رحلة العمر اليابان وكوريا

أوســــــاكــــــا





[الـيـوم الـتـاسـع عـــشـر (الأول فـي أوسـاكـا)]





الباص كان مريح جداً لكن ما قدرت أنام لأن مستحيل أنام بشيء يتحرك هههه والإنترنت كان لازم أسجل مسبقاً عشان استخدمه واللي جنبي نام من أول ما مشينا لين وصلنا لمحطة توقف بالنص (حول 5 ساعات) كنت أبي أروح دورة المياه لكن ما بغيت أقومه هههه

الباص فيه متحدث آلي يعلمك المعلومات عن الرحلة ومدتها ووو إلخ بالياباني والإنجليزي والصيني والكوري ويعلمون الناس آداب استخدام الباص ،، قبل ما ترجّع الكرسي على ورا استأذن من اللي وراك ومن هالكلام وإذا نزلنا يحطون لوحة وفيها شكل ساعة تعلمّنا متى يمشى الباص ولازم نرجع قبل هالموعد ،، الباص في طوكيو مشى بنفس الوقت المحدد بالثانية وبالتوقف مشى بنفس الوقت اللي حددوه وأنا وصلت قبل الوقت المحدد بدقائق بسيطة! حاسبها كلها ومركز إني ألاحظها ،، يا عالم ناس دقييييييييقة الشقيري ما كان يبالغ أبداً

قبل ما ابدأ ،، ما قعدت كثير في أوساكا رغم كبرها وكثرة أماكنها ،، طوكيو تعبتني كثير وخلت أوساكا ولا شيء عنها ههههههه فجزئية أوساكا بتكون قصيرة ..

وصلت وعلى طول على الفندق ،، مشي حقبية ظهر وشنطتين ،، يا مشيت لكم مشي بغيت أموت كان الجو حار شوي ورطوووبة ،، المهم أخيراً وصلت والفندق كان بسيط والغرفة صغيرة بس مريحة 90 ريال باليوم (الحين صار 75 ريال لأن الين نزل سعره مقابل الدولار وريالنا مرتبط بالدولار) والموقع جنب محطة القطار وكان قريب نوعا ما من دوتونبوري يعتبر الداون تاون الجنوبي على ما أعتقد أو شيء زي كذا ،، قلت خلني أروح مشي وأتمشى ،، نص ساعة ووصلت وهذا كان أول منظر :-



فيه قناة كانت تخترق الداون تاون الجنوبي وكان جميل جداً







ووصلت لزبدة المكان









زرت ستاربكس بنيويورك وشيكاغو ومدن عديدة بأمريكا وطوكيو وسيول لكن ستاربكس هذا كان أفضل وأجمل وأريح ستاربكس ارتحت نفسياً كذا ،، المكان كان جميل وروعة وأباجورات وحركتات ودور ثاني وكنب ووو إلخ ما قدرت أصور لأن ممنوع ونسيت أصور بدون ما يدرون هههههه ويسكر الساعة 2 الفجر والدور الأول 4 الفجر ..

المهم أوساكا مشهورة بأكلة اسمها "Takoyaki" ومعناها أخطبوط مشوي ههههه













هو زي الكعكة ووسطها أخطبوط صغير وطبعاً الصوص الخاص حقه والمايونيز الياباني يحلّي الطعم

صحيح إني طولت عليكم وأنا اعتذر كثير الاعتذار بس هذا اليوم الأول في أوساكا ،، بإذن الله راح أنزل اليوم الثاني بكرة وهي زيارة لقلعة أوساكا







[الـيـوم الـواحـد والـعـشـرون (الـثـالـث فــي أوسـاكـا)]





لاحظوا إني طمرت اليوم العشرين لأن قلت أبي أرتاح وأنام وأروّق في ستاربكس وأضبط الصور وأدردش مع أهلي وأخوياي عن رحلتي

المهم اليوم الواحد عشرين في اليابان والثالث في أوساكا رحت قلعة أوساكا ،، والله يا مشيت مشي ما مشيته يمكن بحياتي هههههه محمل تطبيق يحسب الخطوات اللي مشيتها وكم مسافة مشيي وكم سعرة حرارية حرقت ،، ذاك اليوم مشيت 16 كيلو ومشيت بما مجموعه 4 ساعات وحول 20 ألف خطوة وحرقت بما مجموعه 1108 سعر حرارية hap:


























