الـــــــــــباص البــــرمــــائي
Duck Tour
# ربما لاحظتم التقييم المنخفض جدا في جزء تقييم الأنشطة .. 1.9 من 5 (الرد رقم 87)
# السبب وضحته في ردي على الأخ الغالي كتكات ولكن أعيده هنا لإكمال السياق ..
# شخصيا اشوفه "مقلب سياحي" ولا يستاهل .. واعطيته 1 من 5
# حتى يكون الجميع على بينه .. تفصيل التقييم كان كالتالي ( 5 أفراد اختاروا تقييم 1 يعني سيء __ 1 اختار تقييم 2 يعني مايسوى __ 2 اختاروا تقييم 4 يعني حلو) ..
# السبب الرئيسي لأن مستوى التوقعات كان عالي والواقع كان شيء ثاني .. كنا محتارين وش نسوي أنشطة في القرية الشرقية مع التلفريك وكان الجميع شبه متفق على الباص البرمائي.. فــ إسمه يوحي بتجربة جميلة ..
# بعد ما رحنا للتلفريك حجزنا للباص وكان السعر مقارب لسعر التلفريك .. (38 رنقت للشخص والتلفريك 45 رنقت) .. طلع علينا مبلغ يتجاوز مبلغ رحلة المنغروف بل يسوى اننا ناخذ رحلة بحرية بالساعات ..وهذا أمر لابد تضعه في الحسبان انت في لنكاوي سيدة الجزر فسقف التوقعات للجولات البحرية مرتفع نوعا ما..
# المهم في ذاك الوقت حنا متشوقين للتجربة .. توجهنا للباص ولا لقينا احد انتظرنا لين جا السواق متأخر عن الوقت ..وبسم الله ركبنا الباص "قديم - مستوى نظافة لك عليه والمقاعد ضيقة .. انطلق الباص دون أي تعليق صوتي على الأماكن اللي نمر عليه وهي كلها في حدود القرية الشرقية .. ونزوله للبحر ما كان فيه أي أكشن (سعود مسكين كان متأمل ومنتظر الموية توصل عندنا وقت النزول) .. اخذ له لفه صامته في حدود بحيرة القرية الشرقية ورجع وكأن الجميع غلبهم النوم وعرفت وقتها إن التجربة ماتسوى ..
# برضه دائما أؤكد أن المسألة أذواق لكن أحاول هنا أن أنقل رأيي بكل أمانة ..
ركوب الفــيلة
Langkawi Elephant Adventure
# مكانهم عند المواقف الشرقية للقرية الشرقية (مواقف الباصات والتكاسي) وعند بداية الشارع المؤدي لشلالات الابار السبعه.
# تستطيع ركوب الفيل في جولة قصيرة (يوجد سلة على ظهره يستطيع أن يجلس عليها شخصين) وكذلك إطعام الفيل ومشاهدة النمر الوحيد لديهم.
# المحل صغير والمدخل عباره عن غرفه صغيره .. وجينا وطلعنا ولا كان فيه أحد غيرنا .. ومن التعليقات عليه في قوقل يبدو لي أن هذا المحل يخضع لمقاطعه محلية من أنصار حقوق الحيوان.
#هي جولة مناسبة وممتعه للصغار أكثر خصوصا ركوب وإطعام الفيل ..
#كان يوجد تذكره بـ 100 رنقت تشمل ركوب الفيل وإطعامه وبصراحه السعر مبالغ فيه جدا لكن كان سعود متحمس لها مرة وحنا واعدينه فيها .. و 20 رنقت لمجرد المشاهدة والإطعام ..
#بالنسبة للنمر الوحيد كان نايم وصوتو عليه وسعود ينادي معاهم ولاتحرك شبر .. لأن الأهم حققناه لسعود وهو ركوب الفيل ولا نبغى الوقت يروح علينا قررنا الخروج واللحاق بالبقية اللي راحوا للشلالات ولكن كان صاحب الحلال موجود وقال تقدرون ترجعون مجانا عشان تشوفون النمر وخلى سعود يختار اللي يبغاه من ثلاجة الايسكريم مجانا كترضية عن النمر النايم ..
