوي نطلع درج وكل درج بخليني أتلمسه وأتخيل أنه صلاح الدين الأيوبي دعس على نفس الحجر

كل حجر يحكي قصة عظمة

وكل ما طلعنا أكتر كل ما كان المنظر أجمل

أنهينا جولتنا مع تاريخنا العظيم

وأصرت أم مقداد الله يرضى عليها تعرفنا على ثمره منتشرة جدا فى عجلون وما حدا يسألني شو اسمها لاني نسيت

ودعنا قلعة صلاح الدين على أمل اللقاء

أشجار الزيتون تحيط بنا من كل ناحية

ضلينا ماشين لغاية ما وصلنا لأحد مزارع العنب
بسم الله ماشاء الله لاقوة الا بالله

استقبلونا مسؤول المزرعة وزوجته استقبال حار ورائع، صدقوا لما قالوا لاقيني ولا تغديني واستئذنا منهم نصور دوالي العنب

ضيفونا فنجان قهوة لذيذ بعد تعب مشوار القلعة ومش بس فنجان القهوة

تبارك الرحمن لم أذق بحياتي مثل هذا العنب وللعلم هذا العنقود يزن على الأقل 2 كيلو

طلبنا نشتري منهم فاشترط الرجل أن نشتري 10 كيلو على الأقل لأنهم ما ببيعوا لأفراد بل لمحلات الفواكه ، فكرت لثواني ولم أتردد

بتعرفوا كم شخص أكل من هذا العنب؟ ماشاء الله أكلنا وأكلنا وطعمينا وأهلي واخواني واولادهم، ربنا طرح البركة فيه

الخميس 12/9/2013
الجزء الثالث

كملنا طريقنا باتجاه موقع مار الياس (كنيسة قديمة) ولا يوجد لها رسوم دخول

وتصر عجلون جنة الزيتون أن تبقى فى أبهى حللها

وبدأت رحلة الصعود الى مار الياس والتمتع بفن الفسيفساء

أما هاي فهي شجرة الأمنيات

وبعد ما تمتعنا بفن الفسيفساء توجهنا الى البلدة الجميلة عين جنة

رحلة رائعة ومعلومات جميلة عن الأردن الشقيق
سلمت عدستك والطرح أخي السعيد
لروحك السعادة

تسلمين اختى منال على تواجدك الدائم

ام معن فى ضيافة آل القضاة الكرام

وصلنا الى عقد القضاة (العقد هو المضافة) وكانت النشمية سهى القضاة فى استقبالنا

جولة فى العقد

ثم التقينا بالوالد محمد علي الباشا القضاه وبدأ بسرد الحكايات الجميلة عن ذلك الزمن الجميل ومن جميل ما أخبرنا به أن الملك عبدالله الثاني كان فى ضيافتهم قبل اسبوعين وللمفارقة الرائعة أنه قبل 100 عام كان جده الملك عبدالله الأول أيضا فى ضيافة عشيرة القضاة فى نفس العقد، نعم أحبتي عمر هذا العقد 100 عام.

إهداء خاص

أواني قديمة رائعة من عشرات السنين

شوي والا النشمية سهير بتتصل بتدعونا نتغدى معهم وافقنا بشرط يكون شىء خفيف جدا وفعلا رجعنا وتغدينا مع بعض غداء رائع من المعجنات البيتية اللذيذة.

ودعناهم وشكرناهم على حسن الضيافة الأردنية وودعنا أوقات رائعة فى أحضان عجلون وشكرنا الرائعة ام مقداد على ما قدمته لنا من تعاون ومساعدة لاتقدر بثمن

دخلنا على جرش وصورتلكم مطعم أنا شخصيا بحبه جدا لأنه أكلهم لذيذ جدا جدا

بعد المطعم بكم متر لقينا

ما تتخيلوا شو كنت محتاجه لفنجان هالقهوة والحمد لله كان مرتب تمام التمام

وجمب محل القهوة كان فيه محل انتيكات

الخميس 12/9/2013

الجزء الرابع

انتوا فكرتوا انه يومنا خلص ... لالالا لسه لسه

وصلنا عمان وعلى قد ما انبسطنا بعجلون كان عنا احساس بالذنب تجاه ماما وبابا انهم ما كانوا معنا، فقلت لازم أعوضهم فأخدتهم ورحنا تعشينا فى مطاعم ورد فى شارع المدينة المنورة قريب من مطاعم أبو جبارة وحلويات حبيبة

فى عدة مطاعم من المطابخ الآسيوية والعالمية واللبنانية والايطالية

اخترنا نتعشى هون

وقعدتنا كانت مطلة على مطعم ورد اللبناني

عجبني تصميم المنيو كتير واللي كان على شكل جريدة والحقيقة التصميم فى كل مطاعم ورد عالي الذوق والمستوى

وهذا طلبنا

وهنا صار التدمير النفسي والعاطفي لمشاعر الحب تجاه هذا الطبق اللذيذ

فاتورتنا طلعت 52 دينار تقريبا

الأكل كان لذيذ جدا والجلسة رائعة والخدمة ممتازة جدا مكان يستحق الخمس نجوم بجدارة

رجعنا على البيت وعلى طول رتبت شنطة السفر استعدادا للعودة الى أرض الامارات الحبيبة .

هلأ بقدر أقولكم تصبحوا على خير خلص خلصنا يومنا الحافل بكل ما هو جديد وجميل

الحلقة الأخيرة
الجمعه 13/9/2013

صارلي متغربة عن أهلي أكثر من 15 سنة ومع اني بزورهم بالسنة مرتين على الأقل وممكن أكثر حسب ظروفنا بس مازلت فى كل مرة أبكي عند وداعهم وكأنها المرة الأولى ، مازلت أشعر بغصة فى حلقي ونكسة فى قلبي لفراقهم. فى كل مرة ببوس فيها ايد أبوي بخاف تكون آخر مرة وفى كل مرة بحضن أمي بخاف كتير ما أشوفها مره ثانية.

اللهم بارك فى عمر امي وابوي وخفف عنهم آلامهم وأحسن ختامهم وارزقني برهم ياكريم اللهم آمين

ودعت أهلي وداعا مليان دموع حارة بس طالع من بينهم بريق أمل للقائهم من جديد.

وصلت مطار الملكة علياء الدولي الجديد وبسرعة خلصت كل اجراءات الوزن والجوازات وطلعت على السوق الحرة تمشيت شوي واشتريت هدايا لأبو معن وللأولاد وللرائعات حفيداتي.

انبسطت كتير لما لقيت انه مؤسسة نهر الأردن فاتحين فرع بالمطار ولا أخفيكم أنا من عشاق منتجات هذه المؤسسة

ولأني نسيت نفسي وأنا أتفرج وأشتري كانت رح تروح علي طيارتي وركض ركض ركض على البوابة . وفى الطيارة التقيت بسيدة لطيفة جايه تزور بنتها فى الامارات. فجأة لقينا حالنا وصلنا الشارقة، أكيد عارفين شو السبب لأنكم عارفين الستات لما بيلتقوا شو بصير .

وصلت بيتي والحمد لله لقيت أولادي وحفيداتي بانتظاري وبما اني لسه واصلة من الاردن قررت أعشيهم منسف أردني طازه

سواليف اردنية رائعة
طرح جميل جدا
سلمت جهودك
تحية