لقطات من ذكرياتي لرحلة شهر العسل في ماليزيا قبل أعوام عديدة (ممنوع للمتزوجين حديثا)

.. والصلاة والسلام على رسول الله وبعد :

العود من أول ركزة وشهر العسل هو بداية تعليم الزوجة التي لم يسبق لها السفر ألف باء السياحة .. الخبرة السياحية لابد أن تنتقل من الزوج إلى الزوجة ثم إلى جيل الأبناء .. وهذه لقطات من مواقف في رحلتي لماليزيا في أول أيام زواجي عندما كانت ماليزيا وجهة غير معروفة للكثيرين .. نبدأ الحلقة الأولى على بركة الله :

اللقطة الأولى

بعد ما تزوجت أم سلطان بحوالي ثلاثة أيام قلت لها إيش رأيك في ماليزيا؟ .. مسكينة توها عروس وما تقدر تطالع في عيني من الخجل وما كان عندي نية أسافر شهر العسل كنت ناوي أرجع العمل بعد الزواج بإسبوع وماني مقتنع بها الشغلات شهر عسل وما شعر عسل! .. أضف إلى ذلك إن الواحد بعد ما يتزوج ما يبقى معاه أصلا فلوس لمطعم فما بالك برحلة عسل لكن الله أراد ويمكن لأني محبوب ويتيم (ابوي كان متوفي قبل زواجي بحوالي 8 سنين) أقرباي غمروني بالهدايا لين تجمع عندي مبلغ يخليني أسوي شهرين عسل مو شهر واحد ..الشاهد من الكلام إن أم سلطان هزت راسها موافقة .. اصلا هي ما ركبت طيارات في عمرها إلا مرتين أو ثلاثة ورحلات داخلية بعد .. قمت ثاني يوم من أيام الزواج ورحت لمكتب الصرح (الفرع القديم) على طريق الملك فهد بالرياض وقابلت واحد أظن كان إسمه محمود (الله يذكره بالخير إن كان حي ويرحمه إن كان ميت) وطلبت منه يسوي لي برنامج لماليزيا لمدة 14 ليلة .. وهذيك الأيام عام 1998م ما كانت الرجل على ماليزيا مثل ما هو صاير الحين وكانت الأسعار بتراب الفلوس والحجوزات على قفى من يشيل .. اذكر فندق الجولدن ساندس ببينانج على شاطيء البحر مباشرة أخذناه بسعر 240 ريال مع الإفطار .. وفندق أوانا في جنتنج بسعر 190 ريال لجناح مع حمام جاكوزي و4 تذاكر ذهابا وأياب لركوب التلفريك مع التوصيل لمحطة التلفريك مجانا! .. ولأن الفترة التي سافرت فيها كانت بداية عودة الطلاب للمدارس لذلك حصلت حجز بعد إسبوع من زاوجي الرياض جدة .. جدة كوالالمبور .. كوالالمبور بينانغ .. والخطوط السعودية ذيك الأيام ما كان لها رحلات لكوالالمبور مباشرة من الرياض وإنما عن طريق جدة ..

واتى اليوم الموعود .. أصعب يوم مر على أم سلطان في حياتها .. طلعنا المطار ومن الرياض ركبنا الطيارة إلى جدة .. ونزلنا جدة و(انلطعنا) في المطار كم ساعة لين موعد إقلاع الطيارة لكوالامبور .. وصلنا كوالالمبور بعد رحلة طويلة وعلى طول من الصالة الدولية إلى الصالة الداخلية علشان نركب الطيارة اللي رايحة إلى (بينانج) .. يا مشيت أم سلطان مشي ما قد مشته في حياتها كلها .. المسكينة أول ما نزلنا من الطيارة انقطع نفسها لين وصلنا إلى الصالة الداخلية في كوالالمبور علشان نركب طيارة بينانج .. وصلنا بينانج وأخذنا التاكسي لفندق جولدن ساندس اللي تقريبا في آخر الساحل من بينانج .. مشينا بالتكسي حوالي ساعة ونص لين وصلناه .. تقول ارتحنا؟ .. أم سلطان أول ما حطت راسها مهدود حيلها من المشوار وأقوم الفجر وأصحيها تصلي .. صلت وتوها ودها تحط راسها على المخدة تنام شوي لين الصبح وأقوم أقولها : بتنامين الحين قبل الفطور؟ .. ترى أحلى ما في الفندق الفطور .. قومي نفطر! .. ياعيني عليها ما تقدر تقول لي لأ .. وننزل والدنيا ظلام وموظفة الاستقبال تطالع فينا مستغربة .. قلت لها : وين مكان الفطور؟ .. قالت لي : لسه بقي على موعد الفطور ساعة لين ما يجهز .. وأقوم أسحب أم سلطان من يدها علشان نتمشى على البحر .. وهذه أظنها أول صورة لنا في ها الرحلة .. تلاحظون لسه الشمس ما بعد طلعت :

(معليش الصورة ما هي واضحة لأنها قديمة وصورتها بالكاميرة لأن السكانر خربان وطالع بالصورة لمبة الغرفة لكن لو دققتوا بتشوفوا خلفي شجر ولسه النور ما طلع )

المهم بعد ما لفينا الشاطيء الخالي تقول مجانين رجعنا وكنا أول ناس في جزيرة بينانغ تفطر! .. ما كان فيه أحد في المطعم إلا حنا .. بعد ما خلصنا الفطور وطلع النور رحت للاستقبال أشوف وش البرامج السياحية ولقيت برنامج لزيارة جزيرة لانكاوي في الصباح والعودة في آخر النهار وعلى طول حجزت! .. وفي نفس الوقت كان فيه برنامج لزيارة مركز ثقافي ماليزي وحديقة الفراشات حجزت برنامج الفراشات لليوم اللي حنا فيه وفي اليوم التالي الرحلة لجزيرة لانكاوي ..

وثاني يوم الصبح قبل شقة النهار وحنا ننتظر الباص اللي راح يودينا للميناء .. ركبناه ووصلنا الميناء ولسه الشمس ما طلعت وركبنا ما يسمي (الفري) أو البوت السريع .. مسكينة أم سلطان مرت عليها أيام في شهر العسل ما مرت على أحد .. كنت من مدة ما سافرت وتقول كني ملحوق .. من الفجر إلى آخر النهار ما غير هجولة ومسحب زوجتي وراي وهي مسكينة ما تقول ثلث الثلاثة كام .. أي شهر عسل؟ .. عقوبة مو شهر عسل! .. يوم رجعنا الرياض قعدت شهر ما تطلع من البيت .. اللي مشته في ماليزيا يكفيها سنة قدام! .. وهذه صورة من جزيرة لانكاوي أول ما وصلنا الميناء :

وسلامتكم .. فيه صور كثيرة أغلبها أنا مرتز فيها لذلك وجب التنويه .. وإلى حلقة أخرى لما أكون رايق وفاضي! .. سلام