القصر كانت دخوليته ب 140 كورونا .. و التذكره تقدر تستعملها لسبع ايام ..

طبعاً انا رحت يوم سويت تشيك اوت قلت اقضي وقتي على ما يجي وقت الرحله ..

كان جميل جداً .. و فيه تاريخ .. بس انا اروح هناك اناظر الفنون حقاتهم في التشطيبات و اللمسات الجماليه .. و الا ما همني من مات و كيف مات و لا تاريخ اللوحات



اخترت بعض الصور .. لو حطيتهن كلهن .. بيمتلي الموضوع صور .



مدخل القصر الملكي







كنيسه في القصر الملكي







لبس ملكهم







طاولة اكلهم في الايام الكاجوال











احد الممرات اللي حسيت بالفخامه و انا امشي فيها







احد الصالات .. ينطبق عليها مقولة ... تسرح فيها الخيل









ما اقاوم هالممر











وبعدها الواحد يرتاح عن البحر.. و النسمه البارده .. والغروب



















و تغرب شمس ستوكهولم ..



الوعد ان شاء الله في لاتفيا ... ريجا الجميله

عُدنا ..
Riga عاصمة لاتفيا ..
الويك اند اللي بعده .. كنت مخطط اني اروح الى ريغا .. بعد ما مدحها واحد من الشباب معنا ..
سويت حجوزاتي عن طريق الخطوط الفنلندية ..
كانت الرحلة غاليه شوي بحكم اني تأخرت في قص التذكرة .. اخذتها بحدود ال 330 يورو .. و السكن اخذته في المدينة القديمة .. تقريباً بحدود ال 120 يورو في الليلة ..

قبل ما اتكلم عن المدينة .. خلونا نتكلم شوي عن لاتفيا كبلد .. و عن ريغا كمدينة ..

لاتفيا ..تقع على بحر البلطيق .. يتشارك معها في الحدود استونيا .. و ليتوانيا و بيلاروسيا و روسيا ..



تم احتلالها في عام 1561 م من مملكة بولندا .. ومن يومها تناوشتها الدول والإمبراطوريات .. بعد مملكة بولندا احتلتها مملكة السويد و روسيا و المانيا .. ثم استقلوا لمدة 22 سنه .. وبعدها صارت من ضمن الاتحاد السوفيتي .. ثم استحلهم هتلر (المانيا) بعدين رجعوا تحت مضلة الاتحاد السوفيتي .. و في عام 1991م أعلنوا استقلالهم ..لكن الجيش الروسي لازال متواجد حتى والدولة مستقلة .. و ما طلع منها الا في عام 1998م وبعدها انظموا لحلف شمال الاطلسي و ا للاتحاد الاوروبي في عام 2004م


المتتبع لتاريخهم بيشوف ان فيه حضارات كثيره مرت عليهم .. كل وحده منهن تحاول انه يكون لها اثر على الشريحة السكانية .. و طبعة البلد .. لذا اهل البلد الاصليين يمثلون تقريباً 60 % من شريحة السكان
لذا اللي يزورها يلاحظ وجود نسبة كبيرة من الروس في البلد .. تقريباً حدود ال 30% وباقي 10% يتقاسمها بولنديين + بيلاروس + ليتوان + اوكرانيا + مهاجرين من دول أخرى

ريغا .. هي العاصمة و تعتبر أكبر مدينة في لاتفيا .. تقع على خليج ريغا .. ويصب فيها نهر داوجفا .. وتم انشائها قبل ثمان مائة سنة ..
و تعتبر مدينتها القديمة من الاماكن المسجلة تحت منظمة اليونسكو .. لأنها فعلاً أثرية .. و رصفها و تصريف الامطار اللي فيها و مبانيها.. زي ماهو ما تغير ..


يسكن فيها ثلث سكان الدولة .. بحدود ال 650 الف نسمة .. 40% منهم روس .. وللأسف الشريحة من الروس هذي كان لها اسباب في انعدام الأمن لفترة من الزمن .. لانهم ناس فعلاً ما يخافون ربهم .. و نظام العصابات كان مستفحل فيهم ..
لكن الآن البد آمنة إلى فترات متأخرة من الليل .. (حدي الساعة 1 الى 1 ونص .. بعدها ما ادري وش يصير .. ) لكن الواحد يبعد عن أماكن الشبهه ..

السياحة عندهم تمثل جانب كبير من دخلهم .. لكن مع طيحة البترول .. قل عدد السياح الروس في أغلب الدول .. ولعل لاتفيا من الدول اللي عانت من الشيء هذا.. بحكم ان الروس فيهم حب للصرف .. ولا يكاسرون ..

