بيانات اضافيه [ + ]

رقم العضوية : 1095  تاريخ التسجيل :  Oct 2017  العمر : 49  أخر زيارة : 11-22-2018 (07:57 AM)  المشاركات : 12,670 [ + ]  التقييم :  1432

لوني المفضل : Cadetblue

السلام عليكم ...
دبي .. حديقة الخليج ومتنفسه ..بل هي من متنزهات العالم الان ..يضرب بها المثل في مجالات شتى .. حتى في بعض البرامج الاجنبية او الافلام( امريكي او اوربي او هندي ) يرد ذكرها ..والذكر عادة لايكون الا للأعلام ..الذكر لايكون الا لمن تميز وتفرد...
وصلت دبي وانا اعتقد اني خبيربعض الشيء فيها ...جيتها كم مره عن طريق مطار الشارقة ومطار دبي ( اللي صار لنا حفله فيه غطينا على طاش ماطاش فيه ونص المطار عرفنا اعتقد ) وكانت الفترة بين الزيارات متقاربة .. المهم ماعلينا ... في طريق الدخول كنت اتذكر ابو خالد ( مديرنا فيصل) وهو يقول ماعليك ادعس حتى لو صورت الكاميرات وماقصرت عاد انا شوي اذكره واسرع وشوي اذكر الله واهدي صار عندي انفصام ..وصلنا دبي ودخلت اول محطة عشان اخذ بطاقة سالك وكانوا الشباب في موضوع الاسئلة يقولون عادي ركبها وتشتغل معك لان قريت في موقع سالك انها تحتاج الى عشرة ايام للتفعيل وانا سفري كله اسبوع الا كم ساعه بعد ...كانت المحطه زحمه كنه حادث عندنا من كثر الناس وادخل بقالتهم واسئل عن سالك قالوا عب النموذج ( تسجل فيه بياناتك وبيانات المركبه يعني خذ الاستماره معك ) وتعطيهم النموذج وتحط معه مائة درهم والاستمارة عشان ياخذون صورة منها ..
عطوني بطاقة سالك مغلفة ومكشخه ورحت للسيارة ..
طيب شكلي ابصور معها لاني ماعرفت وشي اسوي بها
المهم قلت شكلها لازم ذبة وجه ..وعادي يصير شكلك مفهي احيانا مايضر ..قلت بروح للعمال في الكاشير اقل للفشلة ( مشرفنا الغردقاوي شكله يبي يدعي علي من مفرداتي الغريبة احيانا والا...؟ لان كتبت اهون وغيرتها لاقل) المهم كان الكاشير زحمه مره وارجع واشوف مجموعة شباب اماراتيين والله فزعوا وماقصروا ابد وبيض الله وجيههم وقشعوا طبقه رقيقه مره ( مثل الحامي حق شاشة الجوال ) وانا كنت ناوي اشيل شي ثاني بس اشوى ماتلقفت وقالوا الزقها على الجام تحت المراية ...
وشو الجام طيب..استحيت اسئل...يالله خل الدراسه تنفعك الحين.. يعجبني كلام الاماراتيين وسواليفهم والله احس لهجتهم مميزة ...
حطيت الملصق على القزازه وخذت القارمن وعدلت الاعدادات بحيث انه معد يتجنب بوابات الرسوم
وجدا كان فله مره لان اول كنت اجي طياره واحط تجنب البوابات بس كان الطريق يطول شوي ..وبعد كم يوم جتني رسالة التفعيل وابشركم كل البوابات عرفتني
وهذي صورة من جوالي لرسايل سالك


