يمشي زمان ويجي زمان
الجيب عامر والراس فرغان..
اللسان معسل والقلب ڨطران..
يولي الخير ياسر..
ومول المال واصل..ومول العلم حاصل..
تجي ذرية كي المدفع في الدنيا ماتنفع
يعلا البنيان..وتكثر لفتان ويقل الإيمان..
تقل النصايح وتكثر لفضايح..
ولي جاي كثر من لي رايح
تكثر النسا وتغلا اللبسة..
والقلوب على بعضاها تقسى ..
يولو الرجال كي النخل والنسا كي النحل
على اخر الزمان يقل الحياء ويكثر الرياء
يولي الخير مشتت والراي مفركت..
والحي يغير من الميت
يولي الراجل هايم والنسا بلاكمايم…
وما بقالك في الدنيا ما تلايم ..
ياربي الطف بينا..