العمرس وعائلته في أوروبا صيف 2011م

كانت المغادرة يوم الجمعة تاريخ 1 يوليو من مطار مسقط الى ميونخ على متن الطيران الهولندي.

مسقط - توقف اقل من ساعة في ابوظبي - ترانزيت امستردام وتغيير الطائرة - ثم ميونخ.

سبب اختيار الطيران الهولندي هو رخص التذكرة والفرق الكبير بينه وبين الطيران العماني المباشر وفرصة نشوف مطار امستردام. ايضا رغبتنا في الوصول في الصباح الباكر للسفر الى وجهتنا الاولي من مطار ميونخ. والحقيقية الطيران الهولندي ممتاز والخدمة ممتازة وكانوا المضيفين ودودين خصوصا مع الاطفال.

المرافقون: زوجتي الغالية - ابنتي اللي الان صار عمرها 3 سنوات وطبعا البعض منكم يتذكرها في تقريري الاول (ببح) وابني كان عمره وقت السفر 10 اشهر فقط. والاخ العزيز العريس اللي تعرفت عليه عن طريق السبلة وهو رجل فاضل تزوج يوم الخميس قبل السفر بيوم واخذ زوجته في رحلة شهر عسل الى اوروبا.

وصلنا مطار امستردام والامور كانت سهلة جدا وكان موعد الرحلة الثانية بعد اقل من ساعتين قضيناها في التجول في المطار وتحديد بوابات المغادرة للرحلة القادمة.

الصور التالية من مطار امستردام وواضح موعد رحلتنا الى ميونخ الساعة 0720

طبعا تم عمل إجراءات الدخول الى الاتحاد الاوروبي وختم الجوازات في امستردام وتعتبر رحلتنا الى ميونخ رحلة داخلية بحيث نزلنا من الطائرة على مكان الشنط ومنها الى الخارج مباشرة بدون جوازات ولا تفتيش.

توجهنا مباشرة الى مكاتب تـأجير السيارات وفقد كنت حجزت سيارة من يوروب كار عن طريق النت لاني سبق تعاملت معهم ووجدتهم شركة جيدة. كنت حاجز فولكس واجن اوتوماتيك ولكن كانت غير متوفرة واعطوني بدالها.



لما تحجز سيارة فانت تحجز فئة ولا تحجز سيارة بعينها. يعني حجزت فولكسواجن معناه ممكن تحصلها او سيارة اخرى من نفس الفئة. واحيانا اذا ما متوفرة السيارة من نفس الفئة يتم ترقية الطلب الى فئة اكبر بنفس السعر.

ركبت الجارمن وكراسي الاطفال اللي جبتها معي من عمان (ليس بخلا ولكن لأن ابنائي معتادين عليها) وانطلقنا الى وجهتنا الاولى Lermoos





قرأت كثيرا عن جمال المنطقة في الجنوب الالماني وخصوصا منطقة جارمش وكان هدفا من اهداف هذه السفرة ولكن بعد البحث والتقصي عن شقة مناسبة في تلك المنطقة وجدت ان الاسعار داخل الاراضي النمساوية ارخص مع ان المسافة قريبة جدا جدا كما هو واضح (الخط الابيض هو الحدود).



ولا توجد حدود طبعا بين البلدين كل ما تراه ليخبرك انك تدخل المانيا او تدخل النمسا هي لوحة مثل هذه فقط.







حجزت التذاكر تقريبا شهر 4 يعني قبل السفر ب 3 اشهر وكان سعرها 695 ريال لثلاثة كراسي (الطفل اقل من سنتين بدون كرسي) وفي الطيران العماني كانت تقريبا 1000 ريال. فحجزت الهولندي وما ندمت الحمدلله. مع العلم الاسعار ارتفعت كثير في شهر 7.


السيارة حجزتها من 2/7 الى 21/7 يعني 19 يوم وكانت ب 771 يورو يعني تقريبا 401 ريال عماني. والحجز كان في شهر 6

الاحداثيات مخزننها مسبقا في الجارمن. سواء احداثيات الفنادق او الاماكن اللي ناوي ازورها وطبعا الجارمن فيه خاصية البحث عن مكان بالاسم.

انطلقنا إلى ليرموس والجو كان يمطر ع الخفيف



وصلنا جارمش الظهر وطبعا لازم نشتري غدا لاننا تعبانين وما جاهزين نطبخ من اول يوم فمرينا مطعم تاج محل في جارمش واشترينا غدا لشخصين ب 23 يورو.



توجهنا الى الشقة والجارمن وصلنا الى عند الباب. بالله عليكم ما حلو هذا الموقف؟



وصورة الشقة من الخارج هذيك اتللي فوق فيها بلكونة فيها زهور بيضاء



اجمالا ليرموس وجارمش والمناطق المحيطة قمة في الجمال وكلها انهار وبحيرات والجو الجو الجو بااااااااارد غير عن زيلامسي وميونخ يعني بارد بجد وكنت داخل الشقة البس جاكيت ومقفلين الدرايش طول الوقت. بس لما نطلع في الشمس شوية نحس بدفوة.

لما وصلنا ما حصلت حد في الاستقبال وحصلت ملاحظة بالالمانية وتمنيت لو كان عندي قاموس الكتروني (المرة الجاية ان شاء الله) فانتظرنا قليلا وبعدين جاء ولد صاحبة البيت واعطانا مفتاح الشقة. صاحبة الشقة التقينا فيها اليوم الثاني وكانت جدا خدومة ومتعاونة ولطيفة مع الاهل والاولاد وكانت تحب تجاوب على الاسئلة وتعطينا نصائح لبعض الاماكن اللي ممكن نزورها.

الشقة عبارة عن غرفة نوم بحمام وكنبة وطاولة وغرفة ثانية فيها طاولة وكراسي للاكل مع المطبخ الكامل من كل شي وبين الغرفتين ممر من الباب الرئيسي للشقة. في رأيي ان الشقة مناسبة لكنها قديمة شويه والارضية تسوي صوت عند المشي لان معظم المبنى من الخشب لكن قضينا اوقاتا ممتعة والحمدلله.

صور للشقة لكنها ملتقطة لاحقا وليس عند الوصول. يعني الكركبة بادية.