وسائل المواصلات العامة .. في البلد عبارة عن باصات و ترام .. بس اللي يسكن في المدينة القديمة ما يحتاج مواصلات .. المشي ممتع فيها الى درجة ان الواحد ينسى نفسه وهو يمشي .. وما يدري الا وهو واقف في مطعم و الا مقهى .. يعوض السعرات الحرارية اللي راحت من المشي.
المواصلات من المطار: فيه اكثر من طريقة للوصول الى المدينة القديمة أو إلى وسط البلد ..
فيه التكاسي الخضراء .. وهذي بسعر ثابت ..لهم مكتب في المطار .. تقول لهم بروح للمكان الفلاني و تدفع لهم في المطار .. ويوديك للفندق .. عادةً السعر من 15 الى 20 يورو
فيه التكاسي العادية .. هذي بالعداد ..
وفيه الباص (الله لا يخلينا ) من المطار الى وسط المدينة ب 2 يورو .. بس وقفاته واجد .. وياخذ منك وقت تقريباً 25-30 دقيقة (باص رقم 22)

-خلال تواجدي فيها لاحظت وجود جالية يهودية .. وبكثرة .. يمكن عشاني كنت فيها يوم السبت وكانوا كلهم طالعين ..
- البلد رخيص جداً كأكل و شرب و يشتهرون بالأسماك .. خصوصاً السلمون ..
- الجولة بالسيكل في ريغا خيالية .. و تخليك تشوف البلد كامله .. و اجار السيكل فيها رخيص جداً مقارنة بالسويد .. في السويد الساعتين ب 10 يورو .. في ريغا ال ساعه بيورو ونص ..
- مو كل الفنادق فيها مكيفات .. لذا الواحد يبي له ينتبه وهو يحجز الفندق خصوصاً ف ايام الحر ..
- الشعب راعي سهر و عربده .. و اغلب الدول المجاورة للاتفيا زي ليتوانيا .. استونيا .. روسيا .. يجون يحييون الويك اند حقهم هناك ..
-لاحظت ان اكثر اللي يبيعون في المحلات .. خصوصاً في المحلات اللي الواحد يقوم لها من بدري .. (زي سوق الخضار و اللحوم المركزي .. و المحلات المجاورة له) كل اللي يبيعون فيها كبار في السن .. و أكثرهن حريم .. بنسبة كبيره 90-95% .
- أقل دخل للفرد مقارنةً بدول اوروبا المجاورة مره قليل .. تقريباً بحدود ال 500 يورو في الشهر .. وهذا راجع للاقتصاد و الموارد حقت البلد ..
-تشتهر دول بحر البلطيق بالكهرمان .. او العنبر .. لذا اللي يبي سبحه او قلادة من الكهرمان بيلقاها هناك ارخص من غيرها في باقي دول العالم.

اترككم مع بعض الصور

ممرات البلدة القديمة من أكثر من مكان
















برج الساعة



فيه تذكرة ب 7 يورو ان كاني منيب واهم عشان الواحد يرقى له ..



الكنيسة القريبة من الساعة .. كانت مقفله .. عندهم زواج و جالسين يجهزون في الورد.

وحده من الساحات .. الصغيرة


صفة من المطاعم المنتشرة في المدينة القديمة ..




صورة بانورامية لوحده من الساحات اللي فيها كوشكات للمشغولات اليدوية و محاطة بالمطاعم ..


تمثال الحرية .. قريب من مبنى الأوبرا .. وفيه جنبه حديقة فيها مجرى مائي و قوارب ..
حلو للناس الرايقه ..




مبنى الاوبرا



ساحة مقابلة لكنيسة .. يتم تركيب المنصات فيها للفعاليات الغنائية ..



الكنيسة المجاورة للساحة .. و يتم ترميم ساعتها الآن ..



احدى الكنائس اللي عجبني التصميم المعماري حقها



المبنى هذا يسمى البلاك هيدس .. او الروس السوداء ..
كان يتجمع فيه الناس اللي يحمون المدينه من الهجمات ..



سوق الخضار و اللحوم ..





احدى الأماكن لاستئجار السياكل ..
الشهادة لله خدمتهم كويسه .. لكن عندهم مشكله في الأقفال حقت السيكل .. يوم جيت ارجعه عيا يفتح القفل .. و اضطريت اني اكلمهم ابو نص ساعه عشان يردون علي .. واشرح لهم الوضع ..

فيه محلات بس عيبها تسكر يوم الاحد و مو 24 ساعة


ختاماً .. البلد جميلة .. تفتقر لوجود الخليجيين .. فيها مركز تجاري صغير جداً .. تفتقر للمحلات التجاريه الكبيرة و الماركات العالمية .. قد تكون موجوده في مكان ثاني .. لكن في المكان اللي رحت له .. اللي يعتبر المكان السياحي في البلد .. ما لقيت شيء.


اتمنى ان البلد تعجبكم .. و الوعد ان شاء الله .. في تالين .. عاصمة استونيا ..