راكب اللي ماغشى شيب صانعها وقار
شيبة فيه الكباير وهو ماهو كبير
عايش بين الكنايس وصالات القمار
وان توفى في جنهم وباصحاب السعير
العمل عنده عباده ومعنى النقص عار
يا يصير انسان قد العمل يا مايصير
ان حضر في واجبه لايمين ولايسار
وان عقد لك حاجبه لا براد ولا هجير
فوق متن اللي ليا ضخ عادمها الغبار
كل صاحب ذنب يشعر بتأنيب الضمير
ولا سحبها بالمدرج ودرج واستدار
تذكر الله قوي وان لله المصير
سرعة فوق المعدل ودون الانتحار
كل درب تقطعه عند راكبها قصير
تل هاللي لا تركد ركد وان طار طار
وماخفض جنحانها الا ورا سودة عسير
اقلعت والصبح ماكف ثلثين النهار
وحولت والشمس مافارقت صفرة عصير
في ديار اخوان نوره ماهي بأية ديار
وعند امر ابها البهيه ماهو بأية امير
فيصليٍ غيبته جور وظلاله جوار
لان قربه قرب خير وجهه وجه خير
ايه اعرفك قبل لااعرف طريق الاشتهار
كانت احلامي كبيره وكان اسمي صغير
جاك حامد زيد منهك وجنحانه قصار
وانت علمته يوقع وانت علمته يطير
وانت اول من رفعت اسم حامد لين صار
فيض حبره ماي زمزم وقرطاسه حرير
منقذ حامد ومنقذ مثل حامد كثار
ضي شمس ماجحد نورها غير الضرير
من عشقت ابها وهي من عمار ليا عمار
ومن سكنت بها وهي من غدير في غدير
افتخرت بخوتك لان خوتك افتخار
واستجرت بقوتك لان ما مثلك يجير
ياطويل العمر ياذخر لاطوال العمار
يانظير الفخر يافخر منقطع النظير
ياغطا ستر العذارى ليا ذب الخمار
يابصير في زمان قليل به البصير
يوم جيتك بلادكم جيت ضيف وجيت جار
ودامني وصلت للفيصلي وصلت خير
والله اني زاير خير جار بخير دار
وعند فيصل كل حاجه بعون الله تصير
ذي ديار اخوان نوره ماهي بأية ديار
وذاك امير ابها البهيه ماهو بأية امير