هذا النصف اللي فيه الطاولة والكراسي والنصف الآخر من هذي الغرفة فيه المطبخ



هذيك غرفةالنوم هناك والممر واضح بين الغرفتين



منظر من البلكونة والباب الزجاجي مغلق



المدخل



وطبعا الشقة فيها انترنت مجاني شويه اسرع عن انترنتنا

هنا بعض الصور من ليرموس الجميلة (زوجتي الى اليوم تسميها قرموص )

على اليسار البيت اللي ساكنين فيه





هذا الجبل يفصل بين المانيا والنمسا وفي القمة ثلج



الطريق بين البلدين



هذا المنظر شي عادي



هذي هي ليرموس وكان فيه اصلاحات في الطريق





بعد الراحة والغدا قلنا نلحق على سبار علشان نشتري منه بعض الاغراض. طبعا هو من المحلات المشهورة والموجودة تقريبا في كل قرية وغيره بيلا و و و ونسيت لاني حبيت سبار.

يوم السبت يقفل بدري ويوم الاحد كل شي مغلق






اشترينا امس السبت اغراض من سبار بحوالي 15 يورو عبارة عن (ما متاكد بس تراه هو كذاك دائما اشتري) شوية فواكه و زبادي وبيض وخبز ومربى. (فيه مرة خلص العيش اللي ماخذينه من هنا وحصلنا سبار العزيز يبيع عيش بسمتي وقلنا عاد المرة الجاية ما راح نجيب شي غير حليب الاطفال)

اليوم الاحد 3 يوليو: الوجهة بحيرة Eibsee (زين تبحث عنها في جوجل)

يمكن واحد يسال كيف اعرف انه شي بحيرة اسمها ايبسي قريبة من المنطقة والجواب اني انا شخصيا قبل لا احجز السكن استكشف المنقطة عن طريق جوجل ايرث او جوجل ماب واشوف الموجود حوالين المكان فاذا فيه بحيرات وانها بالنسبة لي كافي وهو المطلوب. ما اريد متاحف او قصور. وكل حد وذوقه يعني اللي يريد متاحف وقصور ايضا جوجل يخبره عن الموجود حواليه.

من جوجل خذ اسم البحيرة والصبح حط الاسم في الجارمن وهو يوديك ويجيبك. اهم شي لا تتردد دق سلف وامشي والمكان اللي يعجبك وقف عنده. يمكن احس عن المكان اللي ات قصادنه اصلا.

نوقف عن اللعيان ونعرض صور ايبسي



اللي يذكر التقرير السابق كانت ابنتي عمرها سنة وكل ما تشوف بحيرة تقول ببح ببح يعني تريد تتسبح وما تعرف انها ممكن تتجمد بس هالمرة صار عمرها 3 سنوات وخلاص ماشي ببح بس شي مراكض ويوم يمر قطار تصرخ قطار قطاااااااااااااااار. مثل هذا



رسوم دورات المياه (ما عليه المهم متوفرة في كل مكان ونظيفة) واللي على الشوارع العامة مجانية



حوالين البحيرة



توجد ممرات كثيرة للمشاة بمسافات طويلة وهناك الكثير من الناس اللي يحبوا المشي في الغابات



توجد قوارب للي يريد يستأجر



من ملابس الناس يبين انه الجو بااااااارد



بعد الجولة حول البحيرة صار شوية جوع خصوصا مع البرد فتوجهنا الى احد المطاعم الموجودة على ضفاف البحيرة ويبين في الصورة عربات الاطفال. البنت مع انه عمرها 3 سنوات بس تتعب من المشي فالاحسن تكون العربة موجودة.



شو رايكم؟



ومعه هذا طبعا



اما انا اكتفي بهذا



اظن والله اعلم ان الحساب 10 يورو للصورتين الاخيرتين لاننا ما اخذنا سمك ورجعنا الشقة نسوي غدانا.

والمسا عادة جولة قريب البيت مشيا على الاقدام.

وين وصلنا في التقرير؟ نعم نعم تذكرت اليوم الاثنين 4 يوليو

اليوم قررنا نروح نشوف بحيرة بعيدة بس تستاهل لانها من اكبر البحيرات في اوروبا والمثير انه داخل البحيرة حدود 3 دول المانيا وسويسرا والنمسا. وسبب فرعي آخر هو اننا كنا نريد نشتري لحوم ودجاج حلال وفي مدينة كونستانس على ضفاف البحيرة توجد بقالة تركية تبيع المطلوب.

البحيرة تعد ثالث أكبر بحيرة في أوروبا الوسطى من بعد بحيرة Balaton وبحيرة Geneva والبعض يسميها بحيرة كونستانس نسبة الى المدينة كونستانس ولكن اسمها الرسمي bodensee كما هو واضح من الصورة.



احنا جينا من الشرق الى الغرب ولفينا حول البحيرة ودخلنا مدينة كونستانس ورجعنا من اسفل البحيرة ودخلنا الحدود السويسرية ومشنا في سويسرا مسافة ليست قليلة. المثير ايضا ان الحدود داخل مدينة كونستانس ما تبين يعني اعتقد انه شي مباني جزء منها في دولة وجزء في دولة ثانية بس الناس عادي عندهم ما شي حساسيات مثلنا .



المسافة كانت طويلة بس المناظر جميلة والواحد يقول يادرب طولي. كنا سمعنا عن مطعم تركي في مدينة فوسين )محبوبة بعض الناس) وقلنا زين ندخلها نبحث عنه وناخذ منه شي بسيط للطريق.

طبعا هي تابعة لالمانيا وهذي لوحة الحدود واضحة



وهذا جسر في فوسين ولون الماي ولا اروع



للاسف حصلت المطعم مسكر اعتقد يفتح المساء فقط لذلك كان لابد من التوقف عند مكدونالدز



اشترينا ب 12 يورو من ماك

وفي الطريق شاهدنا منطاد والبنت كثير عجبها ومن كثر ما تطالعه حسيت انه بيجي رز من فوق



ارجو عدم التدقيق في التوقيت في الصور لانه ما مضبوط. البحيرة من بعيد



في مدينة على الضفة الشمالية للبحيرة شدت انتباهي لوحي وتوقفت



انها لوحة الشوارما يمي يمي



نزلت وحصلت اتراك طيبين واشتريت منهم شوية شوارما وبارد ب 12 يورو

اتذكر حطيت ديزل فول تانك ب 62 يورو. ميزة الديزل ما يخلص بسرعة وشويه ارخص من البترول وفي محطات ارخص من محطات.

