السبت 31/8/2013



قمت من الصبح لقيت ماما عم تحضر الفطور وأهم شىء كان الجبنة النابلسية المقلية بزيت الزيتون مع كاسة الشاي بالميرميه






والمكدوس من تحت ايدين أعظم امرأة فى العالم أمي الغالية






وياعيني على الزيتون الأسود والله يا جماعة ما ببالغ أطيب زيتون أسود أكلته بعمري من تحت ايدين امي العظيمة





حمدنا الله على نعمه


ونزلت على طول عند ام بشار علشان أفصل ثوب تراثي للعيد لأني بحب ألبس يوم العيد ثوب من التراث الفلسطيني أوالاردني لاستقبال ضيوفنا.

اسمها فداء اسمير مصممة أزياء تراثية، شربت الصنعة من جدودها وورثت عنهم حب التراث وعشقت التطريز اليدوي منذ الطفولة. بدأت من 25 سنة وشوي شوي لغاية ما فتحت محلها تحت اسم ريزورا فى شارع شهداء الحرم الابراهيمي فى الدوار السابع. المفاجأة انهم ماشاء الله بيعيلوا ما يقارب ال 200 عائلة من طرازين وخياطين والحلو فى الموضوع أنه أغلبهم ستات بيوت.


خليني أفرجيكم شوي من شغلها





























ولمواكبة الموضة









وهدول شال عروس ومفرش ومخده لحفلة الحنة

















وصيتها على ثوب حلو وكلفني 400 دينار بس لسه ما خلص وبده على الأقل شهر ليخلص.


كنت مواعدة أخت أبو معن الكبيرة أروح أتغدى عندها وفرصة أشوف كل العيلة هناك. وكنت طالبة منها مقلوبة باتنجان لانها بتعملها كتير طيبه وفعلا لقيتها عاملة سفرة رائعة وانبسطت كتير معهم.

رجعت المساء وقعدت أنا وماما وبابا على البلكون وشربنا الشاي وتسلينا وصار بابا يغنيلي أغاني قديمة حلوة زي روحه الحلوة.


الأحد 1/9/2013



كنت متواعدة مع صديقاتي اللي عايشين فى الاردن نفطر مع بعض فى مطعم لانوازيت والموجود فى بداية شارع المطار ومقابل للسيفواي. وصلنا خلال أقل من 10 دقائق من الدوار السابع










قعدات داخلية وخارجية حلوة كتير بس تفاجأت انه ما فى ناس كتير أتاري اليوم أول يوم مدارس

















سولفنا وتحدثنا وضحكنا وتذكرنا أيام حلوة كتير قضيناها مع بعض وبالآخر أهم شىء أكلنا























وطبعا ما بيحلى الفطور الا مع كاسة الشاي






طلع حسابنا 22 دينار

كنت شايفه جمب مطعم كرش وكوارع مكاتب تأجير سيارات فخليت صاحبتي تنزلني هناك علشان أستأجر سيارة من اليوم لغاية الخميس وأرجع استأجر من الأحد للجمعه. وبالفعل نزلت عند أحدهم






استفسرت منهم عن الأسعار وعن الموديلات المتوفرة فطلع انه سياراتهم كلها موديلات حديثة وعندهم فان اذا كان عدد أفراد العائلة كبير وكمان ممكن استئجار السيارة مع السائق.

طلب الموظف حجز جواز سفري أو مبلغ 350 دينار لفتح كروكه (فى حال حدوث حادث لاقدر الله) وطلب ليسني الاماراتي او الاردني وهويتي الشخصية. ما رضيت ورفضت اني احجز جوازي تماما ولا حتى فتح الكروكه وقلتله انه ممكن تاخد رقم بطاقة الائتمان او صورة عن جواز السفر، وأنا بحكي اجى أبو وسام اللي طلع مدير المكتب وأيد كلامي الحمد لله. واتفقنا على سعر 30 دينار لسيارة هيونداي 2012 اتوماتيك 5 راكب.

مش هون القصة استنوا ... اعطيت الرجال الهوية ... وقعدت أدور ساعة على الليسن وين الليسن وين الليسن لالالالالا تذكرت انا لما سافرت على تركيا بشهر مايو شلت الليسن من المحفظة طبعا زعلت مني كتير وعصبت علي كتير واعتذرت منهم وقلتلهم اني رح ارجع ان شاء الله لما اجيب الرخصة.

مشيت للبيت وأنا أفكر ليش أنا شلت الليسن من المحفظة ايش هالحركة اللي ما الها طعم . اتصلت فى أبو معن فى الامارات وقلتله شو صار معي وهات يا أبو معن لاقي الليسن يا حرام هو وابني أحمد ساعة يدوروا لغاية ما لقوه. طيب لقيناه كيف بدنا نبعته؟ الله وكيلكم بطل حد مسافر على عمان فراح أحمد على أرامكس فطلبوا منه 180 درهم قلتله لالالالا تبعته فاستنى لتاني يوم لما راح أحمد على المكتب وبعته ب دولار واحد فقط عن طريق فيديكس.

لما وصلت على البيت حضرت فنجان القهوة وشربته أنا ومامتي على البلكونه والجو كان خيال الحمد لله عشان أعرف أروق شوي. واتفقنا انه نطلع على العقبة فى نهاية الاسبوع علشان نعطي فرصة لبنات خواتي يكونوا معنا بس للأسف بابا ما رح يقدر يكون معنا.

فتحت جريدة الوسيط وهي جريدة توزع مجانا على البيوت ولقيت فيها الكثير والكثير من العروض من الشركات السياحية سواء للرحلات الداخلية أو الرحلات الخارجية. اتفقنا انه نروح على العقبة لليلة واحدة ويومين وننزل بفندق موفنبيك تالا بيه لانه فى شهر نوفمبر 2012 نزلنا بفندق راديسون بلو تالا بيه وكان رائع جدا جدا جدا فقلنا نشوف شى تاني كنوع من التغيير والتعرف على الجديد.

اول خطوة كانت اني شيكت على الاسعار على بوكينغ لقيتها غالية قمت اتصلت بالفندق ولقيت الليلة لغرفة ثنائية مواجهة للبحر بسعر 170 دينار، فقلت خليني أشوف أسعار الشركات السياحية كيف.

اخترنا احدى الشركات واتصلت فيهم ولما لقيت أسعارهم مناسبة حجزت معهم غرفتين وحده ثنائية لاختي وبنتها ومواجهة للجبل بسعر 100 دينار والثانية ثلاثية لي ولوالدتي ولبنت اختي مواجهة للبحر بسعر 140 دينار ليوم الخميس 5/9/2013 اضافة الى 100 دينار مواصلات (20 دينار على الشخص) عمان العقبة عمان و طلبت مني مسؤولة الحجز أن أحضر لتأكيد الحجز ودفع المبلغ المستحق.

نزلت على الصويفيه على مقر المكتب ودفعت ورجعت ولما رجعت وألاقي عرباية الذرة الرائعة وطبعا صاحبتكم ما بقدر أقاوم الذرة المسلوقة أبدا















مش عارفه ليش دائما بلاقي الذرة أطيب وألذ لما أشتريها من العرباية