دخلت القلعة من الداخل وحسبت صراحة بتكون تقليدية وتراثية وقديمة لكن طلعت كأنك داخل متحف وأشياء تقنية ومدري وشو ،، ليتني ما دخلت خسارة الـ 30 ريال هههههه أحسن شيء طلعت فوق وشفت منظر للمدينة









يا زين حمامهم

عاد جنب القلعة فيه حديقة صغيرة وفيه حمام كثير ،، ارفع يدك بس ويجونك طيران يحسبون فيه أكل هههههه وهذا فــديــو

وهذي آخر ليلة في أوساكا بس راح أرجع لها في آخر يومين لي في اليابان لأني بروح لكوريا من مطار أوساكا ،، الجزئية القادمة بتكون عن ناقويا







الـيـوم الـثـانـي والـعـشـرون




[الأول فــي نـاقـويـا]





رحلتي من أوساكا لناقويا كانت بالباص ،، من المكان اللي كنت ساكن فيه لين محطة الباص كان مشوار ويبي له وقت ،، وحسبت محطة الباص جنب محطة القطار لكن طلعت أبعد ويوم وصلت محطة القطار بقى 10 دقائق واسأل عن البرج الفلاني لأن فيه محطة الباص إلاّ يأشر لي هناك الجهة المقابلة للشارع وما شفت جسر وكان بعيد يعني 10 دقائق ما تكفي ،، وأروح للشارع وأنا محبط قلت بس راحت عليّ الباص ،، أشوف واحد ياباني يناظرني وشكله كأنه يبي يساعدني قمت ناظرته وأشرت على البرج ،، إلاّ ويمشي وياخذني لمكان ويأشر بيده إني ادخل من هنا ،، إلاّ طلع نفق تحت الأرض يوصلني للبرج مباشرة ،، وأشكره ومن الحماس ركضت يا تعبت تعب مو طبيعي معي شنطة ظهر وحقيبتين أشيّلهم وراي هههههه والحمدلله وصلت 3 دقائق قبل المغادرة واسألهم وأقول ناقويا؟ إلاّ يعلموني وين الباص والحمدلله لحقت عليه وأنا كنت آخر واحد! hap:

المغامرات ما انتهت هنا ههههه الكلام هذا يوم الجمعة وكانت فيه فعالية كبيرة يوم الإثنين (رحت لها وراح أتكلم عنها بتقرير موحدة) والفنادق كانت مليانة وما لقيت إلاّ فنادق غالية جداً ،، فمن موقع آخر حجزت غرفة بعمارة صغيرة ليابانيين اليوم الواحد حول 120 ريال ،، يوم وصلت ناقويا خذيت تاكسي عطيته العنوان ووداني هناك ،، يوم رحت إلاّ صور المكان تختلف عن الصور اللي بالموقع ،، ما رضى التاكسي يروح إلاّ لما يتأكد من إنه المكان الصحيح! نزل من السيارة وقاعد يبحث ،، أنا قلت انزل وأدور بنفسي ،، عاد خليته يروح وهو كان يرد بالياباني ما أدري وش يقول بس كأنه يقول متأكد؟ أو يسألني هل تعرف وينه هالمكان؟ وأنا أقول له شكراً وأعطيه الفلوس ،، ماهوب راضي يروح ههههههه

قعدت أدور وما لقيت وأروح لهاتف عمومي لأن هو قال دق عليّ أو على خويته إذا ما لقيت المكان لأن قال لي الباب بيكون مفتوح لكن ما أحد يرد ،، وأروح لنفس العنوان المكتوب إلاّ أشوف عمّال يبنون بنفس المبنى واسألهم ويقولون هذا هو العنوان! استغربت وأقوم أروح لبقالة من بقالاتهم فيها نت وأشيّك على الحجز وألاقي عنوان ثاني!!! وقلت مالها إلاّ أروح له وبنفس الوقت كنت بتعشى مع بعض الأصقاء ووحدة منهم درت إني ضعت وتقول وينك تبي تجيني ،، عاد عطيتها العنوان اللي بروح له وآأخذت تاكسي وأروح للموقع الثاني ونفس الكلام المكان مختلف عن الواقع ههههههه ونفس الكلام التاكسي ما رضى يروح إلاّ لما يتأكد إني ألاقي المكان ،، المهم خليته يروح إلاّ وأشوف الزميلة وهنا ارتحت قلت هي بتعرف المكان ،، قعدنا نص ساعة نمشي وما لقينا شيء ههههههههه



