كنت متوقع أن راح ندخل الساعة (10:30) ونطلع على الساعة (1:30) وبعدها نروح إلى بتروساينز، لكن الأطفال مع اللعب ما خلصوا إلى (4:30) ولا وما يبون يمشون بعد ما شبعوا، وبعد ما خلصنا من كيدزينيا نزلنا عبر السلالم إلى الطابق الأول ومن الطابق الأول في ممر مكيف يطلع من مبنى كيدزينيا ويمر فوق الشارع يوصلك إلى الجهة الأخرى اللي فيها مجمع كيرف، وأول ما دخلنا المجمع قعدنا نبحث عن المطاعم وفي طريقنا لقينا صيدلية وشرينا لزقات ضد الماء حق شوق علشان نغطي بهم الجرح عن الماء، وبعدها كملنا بحث عن المطاعم لين ما حصلناهم وكان في مطاعم كثيرة وحلوة لكن الله يهداهم الأطفال ما يبون إلا ماكدونالدز قلنا يالله ما نزعلهم هالسفرة علشانهم ورحنا ماكدونالدز وكان في قعدات برع وقعدنا برع لأن الجو كان روعة وكان ينزل مطر خفيف والسماء كلها غيوم، وهذي صور للساحة اللي قعدنا فيها.