في الطريق ايضا مرينا على مزارع فواكه والمزارعين يبعوا فواكه على ابواب المزارع فتوقفنا واشترينا فواكه طازجة ومتعنا اعيننا ببعض اشجار الفاكهة





اشترينا فراولة وكرز حسب طلب الاميرة الصغيرة ب 7 يورو ... تفضلوا



هذي الصورة فيها لوحة تدل على مكان فيه عبارات ممكن تركب السيارة وتعبر البحيرة الى كونستانس بس احنا طبعا فضلنا الدوارة وتطويل المشوار.



هنا بعد ما كنا في الجهة الجنوبية الغربية للبحيرة ودخلنا الحدود السويسرية



طبعا حصلنا البقالة التركية بصعوبة واشترينا ما نريد لاسبوع تقريبا لان بعد اسبوع بنكون في زيلامسي وفيها كل شي

منظر البحيرة





في طريق العودة توقفنا عند استراحة في الحدود السويسرية وتذكرت ان الاستراحات السويسرية متميزة بنظافتها ووسعها فاحببت ان اشارككم بعض من ذلك





من بعض انفاق سويسرا الشهيرة





بعض الشوارع في المانيا وسويسرا مافيها تحديد سرعة والناس طايرة



ولازم انفاق



رجعنا الشقة وحطينا اغراضنا في الثلاجة



وسوينا عشاها غداها وكنا متعبين بحق فخلدناالى النوم

غدا زيارة الى بحيرات صغيرة قريبة من ليرموس لذلك الصور سيغلب عليها اللونين الازرق والاخضر كما ستتضمن صور من مركز قرية ليرموس.

اليوم الثلاثاء 5 يوليو

اليوم وبعد الاطلاع على جوجل قررنا زيارة بعض البحيرات

ملاحظة: انا والاهل متفقين اننا مسافرين اساسا لتغيير جو. يعني نريد نشوف اللي ما موجود عندنا من طبيعة وهذا هدفنا الرئيسي لذلك ما نهتم بالمتاحف والقصور (ماعدا واحد لانه جنبه بحيرة) والمدن المزدحمة. اللي يهمنا البحيرات والانهار والاراضي الخضراء والثلج.

القرى اللي زرناها هي Urfield - Walchensee - Kochelsee Grobweil والايم اللي فيه see اخر شي يعني بحيرة. (زين اللي ناوي يسافر هناك يستطلع المكان عن طريق جوجل ماب او جوجل ايرث.

في الطريق توقفت عند مكتب سفريات واشتريت بطاقة للتلفون (الحين الله يعلم وين هي) وكانت ب 15 يورو وفيها 5 يورو رصيد بس اشتريت رصيد ب 20 يورو.

اظن اترككم مع الصور احسن







طبعا معظم البحيرات فيها قوارب للتأجير ولكن قوارب تجديف ياليدين او الارجل او قوارب كهربائية او شراعية وممنوع دخول قوارب تشتغل بالديزل او البترول او اي شي ممكن يلوث البحيرة لان البحيرة مصدر المياه للسكان.



احب ايضا التنويه انه المطر ينزل ويتقطع طول ايام سفرنا



زووووووم الى صاحب القارب





هذي بحيرة ثانية







هنا نزلنا وفرشنا بساط (من عمان) واكلنا فواكه جايبينها معنا من الشقة وجلسنا فترة لا باس بها والاولاد يلعبوا ويشوفوا الدنيا



طبعا المسيلة حوالي متر بعد الماي بسبب حركة البحيرة مدا وجزرا اما المكان اللي ما يوصله الماي واللي فرشنا فيه هو اخضر تمام.





وهذيك سيارتنا



شجرة ورانا



واحنا راجعين صورتين من الطريق





بعد ما وصلنا طبعا تغدينا في الشقة وريحنا شوية بعدين طلعنا نتجول في ليرموس مشيا على الاقدام وكانت هذه الصور





وهنا بنتي حصلت درس عن كلمة كنسية لانها كانت تقول مسجد



وهذا الطريق الى مونتانا (الشقة)





باكر الاربعاء زيارة حوالين القصر (ما دخلناه من الزحمة) وصور قليلة لكن الخميس سيكون حافل ورحلة الى انسبروك وعالم الكرستال.

الأربعاء 6 يوليو

الجو رائع واللي ما مصدق يشوف





صاحبة البيت هلكتنا من يوم واصلين تريدنا نزور قصر مبني على قمة جبل لذلك اليوم قلنا راح نشوف هذا القصرالعجيب.

خبرتها انه عندنا قلاع وحصون وهالامور ما غريبة علينا قالت لا لا هذا غير وقالت ان القصر اللي في قصة سندريلا مأخوذ من هذا القصر وانه نسخة منه. قلنا نروح نشوف.

هذا في مواقف السيارات وما هو هذا القصر الرئيسي



بل هذا هو القصر



نفسه اللي في الصورة اللي حطها Desert Life



ما دخلنا لأنه المكان زحمة عجيبة. باصات كثيرة وسياح من كل بلاد العالم من كل بقاع الأرض قصص شتى

قررنا ناخذ لفة على المنطقة الجميلة حوالين القصر واللي هي في نظري أحلى من القصر نفسه



كنت مستكشف المنطقة في جوجل وشايف انه بالقرب من القصر توجد بحيرة فبحثت عنها في الخارطة في شاشة الجارمن وحصلتها وحطيت اصبعي على البحيرة (في الجارمن تراه تتش سكرين) وقلت له وديني هنا أحسن.

المواقف القريبة من البحيرة



المواقف في شبه غابة وطريق جميل يوصل الى البحيرة ... ابنتي طرحت سؤال.... هل يوجد دب في هذه الغابة. الجواب يمكن يوجد لكن بسبب وجود الناس رحل بعيدا.







اخبرتكم سابقا ان هذي الحلقة قصيرة لاننا رجعنا ليرموس وقضينا باقي الوقت هناك.

حلقة الخميس السفر الى انسبروك وعالم شوارفسكي للكرستال. أحاول أدرج الحلقة اليوم بعد الساعة 10.