هذه الصورة تم تصغيرها . الحجم الافتراضي لها هو 1164x535.
شلالات الآبار السبعه
Seven wells waterfall
Air Terjun Telaga Tujuh
# قريبة جدا من القرية الشرقية بمسافة أقل من كيلو ويفضل إنك تخطط للذهاب لهم في نفس الوقت ..
# وقت ذهابنا لها كانت نسبة المياه معقولة لكن علمت لاحقا إن هذي الشلالات موسمية وتصب غالبا 3 شهور في السنة اعتمادا على كمية مياه الأمطار .. زارها اخوي الكبير قبل سنوات في شهر يناير أو فبراير وكانت شبه جافة.
# إذا كان جدولك ضيق من الممكن أن تضع الأولوية لشلال Durian الموجود قريبا من رحلات المنغروف (سأشرح عنه لاحقا في تفاصيل اليوم الرابع) ..
# لايوجد رسوم لدخول الشلال ولكن في رسوم للمواقف 2 رنقت للسيارة يجيك عامل يطلبها منك ويعطيك ورقة صغيره تضعها داخل السيارة .. لما جينا المرة الأولى ما لقينا احد لكن في المرة الثانية (عند قدومنا لمغامرة الصعود للقمة) جانا العامل أول ما وقفنا.
# الشلالات تحتاج تطلع لها بالدرج وتنقسم لقسمين .. الأول الشلال وهو مو بعيد حدود ربع ساعه بالكثير والقسم الأعلى الأحواض السبعه اللي تصب في الشلال وهي مناسبة للسباحه والإسترخاء لمن أراد والمنظر جميل من هناك ..
# المسافة للأحواض السبعه 480 متر صعودا على 638 درجة ويوجد أكثر من مكان للجلوس والاستراحه .. الأمر ما راح ياخذ أكثر من ثلث إلى نصف ساعه للي ماشي على مهله .. أخذ منا في الصعود (عندما زرناه المرة الثانية) حدود 10 دقايق .. وتغيير الروتين في السفر لايستلزم الكسل ..
# راحوا الوالدة واخواني قبلنا وعند بداية طلعوهم قابلوا عائلة عربية قالوا لهم ما راح توصلون الطريق متعب جدا !! أكمل اخوي واختي الطريق للأحواض وتراجع الوالدة والبقية بعد صعود جزء يسير ..
# جئت لاحقا واختارت زوجتي البقاء في الأسفل مع الوالدة وأصر سعود الله يحفظه على القدوم معي ..
# طلعنا انا وسعود إلى الشلال وجلسنا هناك فترة بسيطة واتصلت على اخوي وهو كان نازل من فوق قلت يستاهل اطلع قال ايه قلت معاي سعود قال لا ما انصحك ..
# اتفقنا انا واخوي على العودة لاحقا لإستكشاف بقية الطريق للقمة وكان الوقت حدود الساعه 5 ونصف عصرا والكل قد تمكن منه الجوع ..
# تشاورنا على أي المطاعم وقررنا العودة للقرية الشرقية .. كانت الساعه قريب 6 وأكثر المطاعم والمحلات بدت تقفل واخترنا مطعم ليلى ..
مطعم ليلى للكباب في القرية الشرقية
# اتجهنا للمطعم وكان مزدحم لكن يوجد صالة مجاورة تابعه لهم وكان يوجد سيدة على الكاشير مدري هي راعية الحلال ولا موظفة قلت حنا عددنا كثير ابغى تفتحون لي الصالة المجاورة قالت اوكي ..
# كان العمال متعاونين والطلبات ما طولت على بال ما جات (مع عدم توفر بعضها) والأسعار معقولة ..
# الأكل كان مستواه معقول "والجوع كافر" .. ممكن اروح له اذا انا موجود في القرية الشرقية لكن ما اتعنى له من أي مكان آخر في لنكاوي.