المهم إن محطة القطار الرئيسية قريبة وقلنا خلنا نروح لأن حتى الزميلة الثانية تنتظر ،، عاد رحنا المطعم ودقيت على صاحب الشقة من واحد من جوالاتهم ويرد وجه العنز وأقول له السالفة (يتكلم إنجليزي) ويقول وينك الحين بجيك ،، عاد قلت له بتعشى وبالساعة الفلانية أشوفك عند المكان الفلاني ،، تعشينا وريحت شوي





ميسو كاتسو دجاج ،، لذيييييييييييييييذ

وجاء خويّنا وخذاني للشقة بسلااااااااااااام ،، والله يا تعبت تعب مو طبيعي

قبل ما ادخل الغرفة ،، لقيت هالورقة



وانتهى أول يوم في ناقووووووووويا

وقريباً اليوم الثاني والثالث

[الـثـانـي فــي نـاقـويـا]





اليوم الثاني قضيته مع بعض الأصدقاء تعشيت وتغديت معهم وما تمشيت كثير في المدينة بس رحت الداون تاون ورحت لـ الـ Maid café للي يعرفونه وأخذ صور بـ الـ Purikura إذا تعرفونها أيضاً



هذا برج التلفزيون حق المدينة















وهذا كان العشاء



هذا إيدامامي ،، نوع من أنواع فول الصويا



جوانح دجاج يابانية



روبيان ،، نسيت اسم الأكلة ههههه



سلطة يابانية



آيسكريم مع نكهة الشاي الأخضر

كان يوم بسيط وقريباً اليوم الثالث والرابع في ناقويا إن شاء الله



[الـثـالـث فــي نـاقـويـا]





صديق لي من 4 سنين قرر يجيني لناقويا وهو يبعد حول ساعتين منها ،، تغدينا ثم رحنا معبد شنتو اسمه Atsuta







على كلامي خويي الشجرة عمرها أكثر من 1000 سنة يعني على أيام الدولة العباسية ههههههههه



صورة أخرى لها









وبعدها أخذني لمجمع فيه معرض لسيارات تويوتا الجديدة ،، تويوتا هي مدينة في اليابان في ولاية أيتشي ومدينة ناقويا هي عاصمة أيتشي

صور الأصحاب اللي قابلتهم



آي شيكانو



أراتا



ساكي & إيريكو



هذا ... ما أعرفه ،، بس كان يبيني أصوره هههههههههه



تشيكا



هذي الساعة موجودة في المحطة الرئيسية للمدينة ،، أشهر مكان للقاء ،، كل ما العالم يبون يتقابلون يقولون خلنا نتقابل عند هالساعة!

انتظروا التقرير القادم والأخير في مدينة ناقويا وهو عن فعالية واحتفال يوم البحر ،، من أكثر الأيام اللي استمتعت فيه في اليابان!

[الـرابـع فــي نـاقـويـا]

- 海の日 -





يوم انتظرته كثير وهو إني أحضر فعالية يابانية ،، يُعرف بيوم البحر أو يوم المحيط وهي عطلة يابانية وطنية والغرض منها تقديم الشكر لهبة وعطاء المحيط لهم والتفكر بأهمية المحيط لليابان كـ شعب في جزيرة ..



وطبعاً ما رحت لحالي ورحت مع صديقة هي اللي قالت لي عنها وقالت إنها بتلبس الزي الياباني التقليدي واسمه كيمونو "kimono" ،، وصلنا وكان زحححححمة والناس على مد البصر! والمكان مليء بالأكلات اليابانية لمثل هالمناسبات وبدأ الاحتفال بالألعاب النارية





















والأكــــل



























الناس تضحك وتلعب وتاكل وجالسة على الأرصفة وبعد ما انتهت الألعاب النارية جت عروض ثقافية جميلة ..















مشينا مشي عشان نوصل لمحطة مفتوحة بعد ما انتهت الفعالية! عاد أخيراً وصلنا وكان زحمة مو طبيعية نفس اللي بالفديو ويمكن أكثر بعد (هنا) ،، والله إني علقت ما أقدر اتحرك لا يمين ولا يسار ولا حتى افر بمكاني ههههههه شنطتي علقت بين اثنين! عاد صورت نفسي فديو وقعدت أتكلم بالفديو والعالم تناظر ومستغربة!