الخميس 7/7

اليوم قررنا الذهاب الى مدينة مشهورة من مدن النمسا وهي مدينة انسبروك (عاشق النمسا يحب انسبروك اعتقد)




الطريق كان رائع طلعنا ليرموس صعودا وكان منظر البحيرات جدا جدا رائع من فوق ومر الطريق على بعض السهول الجبلية (كيف سهول جبلية) يعني سهول منبسطة فوق في القمم. وبعدين لما وصلنا قرب انسبروك نزلنا لان انسبروك نازلة.
الجدير بالذكر اننا رحنا من طريق ورجعنا من طريق آخر.





من البحيرات اللي مرينا عليهم Blindsee وبحيرة Barmsee









وهذا المبنى في الجبل وتحت تكون البحيرة موقعه رهيب



لوحة توضح الانشطة الموجودة عند احدى البحيرات



وهذي السهول الجبلية اللي اخترعت مسماها



حاولنا معهم يبايعونا واحد من ذيلا ما طاعوا



واخيرا وصلنا عالم الكرستال شوارفوسكي (اذا خابصنه الاسم اعذروني) هو اللي يشتروا منهم محلات تفصيل العبايات الكبيرة حسب كلامهم مثلا في الخنجي انهم يستوردوا من هنا.

استقبلنا هذا الارنب



هنا داخل يعني وسط هي الكومة الخضراء يوجد المعرض والمحل. دخول المعرض بفلوس اما المحل طبعا مجاني بس لازم تذاكر (مجانية) علشان الابواب تشتغل بالتذاكر.



وهنا المحل من الداخل



فيه ناس تجي المحل فقط وناس تتمشى في المعرض وبعدين تدخل المحل. طبعا الازواج يحاولوا يدخلوا زوجاتهم المعرض ويغادروا بدون دخول المحل لكن هيهات.



بالنسبة لي كان عندنا مناسبة عائلية في هذيك الفترة فوفقني ربي بشراء هدية جميلة للأهل.

أما هذي هديتي لكل من يتابع تقريري



وهنا بعض معروضات المحل الاخرى







طبعا فيه كفتيريا وحديقة صغيرة فيها العاب اطفال والاميرة الصغيرة هذا اللي يهمها من الموضوع كله.
ثم غادرنا المكان وصورة للذكرى.



الصور القادمة لعشاق السيارات صورتها في مواقف السيارات



اللي ما يعجبه الكلاسيك يتفضل لا يزعل





بعدين توجهنا الى حديقة حيوانات صغيرة واسمها واضح في الصورة



الدخول ب 8 يورو للشخص الكبير والاطفال مجانا

لفينا شوية ومرينا على محل اخذنا لعبتين للاطفال ب 7 يورو

كاني ما جالني شفت مثله



سامحوني تراها حديقة حيوانات يعني شو من الصور احط لكم؟





بعدها غادر العمرس وعائلته في حفظ الله مدينة انسبروك عائدين الى ليرموس. احاول اطلع الخارطة وارسم خط السير وارفع الصورة.

صور من انسبروك عند العودة



هذاك الطريق في الجبل عبارة عن جزء من نفق يطلع من الجبل ويرد داخل الجبل بس يشموا هواء ويرجعوا.



وبهذا تنتهي رحلة يوم الخميس. مرينا نشتري اغراض من الدكان (ما دكان إسمه هايبرماركت) ب 6 يورو فقط بعض الفواكه.

غدا آخر يوم في ليرموس وسنقضيه في التجول في مركز مدينة جارمش. وبعد الغد نسافر الى زيلامسي الجميلة.

الخارطة اللي وعدت بطرحها واللي تبين طريق الذهاب والعودة من ليرموس الى انسبروك



عند حرف C تقع ليرموس وعند حرف B انسبروك وجارمش موجودة فوق في اعلى الخارطة.

الجمعة 8 يوليو

اليوم الاخير في ليرموس فغدا نغادر لقضاء اسبوع في سالفلدين قرب زيلامسي

ما رايكم في الجو؟ رائع طبعا والنية التجول في مركز جارمش







والحقيقية ان جارمش جميلة جدا وهادئة فيها مطعم هندي اللي اشترينا منه غدا لما وصلنا اول يوم. في الطريق توقفنا عند نهر جميل وقضينا عنده بعض الوقت للتأمل.





والصور التالية من مركز جارمش





ونختتم مع اكثر شي عجب اولادي واولاد الآخرين

قبل المغادرة ودفع المبلغ 442 يورو يعني 229 ريال صورت هذا الراديو التحفة



حطينا ديزل ب 52 يورو والصور توضح الأسعار (بعض المحطات أرخص)







صور من الطريق ( بعض الناس ماسكين الكاميرا وهات يا تصوير)





ياليته بيتنا





على مشارف سالفلدين الجميلة





قربنا



هذا الحجز وتفاصيله وبصراحة يعتبر رخيص جدا مقارنة بجمال ووسع ونظافة الشقة



هذي صور الشقة وهي عبارة عن بيت من شقتين واصحاب البيت ساكنين تحت زوج وزجته وولدهم كان عمره قريب من ولدي وفي يوم خليناهم مع بعض في الحديقة وولدي يفكر ولدهم لعبة ما حقيقي . الوجة هي اللي تدير الشقة وبصراحة طيبين كثير وعندهم العاب في الحديقة وخبرونا انه عادي نخلي الاولاد يلعبوا وايضا داخل الشقة في الصالة موجودة بعض العاب الاطفال.





بلكونة الصالة



صورة من البلكونة



الشقة فيها غرفتين بس احنا استخدمنا غرفة وحدة



ويوجد حمامين أعزكم الله



المغسلة في هذا الحمام صغيرة لذلك قالت الاميرة الصغيرة انها خاصة حالها فقلنا سمعا وطاعة









تعرفوا هالصورة كيف مصورة؟



هذا الله يسلمكم جسر خشبي جميل للسيارات يمر فوق النهر والصورة اخذناها واحنا واقفين على الجسر. الجسر ما يوسع الا سيارة وحدة بس عادة ما نلاقي سيارة لانها المنطقة هادية جدا.

لا حد يسالني شو هذا لاني ما اعرف بس هو قرب النهر





احنا حطينا اغراضنا في الشقة وطلعنا هدفنا الاساسي التسوق من بقالة المسجد (نعم مسجد) والبقالة التركية في زيلامسي والعودة.

