وكملنا مشوارنا نزولا الى اوزنغول
لقينا بعض الأطفال عم يلعبوا وعلى طول وقفنا السيارة ونزلنا أعطيناهم كت كات، عيونهم كانت بتحكي حكي كتير . الله يحفظهم من كل شر. 
أحن الى خبز أمي وقهوة أمي ولمسة أمي
كل ما أشوف هاي الصورة تدمع عيناي أديش فى عيون هاي الست العظيمة حزن وكفاح وشقاء السنين ومع هيك رسمت ابتسامة جميلة على محياها لاستقبالنا.
انتوا عارفين شو عم تعمل؟ عم تسن منجل الحصاد ... اللهم بارك فى عمرها وأعطيها الصحة والعافية
قدمنالهم كيس من التمر ويا الله على السعادة وقامت قالتلي استني شوي، دخلت وجابت معها كيس بندق وحضنتني وباستني وأهدتني الكيس وكانت أحلى وأطيب هدية من أجمل نساء الدنيا 
كملنا طريقنا بعد ما مرينا بأجمل وأسعد اللحظات 
طق يا مطر طق بيتنا جديد مزرابنا حديد
وصلنا اوزنغول ولقينا سيدات رائعات ببيعوا وجبات بيتيه من صنع ايديهم وتشجيعا لهم ودعما للمشاريع الصغيرة اشترينا من عندهم وماشاء الله لما وقفنا عندهم ما كان حدا واقف غيرنا وشوفوا كيف اجوا الناس
وتخيلوا طلع حسابنا كم؟ 12 ليرة فقط 
جو اوزنغول كل شوي شى جديد
وصلنا عند الفندق وقرر أبو معن يغسل السيارة وغسل الدعاسات البلاستيكية
طارت وحده من الدعاسات داخل النهر
شو نسوي قلنا خلص لما نرجع طربزون نشتريلهم وحده جديدة
طلبنا كاستين شاي وأخدناهم على حافة النهر وشربناهم ومخمخنا عليهم 
وشكرنا الله على نعمه
احنا هون حسينا أنه خلص ما فى شى نعمله فى اوزنغول فقررنا أنه ما نكمل باقي الأيام فى اوزنغول ونرجع على ايكيزدره على فندق ريدوس، وأعتقد أنا أنه يومين كافي على اوزنغول.
ماشاء الله الكل مبسوط فى اوزنغول
تمشينا 
ولقينا فندق صغير وجميل اسمه شيرين وعندهم جلسات حلوة، تواعدنا مع أم ساري وابو ساري وقعدنا قعدة حلوة كتير بس للأسف الخدمة عندهم سيئة
وهدول الصور اهداء من أم ساري
حبيبي السيد ساري أصر بده يلعب بالكره وما ينلام صراحة معاه حق يلعب في هالجو البارد الجميل 
احنا كنا خلص جعنا وبدنا نتعشى، ودعناهم على أن نلتقي في الغد ان شاء الله
رحنا على مطعم
صفينا السيارة أمام المطعم وبنفس الوقت سيارة تانية كانوا عم بصفوا، اجيت عيني بعين الصبية ابتسمتلها وحسيت كأنها بنتي وقلت في نفسي هاي الصبية شكلها من عنا، وهي ابتسمت وفجأة لقينا أبو معن وزوجها بسلموا على بعض وطلعوا فلسطينية وعايشين بالامارات عزمناهم يتعشوا معنا اعتذروا لانهم بدهم يقعدوا برا في الجو البارد واحنا طبعا ختياريه ما نتحمل فقعدنا جوا.
حبيت كتير الطاولات
معجناتهم طيبه وخفيفه وطلعنا حسابنا 20 ليرة
بعد شوي اجى أبو لينا وام لينا اللي تعرفنا عليهم وشاركونا قعدتنا وضلينا قاعدين يمكن للساعة 12 واحنا مو حاسين والله كأننا قاعدين مع أولادنا. فقلنالهم انه احنا بكره خلص راجعين على ايكيزدره وعرضنا عليهم ييجوا معنا بس همه فندقهم مدفوع لكمان 4 أيام ومع أنهم حاسين زينا أنه اوزنغول بكفيها يومين فقرروا انهم ييجوا معنا يقضوا اليوم كامل معنا.
ودعناهم على أمل اللقاء فى الغد
الى اللقاء