فيه محطة رئيسية على بعد 20 دقيقة الكل كان بيروح لها ومن هالمحطة يروحون للمحطة اللي يبونها ،، عاد بالطريق كان فيه محطات شبه فاضية ما فيها إلا شوي ،، عاد كان فيه شكله غربي مدري أوروبي أو أمريكي ،، عاد شاف الزحمة وانهبل المسكين هههههه وأقوم أنا اصرخ وأقول له تعال اركب واختبر الثقافة اليابانية ،، قلتها بالإنجليزي عاد اتوقع كثير من اليابانيين يفهمون عبارة "Japanese culture" وضحكوا عليها وهو ما سمعني شكله ههههه عاد ،، فجأة إلاّ واسمع ولد وبنت يقولون لي "I love you" أقول للي معي يكلموني ذولي أو وشو؟ والولد مرة قالها وأناظر فيه وهو قاعد يتبسم لي هههه وأقوم أقول له وأنا أحبك بعد ويضحكون بشكل هستيري وشوي والبنت كانت تتكلم ياباني وفجأة قالت كلمة إنجليزية وهي foreign people يعني أجنبي ،، وأقوم أناظر فيها وأقول بالياباني "أنا ياباني" وعيونها صارت تحولت ههههههههه قلت لها مزحة "Joudan" وأنا من السعودية ،، قامت قالت "oil king" يعني ملك بترول ههههههه ويوم وصلنا المحطة طلعوا من القطار وطلعت أنا وفجأة البنت ومعها أصحابها حول 5 ،، كانوا يناظروني وقلت لهم بااااي ويقومون ينحنون لي كلهم ويقولون بااي!!

صراحة أنا مستغرب ،، والله يا إنهم عسل وذوق بشكل مو طبيعي مع الأجانب!



عاد نسيت شاحني بالشقة وراسلت عشان ارجع آخذها وقالوا بتلاقيه بالطاولة بالمطبخ ورجعت ولقيت الشاحن ومعاه قطعة بسكوتة



انتهت جزئية ناقويا والأجزاء القادمة بتكون عن كيوتو أجمل وأكثر مدينة ثقافية صورت في كيوتو أجمل صور

[الأول فــي كـيـوتـو]





هذا أول منظر أشوفه أول ما وصلت كيوتو ،، كنت تعبان بشكل غريب ومخي مقفل ،، عاد ما أمداني أروح للمحطة عشان أروح للفندق إلى جت بنت يابانية صغيرة مع صديقتها وتقول لي ممكن أصوّر معك؟؟؟ (بالإنجليزي) عاد أنا والله ما كان لي نفس أسوي شيء أبي أروح الفندق وأنام! أقول لها صورة معي؟ وتضحك وتقول إيه أنت ممكن؟ أمسك وهي وخشمي وأقول بنفسي شكلي طبيعي أنا أو كيف؟ وقلت أوكي وتموت من الفرح!!! وتصور وتروح ،، الظاهر إني كنت مكشر بالصورة خخخخخ المهم وصلت المحطة المطلوبة وما عندي وضعت ،، شفت لي اثنين وسألتهم عن اسم الفندق وبحثوا وودوني له ،، الفندق نجمة وحدة فقط لكن كان بطل والله بموقع بوكينغ التقييم 8.4 ،، فنادق في نيويورك وسيول ودبي 5 أو 4 نجوم ولا حصلوا هالتقييم ،، لكن ملاحظ إن تقييمات الفنادق في اليابان عالية جداً سواء كانت نجمة أو 2 ،، مو مثل دبي وكوريا وأمريكا لأني بحثت كثير بالفنادق وما فيه أعلى من تقييمات الفنادق باليابان





هذا هو الفندق ،، غرفة وحدة صغيرة والحمامات والشاور مشتركة ونظيفة وفندق نظيف جداً وارتحت فيه ،، اليوم الواحد كان بـ 150 ريال ،، وكان قريب من محطة القطار اللي قريبة نوعا ما من محطة كيوتو الكبيرة اللي بنص المدينة!

راح أعرض صور للمحطة وصور منوعة







------


















[الـثـانـي فــي كـيـوتـو]

Kiyomizudera & 清水寺





هذا معبد بوذي قريب من الجبل اسمه Kiyomizudera ومعناه معبد الماء النقي ،، كان رائع والدخول كما اذكر حول 20 ريال فقط ،، المعبد كما تأسيسه عام 798 ميلادي والمباني اللي حوله تم بنيها ولم يتم استخدام أي مسمار في بنائهم! والاسم جاي من الشلال الصغير اللي يصب فيها ..

