خرجنا ومرينا على المسجد وبصراحة وجوده شي يريح النفس بصراحة. يحتوي على مسجد رجال ومصلى نساء ومطعم وبقالة صغيرة ومحل حلاقة والادارة كلها اتراك جزاهم الله خير.



مصلى النساء فوق



وصلنا الى معشوقة الملايين زيلامسي. طبعا ليس لجمال زسلامسي وحدها وانما المنطقة ككل جميلة بقراها الاخرى وموقع زيلامسي ممتاز كنقطة انطلاق برحلات يومية الى جهات ومدن وقرى وبحيرات مختلفة. كما ان المنطقة تزخر بالعديد من الانشطة التي تناسب الجميع.

شخصيا لا أحبذ السكن في زيلامسي بسبب كثرة وجود الاخوة الخليجيين ولا أخجل ان قلة أن وجودهم ربما يضر بعلاقتنا كسياح مع سكان المنطقة. للأسف معظم السياح الخليجيين لا يهتمون بالنظام في الشوارع وداخل المحلات واثناء المشي في الطرقات. والبعض يستهويهم التباهي بالفلوس والقدرة على الشراء والصرف وفي الجهة الاخرى ينظر الاوربيون الى ذلك على انه قلة عقل وقصر نظر.

في المقابل وجود السياح الخليجيين اوجد البقالات والمطاعم الحلال في زيلامسي ولكن الاسعار وما ادرك ما الاسعار؟ بعض الاغراض فعلا لازم تكون حلال مثل اللحوم والدجاج والاجبان لكن الاخوة الخليجيين رايتهم يشترون اشياء مثل السكر والملح والخضروات والفواكه من البقالة التركية باكثر من ضعف سعره في المحلات النمساوية. عن نفسي اخذت دجاج واجبان وربما بعض الاشياء الاخرى لكن الاشياء المتوفرة في المتاجر النمساوية فاشتريها منها.

مكان الشقة يبعد زيلامسي حوالي ربع ساعة بالسيارة فقط.

معظم الخليجين تجدهم في هذه الجهة من البحيرة وهي الجهة اللي فيها فندق جراند الشهير اللي كله خليجيين وايضا فيها قوارب البحيرة واللي اصبح عليها طوابير.





الجهة المقابلة ويمين ويسار البحيرة اجمل واهدى وتجد فيها بعض العوائل الخليجية اللي تبحث عن الهدوء امثالنا.





من سوق زيلامسي وممراتها



كثير مطاعم عربية وهندية وغيرها الي تقدم الطعام الحلال.... اشترينا غدا من عند الاخ ب 31 يورو لشخصين.



وهذي لوحة البقالة التركية ... ما قدرت اصور المدخل او داخل البقالة لانها مليانة عوائل ونساء خليجيات



وهذي مواقف سيارات قريبة من البقالة وكلفتنا 3 يورو لاكثر من ساعة.



بعد التسوق رجعنا الشقة نرتاح ونتغدا او نتعشا او الاثنان معا ونستعد لرحلة الى شلالات كريمل غدا باذن الله.

الأحد 10 يوليو

من الأماكن المحببة والجميلة والتي يزورها تقريبا جميع الزائرن للمنطة شلالات كريمل

الجو يشجع على الانطلاق



اممممممم اشوف الشارع قدامي ولا اشوف هذي البيوت؟



لكن حتى لو طالعت أمامي ما خسران



وعلى يساري ما خسران



وصلنا واوقفنا السيارة هنا (طبعا بفلوس) ب 4 يورو بدون تحديد وقت.



طبعا فيه اكثر من موقف وكل موقف بقيمة.

هذا البيت ملاصق للمواقف (زوجتي لحد قبل يومين بعدها تفكر تزرع ورود وزهور عند الدرايش مالنا ... تعتقدوا تنجح؟ أنا ما أظن



مطعم بيتزا قرب المواقف وسيارة غير قابلة للوصف إهداء لأخ عزيز غائب عن السبلة عسى ربي يحفظه (راعي السفينة)



اعتقد قطع الاشجار هنا لفتح طريق



نبذة عن المكان: الشلالات موجودة بكثرة في النمسا والمانيا وسويسرا لكن البعض منها تم ترتيبها وتهيئتها لاستقبال السياح والبعض الاخر ترك على حالته الطبيعية.

في هذا المكان وعند الوصول عندك 3 خيارات وجزرة (ماشي جزر بس تخريف).

إما انك تركب باص صغير يوديك اعلى الشلالات وتنزل مشي (جربت المرة الماضية وطفحت) وطبعا تدفع مبلغ للسائق. وممنوع صعود السيارات الخاصة.

أو انك تصعد مشي وتنزل مشي. وطبعا هذا مستحيل مع الأطفال لأنه أطفح مما سبق. مع أن الطريق مسفلت للمشاة وفيه حواجز حماية والمناظر روعة من الأعلى.

أو تتمشى وتتفرج وانت في الأسفل والمكان رائع جدا حتى للأطفال. طبعا لا يلدغ المؤمن من جحر مرتين فقررت الخيار الثالث. احنا رايحين نتمشى ولا نتعاقب؟

قلت سابقا انك اذا ركبت باص راح تدفع رسوم المكان عن طريق الباص لكن اذا حبيت تدخل من الاسفل فتدفع الرسوم عند المدخل واحنا دفعنا 5 يورو. الدفع يكون لبنت واقفة عند المدخل امام كشك التذاكر تدفع لها وتعطيك التذكرة وماشي بوابة واذا تريد تتهرب من الدفع ممكن تلف بعيد عن البوابة وتدخل لكن هناك شي ثقة في الناس وشي من الجانب الآخر إلتزام من الناس يعني الناس تستحق الثقة.

