بعد انتهاء جولتنا السريعة في القرية
كنت متشوقا جدا لتجربة القطار البخاري اللذي يأخذك لقمة بانوراميه واطلالة ماراثونية على بحيرة وولف قانق وموندسي
فوضعت احداثيات مواقف القطار وهي :
N47 44.349 E13 26.357
ماامداني اشرب جغمتين من الببسي الا وحنا عند القطار 
طبعا المواقف فيها حاجز بس تضغط الزر وتدرعم وفي اقرب
مكان ..بمعنى اركن سيارتك في أي مكان واذكر اني وقفت سيارتي تحت شجره
<< صارت سيارته:
وقفنا السيارة وطلعنا على رجولنا لتذاكر القطار
هنا صورة توضح الحاجز حق الموقف
بعد ماتطلع من عند الحاجز تروح يسار وتمشي شوي لين يجيك مكتب التذاكر على اليسار
تلاحظون في الصورة السابقة والتالية وقوف الباخره الي يامكانك اخذ جوله بها في بحيرة وولف قانق
فهذا المكان يعتبر الميناء اللتي ترسوا به البواخر
لحسن الحظ ان مكتب قطع التذاكر ماكان زحمة يوم جينا فقينا التذاكر بسرعه وكان سعر التذكرة 20 يورو للشخص
الواحد ..والله غويلي
بعدها اتت الامم وشلّة حسب الله ووقفوا طوابير وحنا نناظر ونقول الحمد لله اللي فكنا من زفرتكم :
بعد قطع التذاكر تجلس تنتظر القطار يجي من القمة عشان تروح معه فوق
حنا قطارنا الساعه 12 الظهر ..يعني باقيله حول النص ساعه...شوفوا الصورة
فاصل دعائي
القطار البخاري من امتع الرحلات التي رأيت في النمسا
واللي يبي يروح له ينتبه لايتوهق زيي لان الجو في الاسفل يتخلله بعض الحرارة
وهذا اللي خلاني اخلي غطاء الرأس في السيارة ولحسن الحظ اخذت الجاكيت
ولما صعدنا فوق بغيت افطس من البرد 
..لذلك وجب التنبيه 
القطار اسمه في القارمن : Schafbergbahn
يجب ضبط الكاميرا قبل الصعود لانك راح تشوف مناظر اسطوريه لم ترى مثلها في حياتك
وصدقوني حاولت اوصف روعة المكان فلم استطع ذلك ...فالجلسة في القمة والسحاب يداعبك
بحجب الرؤية تاره وينجلي تارة اخرى ومناظر البحيرات الفيروزية في الاسفل والطبيعة تحتضنها
من كل الاتجاهات ..منظر يأسر الالباب ويسر الخاطر وينسيك همومك من ولادتك ويفرمت ذاكرتك
ويزيل منها الشوائب:
عموما هذا رابط pdf فيه كل شي عن القطار البخاري >>>> هنــــا
بغيت انبه على شي مهم الا وهو ( اذا صعدت فوق اول ماتنزل من القطار ..اصعد الدرج وتلقى شباك
ماعليك سوى تحديد وقت مغادرتك يعني بعد ساعه ساعتين ثلاث ..على كيفك وبيعطيك ورقة احتفظ بها لين ترجع)
فيه منحدرات خطيره بالاعلى يعني اللي معه بزارين ينتبه لهم ..وراح تشوفون بعض الانحدارات اللي انا بكبري
بغيت ادحدر منها :
هذا باختصار اللي بغيت انبه عليه
الحين اخليكم مع الصور
هنا اثناء انتظارنا للقطار
تعبنا من الانتظار لين وصل قطارنا ..الحمد لله على السلامه