باتومي



مدينة ساحلية جميلة جداً مطلة على البحر الأسود

تبعد عن تبليسي حوالي 6 ساعات بالسيارة مثل ما قلت

و الحلو في موقعها انها قريبة من حدود تركيا تطلع من باتومي توصل حدود تركيا في نصف ساعة فقط

و اقرب مدينة في تركيا لباتومي هي طرابزون و تبعد عن باتومي 3 ساعات

باتومي مدينة في البحر و مختلفة عن العاصمة تبليسي يعني لا تتوقعون تشوفون فيها مولات

لكن اللي يحب البحر راح يحب هالمدينة فيها اسواق و ساحات جميلة و مناظر خلابة اقدر اقول ارتحنا فيها اكثر من تبليسي

خلال اقامتنا في باتومي دخلنا فندق Batumi World Palace و حجزنا له عن طريق موقع Booking

فندق Batumi World Palace



فندق رائع جداً شو اقول شو اخلي عنه

من غرف من استقبال بنظري يستاهل 5 نجوم مب 4

الفندق افضل بكثير من الفندق اللي اخذناه في تبليسي

حصلنا فيه احد ياخذ عنا الحقائب و وصلوها لنا للغرف

و الانترنت مجاني و تقدر تفتح براحتك فقط المطلوب منك تاخذ الباسوورد من الاستقبال

و الغرف من اروع ما يمكن

هاذي صورة لإحدى الغرف اللي سكنا فيها و هي من نوع توأم هوليود



لو تلاحظون غرفة وسيعة

اخذنا غرفة من هذا النوع و غرفة من سرير كنغ كبير

هاذي صورتها



الحلو في الغرف ان فيهم سرير اريكة كبير لو تلاحظون الغرفة اللي فيها سريرين سريرها الفردي صغير و اصلا كنا حاجزين منها غرفتين لكن وصلنا متأخرين فحصلنا غرفة بسريرين و غرفة بسرير واحد لكن الغرفتين اثنينتهم فيهم سرير اريكة

المطلوب منك فقط تناديهم في الفندق يفتحون لك اياه و هو كبير و حجمه مثل حجم السرير الكنج و احسن من الفردي

موقع الفندق من اروع ما يمكن كل شي عندك و يخطر على بالك موجود قريب الفندق

مساج تايلندي صالون حلاقة صرافة و محلات و مطاعم حلال اغلبها تركية و في مطعم سعودي قريب من الفندق اسمه مطعم مكة يبعد عن الفندق 5 دقائق مشي فقط

صورة لمطعم مكة



حتى المسجد الوحيد في باتومي قريب من الفندق و تروح له مشي بعد

في ساحة بعد عند الفندق و هي تحتوي كل اللي قلته

صورة للساحة



طبعا باتومي فيها مطاعم حلال كثيرة مثل اللي ذكرتها فوق القريبة من الفندق هذا غير المطاعم الحلال في اماكن ثانية بعيدة شوي عن الفندق بينها مطعم بغداد و هو مطعم عراقي و في مطعم ايراني و مطعم هندي

اول يوم في باتومي تعرفنا على الفندق لأن وصلنا متأخرين تعشينا في مطعم تركي بعدها مشينا في الساحة نستكشفها

و في اليوم الثاني في باتومي نزلنا الفطور

هاذي اطلالة للمطعم اللي فيه الفطور على البحر الأسود



طبعا تقدر تاكل برع عند الاطلالة و تقدر تاكل داخل

الحلو ان مواعيد الافطار مناسبة

في الايام العادية الافطار حتى الساعة 11 الصبح

و في اجازة نهاية الاسبوع حتى الساعة 12

بعدما خلصنا الفطور بدينا جولتنا في باتومي

ركبنا التلفريك في باتومي و صعدنا فوق



هاذي صورة لباتومي بالكامل بعد ما صورناها من فوق



كملنا جولتنا برحلة في البحر داخل قارب





بذمتكم شو رايكم بتصويري

بعد ما خلصنا التلفريك رحنا عروض دلافين يسوونها في باتومي



و كملنا جولتنا في شارع كورنيش باتومي



كورنيش جميل و فيه مناظر حلوة و فيه مناطق العاب لليهال و مكان حلو للمشي بعد

و هاذي منارة في باتومي و لو تلاحظون فيها هاذيج اللعبة العجلة اللي تدور في باتومي



برج الأحرف الجورجية من اجمل معالم باتومي و طبعاً تقدر تدخل البرج و تطلع فيه باللفت فوق و في مطاعم و كافيهات فوق و هو قريب من الكورنيش



و هذا مكان حلو قريب من باتومي اكلنا فيه سمك عندهم وايد حلو سمك طازج و شاوينه زين و المكان فيه شلالات و مناظر



و هاذي صور لشلالات قريبة من الموقع اللي اكلنا فيه السمك





و في يوم العودة قررنا نسير صوب فندق الهيلتون في باتومي و طبعا فنادق الهيلتون معروفة فنادق 5 نجوم و فخمة و كان في مكان حلو للمشي قريب من الهيلتون مشينا فيه



بعد ما خلصنا مشي قريب الهيلتون سرنا نمشي شوي في البحر و ما في شي مهم رحنا بعدها لمطار باتومي و من هناك اخذنا طيران العربية و رجعنا للبلاد على مطار الشارقة


الخاتمة

جورجيا دولة جميلة جداً رحنا فيها على مدينتين فقط لأن الوقت كان ضيق بس و الله استمتعنا فيها سواء في تبليسي او باتومي

عن نفسي حبيت باتومي اكثر

انصحكم بزيارة جورجيا دولة جميلة جداً و لو تسيرون شهر 9 مثل ما انا سويت احسن انا لما سرت الجو كان حلو

لا تحطون في بالكم التعامل السيء من بعض افراد الشعب الجورجي مثل موظفة المطار اللي في تبليسي ترا مو كلهم جذي كثيرين منهم طيبين و يحطونك على رؤوسهم مثل السائق اللي كان معنا طول الرحلة و ما قصر معانا

لا تفوتون على أعماركم زيارة جورجيا

و في الختام اتمنى اكون توفقت في الموضوع و تكونون استفدتوا منه لأخذ معلومات عن جورجيا و السياحة هناك