هذا الممر المؤدي الى المدخل



وهاذا الشلال من بعيد



وهنا تدفع التذاكر



الشلال



الاميرة الصغيرة اصرت والحت انها تصور مع هذا الشي



وانا احاول منها تصور مع هذي المناظر







حتى مع خيار التجول في الاسفل لا يخلو الموضوع من صعود ونزول



وهذا الشلال عن قرب والجدير بالذكر ان سبب وجود الشلالات بكثرة هو كثرة الامطار وايضا ذوبان الثلج في قمم الجبال





هذاك الاخ هناك وحده في عالم لابس واقي من المطر وجالس يتفرج على كرسي







انا واولادي انخشنا في مكان قريب من هنا وجلشنا على كرسي خشبي جميل بين الاشجار وجلسنا ناكل فواكه احضرناها معنا



من الاشياء اللي عجبت الاميرة الصغيرة مجسمات سنافر في حديقة مقهى قرب الشلالات



لوحية تبين اسم الشلالات



رجعنا البيت ومرينا على المسجد واشترينا من البقالة ب 5 يورو ورجعنا الشقة تغدينا والمسا طبعا اكيد لازم زيلامسي بس منطقة هادئة على البحيرة بعيد عن جراند واصدقائه









وصورة اخيرة عن الطقس عند العودة الى الشقة



غدا زيارة ما يسمى ببحيرة الملك والتعرف على صديقتنا الجديدة (((فراشة))) اللي لحد اليوم ما تنام الاميرة الصغيرة الا وفراشة لازم جنبها

الاثنين 11 يوليو

امممم لفلفنا على جوجل ماب في الليلة السابقة واستكشفنا البحيرات القريبة ومنها بحيرة الملك اللي قرأت انها مقصد للزوار. احب اذكر ان الوجهة غير مهمة لان اي طريق تسلكه ستجد ما يسر ناظريك وربما تتوقف في مكان جميل وينتهي الوقت ولا تصل الى وجهتك اساسا. تحديد وجهة انما هو فقط لتحديد مسار عند الخروج.

اولا صورة توضح اسم البحيرة



اتذكر في هذي الرحلة مرينا على مناطق يعجز اللسان عن وصفها وكنا نردد "سبحان الله" بس طبعا النفق ما من ضمنها




لكن هذا من ضمنهم ويعتبر مقبلات




شو رايكم؟



حد عنده كلام غير "سبحان الله"



المدام بالغصب اقنعتها نواصل المسير طبعا بعد ما التقطت لها عدة صور





الطريق في صعود ونزول مرة يضيق ومرة يتسع



مثل الجسر اللي عند شقتنا





وقفنا السيارة ومشنا الى البحيرة ... هناك البحيرة تبين



من هنا اشترينا فراشة ب 7 يورو



البحيرة جميلة وفيها قوارب للي يريد يتمشى لكنها كانت مزدحمة بالسياح الأجانب وما شفت ولا عربي هناك حول البحيرة



تعجبني البحيرة اللي مافيها شاطي لانه ما تشوف حد بلباس غير مقبول







بعد ما تمشينا حول البحيرة واحنا طالعين اشوف لوحة جميلة محبوبة



هنا يعني شوارما واكيد حد عربي او تركي ولما وقفت حصلت اخت تركية مسلمة واشتريت منها ما يسد جوعنا بعد الجولة حول البحيرة ب 10 يورو



وقفنا في استراحة على الطريق وجلسنا على كراسي خشبية وطاولة خشبية تحت شجرة خشبية (يعني شي شجرة حديدية؟) والجدير بالذكر ان تقيربا جميع الاستراحات على الطريق فيها مواقف وكراسي وطاولات ودورات مياة (نظيفة) وكل حد جالس ياكل ويشرب ويستريح وينظر يمينا وشمالا.

هذا الرجال كان قربنا وعزمنا عليه بس قال اذا زودتوا كلام بهالحديدة



وكان مقابلني منظر السحاب والجبل ومنظر كثيرا ما يتكرر هناك



رجعنا وفي الطريق مرينا انترسبار واشترينا اشياء من ضمنها عيش بسمتي لانه عيشنا خلص. انترسبار هو فرع اكبر وأشمل من سبار

الثلاثاء 12 يوليو

اليوم سنتوجه باذن الله الى جبل جروسلوكنار Groslockner وهو جبل الدخول اليه برسوم للسيارة به طريق جبلي جميل يمر على مناظر رائعة وفي الاعلى يوجد الثلج. في العام 2009 كنا اكثر حظا حيث نزل الثلج في اليوم السابق لزايرتنا لذلك كان هناك الكثير منه. اما في هذه الزيارة فقد كان الثلج قليلا ولكنه يكفي لكي تصنع الاميرة الصغيرة كرة ثلجية وترميها على والدها المسكين في حين غفلة مقلدىة ما شاهدته في قناة براعم.

قبل الصعود



توقفنا عند منطقة العاب عند مدخل الجبل لشراء قفازات للاميرة الصغيرة ونظارة شمسية ب 14 يورو. وطبعا لازم تلعب "شوية بس بابا شوية"



وهذي هي البوابة



زووووووم على لوحة الاسعار السيارة الصغيرة 29 يورو والدراجات 19 والصراحة الدراجات اكثر عن السيارات



ثم مشاهد من الجبل















فيه بحيرة صغيرة فوق - اللي يحب يتسبح يتفضل على مسؤوليته (بررررررد)



وايضا تكثر الانفاق فوق في الجبل. وداخل النفق الماي يقطر والشارع مبلل داخل النفق



وهذا الثلج اللي صنعوا به الكرة الثلجية وضربوني بها







طبعا لازم جايبين فواكه وشاي وجلسنا هنا











بعض القمم ما توصلها السيارات فاللي يريد ياخذ تلفريك



لوحة تبين تاريخ بناء احد الانفاق والارتفاع









اللي يحب يبات يختار بين الكهف هذاك ولا الكوخ الصغير



عدة الوان



الاستراحات والمطاعم ودورات المياة متوفرة



مشاهد متفرقة







وهكذا تنتهي زيارة الجبل ...... غدا الاربعاء زيارة الزحليقة الصفية باذن الله

الأربعاء 13 يوليو

في هذا اليوم قررنا زيارة واللعب في الزحليقة الصيفية ومن ثم التجول في قرية كابرون الجميلة والبحث عن اسواق ليوم التسوق وهو الذي سيكون الاخير لنا في المنطقة

من خلال الصور ستظهر الزحليقة وهنا فيديو وجدته في يوتيوب



لوحة توضح اسم الزحليقة لمن اراد البحث في جوجل



الصعود الى القمة يكون بواسطة هذه الكراسي المعلقة



التذكرة تقريبا 12 يورو للفرد الكبير ... الاطفال الصغار لازم يجلسوا في نفس العربة مع شخص كبير. الاميرة الصغيرة كانت معي واستمتعت كثير وكانت تقول بابا اسرع اسرع.

