منتديات رياض الأنس - عرض مشاركة واحدة

11-09-2018, 02:40 PM

الــيــوم الـحـادي عـشـر

[ اليوم الـسـادس فـي طـوكـيـو ]

لاحظوا إني طمرت اليوم العاشر في اليابان والخامس في طوكيو لأني خذيت راحة وبس مشي حول المنطقة اللي ساكن فيها ،، وقعدت أعدّل وأضبّط بالصور وأتابع الوضع السياسي العربي ومن هالكلام ..

في الحادي عشر قابلت الحلوين ذولا ،، من اليمين ياسوهيكو وأنا وجنقسو(كوري) وشوتا ،، اليابانيين الاثنين ذولا غير عن أغلب اليابانيين اللي تعرفت عليهم ،، أغلب الشباب اليابانيين اللي أعرفهم هدوء وخجل وثقل ،، هذولا راعين نكت ولكاعة!

مدري ليش بس أصعب قرار نتخذه كان قرار اختيار المطعم ،، اختاروا مطعم صراحة كان فيه أكل غريب وفريد من نوعه

صلصة مكونة من 17 شيء ،، طعمها كان عالمي!

تشيكن ساشيمي يعني دجاج نيء هههههه والله طعمه كان حليو

لحم صحان ني ،، كيف بس؟

أول مرة آكل حصان ،، كان ودي آكله مطبوخ عشان أعرف طعمه كيف ،، ما أحس طعمه مختلف (أكلت لحم بقر ني بكوريا هههه)

رز مقلي ياباني (فرايد رايس)

نسيت وشو ههههه

مفاصل دجاج ،، أكلت وحدة وحمدتُ الله

النادلة اللي سوّت القلب

صار لي موقف جميل ،، أنا وشوتا رحنا ننتظر لدورة المياه ،، عاد هو واحد بس ولكل الجنسين ،، كنا نتكلم (إنجليزي طبعاً) وقدامنا يابانية كل شوي تلتفت علينا وتبتسم ،، يوم جاء دورها تدخل الحمام إلاّ تناظرني وتأشر بيدينها لي للحمام ،، يعني تبي تدخل قبلي! استغربت وأشّرت لها إنها هي تدخل ،، شوتا الياباني استغرب وقال لي تعرفها؟ هههههه قلت ولا عمري شفتها ،، قال ليش طيب سوت كذا؟ قلت وش دراني اسألها إذا طلعت ،، قال لالا ما أقدر أنت غريب أنت اسألها ،، قلت قدّام ،، يوم طلعت جت باتجاهنا وقلت لها تفهمين إنجليزي؟ قالت أيه

قلت هل كنتِ قاعدة تتسمعين علينا؟ قالت إيه

قلتُ مازحاً هذه وقاحة هههههه انهبلت وتعتذر وتقول ما كان قصدي بس حبيت اتكلم إنجليزي معكم ههههه عاد قعدت تسألنا كيف نعرف بعض ووش قاعد أسوي هنا وكيف تقابلنا وووو إلخ ،، وراحت عاد خويي يقول باليابان مستحيل أحد يسوي كذا بس لأنك سائح يسوون كذا ،، وفعلاً كل ما يصير لي شيء أقول له لأخوياي اليابانيين ،، يقولون لي غريب يمكن لأنك سائح ،، اكتشفت إن اليابانيين أطيب وألطف وأعطف مع السيّاح!

المهم رجعنا لمكاننا عاد شوتا الياباني قال السالفة لياسوهيكو الياباني الثاني واستغرب ،، عاد الثاني قال لي أتحداك تروح الطاولة هناك كان فيها مجموعة يابانيين وتتكلم معهم (طبعاً أنا أعرف شوي ياباني يعني وش اسمك؟ أنا اسمي فلان ومن السعودية وتشرّفنا وأنا أحب اليابان) وفيه جملة تعلمتها وهي مؤدبة جداً وتعني (اسمح لي أغادر أولاً - おさきにしつれいします) ،، عاد كل ما أقولها لياباني يموت ضحك لأنها تقال للي أكبر منك سناً

ليتني والله كنت أعرف أتكلم ياباني ،، كان فليتها معهم هههههههه طبعاً اللي معي ما براسهم تصوير فالصور ما طلعت لا واضحة ولا بزاوية زي الناس

المهم حسبتهم كلهم جايين مع بعض ،، بس طلعوا مجموعتين ودخلتهم في بعض هههههههه

هنا يوم قلت الجملة ومشينا

ودّوني لمقهى عربي والشيء العربي الوحيد هو الأغاني بس ههههههههه

والله بغيت أقول لها ترى هاللبس هندي عصري وهالحركة هندية ،، العرب مالهم علاقة في هالحركة بس استحيت قلت خلهم يعيشون هههههههه وطبعاً طلبوا مني الكاميرا وقالوا خلنا نصورك أنت السايح لازم أنت الي تتصور ،، وثقت فيهم لكن الصور كلها غير واضحة!

المهم انتهى اليوم بسلام ،، نشوفكم بالتقرير القادم