مكان كان جميل وراااائع جداً ويستاهل التعب والمشي بالمرتفعات ،، عاد أنا شفت مدخل وقلت خلني أسوي مغامرة ،، ومشيت حول نصف ساعة طالع للجبل قلت يمكن فيه معبد سرّي أو شيء زي كذا خخخخخ لكن بعد كل هالتعب والمشي وقف الطريق وطلع ما فيه شيء هههههه

اعذروني على التأخير





[الـثـالـث فــي كـيـوتـو]

二条城 - Nijo Castle





هذه قلعة اسمها نيجو وذاك الجو كان مشمش وساعد على جمالية الصور



























كان حر شوي هههههه







[الـثـالـث فــي كـيـوتـو]

金閣寺 - Kinkakuji





هذا معبد بوذي اسمه السرادق الذهبي ،، الأول والثاني بالخارج مغطى بأوراق الذهب ويعتبر من أجمل المعابد في اليابان ،، تم تأسيسه عام 1397























كان صغير لكن المبنى والحديقة كانت جميلة جداً وكان زحمة!

[الـثـالـث فــي كـيـوتـو]





هذا كان عشاي بعد المشاوير والتعب ،، نسيت اسم الوجبة بس كانت أكل بحري منوّع














[الــرابــع فــي كـيـوتـو]





كنت بروح لأحد المعابد وفجأة شفت مسيرة في الشارع وللحين ما أدري وش هي بالضبط لكن خذيت صور ،، كانت مسيرة ثقافية والظاهر عرض للثقافة اليابانية في كيوتو ،، كلهم كانوا لابسين لبس تراثي ساموري وقايشا وصغار وكبار وكل شيء!























































伏見稲荷大社 - Fushimi Inari Taisha





هذا معبد شينتو اسمه فوشيمي إناري تايشا بجانب جبل يحمل اسم إناري في جنوب كيوتو وفيه معابد صغيرة فيه على مدى 4 كيلو وأقل شيء ،، المكان رائع جداً وسهل جداً الوصول له قدام محطة القطار والدخول مجاني!

حان وقت الأكل



هالوجبة اسمها سباقيتي شوربة كريم هوكايدو بحري! سباقيتي بس بستايل ياباني ،، فيه كثير وجبات غربية لكن بطريقة يابانية زي بيتزا ومكرونة وبرقر ووو إلخ!

هذي تعتبر من ألذ الوجبات اللي أكلتها صراحة في اليابان



كاري دجاج وميسو سوب وأودون وسلطة ذرة





الوجبتين اسمها بينتو ولها أنواع ،، وجبة تعطيك أنواع عديدة من الوجبات سواء دجاج وروبيان وسمك ورز وشوربة وتوفو وخضراوات وحلى!













الأكل في اليابان عالم آخر في عالم السياحة

رحتى الى كوريا









الـسـلام عـلـيـكـم ورحـمـة الـلـه وبـركـاتـه





هذه الرحلة هي لتكملة رحلة سياحية طويلة قضيتها في اليابان ثم كوريا الجنوبية واللي راح اتكلم عنها في هذا التقرير واللي ما شاف تقريري عن اليابان تراه موجود في توقيعي





ميزة كوريا مو لازم تأشيرة للسعوديين ،، رح المطار وورهم جوازك وبس ،، حتى أثناء تسجيل الدخول فيه شاشة تعلمت وش لازم تسوي وبالعربي!!!! استانست أنا يوم شفتها وقمت ناظرت الموظفة وابتسمت وهي مكشرة وتناظر نظرة "والله من القراوة" خخخخخ المهم أنا قررت أروح لمدينتين وهي العاصمة سيول بحكم إن أغلب اللي أعرفهم هناك وهي الكل بالكل في كوريا ونص سكان كوريا البالغ 50 مليون يسكن في سيول الكبرى! والمدينة الثانية هي بوسان الميناء الأكبر في الدولة وفيها بعض الأصحاب اللي يستاهلون الزيارة

رحت في أواخر شهر 7 حتى منتصف 8 يعني الجو كان رطوبة أعوذ بالله وشوية حار بس كان 30 بس لكن الرطوبة تخليه اسوأ مما هو سيء ،، صراحة ما استمتعت بالرحلة لأني كنت تعبان من رحلة اليابان والجو ما كان يساعد أبداً وأنا تشبعت مرة من السياحة عشان كذا الأسبوع الجاي رايح لكوريا لكن بنفسية فريش ومنفتحة وراح أدمج رحلتي السنة الماضية برحلتي هالسنة ،، وترى الانستقرام والسنابات بتدهر بخصوص سفرتي لكوريا وسفرتي لليابان أيضاً وقبلها دبي ونيويورك هههه ،، تلاقون اسم العضوية بالتوقيع