صور لمسار الزحليقة واحنا صاعدين














وهذي هي كراسي الصعود ... كرسي يركبوا عليه ناس وكرسي يستخدم لارجاع العربات للاعلى



صور لقرية سالفلدين اللي ساكنين فيها











بيت في الجبل



وماشاء الله (كلهن معلق لهن اجراس ويسون صوت اثناء الرعي)



عند الانتهاء توجهنا الى كابرون وزيلامسي ووجدنا اخ تركي عنده مقهى صغير واشترينا بعض الاشياء



ثم رجعنا الشقة وتغدينا وبعد الراحة توجهنا الى ضفة خضراء هادئة من ضفاف بحيرة زيلامسي لتناول الشاي والفواكه والاستمتاع بالجو





وجانا ضيف وقمت باطعامه بيدي بس ما عضني مثل احد الاخوة قرأت في تقريره انه حصل عضة محترمة





ويوم بقية الشلة جات توقفت عن اطعامه وطردته شر طرده



بدأ المطر في النزول ايذانا بنهاية الرحلة فعدنا ادراجنا الى شقتنا وفي الغد يوم جديد ورحلة جديدة

الخميس 14 يوليو

اليوم مقررين تسوق في منطقة تجارية بين كابرون وزلامسي

الجو رائع





في البداية توجهنا الى منطقة العاب اطفال في كابرون. المكان ظريف جدا والاطفال يستانسوا والاميرة الصغيرة لعبت مع الاطفال النمساويين



وفي المكان نفسه زحليقة ايضا ظريفة لكن زحليقة سالفلدين اطول وامتع بس حتى هذي ممتعة







وطبعا عند الصعود تحلى المناظر والتصوير





بعد قضاء وقت ممتع توجهنا الى السوق ... لوحات تبين اسماء المحلات









الجو كان مطر خفيف









ثم عدنا ومرينا على مطعم تركي قريب الشقة واشترينا غداء بيتزا دجاج



صاحب المطعم تركي اسمه كمال ... تحدثنا في السياسة شويه واخبرته انا الكثير من العمانيين معجبين بالساسة في تركيا خصوصا اردوغان واخبرني انه من نفس مدينة الرئيس عبدالله غول.

عدنا نتفرج على ما اشترينا وقضينا باقي الوقت في البلكونة نشوف المطر. غدا آخر يوم في سالفلدين

الأسبوع القادم كان التخطيط الذهاب الى سلوفينيا واستكشاف اوروبا الشرقية. كنت قد قرأت عند مدينة اسمها "بلد" Bled وبها بحيرة جميلة حسب الصور. ولكن بينما نحن في سالفلدين قمت بتفحص مواقع الطقس لانها وصلتني اخبار ان سلوفينيا تمر بموجة حر وهذا يحدث في الصيف في اوروبا ان تمر بعض المناطق بموجة حر لمدة ايام او اسبوع. كانت مواقع الطقس تشير ان درجة الحرارة المتوقعة في سلوفينيا في الاسبوع القادم اعلى من 30 درجة.

بعد البحث عن احوال الطقس في النمسا تبين ان الجو سيكون رائع لذلك وبسرعة الغيت الحجز في سلوفينيا بعدما تأكدت من وجود شقة جيدة في منطقة نمساوية ليست بعيدة عن زيلامسي اسمها Abtenau وكان اختيار موفق والحمدلله.

الجمعة 15 يوليو

اليوم حبينا نرجع الى الزحليقة الصفية ونبقى في زيلامسي لنودعها لاننا غدا سنتوجه الى Abtenau

عند خروجنا من الشقة قلت لازم اصور الخيول اللي كل يوم امر عليها وانا مستعجل



اليوم صورت صور توضيحية اقرب الى كيفية عمل الزحليقة





وقضينا باقي اليوم في زيلامسي وآخر صورة هي للبيت من الخارج وشقتنا فوق



طبعا ايضا قضينا وقت في تجهيز الحقائب وتنظيف الشقة ... مع انه ما شرط تطلع عن الشقة نظيفة.

السبت 16 يوليو

مغادرة سالفلدين والتوجه الى ابتناو وصور من الطريق وهي تغني عن اي وصف















ومن هنا الصور داخل ابنتاو وبصراحة منطقة رااااائعة (وما فيها خليجيين)





لما حسينا نفسا قريبين من الشقة توقفنا ناكل بعض الاشياء اللي احضرناها معنا في هذا المكان الجميل يبعد حوالي 3 كم عن الشقة





بعد ما خلصنا لما رحت ارمي الفضلات تفاجأت بشي مكتوب في برميل القمامة لأول مرة أشوفه في النمسا



وصلنا الشقة وفي البداية احب اعرض صورة من الحجز لمن يرغب في اخذ فكرة



147 ريال للاربع ليالي........... شو رايكم؟

صورة البيت وايضا الشقة فوق



وهذيك البلكونة حالنا



ومن الداخل









طبعا اليوم استقرار وترتيب وغدا رحلة الى البحيرة الشهيرة من اكبر بحيرات النمسا وولفقانق Wolfgang

الاحد 17 يوليو

من زمان وانا نفسي ازور بحيرة وولفقانق لاني سمعت عنها الكثير وهذا سبب رئيسي انه اثناء بحثي عن سكن جديد في النمسا اخترت منطقة قريبة من البحيرة

الطريق رائع جدا جدا جدا مرة صعود ومرة نزول







الجارمن مضبط انه يمشي في الطريق الاقصر وما مضبط انه يتفادى الطرق المدفوعة فما قصر لقينا نفسنا عند محطة للدفع



دفعنا 8 يورو بس ما ندمنا لانه الطريق جبلي ويستاهل ..... شوفو واحكموا







انا شخصيا تتعبني هذي المناظر















وصلنا البحيرة بس للاسف لانه الجو مشمس فالمكان مزدحم وفي بعض الاماكن الناس بملابس غير لائقة فتعبنا لحد ما وجدنا مكان مناسب نوقف فيه السيارة