ياجماعه فيها تطور عجيب ماشاء الله تبارك الرحمن ...وشكل كل رحله لازم تحدث القارمن لانه حاس معي شوي بسبب وجود جسور جديدة او حتى طرق حديثه ماكانت موجوده اصلا فتلاحظ احيانا انك تمشي بشارع والقارمن رايح فيها ومعطيك انك في بحر او منطقة مافيها اصلا طريق وهذي صارت جهة الجي بي ار مثلا
فيه مثلا اخر مره جينا كان شارع الصفوح فيه حفريات (موب مثل حفرياتنا طبعا) ويوم جينا والا الترام يمشي له فتره بعد ومحطاته كاشخه (ناس تشتغل من جد وتحب ديرتها ) الله يهنيهم .
المهم كنت مخزن الاحداثيات للشقه وطبعا ضعنا شوي لازم عاد اول يوم
وصلنا الشقه مع المغرب وكانت اربيان سويتس ولاحد يسكن فيها طيعوني
هي ميب شينه شينه بس ... الخ بس فيه احسن منها كثير بس انحدينا عليها بسبب التأخر في الحجز وتراي حستهم في تقييم بوكينق بعد...مع انهم فكوا البلوك عن مبلغ البطاقة بسرعه..
نزلنا اغرضنا وصلينا ...ورحنا لمركز قريب ولقينا كشك وخذنا منه بطاقة للنت ..كانت شريحة دو 4 جيجا بـ 250 درهم وفعلها العامل لنا واحنا واقفين عنده وصار بالنسبة لي احسن من مراكز الاتصالات والزحمة اللي فيها واشوى تجملت معنا الين رجعنا ( عليها 4 اجهزه ) ..
كان مركز برجمان للتسوق موب بعيد عنا ورحنا له لان العيال يحبونه ( قد شافوا فيه عرض سلاحف النينجا ) وعشقوه بعدها
وصلنا له واخذنا لفه وماكان فيه زحمه ورقينا للمطاعم وادخل وانا واثق لواحد من المطاعم واخذ المنيو ويجيني واحد يركض ...فكه الله ماطاح ...بغيت انحاش انا..وقال لي اسفين خلاص بنقفل ..قلت تونا 9.30 قال ايه خلاص ..
وكالعاده اليوم انواع الفشلات وطيحات الوجه ونطلع ونمر من عند نودلز والاهم شايطين يغسلون وقلنا لهم ورحمونا...
شفنا المنيو ومالك الا خشمك ولو هو اعوج ... كل من هنا والا دور لك توست وجبن .. وانا مانسيت هوشت الظهر في السيارة يوم امس بالجماعه 200 كيلوا احسبها 20
وجلسنا وهذي النتيجه :










وكان شغلهم لذيذ جدا ذكرني بمطعم نودلز في كاميرن ماليزيا
وحمدنا الله على فضله ورزقه وعافيته ...
اعتذر عن الاطاله وسامحونا على القصور واستروا ماواجهتوا ...





من الاماكن اللي علمتوني عنها ( اي فلاي ) وهو بعبارة بسيطة (نفق يطيرونك فيه )..
كنت اعتقد حسب ماقريت انه لازم حجز مسبق قبل يوم او حتى يومين وتقدر تحجز عن طريق الموقع وهم يستقبلون من عمر خمس سنوات فما فوق ..
فقلنا نروح لهم اول يوم عشان يمدينا عليهم يمكن زحمه او شي ..
رحنا الصباح بدري وكانوا في مردف سيتي سنتر




وصلنا السوق واول شي نصينا الخريطه

ولقينا موقعهم يمين
كان السوق شبه فاضي لاننا رايحين من بدري ..
وصلناهم وماكان استقبالهم فيه احد وكانوا ودودين جدا وجاوبونا عن كل اللي سئلنا وقلنا بنحجز قالوا اوكي قلنا طيب متى نجيكم قالوا بعد نص ساعه



طلبوا منا التسجيل وكان عندهم اجهزة


سجلت العيال
ثم دفعت الحساب وكان 440 لطفلين





كان باقي نص ساعه تقريبا على الموعد فقلنا ناخذ لفة نعلمكم وش فيها اخر شي عشان مانفصل عن اي فلاي
رجعنا بعد نص ساعه وطلعنا فوق ودخلونا درس اساسيات يعلمونهم فيه وضعيات اليدين وبعض الاشارات للتفاهم خلال عملية الطيران اللي تستغرق دقيقتين مقسمه على جزئين كل جزء دقيقه واحده ( ابشركم صارت الدقيقة طويله وانا احسبها مهناش )
والدرس يكون بالعربي او الانقليزي حسب رغبتكم ، واحنا كان معنا طفل مايتكلم عربي فكان الشرح باللغتين
ويركزون على ان الشخص مايكون عنده مشاكل بالظهر او الاكتاف

بعدين طلعنا واعطونا ملابس وحطوا في اذان العيال اسفنج او قطن اتوقع عشان الضغط وخوذة للراس

طبعا جينا بدون فطور لان داحس والغبراء قامت مع الصغار يبون يجون ويوم قالوا بعد نص ساعه صار

المعنويات كانت فل الفل


هذا جهاز التحكم


المهم ويبدون الناس يدخلون على اساس الحين الدقيقه الاولى بتكون على خفيف مجرد يرفعهم ويدربهم على وضعية اليدين والارجل كيف تكون








ويجي دور الولد
ويتمسك بالمدرب


يالحبيب




ويختفون
واثر المدرب يوم عجز عنه اعطى اللي على جهاز التحكم اشارة واقلعوا فووووووووووق سوا

يرقون وينزلون وذا متعنقط فيه السيامي حقه




طبعا خلصت دقيقته وطارت جزمته تكرمون في النفق ( داخل حرب ) ويوم وصل دوره مره ثانيه للدقيقه الثانية ويصير هو وعامود الباب قطعه وحده ( عجزوا يفكونه مايبي يركب) يقول ضيعتوا جزمتي

طولت عليكم واتمنى هالجزء يكون حليوا وخفيف والجزء القادم نكمل جولة مردف سيتي سنتر ...
تصبحون على خير