قبل كل شيء ،، الموضوع يمكن راح يكون طويل وأتمنى منكم تصبرون ،، وشيء ثاني هو إني راح أضع صور لأصدقائي ذكوراً وإناثاً وصور للأكل وأتمنى إني ما أشوف أي ردود ما تعجبني ههههه اللي عنده كلام واستفسار خارج عن نطاق الرحلة رجاءً تقييم أو على الخاص

هذا هو قيونغ بوك قونغ تم بناؤه قبل أكثر من 700 سنة ،، كان القصر الملكي الرئيسي لسلالة الـ جوسون طيب الله ثراهم شكله جميل جداً في الليل!

عاد كان مسكر الظاهر القصر وما قدرت أدخله بالليل وما رحت له لكن بروح له في سفرتي القريبة

قدام القصر كان فيه مساحة كبيرة وفيها معالم جميلة



عواميد نسيت وش سالفتها خخخخ



هذا هو الملك العظيم سيجونغ اللي انشأ الحروف الكورية ذات المقاطع الصوتية المستخدمة حالياً ،، تعلمتها أنا في أسبوعين وتعلمها فعلاً سهل ومميزة جداً وفرييييدة من نوعها!



معلم آخر



أسميه برج الحلزونة هههه

عاد فيه جدول (نهر صغير) يخترق المدينة وزيّونه بطريقة جميلة!











كلٍ جاي مع زوجته أو حبيبته خخخخ





وفي اليوم الثاني مشيت بمنطقة اسمها إنسادونغ ،، يقال بأنها تراثية وقديمة



ستاربكس كوري





على ما أعتقد فن معماري بوذي



الصورة مو مايلة ،، السوق هو مايل ههههه بدال ما تطلع وتنزل بالدرج ،، امش والسوق يطلع فيك لفوق! حركة جميلة صراحة!





يقول لها يا سيدي وتقول له يا لبق (جنتل) خخخخخ



عزفه للكمان رائع جداً ،، خذيت له فديو بنزله قريباً!

الأكل والأصحاب

كيمتشي حبيب الشعب



ثوم وصلصة حارة للباربكيو الكوري



لحم بقر بولقوقي ،، بولقوقي صوص مالح وحلو بنفس الوقت ،، روعة طعمه!



اشوي



ما عندهم خبز ،، بالخس صحي أكثر



أفضل وجبات الشارع ،، دوكبوكي



أعتقد أشهر الحلوى الكورية ،، 팥빙수

معناه فول أحمر حلو مع ثلج ،، مكون من ثلج مبشر وخذ لك
من جميع أنواع النكهات والأشكال! هذا نسيت وشو خخخخ



أول شخص أقابله في كوريا ،، حلفت إلاّ تجي المطار وتشتري لي تذكرة الحافلة وتوديني للفندق! المطار عن بيتها حول ساعة ونص والمطار عن الفندق ساعة وربع ،، ما قصرت سيريونغ هانم



على اليمين سوهوان واليسار كانغ هو



خويته ما أعرفها ،، عزمتها عشان تشوف واحد مختلف عنهم خخخخخ



سيريونغ و ون كيونغ ،، كل الصور لأصحاب تعرفت عليهم فترة معهد اللغة ،، مشتاق لفترة المعهد ،، الحين كرف وشغل الله يعين

انتهى تقرير أول يومين وانتظروا المزيد

فيه يوم مشيت فيه حول 18 كيلو ولفيت فيها مناطق وأنا ما أدري وش اسمها فاعذروني على عدم ذكر أسماء الأماكن إذا ما ذكرتها





أتوقع إنها إنسادونغ أو قريبة منها



الكنيسة الكاثوليكية في ميونغ دونغ













=======





هذي ناطحات سحاب لشركات كورية



















هذي مناظر لنهر الهان وما حواليها

حان وقت الطعام



المقبلات الكورية اللي لازم تكون موجودة قبل كل شيء وتقدم بدون ما أحد يطلب





بيبيمباب عبارة عن رز وخضروات وبعض الأحيان لحم بقر ،، هذا كان محل شغل سريع سريع مو عالي الجودة وألا بيكون ألذ!