وهذي صور اثناء التجول في القرية

















قررنا استإجار عربة يجرها حصانين للتجول في القرية



كان سائق العربة ممتاز من ناحية التعامل والشرح وحتى قام يوقف وياخذ لنا صور









الانشطة كثيرة جدا في المكان





يوجد على سبيل المثال قطار يحمل ركاب الى اعلى الجبل ويعود بهم مرة اخرى في رحلة تدوم حوالي 40 دقيقة

محطة القطار

بخليكم تصرخوا تقولوا "بس" من الصور



موقف سيارات وطبعا بفلوس...... احنا وقفنا في بيت حرمة مسوية الحوش مالها مواقف مثل كثيرين هناك وارخص من هذي المواقف



اشترينا من هنا طبعا



خارطة تبين اماكن مختلف الانشطة



عدنا ادراجنا بعد يوم مليئ بالنشاط وكان الجميع في حالة تعب



بس اذكركم بروعة الطريق

الثلاثاء 19 يوليو

آخر يوم في ابتناو وغدا نتجه الى ميونخ للمغادرة الى السلطنة

اليوم حبينا نزور بحيرة زرناها سابقا واعجبتنا وهي بحيرة هلستات



وقفنا في احدى الضفاف البعيدة عن قرية هلستات وكان المكان جدا رائع









ثم توجهنا الى قرية هلستات وتمشينا في طرقاتها





لحد ما حصلنا مكان هادئ مافيه حد جلسنا فيه (طبعا نجرع)



قرية هلستات في الجهة الاخرى



وهذا هو المكان اللي جلسنا فيه وطبعا اللي كانوا جالسين هنا تركوه نظيف





من ضمن الاشياء اللي ماخذينها معنا من عمان الحبيبة





زووووووم على هلستات



ثم عدنا نسلك هذا الطريق الجميل الى ابتناو لاننا نريد نزور زحليقة ابتناو وترتيب اغراضنا للرحيل



F.B.I هذا كرسي حالك تفضل تعويض عن المخالفة



الزحليقة زحمة زحمة زحمة تصادف قبلنا وفد من مدرسة صغار وانتظرنا تقريبا 40 دقيقة لحد ما جاء دورنا والتذكرة ب 10 يورو للمرة الواحدة



وتلك هي ابتناو الجميلة





هذا التلفريك اللي يطلعك فوق وتنزل بالزحليقة او اذا تعبت من الانتظار ممكن تنزل بالتلفريك نفسه



وهذا مسار الزحليقة







هذي هي عربة الزحليقة وهذاك الجير للامام للسرعة وللخلف للبطئ او التوقف



قدامنا طابور



تنتظر الاشارة لحد ما تصير خضراء تطفئ الكاميرا وتنطلق



خلصنا رجعنا الشقة خليت الاهل يرتبوا الاغراض وانا رحت اغسل السيارة ب 7 يورو في مغسلة اوتوماتيك بس التنظيف الداخلي بنفسك. يعني موجودة مكينة شفط تشتغل بفلوس تحط فلوس وتنظف السيارة من الداخل. فيه ايضا مغاسل يدوية كثير فكرتها ايضا انك تحط فلوس وتستخدم المغسلة بنفسك.

غدا نغادر الى ميونخ والمبيت في فندق قرب المطار لان الرحلة الى عمان عن طريق امستردام الساعة 7 الصبح يعني لازم نكون في المطار ع الاقل الساعة 4 ونص علشان إعادة السيارة.

الاربعاء 20 يوليو

السفر الى ميونخ والجو ماطر بغزارة







درجة الحرارة 12



وآخر صورة في تقريري هي لميونخ والدنيا مطر واتذكر ان المطر استمر طوال اليوم والليلة



اشتريت غداء من مطعم لبناني شهير في ميونخ وهو مطعم كسارة وكان الاكل طيب بس غالي لشخصين ب 42 يورو بس تذكر انت في ميونخ ولست في الارياف.

الفندق بحوالي 59 ريال وهو من الفنادق التي تقع في محيط المطار لسهولة دخول المطار فجرا وتسليم السيارة.



يوم الخميس توجهنا الى المطار الساعة تقريبا 4 ونص فجرا ولكن كان لابد من ملء خزان السيارة وهو احد شروط ارجاع السيارة والا دفعت مبلغ اكبر من سعر الديزل وكان حق الديزل 30 يورو. وافطار خفيف في المطار ب 10 يورو.

تم بحمد الله

أتمنى أن يكون تقريري دافعا ومرشدا ومرجعا للبعض ممن يريد الاستفادة او من يفكر في السفر الى اوروبا.

كما وعدتكم اليكم تفاصيل المصاريف

695 ريال التذاكر ل 3 كراسي وطفل (تذكرة البنت ارخص شويه عن تذكرة الكبار)

ايجار السيارة اودي ايه4 400 ريال من 2 يوليو الى 21 يوليو لمدة 19 يوم
235
ريال سكن ليرموس شقة

200 ريال سكن سالفلدين شقة

175 ريال سكن ابتناو شقة

95 ريال سكن ميونخ فندق

500 ريال مصاريف يومية غير شاملة الهدايا

المجموع 2300 ريال

مع العلم ان رحلة 2009 كانت لفترة اقصر وكلفت اكثر والسبب اني تعلمت كيف ابحث عن سكن ارخص بنفس مستوى الغالي ويمكن افضل. وهو السكن بعيدا عن مركز المدينة والشقة ارخص من الفندق. وايضا اخترت سيارة مناسبة قيمتها جيدة لان في 2009 اخترت مرسيدس وكلفت حوالي 600 ريال لمدة اقل. والشقة في مركز كابرون لمدة اسبوع كانت بحوالي 350 ريال او اكثر. وايضا هذي المرة اعتمدنا على الطبخ وما اشترينا من مطعم الا يمكن 3 مرات. الاكل من المطاعم وخصوصا العربية والهندية غالي جدا.

اخنا معنا بعض الاشياء مثلا 2 كيلو عيش وبعض علب حليب شاي لكن وجدنا انه موجود هناك والمرة الجاية ما راح اشيل شي الا الملابس وحليب الاطفال ويمكن بعض طعام الاطفال لاول يومين فقط.

بهذا اكون اوفيت بوعد قطعته على نفسي اني اعمم الفائدة على من يخطط للسفر الى اوروبا