وصلنا الفندق تقريبا في التاسعة صباحا ، و الدخول في معظم الفنادق بكون في الثانية او الثالثة ظهرا، وضعنا الحقائب في الفندق ، و اخبرتهم عن الحقيبة الضائعة انها ممكن توصل باي وقت ، و سلمتهم وصل الحقيبة الضائعة الي أعطوني ايا في المطار ، و طلبنا تكسي جراب و خرجنا لمنطقة كواة و نصب النسر.

- فندق لانكاوي لاجون هو الفندق الوحيد من كل الفنادق الي دخلناها الي طلب سعر أعلى من السعر الموجود في بوكينغ ،"قبل السفر قمت بطباعة جميع اوراق حجز الفنادق بالسعر النهائي الشامل للضريبة و الخدمة و الافطار "، لكن ما سالتهم عن السبب و لا جادلتهم ، لكن بالفنادق الاخرى ، كنت أأشر على الرقم النهائي في الاوراق الي طبعتها من موقع بوكينغ ،وما كنا ندفع زيادة على الرقم المكتوب.

- لكن كنا ندفع 10 رينجت زيادة عن المكتوب لكل غرفة عن كل يوم في الفنادق الي كنا نقيم فيها وهي عبارة عن ضريبة ثانية .

- بالنهاية ، الفندق كان جميل و نظيف ، لكن كانت غرفتنا جنب ماتورات ، تصدر صوت عالي، كانت مصدر ازعاج في الليل، بالاضافة لصوت المكيف العالي ، وفي كل الفنادق الي دخلناها ،كان صوت المكيفات عالية و مزعجة ، كنا نضطر نغلق المكيف حتى نعرف ننام بهدوء.

وصلنا نصب النسر عن طريق تكسي جراب ، كان مكتوب ان السعر 29 رينجت ، و لما سالت السائق كم الحساب طلب 39 رينجت ، يعني استغربنا شوي، بس دفعنا و ما سألنا ليش، و كانت اول و اخر مرة بنسأل سائقي تطبيق جراب كم الحساب،لان الهدف من التطبيق انك ما تتعرض للنصب وانت في بلد غريبة ، و انك تدفع الرقم المكتوب ، فصرنا ندفع الرقم المكتوب تماما ، باستثناء بعض الاحيان الي كان فيها السائق يشرحلنا ليش طلب اكتر،او المرات الي كانت الحقائب فيها معنا ، لانهم كانوا يحملوها عنا ، فكنا نزيدهم ، و في أحيانا نادرة جدا جدا ، السائقين بحاولوا يطنشوا يرجعوا الباقي، بس كنا نطالبهم في.