الأكلة تعتمد على إنك تخلط كل شيء مع بعض وتزيد عليها صلصة حارة ،، عجيبة





نودلز لحم بقر ،، توقعت كل النولدز عندهم سباسي لكن هذا كان مالح فقط



منتو كوري ،، مين ما يعرف المنتو؟



بعض الأصحاب اللي قابلتهم ،، من اليمين لليسار

جايون ،، أليشا (عمريكية) ،، سونهيوك ،، جيهيونغ ،، جايسون



هذا مصرقع اسمه جونسيك ،، أيام المعهد كان يموت بالسعوديين ويماشيهم! تعلم كلمات تخليك تموت من الضحك ،، مثلاً يشوف سعودي يدخن يروح يقول له لا تدخن اتق الله حتى لو ما يعرفه هههههههههههه أو إذا سعودي دخل الكلاس يقول يالله حيه ههههه كان مشهور ومحبوب بين السعوديين



هذا خوي المصرقع ،، مصرقع مثله لكن ما يعرف إنجليزي أبد وقال لجونسيك أبي أجيك معك وأشوف عربي بالحقيقة خخخخخخ وحنا ناكل شاف الشعر اللي بيدي ويقوم يمسك وعيونه كذا مستغرب كيف انسان له شعر بيده ههههههه عاد ماش أحسه خرب الجلسة شوي كل ما يتكلمون معي يسأل يقول وش قلتوا ووش قال ومدري وشو ،، قلت لجونسيك المرة الثانية أشوفك لا تجيبه ههههههههه

المنظر هذا من الفندق اللي قعدت فيه أول 5 أيام واسمه Golden Seoul Hotel ،، عجبني كثير ومريح والموظفين محترمين بس كان بعيد نوعا عن أغلب المناطق السياحة واللي كنت أبيها لكن فيه محطة مترو قريبة وتودي كل مكان ،، بس كان المشوار أطول وبعض الأحيان لازم أغير القطار!



Dongdaemun Design Plaza

مبنى بشكل غريب صُمم من قبل شركة صاحبتها زُها حديد بريطانية ذو أصول عراقية ،، المكان كان فريد من نوعه وغريب!











------



كيمشتي حبيب الشعب



شوربة خضار



دجاج مقلي على الطريقة الكورية



Patbingsu



بطعم الأوريو



فيه نكهات عدييييييدة

------

هذا تقرير على السريع ،، وراح اتبعه بتقرير آخر اللية بإذن الله ولا اذكركم بالسناب تشات فيه صور ومقاطع أكثر هههههه

بـــوســان



بوسان هي أكبر ميناء ومرفأ في كوريا الجنوبية وتتواجد جنوب شرق كوريا ،، أكبر ثاني مدينة في كوريا بعد العاصمة طبعاً ..

اللي بالصورة هذا جسر الجوهرة أو بالكوري Gwangan كوانغ آن ومعناه السلام الكبير أو شيء زي كذا ،، قعدت فيها 4 ليالي واستمتعت فيها كثيراً والله! وأخوياي اللي فيها ما قصروا ،، واحد منهم قابلني في محطة الوصول وكل يوم يمرني وياخذني ويمشيني ،، اللي قعدت معهم عائلة عندهم غرفة فاضية ويأجرونها باليوم حول 200 ريال شامل الفطور ،، الأم طيبة بشكل مو طبيعي ،، كل ما دخلت وطلعت من البيت تنادي بينتها الصغيرة تنحني لي وتمشي ،، أقول لأمها مو لازم تقول إلاّ لازم أنت ضيف ولازم نحترمك بغيت أقول ليش مو أنتِ تنحنين لي خخخخخ طبعاً لأنها أكبر مني ،، عندها بنت ثانية أكبر بالثانوية وتقول أمها إنها مستحية تشوف اللي يجون يستأجرون خصوصاً لو كانوا شباب ،، مرة يوم السبت بالليل دخلت غرفتي وشوي وطلعت عشان أكلم الأم إلاّ البنت الكبيرة بالصالة ،، بغت تتغطى ورا الستارة بس ما أمداها وأكلمها وأقول وش اسمك وأي مرحلة دراسية وبالأخير قلت ليس مستحية؟ وتقوم تغطي نفسها بالستارة ،، أموت على الخجل أنا خخخخخ









الخوي وداني لأعلى قمة جبل في بوسان ،، المنظر كان رائع جداً لكن كان مغيم وأمطار













ورجعنا للبحر

أحلى ما في الرحلة هالحلوين

كانغ مون - هون كيونغ - أنا - جو هيونغ
دونغ هيون - هيون دونغ















=====

هذا طبخ الأم :-















وهذا مع الأصحاب :-

해동용궁사 - Haedong Yonggungsa Temple



هذذا معبد بوذي ومزيته إنه بُني على الساحل لأن أغلب المعابد في كوريا بنيت في الجبال ،، وتم بناؤه عام 1376 ميلادي ،، وزيارته ببلاااااش!



































كان راااااااااااااائع

رجعنا سيول وقضيت كل بقية أيامي فيها ،، صراحة كنت تعبان مرة وطفشت من السفريات والتمشيات



صورة عامة على نهر الهان ،، فيه مناطق كثيرة حقة تمشيات في نهر الهان وجسور كثيرة بأشكال مختلفة ،، هذي وحدة منها



صورة عامة



هذا جسر من الجسور الجميلة ،، اسمه Tteokseom









نسيت وين صورت هالصورة خخخخخ

اللي استقبلتني بالمطار قالت لأهلها بتقابل صديق من السعودية عاد قالوا لها لازم نستقبله ونقوم بالواجب وعزموني على أكل كوري عجيب! كان غدا مليان أكل وحركات















كان فيه أكل أكثر لكن من الحيا استحيت أصور الأكل اللي مو قدامي خخخخ

هذا أكبر مسجد في كوريا (على ما أعتقد)









هذا كوري كان مسيحي وأسلم

صور بعض الأصدقاء



جو هيونغ - جاي يون - سون هيوك - الأخير نسيت اسمه الكوري بس اسمه الإنجليزي جايوسن خخخ الأمريكية أليسا





غريب ذا الانسان ،، يموت بالكوريين لكن يكرهم خخخخخ قابلته بأمريكا وراح كوريا يدرّس إنجليزي











قالوا يبون مطعم عربي وقلت نجرب مطعم مصري وطلع يفشّل وغالي بشكل عجيب! اشتكيت لصاحب المطعم المصري وقام جاب لنا كشري مجاني خخخخ

بهالتقرير راح اتكلم واعرض عن أفضل مكان رحت له في كوريا ،، كان يستاهل التعب اللي تعبته والله



المكان هو جبل أتشاسان ،، من محطة أتشاسان لين هالنقطة اللي بالصورة تعبت عاد من هالنقطة لين القمة أكثر من كيلو صعوداً

قعدت أمشي يمكن ساعتين لين وصلت لأحلى مكان ،، مكان يخليني أطل على منظر خيالي لأغلب مدينة سيول ونهر الهان ،، كان الوقت حول 6 ،، قلت ما راح ارجع إلاّ لين الدنيا تصير ظلام وأشف هالمنظر بالليل ،، وما أجمله من منظر











هالمنظر خلاني انتظر ساعتين عشان أشوفه بالليل



جسر الأولمبياد

















وغابت الشمس






مستعدين للمنظر؟







والله إن بالطبيعة أجمل بكثير ،، كأني بالفضاء وكان كل شيء ظاهر والأنوار كانت جميلة جداً







عاد قلت لازم أصور صورة شخصية لي وهالمنظر يكون خلفية ،، والله قعدت يمكن نص ساعة أضبط بالكاميرا وأحط بالمؤقت وأركض عشان الصورة ،، في أحد الصور الكاميرا صورتني وأنا بغيت اخبط على وجهي خخخخخ



عاد فيه واحد عرف إني بهالجبل وهو ساكن قريب جداً له فقال خلنا نتقابل
وإلاّ قعدت طول الليل هناك ،، عاد شلت هم الرجوع كان ظلام وما كنت
أدل صراحة خخخخخ لكن الحمدلله كان فيه أنوار وسهّل عليّ الرجوع!

عاد قابلته وقال أهلي يبي يشوفونك ما عمرهم شافوا واحد من السعودية ههههه
عاد أنا حالتي حالة وتعبان والجبل كان مليان تراب ،، مالها داعي يشوفون
أول سعودي بهالحالة ،، اعتذرت له خخخخخ



Dongdaemun Design Plaza





هالمكان بالليل أجمل بكثير من النهار وأجمل ما فيه الورود الكهربائية بالليل

















جميل جمال مالوش مثال